“Kweilo̧k ko an Ko̧o̧njeļ an Rūkaki—N̄an M̧am̧a im Baba ro im Rūkaki ro Em̧ōj Kūr Er,” Katakin ilo Wāween eo an Rilo̧mo̧o̧r: N̄an Aolep Ro Rej Katakin ilo M̧weeo ak ilo Kabun̄ in (2022)

“Kweilo̧k ko an Ko̧o̧njeļ an Rūkaki,” Katakin ilo Wāween eo an Rilo̧mo̧o̧r

Kweilo̧k ko an Ko̧o̧njeļ an Rūkaki—N̄an M̧am̧a im Baba ro im Rūkaki ro Em̧ōj Kūr Er

Kajjojo ward rej aikuj kōm̧m̧ane kweilo̧k ko an ko̧o̧njeļ eo an rūkaki kajjojo kuwōta, jim̧or n̄an m̧am̧a im baba ro im rūkaki ro em̧ōj kūr er ilo ward eo. Ilo kweilo̧k kein, m̧am̧a im baba ro im rūkaki ro jet remaron̄ kōnono ippān doon kōn pedped in katak ko n̄an katakin ĀinwōtKraist (lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 13.4, 13.5, 17.4, 17.5, Gospel Library).

Jim̧or kweilo̧k ko an ko̧o̧njeļ an rūkaki rej kōm̧m̧an aolep kuwōta ilowaan wōt 50 minit in kūlaaj ilo Jabōt.

Kweilo̧k ko an Ko̧o̧njeļ an Rūkaki N̄an M̧am̧a im Baba ro

Wōn Ej Tōl Kweilo̧k Kein? Ekkā wōt, juon membōr in būreejtōnji eo an Jabōt Jikuuļ ej tōl kweilo̧k ko an ko̧o̧njeļ ko an rūkaki n̄an m̧am̧a im baba ro. Ijoke, bisoprik eo emaron̄ jitōn̄ membōr ro jet an ward eo n̄an tōl kweilo̧k ko ilo iien ko jet.

Ward ko̧o̧njeļ eo, kōn jipan̄ eo jān būreejtōnji eo an Jabōt Jikuuļ, rej eddoik mije kweilo̧k ko an ko̧o̧njeļ an rūkaki n̄an m̧am̧a im baba ro. Rej kōnono ippān doon kōn aikuj ko an m̧am̧a im baba ro im baam̧le ko, im rej jerbal ippān doon n̄an kāālet pedped in katak ko jān Katakin ilo Wāween eo an Rilo̧mo̧o̧r enaaj em̧m̧antata n̄an kabwe aikuj ko.

Wōn Aikuj Pād? Ward ko̧o̧njeļ eo ej kāālet n̄an kūrtok m̧am̧ā im baba ro ak kōpeļļo̧k iien en n̄an aolep ro rej kōņaan bōk koņaer.

N̄āāt Eo Kweilo̧k Kein Raikuj Kōm̧m̧an? Kweiļok ko an ko̧o̧njeļ an rūkaki n̄an m̧am̧a im baba ro remaron̄ kōm̧m̧an ilo jabdewōt Jabōt, āinwōt kāālet jān ward ko̧o̧njeļ eo.

Kweilo̧k ko an Ko̧o̧njeļ an Rūkaki n̄an Rūkaki eo Em̧ōj Kūr Er

Wōn Ej Tōl Kweilo̧k Kein? Ekkā wōt, juon membōr in būreejtōnji eo an Jabōt Jikuuļ eo ej tōl kweilo̧k ko an ko̧o̧njeļ an rūkaki ro em̧ōj kūr er. Ijoke, bisoprik eo emaron̄ jitōn̄ membōr ro jet an ward eo n̄an tōl kweilo̧k ko ilo iien ko jet.

Ward ko̧o̧njeļ eo, kōn jipan̄ eo jān būreejtōnji eo an Jabōt Jikuuļ, rej eddoik kweilo̧k ko an ko̧o̧njeļ an rūkaki ro em̧ōj kūr er. Rej kapilōk doon kōn aikuj ko an rūkaki ro im rūkatak ro, im rej jerbal ippān doon n̄an kāālet pedped in katak ko jān Katakin ilo Wāween eo an Rilo̧mo̧o̧r enaaj em̧m̧antata n̄an kabwe aikuj ko.

Wōn Aikuj Pād? Aolep ro rej katakin juon doulul ak kūlaaj ilo ward eo rej aikuj pād ilo kweilo̧k ko an ko̧o̧njeļ an Rūkaki. Ro uwaan būreejtōnji eo an doulul ko rej barāinwōt ruwainene.

N̄āāt Eo Kweilo̧k Kein Raikuj Kōm̧m̧an? Rūkaki ro rej pād ilo kweilo̧k ko an ko̧o̧njeļ an rūkaki ilo Jabōt n̄e rejjab rūkaki ilo kūlaaj eo aer.

Rūkaki ro an doulul eo an priesthood, Doulul eo an Kōrā ro, Doulul eo an Jiron̄ ro remaron̄ pād ilo Jabōt juon ak jilu, āinwōt kāālet jān ritōl ro ijo jokwe ie.
Rūkaki ro an Jabōt Jikuuļ remaron̄ pād ilo Jabōt ruo ak emān, āinwōt kāālet jān ritōl ro ijo rej jokwe ie.
Rūkaki ro an Būraimare remaron̄ pād ilo jabdewōt Jabōt, āinwōt kāāle jān būreejtōnji ko an ward Būraimere im Jabōt Jikuuļ. Eļan̄n̄e rekōņaan, rūkaki ro an Būraimere remaron̄ kweilo̧k makeļo̧k jān rūkaki ro jet n̄an kōnono kōn jekjek ko rejenolo̧k n̄an katakin ajri ro. Menin emaron̄ kōm̧m̧an ilo iien al eo 20 minit, m̧okta ak ālkin kweilo̧k ko ilo Jabōt ekkā kōm̧m̧ani ak ilo bar juon raan ilo wiik eo. Emaron̄ kōm̧m̧an elōn̄ļo̧k jān juon kweilo̧k ko an ko̧o̧njeļ ilo juon kuwōta n̄an rūkaki ro an Būraimere bwe ren jab likjab ilo kūlaaj ko an Būraimere ilo ejja week eo wōt. (Kakeememej: N̄e emenin aikuj, būreejtōnji eo an Būraimere ej kappeik rūkaki ribōk jikin rūkaki, kobaik kūlaaj ko, ak kōm̧mani karōk ko jet n̄an kōtļo̧k an Rūkaki ro an Būraimere bwe ren pād ilo kweilo̧k ko an ko̧o̧njeļ an rūkaki.)

Laajrak in Wāween an Kōm̧m̧an Kweilo̧k ko

Kweilo̧k ko an ko̧o̧njeļ an rūkaki—jim̧or n̄an m̧am̧a im baba ro im rūkaki ro em̧ōj kūr er—ļoor laajrak in wāween in:

Kwaļo̧k im kōnono ippān doon (kōn 20 minit). Karuwaineneik mam̧a im baba ro ak rūkaki ro n̄an kwaļo̧k ta eo em̧m̧an aer kōm̧m̧ane ilo aer katakin kōn gospel eo ilo m̧weeo ak ilo kūlaaj ko aer. Remaron̄ bar kwaļo̧k apan̄ ko rej iooni ak men ko remaron̄ kōņaan kōkm̧anm̧aniļo̧k.
Ekkatak Ippān Doon (emaron̄ 15 minit). Kōnono ippān m̧ām̧a im baba ro ak rūkaki ro juon iaan pedped in katak ko ilo Katakin ilo Wāween eo an Rilo̧mo̧o̧r. Itok, Ļoor Eō emaron̄ bar jerbal āinwōt juon kein jipan̄ n̄an kōnono kein.
Karōk im Karuwainene (emaron̄ 10 minit). Kajjitōk ippān m̧am̧a im baba ro ak rūkaki ro n̄an kwaļo̧k ta eo raar ekkatak ilo kweilo̧k eo im elmen aer karōk n̄an mour kake.