N̄an Ritōl ro—Kajineete im Jipan̄ Rie Rūkaki ro

Āinwōt juon ritōl, ewōr ippam̧ eddo eo n̄an “kweilo̧k ippān rūkaki ro rekāāl emōj kūr” ilo doulul eo im “jipan̄ er kōppopo n̄an kūr ko aer” (Bok in Bōk Meļeļe Eļap, 17.3, Gospel Library). Kweiļo̧k kein rej juon iien em̧m̧an n̄an kwaļo̧k kadkad in rūkaki kāāl ro n̄an kūr ko aer rekwojarjar im im̧we er kōn juon visōn kōn ta meļeļe in n̄an katakin ilo wāween eo an Rilo̧mo̧o̧r. Āinwōt juon ritōl, kwomaron̄ jipan̄ rūkaki ro rekāāl kōppopo n̄an jerbal ilo aer kōm̧m̧an men kein:

• Kwaļo̧k lōke bwe Rilo̧mo̧o̧r enaaj jipan̄ er ilo kūr eo aer (lale Katak im Bujen Ko 88:78).

• Leļo̧k n̄an rūkaki ro rekāāl ro juon kape in kein jipan̄ in, im kōketak er n̄an pukōt wāween ko n̄an kōjerbal pedped in katak ko ilo aer katakin.

• Kwaļo̧k n̄an rūkaki ro rekāāl jabdewōt men kōn doulul eo am̧ me emaron̄ jipan̄ er jeļā.

• N̄e emenin aikuj, ba n̄an rūkaki ro rekāāl ewi wōt ruum̧ eo rej rūkaki ie im ta katak eo rej jino kake. Leļo̧k jabdewōt meļeļe ko rej aikuji n̄an kūlaaj eo aer im membōr in kūlaaj eo.

• Kōmeļeļe n̄an rūkaki kāāl ro bwe kwomaron̄ jipan̄ er ilo kūr eo aer. Leļo̧k jipan̄ ilo kūlaaj ruum̧ eo im būki kein jipan̄ katakin ko eļan̄n̄e emenin aikuj.

• Ba kwonaaj lale kūlaaj ko an rūkaki ro jet iien, im leļo̧k kōļmenļo̧kjeņ ko āinwōt im̧we jān Jetōb.

• Kajjitōk ippān rūkaki ro n̄an bōk koņaer ilo kweilo̧k ko an ko̧o̧ņjeļ eo an rūkaki kajjojo kuwōta.

Ilo aolepān jerbal ko an rūkaki ro, wōnm̧aanļo̧k wōt im kōmakijkij ami kōnono ippāer n̄an leļo̧k jipan̄. N̄an waanjon̄ak, emaron̄ wōr jidik iien am̧ kōnono ippān rūkaki eo m̧okta ak ālkin kūlaaj n̄an kōnono kōn pedped in katak ko ilo Katakin ilo Wāween eo an Rilo̧mo̧o̧r. Kajjitōk ippān rūkaki ro kōn ta eo rej en̄jake em̧m̧anļo̧k aer kōm̧m̧ane im wāween ko rekōņaan kōkm̧anm̧aniļo̧k. Rōjan̄ er kōn naan ko rōm̧m̧an im jouj im kōn kam̧m̧oolol kōn jerbal ko rej jipan̄ kaki.

Kwomaron̄ kōppopo n̄an iien kōnono ilo am̧ lale an rūkaki ro katakin. Pukōt em̧m̧anļo̧k n̄an meļeļe kajoor ko an rūkaki eo im lo wāween ko kwomaron̄ leļo̧k jipan̄ ie. Kalōk kajoor eo an rūkaki eo ej juon wāween eaorōk āinwōt m̧ōttan iien ko rem̧m̧an n̄an kwaļo̧k ia ko rej aikuj kōkm̧anm̧aniļo̧k.