Kapitulo 9

Pagbuntog sa Tintasyon

Sukli ninyo ang yawa, ug dili ba mokaratil siya sa pagdagan palayo kaninyo. Pagpaduol kaniya, dili ba dali kaayo mong magaid, dili ang inyong mga kamot, pero ang inyong kalag.¹

Pasiuna

Isip usa ka batan-ong misyonaryo didto sa Scotland, si David O. McKay mitambong sa usa ka miting nga gipahigayon ni James L. McMurrin, usa ka magtatambag sa European Mission presidency. Sa nagpadayon pa ang miting, kadtong nanambong nakasaksi og pipila ka mga pagpakita sa mga gasa sa Espiritu. Mga 70 ka mga tuig na ang milabay, human niadto diha sa usa ka miting sa priesthood, si Presidente McKay nahinumdom: “Nahinumdom ko, ingon og kagahapon lang, sa kakusog sa inspirasyon niana nga okasyon. Ang tanan mibati gayud sa impluwensya sa Espiritu sa Ginoo. Ang tanan nga nanambong sa tinud-anay nahimong usa sa kasingkasing ug usa sa hunahuna. Wala gayud ako sukad makasinati sa mao nga emosyon. …

“Mao kadto ang sitwasyon nga gihulagway ni James L. McMurrin sa unsay naprobahan sukad nga usa ka panagna. Akong nakat-unan pinaagi sa suod nga pagpakig-uban kaniya nga si James McMurrin usa ka halangdong tawo. Ang iyang hugot nga pagtuo sa ebanghelyo walay pagduhaduha. Walay mas matinudanong tawo, walay tawo nga mas maunungon nga sukad nagpakabuhi sa unsay iyang gihunahuna nga tinuod. Mao nga sa dihang miatubang siya kanako ug mihatag sa unsay akong gituohan kaniadto nga usa ka pahimangno kay sa usa ka saad, ang iyang mga pulong nakahatag og dili mapapas nga impresyon ngari kanako. Nagsulti og usab sa mga pulong sa Manluluwas ngadto ni Pedro, si Brother McMurrin miingon: ‘Tuguti ako nga mosulti kanimo, Brother David, gipangayo ka ni Satanas, sa pagbaton kanimo aron iya kang alig-igon ingon sa trigo, pero ang Dios naghunahuna kanimo.’ [Tan-awa sa Lucas 22:31.]…

“Niadtong higayona dihay mikalit og abut sa akong hunahuna nga mga tintasyon nga mibabag sa akong dalan, ug ako mas nakaamgo pa kay ni Presidente McMurrin, o ni bisan kinsang tawo, kon unsa ka tinuod ang iyang gipanulti sa dihang siya miingon, ‘Gipangayo ka ni Satanas sa pagbaton kanimo.’ Uban sa saad sa paghupot sa hugot nga pagtuo, dihay natawo nga tinguha sa pagalagad sa akong isig ka tawo; ug tungod niini miabut ang pagkaamgo, bisag gamay lang, sa unsay akong nautang ngadto sa elder kinsa unang midala sa mensahe sa gipahiuli nga ebanghelyo ngadto sa akong lolo ug lola, kinsa midawat sa mensahe daghang mga tuig na ang milabay didto sa amihanang Scotland ug didto sa Habagatang Wales.”

Si Presidente McKay mitapos niini nga istorya alang sa mga batan-ong lalaki sa Simbahan uban sa tambag nga magamit sa tanan: “Naghangyo ako sa Dios sa pagpadayon sa pagpanalangin kaninyo. … Ayaw pagtugot nga ang tintasyon mopahisalaag kaninyo.”²

Mga Pagtulun-an ni David O. McKay

Kinahanglang bantayan nato ang atong mga kaugalingon ug ang atong mga pamilya batok sa impluwensya sa kaaway.

Ang mga kahoy nga makasugakod sa unos sa kasagaran mabuntog sa makalaglag nga mga dangan nga lisud gani makita diha sa mikroskop. Sa maong paagiha ang pinaka banggiitang kaaway sa katawhan karon mao ang maliputon ug usahay dili makita nga mga impluwensya nga naglihok diha sa katilingban nga naglaglag sa pagkalalaki ug sa pagkababaye sa pagkakaron. Ang pagsulay, human sa tanan, sa pagkamatinud-anon ug pagkaepektibo sa mga katawhan sa Dios usa ka tagsa-tagsa nga paningkamot. Unsa ang gibuhat sa tagsa-tagsa?

Ang matag tintasyon nga moabut nganha kaninyo ug kanako magagikan sa usa sa tulo ka mga matang:

Tintasyon sa gana o kahinam;
Pagpadala sa garbo, uso, o panghambog;
Tinguha alang sa kalibutanong mga katigayunan ug dominyon sa mga yuta o yutan-ong mga kabtangan sa mga tawo.

Ang mao nga mga pagtintal moabut kanato diha sa atong sosyal nga mga panagpundok; moabut kini sa atong politikanhong mga paninguha; moabut kini sa atong mga relasyon sa negosyo, diha sa uma, diha sa komersyal nga mga establisemento; sa atong pagpakig-atubang sa tanang mga kalihokan sa kinabuhi atong makita nga kining malimbungon nga mga impluwensya naglihok. Kon kini mamatngunan na sa matag indibidwal mao kana ang panahon nga ang depensa sa kamatuoran maningkamot na mismo sa iyang kaugalingon.

Ang Simbahan nagtudlo nga ang kinabuhi dinhi usa ka pagsulay. Katungdanan sa tawo nga mahimong agalon, dili ulipon sa kinaiyahan. Ang iyang mga gana kinahanglan nga kontrolon ug pagagamiton alang sa kaayohan sa iyang panglawas ug sa pagpatunhay sa iyang kinabuhi––ang iyang mga kahinam masteron ug kontrolahon alang sa kalipay ug panalangin sa uban. …

Kon kamo matinud-anon nga nagsunod sa mga pag-aghat sa Balaang Espiritu, ug magpadayon sa pagbuhat sa ingon, ang kalipay mopuno sa inyong kalag. Kon kamo mopalahi gikan niini ug nakahibalo nga kamo nasayop sa unsay inyong gituohan nga sakto, dili kamo magmalipayon bisan [kon] kamo makabaton sa bahandi sa kalibutan. …

Sa ilang pangandoy alang sa paglingawlingaw, ang mga kabatan-onan sa kasagaran matintal sa pagpatuyang sa mga butang nga makapahimuot lamang sa talamayong bahin sa pagkatawo, lima sa labing komon niini mao ang: una, pagkabulgar ug kalaway; ikaduha, pag-inom ug pag-ugay-ugay; ikatulo, pagkadili putli; ikaupat, pagkadili maunungon; ug, ikalima, pagkawalay balaang pagtahud.

Ang pagkabulgar sa kasagaran mao ang unang lakang padulong ngadto sa pagpatuyang. Ang pagkabulgar mao ang pagsaway sa maayong butang o maanindot nga mga pagbati.

Usa lang ka lakang ang distansya gikan sa pagkabulgar ngadto sa kalaw-ay. Sakto, importante gayud, ngadto sa kalipay sa atong mga kabatan-onan nga sila magkakita diha sa mga sosyal nga mga parti, pero kini usa ka timailhan sa ubos nga moral kon alang sa kalingawan sila modangop sa pisikal nga pagpaikag ug kaulawan. Ang mga parti nga may pag-inom ug pag-ugay-ugay makahatag og kahigayunan diin ang moral nga pagbati mahimong malubog, ug ang walay kontrol nga kahinam magpatuyang. Dayon sayon na lang kaayo ang paghimo sa katapusang lakang ngadto sa moral nga kaulawan.

Nga, imbis ang taas nga moral nga mga baruganan, ang kinabuhi sa imoral nga pagpatuyang maoy gipili, ug ang lalaki o babaye mag-anam og kaut-ot, ang pagkadili loyal mahimong usa ka dili kapugngan nga bahin sa iyang kinaiya. Ang pagkamaunungon ngadto sa mga ginikanan mawala; ang pagsunod sa ilang mga pagtulun-an ug mga sumbanan mabiyaan; ang pagkamaunungon ngadto sa asawa ug mga anak masanta sa walay hinungdan nga katagbawan; ang pagkamaunungon ngadto sa Simbahan mahimong imposible, ug sa kasagaran mapulihan sa pagtamay sa mga pagtulun-an niini.³

Ang tintasyon sa kasagaran moabut sa [usa ka] hilom nga paagi. Tingali ang pagpadala ngadto niini mahimong dili mahibaloan ni bisan kinsa gawas sa indibidwal ug sa iyang Dios, pero kon siya magpadala ngadto niini, niana siya mahimong huyang, ug mamansahan sa dautan sa kalibutan.⁴

Si Satanas gisalikway tungod kay siya nagtinguha sa pagpuli sa Tiglalang. Pero ang iyang gahum mabati gihapon. Aktibo siya ug nagahunghong niining higayona sa paglimud sa pagkaanaa sa Dios, sa pagkaanaa sa iyang Hinigugmang Anak, ug sa paglimud sa pagkaepektibo sa ebanghelyo ni Jesukristo.⁵

Ang kaaway aktibo. Siya malinglahon ug maliputon, ug nangita sa matag kahigayunan sa pagguba sa pondasyon sa Simbahan, ug moatake bisan kanus-a kon mahimo aron sa pagpahuyang o paglaglag. … Ang Dios mihatag sa kagawasan sa pagpili. Ang atong moral ug espirituhanong kauswagan mag-agad sa atong paggamit niana nga kagawasan.⁶

Si Satanas sa gihapon determinado nga mopadayon, ug ang iyang mga sinugo adunay gahum nga gihatag kanila karon nga wala nila maangkon sa milabayng mga siglo. Pangandam sa pagpakigbatok sa mga kahimtang nga grabe, pang-idolohiya nga mga kahimtang nga ingon og makatarunganon pero dautan. Aron makabatok niining mga gahuma, kinahanglan kita nga magagad sa mga paghunghong sa Balaang Espiritu, nga kamo may katungod. Kini tinuod.

Ang Dios naggiya niini nga simbahan. Pagmatinuoron niini; pagmaunungon niini. Pagmatinuoron sa inyong pamilya, pagmaunungon ngadto kanila. Panalipdi ang inyong mga anak. Giyahe sila, dili sa walay katarungan, pero pinaagi sa matang sa ehemplo sa usa ka amahan, ug sa ingon makatampo sa kalig-on sa Simbahan pinaagi sa paggamit sa inyong priesthood sa inyong panimalay ug sa inyong kinabuhi.⁷

Ang pagkamiyembro sa Simbahan ni Jesukristo sa mga Santos sa Ulahing mga Adlaw nag-uban niini ang responsibilidad sa pagbuntog sa tintasyon, sa pagpakigbatok sa sayop, sa pagpalambo sa hunahuna, ug sa pagpauswag sa iyang espiritu hangtud kini moabut sa sukod sa gidak-on sa kahingpitan ni Kristo.⁸

Ang kaaway maningkamot sa pag-ataki sa atong pinakahuyang nga bahin, pero makaangkon kita og kalig-on kon kita mobatok kaniya.

Dili kamo makaduladula sa Dautan. Pakigbatok sa tintasyon, pakigbatok sa Yawa ug siya mopahilayo gikan kaninyo. [Tan-awa sa Santiago 4:7.]

Ang Manluluwas sa Bukid mihatag kanato sa pinakamaayong ehemplo sa tibuok kalibutan. … Pagkahuman gayud sa bunyag sa Manluluwas, gidala siya ngadto sa bukid nga nailhan karon nga Bukid sa Tintasyon. Wala ako masayud kon mao ba kana ang iyang gitindogan, ang iyang gipuasahan sulod sa kwarenta ka mga adlaw, o dili. Pero didto kini sa usa ka bukid nga iyang giadtoan, ug human … sa kwarenta ka mga adlaw, ang Tigtintal miduol kaniya, sama sa gisulti kanako, ug ingon nga maoy kanunay himoon sa Tigtintal, iyang giataki siya sa unsay gituohan sa Tigtintal nga mao ang iyang pinakahuyang nga bahin.

Human [si Jesus] makapuasa, ang Tigtintal nagtuo nga siya gigutom, ug ang unang tintasyon, kon inyong mahinumduman, mao, “Kon, ” ug gisulti niya kini nga makantalitahon, “Kon ikaw mao ang Anak sa Dios, ” nagpasabut sa pagpamatuod sa Amahan sa dihang siya miingon, “Kini mao ang akong Anak nga pinalangga, ”––”Kon ikaw anak man sa Dios, sugoa kining mga bato nga mahimong mga tinapay.” Ug dihay bato nianang dapita nga sama sa pirasong tinapay sa trigo, mao nga mas kusog ang tintasyon niini. Ang tubag ni Kristo mao: “Ang tawo mabuhi dili sa tinapay lamang, kondili sa matag pulong nga magagula sa ba-ba sa Dios.” (Mat. 4:3–4.)

Ang sunod nga tintasyon mikutlo usab sa kasulatan. Mao kadtong pagkadani ngadto sa pagpanghambog, pagkadani nga makaangkon og kamandoan ibabaw sa atong isigkatawo: “Kon ikaw anak man sa Dios, umambak ikaw ngadto sa ubos …”(gikan sa tumoy sa templo)” … kay nahisulat …” (ug ang Yawa makakutlo og kasulatan alang sa iyang katuyoan) “… kay nahisulat man kini, Magahatag siyag sugo sa iyang mga anghel mahitungod kanimo: ug sa ilang mga kamot pagasapnayon nila ikaw, aron ang imong mga tiil dili mapandol sa bato.” Ug ang tubag mao nga, “Ayaw pagtintala ang Ginoo nga Imong Dios.” (Mat. 4:6–7.)

Ang ikatulo nga tintasyon mao ang gugma sa bahandi ug gahum. Ang tigtintal midala kang Jesus ngadto sa taas kaayo nga bukid ug mipakita kaniya sa mga butang sa kalibutan ug sa gahum niana. Dili siya makantalitahon niini nga tintasyon. Nanghangyo siya, kay ang pagpakigbatok sa Manluluwas nakapaluya sa mga gahum sa Tigtintal. Iyang gipakita kaniya ang mga butang sa kalibutan. “Kining tanan akong ihatag kanimo, kon ikaw mohapa ug mosimba kanako.” Mibarug sa kaharianon sa iyang pagkabalaan, si Jesus miingon: “Pahawa ka, Satanas: kay nahisulat kini nga nagaingon, Maoy simbaha ang Ginoo nga imong Dios, ug siya lamang ang alagara.” Ug ang Tigtintal mipahawa. [Tan-awa sa Mateo 4:8–11.] …

Mao kana ang inyong istorya. … Ang inyong labing huyang nga bahin mao ang bahin diin ang Yawa mosulay sa pagtintal kaninyo, mosulay sa pagdaug kaninyo, ug kon kamo mihimo niini nga huyang sa inyong kaugalingon sa wala pa kamo makahimo sa pagserbisyo sa Ginoo, siya modugang niana nga kahuyang. Isalikway siya ug kamo makabaton og kalig-on. Siya motintal kaninyo sa laing bahin. Isalikway siya ug siya mas maluya ug kamo mahimong mas malig-on, hangtud kamo makasulti, bisag unsa pay inyong palibot, “Pahawa, Satanas: kay nahisulat kini nga nagaingon, simbaha ang Ginoo nga imong Dios, ug siya lamang ang alagari.” (Lucas 4:8.)⁹

Uban sa iyang mga disipulo sa wala pa ang Getsemane, … si [Jesus] miingon, “Ug karon dili na ako dinhi sa kalibutan, apan kini sila ania sa kalibutan, …

“Dili ako mangamuyo nga kuhaon mo sila gikan sa kalibutan, kondili hinoon nga imo unta silang ilikay gikan niadtong dautan.” (Juan 17:11, 15.)

Anaa ang inyong leksyon. Anaa kamo sa taliwala sa tintasyon, pero kamo, sama ni Kristo sa Bukid sa Tintasyon, makabuntog niini.¹⁰

Samtang kita magsunod sa ebanghelyo ug magkontrol sa kaugalingon, makadawat kita og kalipay ug kalinaw.

Samtang ang Kaaway sa kamatuoran gawasnon sa paghimo og dominyon niini nga kalibutan, makatagamtam kita og mga pangataki, ug ang bugtong paagi sa pagpakigbatok nianang mga pangataki mao ang pagsunod sa Ebanghelyo.¹¹

Kini nga ebanghelyo makahatag kanato og kahigayunan sa pagpuyo labaw niining daang kalibutan ug sa mga tintasyon ug, pinaagi sa pagkontrol sa kaugalingon ug pagmaster sa kaugalingon, sa pagpuyo pinaagi sa espiritu, ug mao kana ang tinuod nga kinabuhi dinhi ug sa umaabot.¹²

Hinaut nga atong maamgohan ingon nga wala pa maaguhi sukad nga ang pagmaster sa personal nga mga tinguha sa usa ka tawo mao ang sentro sa relihiyon nga Kristiyano ug sa tanang mga relihiyon. Natural sa tawo ang pagkahakog ug pagtinguha sa pagsunod kon unsay iyang gibati nianang higayona. Nagkinahanglan og relihiyon, o butang nga mas taas kay sa usa ka indibidwal o bisan sa usa ka katilingban sa mga indibidwal, ang pagbuntog sa hinakog nga mga pagbati sa natural nga tawo. … Ang pagmaster sa kaugalingon moabut pinaagi sa pagbaliwala sa kaugalingon sa gagmay nga mga butang. Si Kristo niining nagbinugtong nga mga pulong miingon: “… bisan kinsa nga buot magpatunhay sa iyang kinabuhi, mawagtangan hinoon siya niini: ug bisan kinsa nga magawagtang sa iyang kinabuhi tungod kanako makakaplag siya niini.” (Mat. 16:25.)

Sa higayon nga inyong kalimtan ang inyong kaugalingon ug maningkamot alang sa kaayohan sa uban, ug alang sa butang nga mas labaw ug mas maayo, misaka kamo ngadto sa espirituhanong kahimtang. Kon, sa panahon sa panag-away, sa panahon sa tintasyon sa pagpangita og sayop sa usag usa, atong giwagtang ang atong pagkamakaugalingon alang sa kaayohan sa Simbahan diin kita mga miyembro, alang sa kaayohan sa komunidad, ug ilabi na alang sa kauswagan sa ebanghelyo ni Jesukristo, kita mapanalanginan sa espirituhanong paagi, ug ang kalipay mao ang atong ganti.

“Unsay kaayohan kon mabuntog ko ang mga kaaway, 
Ug magtigum og materyal nga mga butang ug bahandi!
Usa gayud ako ka walay pulos nga tigbuntog
Hangtud akong mabuntog ang akong kaugalingon.”

[Ang tagsulat wala mailhi.]¹³

Ang usa ka tawo kinsa magpatuyang sa iyang mga gana, sa sekreto o sa laing paagi, adunay kinaiya nga dili makaayo kaniya kon siya pagatintalon sa pagpatuyang sa iyang mga kahinam.¹⁴

Unsay kanunay nga gihunahuna sa usa ka tawo maoy nagdeterminar sa iyang mga aksyon sa mga panahon sa oportunidad ug kalisud. Ang reaksyon sa usa ka tawo sa iyang mga gana ug mga tinguha kon kini maoy makasukod sa kinaiya niana nga tawo. Niini nga mga reaksyon napakita ang gahum sa tawo sa pagdumala o sa iyang pinugos nga pagtugyan ngadto sa pagkaulipon.¹⁵

Ang mga aksyon nga nagsubay sa balaang balaod ug sa mga balaod sa kinaiyahan makahatag og kalipay, ug niadtong mosupak sa balaang kamatuoran, kaalaotan. Ang tawo maoy responsable dili lamang sa matag binuhatan, pero sa matag pulong nga walay pulos ug hunahuna. Miingon ang Manluluwas:

“… nga sa adlaw sa paghukom ang mga tawo magahatag unyag husay bahin sa matag pulong nga walay pulos nga ilang ginalitok.” (Mateo 12:36.)¹⁶

Ang tanang mga butang nagkinahanglan og paningkamot. Kana nga takus o angayan angkunon magkinahanglan og bahin sa inyong pisikal nga pagkatawo, sa inyong gahum sa salabutan, ug sa inyong gahum sa kalag––”Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan.” (Mat. 7:7.) Pero kamo kinahanglan nga mangita, kamo kinahanglan nga manuktok. Sa laing bahin, ang sala mohulhog kaninyo. Maglakaw kini tupad kaninyo, motintal kini kaninyo, modani kini, mohaylo kini. Dili na kamo kinahanglan pang maningkamot. … Sama kini sa karatola sa pahinumdom nga nakapadani kaninyo sa pag-inom ug sa pagpanabako. Sama kini sa mensahe nga moabut sa inyo gayung mga panimalay pinaagi sa telebisyon ug sa radyo. …Ang dautan mangita kaninyo, ug nagkinahanglan og paningkamot ug kaisug sa pagpakig-away niini. Pero ang kamaturoan ug kaalam maangkon lamang pinaagi sa pagpangita, pinaagi sa pag-ampo, ug pinaagi sa paningkamot.¹⁷

Ato gayud nga ibutang sa hunahuna nga ang kinabuhi magagad kon unsay atong gihimo niini, ug nga ang Manluluwas sa mga tawo klaro ug yanong miingon kon sa unsa nga paagi nga maangkon ang kalipay ug kalinaw. Anaa kini sa ebanghelyo ni Jesukristo ug sa pagsunod niini.¹⁸

Hinaut nga ang Dios motugot nga samtang kita maningkamot sa dugang kalamboan sa gingharian sa Dios, nga kita makatudlo sa atong mga kabatan-onan, ug sa mga miyembro sa Simbahan bisan asa, sa pagpakigbatok sa mga tintasyon nga makapaluya sa lawas, nga makadaut sa kalag, nga kita magbarug nga tinud-anay nga maghinulsol sama sa dihang kita nagpabunyag; aron kita mabag-o sa tinuod nga pagsabut sa pulong, aron kita matawo pagusab; aron ang atong mga kalag mainitan sa kahayag sa Balaang Espiritu, ug magpadayon nga tinuod nga mga miyembro sa Simbahan ni Jesukristo hangtud nga ang atong misyon dinhi sa yuta mahuman.¹⁹

Mga Sugyot alang sa Pagtuon ug Panaghisgutan

Si Presidente McKay migamit sa analohiya sa lig-on nga mga kahoy nga makabarug sa dagkong mga unos pero mapukan sa gagmayng mga mananap nga mosulod niini (tan-awa sa pahina 99.) Sa unsa nga mga paagi nga kini nga analohiya magamit sa atong pagpakigbatok sa tintasyon? (Tan-awa sa mga pahina 102–03.) Unsa ang atong mahimo sa paglikay sa madanihong tintasyon sa atong mga kinabuhi? Sa unsa nga paagi nga kita makapalig-on sa mga kabataan ug sa mga kabatan-onan batok sa nagkadaghang mga tintasyon sa kalibutan?
Sa unsa nga mga paagi nga ang mga tintasyon nagkalahi, depende sa atong kaugalingong mga sitwasyon? Sa unsa nga paagi nga kita makatabang sa usag usa sa pagpakigbatok sa tintasyon?
Unsay atong makat-unan gikan sa asoy sa Manluluwas nga nakigbatok sa mga tintasyon ni Satanas? (Tan-awa sa Mateo 4:1–11 ug Lucas 4:1–13, lakip ang sinulat sa ubos sa panid nga dunay kinuha gikan sa Hubad ni Joseph Smith; tan-awa usab sa D&P 20:22.)
Sa unsa nga mga paagi nga ang kalipay sa pagsunod sa tintasyon lahi gikan sa kalipay sa pagsunod sa Manluluwas?
Sa unsa nga paagi nga si Satanas mosulay sa paggamit sa atong mga kahuyang? (Tan-awa sa mga pahina 102–03.) Sa unsa nga paagi nga kita makabuntog sa atong mga kahuyang pinaagi ni Jesukristo? (Tan-awa usab sa Ether 12:27.)
Unsa ang inyong mahimo sa pagpakigbatok ug pagbuntog sa mga tintasyon nga sa kasagaran moabut kaninyo? Ngano nga mahinungdanon man ang pagpalig-on sa atong mga hiyas sa dili pa nato makita ang atong kaugalingon nga anaa sa makatintal nga mga sitwasyon?
Sa atong mga pagpaningkamot sa pagsunod sa Manluluwas ug sa pagpakigbatok sa tintasyon, sa unsa nga paagi nga kini makatabang kanato sa paghinumdom nga “walay bisan kinsa nga arang makaalagad og duha ka agalon”? (Mateo 6:24).
Sa unsa nga paagi nga ang matarung ug maayo nga mga hunahuna makatabang kanato sa pagbuntog sa tintasyon? Unsay atong mahimo sa pagkat-on sa pagmaster sa kaugalingon ug pagkontrol sa kaugalingon nga gihisgutan ni Presidente McKay? (Tan-awa ang mga pahina 104–06.)

May Kalabutan nga mga Kasulatan: 1 Mga Taga- Corinto 10:13; Santiago 1:12–17; 2 Pedro 2:9; 1 Nephi 12:17; 15:23–24; Helaman 5:12; 3 Nephi 18:18–19; D&P 10:5