« ស្វែងរករបៀបសមរម្យនានាដើម្បីបង្ហាញសេចក្តីស្រឡាញ់របស់អ្នក » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន ( ឆ្នាំ ២០២៣ )
« ស្វែងរករបៀបសមរម្យនានាដើម្បីបង្ហាញសេចក្តីស្រឡាញ់របស់អ្នក » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន
ស្វែងរករបៀបសមរម្យនានាដើម្បីបង្ហាញសេចក្តីស្រឡាញ់របស់អ្នក ។
ជំនាញ
ផ្ញើសំបុត្រទៅកាន់ឪពុកម្ដាយរបស់សិស្ស អំពីចំណុចវិជ្ជមានដែលអ្នកបានកត់សម្គាល់ឃើញអំពីកូនរបស់ពួកគាត់ ។
កំណត់និយមន័យ
របៀបដ៏មានឥទ្ធិពលមួយដើម្បីបង្ហាញសេចក្តីស្រឡាញ់របស់អ្នកសម្រាប់សិស្សម្នាក់ គឺតាមរយៈការផ្ញើសារវិជ្ជមានមួយទៅកាន់ឪពុកម្តាយ ឬអាណាព្យាបាលរបស់សិស្ស អំពីអ្វីមួយជាក់លាក់ដែលអ្នកបានកត់សម្គាល់ឃើញអំពីសិស្សនោះ ។ សារនេះនឹងកាន់តែមានប្រសិទ្ធិភាព ប្រសិនបើអ្នក ៖
-
អធិស្ឋានសូមការណែនាំអំពីសិស្សណាម្នាក់ដែលអ្នកគួរផ្តោតលើ និងអ្វីដែលគួរចែកចាយជាមួយឪពុកម្តាយ ឬអាណាព្យាបាល ។
-
ចាប់ផ្តើមសារដោយការណែនាំខ្លួនឯង ។
-
ថ្លែងអំណរគុណយ៉ាងស្មោះសរចំពោះឱកាសដែលមានសិស្សរូបនេះនៅក្នុងថ្នាក់ ។
-
ប្រាប់អ្វីមួយដែលវិជ្ជមាន និងជាក់លាក់ដែលអ្នកបានសង្កេតឃើញឲ្យបានច្បាស់លាស់ និងសាមញ្ញ ។
នៅពេលអ្នកប្រាស្រ័យទាក់ទងនូវចំណុចវិជ្ជមានដែលអ្នកបានសង្កេតឃើញប្រាប់ទៅឪពុកម្ដាយដោយចិត្តស្មោះសរ និងប្រកបដោយការអធិស្ឋាន នោះសិស្សនឹងទទួលអារម្មណ៍សេចក្តីស្រឡាញ់របស់អ្នកក្នុងរបៀបដ៏មានឥទ្ធិពល ។
គំរូ
បងប្រុស ខាម៉ាហ្គូ ស្រឡាញ់សិស្សរបស់គាត់ ហើយពិតជាចង់ប្រាស្រ័យទាក់ទងសេចក្ដីស្រឡាញ់នោះតាមរបៀបដ៏សមរម្យ ។ គាត់អធិស្ឋានដើម្បីដឹងថា តើនរណាដែលគាត់អាចចែកចាយសារវិជ្ជមានប្រាប់ទៅឪពុក ឬម្តាយបាន ហើយមានអារម្មណ៍បំផុសគំនិតឲ្យសរសេរទៅកាន់ឪពុកម្តាយរបស់ ជែកសុន ។ គាត់កត់សម្គាល់ឃើញថា គាត់មិនដែលសុំឲ្យ ជែកសុន យកគម្ពីររបស់គាត់ទេ ហើយថា ជែកសុន តែងតែមានឆន្ទៈជួយ ។ បងប្រុស ខាម៉ាហ្គូ ផ្ញើអ៊ីម៉ែលមួយដែលនិយាយថា ៖
-
ជូនចំពោះបងប្រុស និងបងស្រី ឌូវ៉ល
-
ខ្ញុំឈ្មោះ ខាម៉ាហ្គូ ហើយខ្ញុំជាគ្រូបង្រៀនថ្នាក់សិក្ខាសាលារបស់ ជែកសុន ។ ខ្ញុំពិតជាមានអំណរណាស់ដែលមានគាត់ក្នុងថ្នាក់របស់ខ្ញុំ ។ ខ្ញុំគ្រាន់តែចង់ឲ្យបងប្រុសបងស្រីដឹងថា ជែកសុន តែងតែយកព្រះគម្ពីររបស់គាត់មកថ្នាក់រៀន ហើយតែងមានឆន្ទៈជួយគ្រប់អ្វីដែលខ្ញុំត្រូវការ ។ សូមអរគុណចំពោះអ្វីៗទាំងអស់ដែលបងកំពុងធ្វើដើម្បីជួយ និងគាំទ្រគាត់ ។
-
ដោយក្ដីស្មោះស្ម័គ្រ
-
បងប្រុស ខាម៉ាហ្គូ
អនុវត្ត
សូមសរសេរសារវិជ្ជមានមួយទៅកាន់ឪពុក ឬម្ដាយសម្រាប់ស្ថានភាពដូចខាងក្រោម ៖
-
ស៊ូសាន ហាក់ដូចជាអង្គុយនៅឆ្ងាយដាច់គេក្នុងថ្នាក់ ហើយអ្នកចង់បង្ហាញសេចក្ដីស្រឡាញ់របស់អ្នកចំពោះនាង ។ នៅពេលអ្នកកំពុងអធិស្ឋានអំពីវា អ្នកសម្គាល់ឃើញថា គាត់ស្ម័គ្រចិត្តជួយសិស្សម្នាក់ដែលកំពុងមានបញ្ហាក្នងការស្វែងរកបទគម្ពីរ ។
-
សូមគិតអំពីសិស្សម្នាក់របស់អ្នកដែលតែងតែជួយពង្រឹងសិស្សក្នុងថ្នាក់របស់អ្នក ។ សូមពិចារណាប្រកបដោយការអធិស្ឋាន ហើយប្រាប់សិស្សនូវអ្វីមួយដែលអ្នកបានសង្កេតឃើញអំពីគាត់ ។
ពិភាក្សា ឬសញ្ជឹងគិត
-
តើការណ៍នេះអាចមានឥទ្ធិពលអ្វីខ្លះដល់សិស្សម្នាក់ៗ និងទំនាក់ទំនងរបស់ពួកគេជាមួយព្រះអង្គសង្គ្រោះកាលវេលាចេះតែកន្លងទៅ ? តើវាអាចមានឥទ្ធិពលដល់ការចូលរួមរបស់សិស្ស ឬអារម្មណ៍នៃការមានចំណែកក្នុងថ្នាក់ដោយរបៀបណា ?
-
សូមពិចារណាពីពេលមួយដែលការបង្ហាញសេចក្តីស្រឡាញ់ ឬអំណរគុណរបស់នរណាម្នាក់បានពង្រឹងដល់ទំនាក់ទំនងរបស់អ្នកជាមួយនឹងព្រះអង្គសង្គ្រោះ ។
រួមបញ្ចូល
-
សូមចាប់ផ្តើមដោយការជ្រើសរើសសិស្សម្នាក់ ឬពីរនាក់ក្នុងមួយថ្ងៃដែលអ្នកទទួលអារម្មណ៍ឲ្យរៀនប្រើជំនាញនេះជាមួយគ្នា ។ សូមបន្តធ្វើដូច្នេះរហូតដល់វាក្លាយជារឿងធម្មតា ហើយដរាបណាដែលព្រះវិញ្ញាណដឹកនាំ ។
តើចង់បានបន្ថែមទៀតទេ ?
-
ជីន ប៊ី ប៊ីងហាំ « Teaching Truth in the Language of Love » ( ការចាក់ផ្សាយអំពីការបំពាក់បំប៉នប្រចាំឆ្នាំរបស់ថ្នាក់សិក្ខាសាលា និងថ្នាក់វិទ្យាស្ថាន នៅថ្ងៃទី ១៩ ខែ មករា ឆ្នាំ ២០២១ ) នៅលើគេហទំព័រ broadcasts.ChurchofJesusChrist.org