Wase 16

Vei Ira na Qase Sara ena Lotu

“Me qai nomuni veiyabaki taleitaki vakaoti na veiyabaki koula oqo ni ko bulataka ka lomana ka qarava vakataucoko. Ka vakalougatataka na Kalou o ira era qarava na nomu gagadre—nomu matavuvale, nomu itokani, kei na nomu icaba lewe ni Lotu kei na veiliutaki.”

Mai na Bula nei Ezra Taft Benson

O Ezra Taft Benson a sa yabaki 86 ena nona sa mai Peresitedi ni Lotu. E kila deivaki okoya na reki kei na bolebole e dau lako mai donuya na veiyabaki e muri ni bula. Dua na reki vua oya na nona veimaliwai veitomani vata kei na watina, o Flora. Rau a marautaka na veiwatini na ika 60 ni yabaki ni nodrau vakamau donuya na imatai ni nona yabaki vaka-Peresitedi. Rau dau rekitaka na nodrau tiko vata ka curuma vata na valetabu voleka ni veimataka ni Vakaraubuka taucoko. Ena nona soqo ni ika 87 ni siganisucu, a tarogi Peresitedi Benson e dua me baleta na ka vuni ni nona bula marau balavu. “Ni bera ni sauma rawa okoya, a kaya o Sisita Benson, ena veivakanini ia e vakaibalebale, ‘E tiko vua e dua na lewenivale vinaka.’”¹

Ena nodrau veiyabaki vaqase, e dau taleitaka o Peresitedi kei Sisita Benson na vakayagataki gauna vata kei ira na luvedrau kei na makubudrau, ka ra sa tomana na nodra matavuvale mera vuli mai na nodrau ivakaraitaki. “E dua na makubudrau yalewa a tiko vata kei rau donuya vakalevu na imatai ni tinikawalu na vula ni nona peresitedi, ka dau lako vakagade wasoma vata kei rau ena nodrau kerekere me tokoni rau ka qarava na nodrau veigagadre. Ka a dikevi rau na tubuna okoya vakaimatai ni gauna e vale—na nodrau veigadivi ki na dua na sitoa ni asi kirimi; nodrau dabe voli ena idabedabe dakoba ena veitauri liga ena nodrau vakanananu lesu, laga sere, ka veidredrevaki; na veisiko totoka rau sotava mai vei ira na dauveituberi vakavuvale vata kei ira tale eso ka dau gole mai.”²

Era vakila na makubudrau ni sa veivakalougatataki dina na kena tiko na veivakayarayarataki yalomatua kei na loloma ni tubudra. “A vola na nona ivola ni vakavinavinaka e dua na makubui Peresitedi Benson yalewa ni oti na nona vakasalataki koya kei na watina me baleta e dua na vakatulewa drakidrakita. ‘Keirau a tarogi iko se cava na nomu vakasama ko a qai kaya, “Masulaka ga. Sa tu vei au na vakabauta ni ko na vakatulewa dodonu.” Na nomu vakabauta vei keirau a ikuri ni neirau nuidei.’”³

Me baleta na koniferedi raraba ka tarava oti toka ga na ika 90 ni nona siga ni sucu, a vakarautaka o Peresitedi Benson e dua na vosa ka vakatabakidua “vei ira na qase cake ena Lotu kei na nodra matavuvale kei ira ka dau qarava na nodra veigagadre yadudua vakaiira.” Ena ivakamacala taumada, a vakaraitaka okoya na nona isema bula ki na iulutaga: “Au dau vakananumi ira tu vakasakiti na qase cake—me baleta na ilawalawa vakamareqeti oqo ni turaga kei na marama. Au vakila ena so na ituvaki ni’u kilai ira deivaki, ka niu dua vei ira.”⁴

“Au dau vakananumi ira tu vakasakiti na qase cake. … Au vakila ena so na ituvaki ni’u kilai ira deivaki, ni’u sa dua vei ira.”

iVakavuvuli nei Ezra Taft Benson

Na Turaga e kila ka lomani ira na qase cake ka sa vakatikora e vuqa na Nona itavi cecere kivei ira.

Na Turaga e kila ka lomani ira na qase cake ka maliwai ira na Nona tamata. E sa dau vaka tu kina, ka sa vakatikora o Koya kivei ira e vuqa na Nona itavi cecere. Ena veitabagauna duidui e sa tubera o Koya na Nona tamata ena ivakavuvuli ni parofita ka ra a bula voli ena veiyabaki eliu. E sa gadreva o Koya na yalomatua kei na kilaka ni yabaki ni bula, na veidusimaki veivakauqeti mai vei ira sa vakadinadinataki na balavu ni yabaki ni nodra yalodina ki na Nona kosipeli.

Na Turaga a vakalougatataki Sera, ena yabaki ni nona qase, me vakasucuma vei Eparaama e dua na gone. De dua na ivunau levu duadua nei Tui Penijamini a soli ena gauna e sa qase saraga kina ka sa volekata na mate. Sa dua dina okoya na iyaya ni cakacaka ena liga ni Turaga ena nona liutaka rawa ka tauyavutaka na veisaututaki vei ira na nona tamata.

E vuqa vei ira na turaga kei na marama ena veitaba yabaki sa rawata na veika lelevu ni ra lako voli ka qarava na Turaga kei na Luvena, ena nodra yabaki ni qase sara mada ga.

Ena noda itabagauna, me baleti [ira] na parofita ka ra sa kacivi mai vua na Turaga, e vuqa era a kacivi ena nodra sa yabaki vitusagavulu vakacaca se walusagavulu vakacaca, se qase cake sara. Sa dau kila ka lomani ira na Luvena na Turaga era sa soli ira vakalevu ena nodra veiyabaki ni rawaka!

Keitou taleitaki kemuni ko ni sa qase cake ena Lotu. Ko ni sa iwasewase tubu totolo duadua ni noda iwiliwili na tamata e vuravura edaidai, ka vakakina ena loma ni Lotu.

Na neitou gagadre oya me na taleitaki ka vakaikuritaki na nomuni veiyabaki koula. Keitou masulaka mo ni na vakila na reki ni dua na bula sa vakayagataki vinaka ka dua e vakasinaiti ena ivakananumi vakamareqeti eso ka vakakina na nanamaki levu cake ena veisorovaki i Karisito. Keitou nuitaka ni ko ni na vakila na vakacegu ni Turaga sa yalataki kivei ira era tomana voli mera maroroya na Nona ivakaro ka muria na Nona ivakaraitaki. Keitou nuitaka ni na vakasinaiti na nomuni siga ena veika me caka kei na veisala e rawa ni ko na veiqaravi kina kivei ira tale eso ka ra sega soti ni rawaka me vakataki iko. Na qase cake e dau voleka ni kena ibalebale na vinaka cake, me baleta na sautu ni nomuni yalomatua kei na kilaka ena rawa ni tomani me vakarabailevutaki ka vakuri ni ko yacovi ira yani na tani.⁵

Eda na rawa ni vakayagataka vakalevu na noda veiyabaki qase.

Me keitou navuca mada e walu na iwasewase ka rawa ni da vakayagataka kina vakalevu na noda veiyabaki qase:

1. Cakacaka ena valetabu ka dau curuma wasoma. O keda na sa qase cake sa dodonu meda vakayagataka na noda igu sega walega ena nodra vakalougatataki na sa tauri itutu oti, ia me vakadeitaki ni, ena kena dina taucoko, ni ra na ciqoma na noda kawa taucoko era muri mai na veicakacaka tabu vakalotu lagilagi ena valetabu. Cakacaka vata kei na nomu matavuvale; veivakasalataki ka masulaki ira ka na rairai datuvutaka mera vakarautaki ira.

Keitou sa vakamasuti ira kece ka rawa ni tiko vakawasoma ena valetabu ka vakadonuya na veikacivi me veiqaravi ena valetabu ni vakatara vei ira na bulabula vakayago kei na kaukauwa kei na yawa ni vanua. Keitou sa vakanuinui vei iko mo veivuke ena veiqaravi ena valetabu. Ena tubucake tiko ni iwiliwili ni valetabu, keitou sa gadreva e levu cake na noda lewenilotu mera vakarautaki ira ki na veiqaravi kamikamica oqo. Au vakavinavinakataka vata kei Sisita Benson ni keirau dau tiko vata ena valetabu voleka ni veimacawa taucoko. Sa dua na veivakalougatataki dina oqo ki na neirau bula!

2. Vakasoqona ka vola na veitukutuku makawa ni matavuvale. Keitou sa kacivi kemuni mo ni saga vagumatua na sokomuni kei na volai ni veitukutuku makawa ni tamata yadua kei na kena vakamatavuvale. Ena vuqa na veituvaki, o iko taudua ga e tiko vei iko na itukutuku makawa, na ivakananumi nei ira na daulomani, na veitiki ni siga kei na veika a yaco. Ena so na ituvaki o iko sa na ivola ni kawa. Ena rawa ni maroroi vinaka ena so na sala lalai na nomu ivuvu mai na nomu sokumuna ka vola na nomu itukutuku makawa.

3. Dau vakaogai iko ena cakacaka ni kaulotu. Keitou gadreva na iwiliwili e tosocake tikoga ni daukaulotu qase cake ena veiqaravi vakaulotu. Na gauna e rawati kina na yago bulabula kei na veika e gadrevi, keitou sa kaciva e drau vakadrau na noda veiwatini tale eso mera tuvana vakamatau na nodra bula kei na itavi eso ka mera lako ena kaulotu. Keitou gadrevi kemuni vakalevu sara ena buturara ni kaulotu! Ko sa rawa ni qarava na itavi vakaulotu ena sala eso era sega ni rawata na noda daukaulotu gone.

Au vakavinavinakataka ni rawa vua e rua na ganequ dawai me rau veiqaravi vakaveitokani vata vakadaukaulotu e Igiladi. Rau a yabaki onosagavulu ka walu kei na vitusagavulu ka tolu ni rau a kacivi, ka rau a sotakaya e dua na bula vakasakiti.

Sa dua dina na ivakaraitaki kei na veivakalougatataki oqo ki na kawa tamata muri mai ni dua na matavuvale ni ra veiqaravi vakaulotu na tubudra. E levu vei ira na veiwatini qase cake ka ra lako era a vakaukauwataki ka vakabulabulataki ena veiqaravi vakaulotu. Mai na itutu ni veiqaravi tabu oqo, e vuqa era sa vakasavasavataki ka vakila na reki ni nodra vakau mai eso tale ki na kila-ka ena taucoko ni kosipeli i Jisu Karisito. …

4. Vakarautaka na veiliutaki ena taraicake ni duavata vakamatavuvale. Keitou vakamasuti ira kece na lewenilotu qase cake, ke mani rawa, mera kaciva vata mai na nodra matavuvale. Tuvai ira mera cokoti vata vakaiwasewase. Soli veiliutaki ki na sokomuni ni matavuvale. Tauyavutaka na vakasoqoni vata ni matavuvale ka rawa ni vakilai ka vulici kina na veitokani kei na ivuvu ni matavuvale. Eso na ivakananumi kamica e tu vei au e sa mai na neitou vakasoqoni vata vakamatavuvale kei na vakasokumuni vata. Vakabulabulataka na ivakarau matau totoka vakamatavuvale ena vauci kemudou vata ka tawamudu. Ni caka vakakina, sa rawa ni da bulia e dua na tiki lomalagi ena vanua oqo e vuravura ena loma ni veimatavuvale yadudua. Me kena ilutua, na tawamudu sa na dua walega na ikuri ni bula yalododonu vakamatavuvale.

5. Vakadonuya ka qarava vakaoti na veikacivi ni Lotu. Keitou nuitaka ni o ira kece na lewenilotu qase cake ka ra na rawata era na vakadonuya na veikacivi ena Lotu ka qarava vakaoti ena yalorakorako. Au sa vakavinavinaka ni kilai ira na veitacini era sa tiko ena vitusagavulu kei na walusagavulu vakacaca ka ra se veiqaravi voli vaka-bisopi kei na peresitedi ni tabana. Sa duatani na neitou gadreva na ivakasala kei na veivakayarayarataki mai vei kemuni ka sa lakova na salatu ni bula! Keitou gadreva ni rogoca na nomuni rawaka eso kei na sala cava ni a tubu sivita kina na vutu ni yalo, mosi, se yalorarawa, ka yaco me kaukauwa cake ena nomuni sotavi ira.

E sa tu na veimadigi bulabula me baleti iko ni veiqaravi ena levu na veitabana ni Lotu. Sa tiko vei iko na gauna kei na yavu ni kosipeli tudei ka vakavuna mo qarava e dua na cakacaka levu. O veiliutaki ena vuqa na sala ena veiqaravi yalodina ena Lotu. Keitou vakavinavinakataki kemuni ena veika kece o ni sa cakava ka masuta ni na vakaukauwataki kemuni na Turaga mo ni cakava e levu cake tale na ka.

6. Tuvaka me baleta na nomu bula vakailavo mai muri. Ni ko sa lako curuma na bula ni vakacegu kei na veiyabaki e tarava, keitou sa sureti ira kece na noda lewenilotu qase cake mera tuvaka vakamatau me baleta na veiyabaki ka tarava na cakacaka tudei. Me da sa levea na dinau tawayaga. Keitou sa veivakasalataki talega ena qaqarauni ni sainitaki ni ivola vakailavo, vata kei ira sara mada ga na lewe ni matavuvale, ka rawa ni vakacala na ilavo ni vakacegu.

Mo qaqarauni vakalevu sara ena veiyabaki ki liu me baleta na ivadi “mo-vutuniyau,” moketitaki ni itikotiko, se vakavureilavo ena so na sasaga tavariri. Toso vakamalua me kakua kina ni vakacalai na tuvatuvaka ni bula taucoko mai na dua se so na ivalavala vakaloloma ni vakatulewa vakailavo. Tuvana rawa na nomu bula vakailavo mai muri, qai vakamuria na ituvatuva.

7. Vakayacora na veiqaravi va-Karisito. E veivakalagilagi na veiqaravi va-Karisito. Ni kilai oqo, keitou sa kaciva na lewenilotu qase cake taucoko ka rawa ni curumaka na nodra isele takelo ena veiqaravi vei ira tale eso. Oqo e sa rawa ni tiki ni ivalavala ni veivakasavasavataki. Sa yalataka na Turaga ni o ira era vakayalia na nodra bula ni qaravi ira na tani ena kunei ira vakaiira. E tukuna vei keda na Parofita o Josefa Simici ni sa dodonu meda “oga ka solia na noda bula” ena kena vakavotui na veinaki ni Turaga (V&V 123:13).

Na vakacegu, reki kei na veivakalougatataki ena muri ira era vakayaco veiqaravi kivei ira tale eso. Io, keitou vakacaucautaka na veiqaravi va-Karisito ki na tamata kece, ia e sa kamikamica vakaoti ki na nodra bula na qase cake.

8. Me tu vinaka na bula vakayago, me bulabula, ka dau yavala. Keitou sa vakadrukai ena sasaga era cakava e vuqa na qase cake mera vakadeitaka kina na bulabula vinaka ena veiyabaki eliu. …

Sa duatani na neitou taleitaka ni raici ira na noda qase cake mera yavavala ka qaqaco tikoga! Mai na yavavala voli, rau sa cakacaka vakavinaka kina na vakasama kei na yago.⁶

“Me sa yaco na veiyabaki koula oqo me nomuni veiyabaki taleitaki duadua ni ko bulataka ka dauloloma ka veiqaravi vakataucoko.”

Nodra qaravi eso tale e vukea ni vakabulai ira era vakayalia na nodra daulomani se o ira era taqayataka na tu duadua.

Kivei ira na sa vakayalia na watimuni, keitou via vakaraitaka talega na neitou loloma. So na gauna e tiko ki na so vei kemuni e dua na vakanananu ni tawayaga kei na galili ka na voleka ni rawa ni veirawai. Ena vuqa na gauna, oqo e sega ni dodonu me vakakina. Me ikuri ki na walu na vakatutu sa vakaraitaki koto, oqo e dua na sabolo ni itaviqaravi eso ka sa vakadinadinataki ni veivuke kivei ira tale eso.

Eso ka ra tu duadua era vakaogai ira voli ena cula itutuvi me baleta yadua na makubudra vou me na vakamau se gone dramidrami vou yadua e sucu ki na matavuvale. Eso era volai vola ena siga ni sucu se tiko ena soqoni ni vuli kei na qito ni makubudra ke ra rawata. Eso era vakasoqona na itawatawa ni itaba eso ni makubudra yadua me soli ena siganisucu. …

Eda raica e lewe levu tale na noda dawai era soli ira vakarawarawa … ena veivalenibula se vakayacora eso tale na mataqali veiqaravi veikauwaitaki raraba. E vuqa era vakasinaiti mai na nodra veivuke ena sala vakaoqo.

Na idola ni kena lako siviti na galili kei na nanuma koya me sa tawayaga vua e dua e rawata vakayago oya me kalawa yani ena nodra vukei tale eso era vakaleqai dina tu. Keitou yalataka vei ira era na vakayacora na mataqali veiqaravi vakaoqo ni, ena so na ivakarau, ko na vakacegui mai na yali ni dua na daulomani se na taqaya ni tiko duadua. Na sala mo vakila vinaka kina na kemu ituvaki oya mo vakavinakataka na veika e sotava tiko e dua tale.⁷

Ena gauna ni matetaka kei na mosi, sa rawa ni da kaukauwa tiko ena ivakarau ni bula kei na yalo.

Kivei ira era tauvimate ka bikai voli ena mosi kei na veiveisau ni bula oqo, keitou sa dulaka yani na loloma kei na kauwai bibi. Sa lako yani na lomai keitou kei na neitou masu kivei kemuni. Nanuma na ka a tukuna na tama o Liai ena nona vakalougatataki Jekope na luvena tagane, ka a vakatotogani mai vei rau na tuakana o Leimani kei Lemueli. A tukuna okoya, “Ko sa kila na nona loloma na Kalou; ka na vakalougatataka vei iko ko Koya na nomu rarawa” (2 Nifai 2:2). Ka na cakava vakakina o Koya kivei iko.

Keitou masuta ni ko ni na sasagataka tikoga mo ni na kaukauwa tiko ena ivakarau ni bula kei na yalo. Keitou kila ni sega soti ni dau rawarawa. Keitou masuta ni o ira era sa cakava oqo vei iko na itavi ko sa sega ni cakava rawa vakaiiko era na cakava ena yalololoma, ena yalomalua, vata kei na yalo veikauwaitaki.

Keitou nuitaka ni ko na tomana voli mo vakavurea na vakasama kei na vakanananu vinaka ena lomamu ka vakatikitikitaka vakatotolo o ira ka ra veivakamavoataki ka veivakaleqai kivei iko. Keitou nuitaka ni sa cabori tiko na nomuni masu ena veisiga ka vakatalega ena veiaua, ke gadrevi. Me vaka e vakatavulica na iVola i Momani, “Dou dau vakavinavinakataka vua ena veisiga na nona loloma, kei na isolisoli sa solia na [Kalou] vei kemudou” (Alama 34:38).

Ko na raica na wiliki ni iVola i Momani e veisiga ni na laveta na yalomu, kauti iko vakavoleka ki vua na nomu iVakabula, ka vukei iko mo dua na gonevuli ni kosipeli ka rawa ni wasea na veidina lelevu vata kei ira tale eso.⁸

Sa ka bibi mera solia na matavuvale vei ira na nodra itubutubu qase cake kei na tubudra na loloma, veikauwaitaki, kei na vakarokoroko e ganiti ira.

Me’u na qai vosa mada vakalekaleka oqo ki na nodra matavuvale na qase cake. Keitou tokaruataka e dua na ivolanikalou mai na Same: “Kakua ni biuti au ena gauna ka’u sa qase mai kina; Kakua ni laivi au ni sa oti na noqu kaukauwa” (Same 71:9).

Keitou sa vakayaloqaqataka na veimatavuvale mera solia ki na nodra itubutubu qase cake kei na tubudra na loloma, veikauwaitaki, kei na vakatudaliga e ganiti ira. Meda qai nanuma na ivakaro ena ivolanikalou ni sa dodonu meda qarauni ira na noda lewe ni vale de kunei ni da “sa uasivi cake ena ca” (1 Timoci 5:8). Au sa vakavinavinaka vakalevu ki na noqu matavuvale kei na loloma kauwai era sa solia ki na nodra itubutubu ena vuqa na yabaki.

Dau nanuma ni sa vakatautaki vei keda o ira na itubutubu kei na tubuda, ka meda sa qarauni ira ena ivakatagedegede cecere duadua. Ni sa sega na matavuvale me qarauni ira na qase cake, sa dodonu me na sasagataka sara na iliuliu ni matabete kei na iSoqosoqo ni Veivukei me sotava na nodra gagadre ena sala ni loloma vata ga. Keitou vakatura e vica na vakatutu ki na nodra matavuvale na qase cake.

Mai na gauna a ceuta kina na Turaga na iVunau E Tini ena vatu raraba, e sa voqa sobu na Nona vosa mai Saineai ena veisenituri mo “vakarokorokotaki rau na tamamu kei na tinamu” (Lako Yani 20:12).

Na rokovi kei na dokai ni noda itubutubu sa kena ibalebale ni da dau raici ira cake. Keitou taleitaka ka marautaki ira ka sa kauwai me baleta na nodra bula marau kei na tiko vinaka. Keitou qaravi ira ena veidokai kei na veinanumi veikauwaitaki. Keitou saga me keitou dau kila na ka era vakasamataka tiko. E sa tiki ni veivakarokorokotaki vakaidina na talairawarawa ki na gagadre yalodina kei na vakanuinui ni itubutubu.

Me kuri tale, sa ganiti ira na noda itubutubu na noda vakarokoroko kei na veidokai ena kena soli vei keda na bula vakaikoya. Ena taudaku ni ka oqo era sa dau voleka ni cakava na solibula tawawili ni ra kauwai ka susugi keda mai na noda bula dramidrami kei na bula vagone, vakarautaka vei keda na veika yaga ni bula, ka qaravi keda mai na veimate vakayago kei na osooso ni vakasama ni tubu cake tiko. Ena vuqa na gauna, era vakarautaka vei keda na madigi meda rawata na vuli, ka, me vaka oya, era a vakatavulici keda. E levu na ka eda kila ka cakava eda a vulica mai na nodra ivakaraitaki. Meda sa dau vakavinavinakataki ira vakalevu ka vakaraitaka na loloma oya.

Meda sa vulica talega ni dau vosoti ira na noda itubutubu, ka ra, a cakava beka eso na cala mai na nodra susugi keda, era a voleka ni dau cakava na kena vinaka taucoko era kila rawa. Meda sa dau vosoti ira me vaka eda sa nuitaka vakakina meda na vosoti mai vei ira na luveda me baleta na veicala eda cakava.

Ena gauna mada ga era sa qase cake kina na itubutubu, sa dodonu meda rokovi ira ena vakatarai ni nodra galala ni digidigi kei na madigi ni bula vakataki ira ka vakatau na kena balavu. Meda kakua ni kauta tani mai vei ira na digidigi e rawa ni ra se cakava. Eso na itubutubu sa rawa ni bula ka qaravi ira vinaka ki na nodra veitaba yabaki ka na vinakata mera cakava vakakina. Ni rawa vei ira, vakatarai ira kina.

Kevaka era sa sega ni rawa ni bula vakataki ira, sa na qai gadrevi na veivuke ni matavuvale, Lotu, kei na itikotiko raraba me vukei ira. Ni sa sega ni rawa vei ira na qase cake mera qaravi ira vakataki ira, mai na ikuri ni veivuke tale mada ga, sa rawa ni vakarautaki na veivuke ena itikotiko ni dua na lewe ni matavuvale ke rawa vakakina. Na veivuke ni Lotu kei na itikotiko raraba sa na rairai gadrevi talega ena gauna vakaoqo.

Sa bibi kina na itavi ni dauniveiqaravi. Sa tiko na gagadre levu ena soli ni veitokoni kei na veivuke ki vua na tamata vakaoqo. Oqo e dau vakatu e dua na lewe ni vale qase cake se dua na luve yalewa uabula ka ra tiko na luvena me qarava ka vakakina na qaravi ni itubutubu qase cake.⁹

O ira era sa kalougata ni veivolekati vata na tubudra kei ira na tamata qase cake tale eso era sa rawata na veitokani kei na veimaliwai qaqaco.

Keitou nuitaka talega ni ko na okati ira na qase cake ena veitaviqaravi vakamatavuvale ke rawa vakakina. Sa ka levu na reki me keitou raici ira na makubuni gone bulabula ka kamica vata kei na dua na tubudra dau loloma ena kedra maliwa. Era taleitaka na gonelalai na veigauna vakaoqo. Era taleitaka mera dau sikovi ira mai na tubudra ka mera dau tiko ena vakayakavi, ena lotu vakamatavuvale, kei na so tale na soqo vakamareqeti. Oqo e vakarautaka na madigi eso ena sala ni veivakatavulici me dokai, lomani, rokovi, ka qaravi kina o ira ka ra sa tiko ena nodra veiyabaki qase cake.

Sa rawa ni tiko vei ira na tubunigone na veivakayarayarataki momona me baleta na makubudra. Na nodra gauna e sega soti ni dau veivaogai se osooso me vakataka na itubutubu, ka sa rawa ni dolavi na ivola eso ka wiliki, rawa ni tukuni na italanoa eso, ka rawa ni vakatavulici na tutaki ni ivakavuvuli ni kosipeli. Sa ra na qai taura rawa na gonelalai e dua na ituvatuva matau ni bula ka sega walega ni vinaka ia e rawa ni kauta mai vei ira na tataqomaki, vakacegu, kei na kaukauwa. Sa rawa ni vakau na ivola eso, [katokatoni], kei na veiyaloyalo, ka vakabibi ena veivanua veiyawaki sara ka sa sega ni rawa kina na veiraici wasoma. O ira era sa kalougata ni veivolekati vata na tubudra kei ira na tamata qase cake tale eso era sa rawata na veitokani kei na veimaliwai qaqaco. Ena tu beka na gauna e rawa ni ra tiko kina ena tauri ivola, vakamau, ilakolako ki na valetabu, … kei na so tale na soqo vakamareqeti kei ira na lewe ni matavuvale.

Eda marautaka ni sarava na nodra tubu ka rawaka ena veisala vakamareqeti na luveda kei na makubuda ni da wasea vata kei ira na nodra reki ka marautaka na nodra qaqa. Na marau e vakalougatataka na noda bula ni ra sasaga ka rawa-ka na luveda ena nodra bula. Ena 3 Joni 1:4 eda wilika, “Sa ka levu na noqu reki ena vuku ni ka e duabau ga oqo, ni’u sa rogoca era muria na dina ko ira na luvequ.” Kei na kilai ni ka oqo e rawa ni kauta mai e dua na vakavoui ni loloma kei na veivakayaloqaqataki meda tomana na noda sasaga kaukauwa.¹⁰

“Sa rawa ni tiko vei ira na tubunigone na veivakayarayarataki titobu me baleta na makubudra.”

Sa dodonu mera masulaka na qarai ni Yalotabu na iliuliu ni Lotu ena vukei ni lewenilotu me sotava na nodra gagadre na qase cake.

Keitou … vakamasuti ira na iliuliu ni matabete ni qase cake mera na qaqarauni ki na Yalotabu ni Tamada Vakalomalagi ena raici vakamatau kei na sotavi ni gagadre vakayalo, vakayago, itovo ni vakasama, ka vakailavo ni qase cake. Keitou nuitaka ni ko na vakayagataka na nomu daunivakasala, iliuliu ni kuoramu ni Matabete i Melikiseteki, kei na iliuliu ni Soqosoqo ni Veivukei, dauveituberi vakavuvale, kei na dauveisiko ena itavi levu oqo, ni sa dodonu meda qarava taucoko na veitavi oqo ena tawaguce se tawadatuvu.

Keitou nuitaka ni ra na tomana na iliuliu ni matabete kei na mataisoqosoqo na soli ni veikacivi kivei ira na qase cake me rawa ni ra vakayagataka kina na nodra ivurevure ni yalomatua kei na ivakasala. Keitou nuitaka, ke vakakina, ni rawa ni da na dauveituberi vakavuvale se dauveisiko yadua. O ira mada ga na sa davo tu vakadua ena nodra idavodavo kei na itikotiko sa rawa ena so na gauna mera veivuke ena rai-kauwai oqo mai na veitaratara ena talevoni, volai ni ivola, se so tale na ilesilesi vakamareqeti.

Sa rawa ni cakava e levu na ka e dua na iliuliu ni matabete me veivuke ka vakayaloqaqataki ira kina na tamata yadua kei na veiwatini ni ra vakavakarau ni qarava na kaulotu. Na vakadauci ni yaca ena valetabu [sa kacivi tu oqo me tuva matanivola ni tuva kawa] kei na veiparokaramu ni welefea e sa vakalougatataki vakalevu mai vei ira ka tiko ena yabaki qase cake ka tiko na madigi eso mera veiqaravi ena veitikina oqo.

Keitou nuitaka ni ra sa tiko na dauveituberi vakavuvale kei na dauveisiko qaqaco ka kauwai era sa lesi kivei ira na qase cake yadua se veiwatini. Na lomavinaka kei na vakacegu levu e rawa ni lako mai kivei ira ka kila ni tiko e dua na tamata e rawa ni ra gole kina ena gauna ni leqa tubukoso se gagadre. Sa ka bibi me na vakadeitaki na maqosa, itovo matau, kei na yalomalua ena kena raici matua ka qaravi na veigagadre e tiko.

Keitou nuitaka ni ko na vakayagataki ira na qase cake tiko duadua ena veilesilesi ni veiqaravi vakadauloloma. Okati ira talega ena veisoqoni ni itaviqaravi ena iteki kei na tabanalevu, vakabibi o ira na lewenilotu taudua kei ira na dawai vakararavi. Ena vuqa na gauna era dau guilecavi. Vakabibi ena gauna e mate kina e dua na turaga se marama vakawati, sa rawa ni soli na loloma veikauwaitaki. Oqo e sa dua saraga na gauna malumu vei ira e vuqa.

So na gauna ena gadrevi ka vakavinavinakataki vakalevu na veivakacegui tubu koso mai na lewe ni matavuvale ka ra vakarautaka na veiqaravi tudei vakayago ka vakayalo kivei ira era gadreva na veivuke matalia. Sa ka bibi na nodra vukei na matavuvale mera taurivaka tikoga na veicakacaka vakamatavuvale vata na galala vagauna mai na veitavi dredre ka rawa ni vakavuna na tauvimate ni yago balavu. Eda gadreva taucoko na veitokoni loloma kei na vakacegu mai na veitavi veivakayalolailaitaki ni tauvimate bibi se leqa eso.

Era dau kauwaitaka vakalevu vakawasoma na qase cake na sala ni veilakoyaki. Sa rawa ni da veivuke ena vakarautaki ni dua na sala mera tiko kina ena soqoni ni Sigatabu, veisiko ki na nodra daulomani, volivoli, ka lako ki vua na vuniwai se vale ni bula.

Sa dodonu meda vakasaqara tale ena masumasu na veivakauqeti kei na idusidusi ni nodra vukei na qase cake. Sa dau tikoga na duidui levu ni tamata yadua kei na nodra gagadre.¹¹

Na noda veiyabaki e muri sa rawa ni noda veiyabaki vinaka duadua.

Na Kalou me vakalougatataki ira na qase cake ena Lotu. Au lomani kemuni mai na vuniyaloqu taucoko. O au e dua vei kemuni.

Sa tiko vei iko e levu na ka mo bula kina. Me sa yaco na veiyabaki koula oqo me nomuni veiyabaki taleitaki duadua ni ko bulataka ka dauloloma ka veiqaravi vakataucoko. Me qai vakalougatataka na Kalou o ira era qarava na nomu gagadre—nomu matavuvale, nomu itokani, kei ira na nomu ilawalawa lewe ni Lotu kei na veiliutaki.

Au sa solia vei iko na noqu ivakadinadina me baleta na reki ni bula voli—me baleta na reki ni taucoko ni bulataki ni kosipeli kei na lako curumi ni kama ni Dauveivakayagovinakataki kei na cakacaka ni veivakasavasavataki ka dau yaco. Me vaka a tukuna vinaka na iApositolo o Paula, “Ni da sa kila sa veivuke na ka kecega me ra vinaka kina era sa lomana na Kalou” (Roma 8:28).

Au sa solia na noqu veivakalougatataki vei iko. Sa bula na iVakabula. Oqo na Nona Lotu. Na cakacaka e dina, ka mai na vosa ni noda Turaga ka iVakabula, “Dou muri au ka vosota me yacova na ivakataotioti, dou na bula kina; ia ko koya sa vosota me yacova na ivakataotioti au na solia vua na bula tawamudu” (3 Nifai 15:9).¹²

Vakatutu ni Vuli kei na Veivakavulici

Taro

O sa rawaka vakacava mai na “yalomatua kei na veika era a sotava” na tamata qase cake mai vei iko? (Raica na wase e 1.)
Ena ika 2 ni wasewase, e lisitaka kina o Peresitedi Benson e walu na ka e rawa ni ra cakava na qase cake mera “vakayagataka vakalevu cake kina na [nodra] veiyabaki qase.” Navuca na vakatutu yadua. Ena rawa ni vaqaqacotaka vakacava na noda bula na veivakatutu oqo se vakaevei na yabaki ni noda bula?
Cava na vuna o nanuma kina ni veiqaravi “sa idola ni kena lako siviti na galili kei na vakilai ni tawayaga”? (Raica na wase e 3.) Gauna cava o a raica kina ni dina na ka oqo?
Vakasamataka vagumatua na ivakasala nei Peresitedi Benson kivei keda ni da sotakaya na tauvimate kei na mosi (raica na wase e 4). Ena rawa ni vukei keda vakacava na ivakasala oqo ni “kaukauwa tikoga ena ivalavala kei na yalo”?
Navuca na ivakavuvuli nei Peresitedi Benson ena ika 5 ni wasewase. Ena sala cava soti e rawa ni ra rokovi ira kina na nodra itubutubu kei ira na tubudra qase cake o ira na luveda kei na makubuda?
Gauna cava o sa bau raici ira kina na itabagone ni ra veilasamaki vata kaya kei na tamata qase cake? (Raica na wase e 6.) Na cava e rawa ni da cakava ena noda matavuvale kei na Lotu me susugi cake kina na veimaliwai vakaoya?
Na sala cava soti e rawa ni ra veivuke kina na iliuliu ni Lotu kei na lewe ni tabanalevu se tabana ena sotavi ni nodra gagadre na qase cake? (Me baleta na ivakaraitaki eso, raica na wase e 7.)
Na cava e kena ibalebale vei iko mo sotava “na reki ena bulataki taucoko ni kosipeli”? (Raica na wase e 8.) Na ivakaraitaki cava o sa bau raica vei ira na tamata era vosota voli ena yalodina me yacova na ivakataotioti?

iVolanikalou Veisemati

Vosa Vakaibalebale 20:29; Aisea 46:3–4; Luke 2:36–38; Efeso 6:1–3; Taito 2:1–5; Jemesa 1:27; V&V 121:7–8

Veivuke ena Vuli

“Na cakacakataki ni veika o sa vulica ena kauta mai eso tale na kilaka kei na vosota (raica na Joni 7:17)” (Vunautaka na Noqu Kosipeli [2004], 21). Navuca ni vakatarogi iko se o na vakayagataka vakacava na vulici ni kosipeli e vale, ena vale ni cakacaka, kei na nomu itavi eso vaka-Lotu.