« ជួយសិស្សឲ្យស្គាល់សេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់នៅក្នុងជីវិតពួកគេ » ជំនាញអភិវឌ្ឍន៍គ្រូបង្រៀន ៖ ផ្តោតលើព្រះយេស៊ូវគ្រីស្ទ ( ឆ្នាំ ២០២៣ )
« ជួយសិស្សឲ្យស្គាល់សេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់នៅក្នុងជីវិតពួកគេ » ជំនាញអភិវឌ្ឍន៍គ្រូបង្រៀន ៖ ផ្តោតលើព្រះយេស៊ូវគ្រីស្ទ
ជួយសិស្សឲ្យមកកាន់ព្រះយេស៊ូវគ្រីស្ទ
ជួយសិស្សឲ្យស្គាល់សេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់នៅក្នុងជីវិតពួកគេ ។
ជំនាញ
សួរសំណួរដែលផ្តោតលើការភ្ជាប់ព្រះចេស្តា សេចក្តីមេត្តាករុណា និងឥទ្ធិពលរបស់ព្រះអម្ចាស់ទៅនឹងសេចក្តីពិតដែលបានបង្រៀននោះ ។
កំណត់និយមន័យ
ព្រះចេស្ដាកើតមាន នៅពេលយើងភ្ជាប់ការខិតខំរបស់យើងដើម្បីរស់នៅតាមគោលការណ៍នៃដំណឹងល្អ ទៅនឹងព្រះអង្គសង្គ្រោះរបស់យើងគឺព្រះយេស៊ូវគ្រីស្ទ ។ សូមចំណាយពេលក្នុងការរៀបចំរបស់អ្នក ដើម្បីពិចារណាអំពីអ្វីដែលគោលការណ៍នៅក្នុងបណ្តុំបទគម្ពីរជួយអ្នកឲ្យដឹង និងយល់អំពីព្រះយេស៊ូវគ្រីស្ទ ។ បន្ទាប់មក សូមបង្កើតសំណួរយ៉ាងប្រុងប្រយ័ត្នដែលអញ្ជើញសិស្សឲ្យពិចារណា អំពីអ្វីដែលពួកគេអាចរៀនអំពីសេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ទ្រង់មកពីសេចក្តីពិតដែលកំពុងបង្រៀននោះ ។ ក្រៅពីជួយសិស្សឲ្យយល់គោលលទ្ធិ សំណួរប្រភេទនេះក៏អាចជួយពួកគេឲ្យឃើញអំពីរបៀបដែលការរស់នៅតាមគោលការណ៍នោះនឹងជួយពួកគេឲ្យដកពិសោធនូវសេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ទ្រង់ ព្រមទាំងប្រែក្លាយកាន់តែដូចទ្រង់ផងដែរ ។ សំណួរប្រភេទនេះក៏អាចជួយសិស្សឲ្យពិចារណាអំពីរបៀបដែលព្រះយេស៊ូវគ្រីស្ទនឹងជួយពួកគេឲ្យរស់នៅតាមគោលលទ្ធិនោះផងដែរ ។
គំរូ
ជំនួសឲ្យការសួរថា …
-
ហេតុអ្វីការរស់នៅតាមច្បាប់ដង្វាយមួយភាគក្នុងដប់សំខាន់ ?
-
ហេតុអ្វីយើងគួរប្រែចិត្តរាល់ថ្ងៃ ?
ផ្ទុយទៅវិញ សូមព្យាយាមសួរថា …
-
តើការរស់នៅតាមច្បាប់ដង្វាយមួយភាគក្នុងដប់បានបង្រៀនអ្នកអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
-
តើអ្នកបានរៀនអ្វីខ្លះអំពីសេចក្ដីមេត្តាករុណារបស់ព្រះអង្គសង្គ្រោះ តាមរយៈការប្រែចិត្តរាល់ថ្ងៃ ?
សូមចុចនៅត្រង់នេះដើម្បីមើលវីដេអូអំពីគំរូនេះ ។
អនុវត្ត
សូមអនុវត្តដោយផ្លាស់ប្តូរសំណួរខាងក្រោម តាមរបៀបដែលជួយសិស្សឲ្យភ្ជាប់សេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់ទៅនឹងសេចក្តីពិតដែលកំពុងបង្រៀននោះ ។
ជំនួសឲ្យការសួរថា …
-
ហេតុអ្វីវាសំខាន់ដើម្បីសិក្សាព្រះគម្ពីររៀងរាល់ថ្ងៃ ?
-
តើព្រះចេស្តាអ្វីខ្លះដែលកើតមកពីការចូលរួមព្រះវិហារបរិសុទ្ធ ?
ផ្ទុយទៅវិញ សូមព្យាយាមសួរថា …
ពិភាក្សា ឬសញ្ជឹងគិត
-
តើអ្នកបានរៀនមើលឃើញថា គោលការណ៍ខាងគោលលទ្ធិនោះប្រែកាន់តែមានអត្ថន័យយ៉ាងដូចម្តេច នៅពេលអ្នកភ្ជាប់គោលការណ៍ទាំងនោះទៅនឹងសេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់ ?
-
តើការធ្វើបែបនេះអាចជួយសិស្សរបស់យើងឲ្យយល់កាន់តែច្បាស់ និងពឹងផ្អែកលើការបង្រៀន និងដង្វាយធួនរបស់ព្រះយេស៊ូវគ្រីស្ទយ៉ាងដូចម្តេច ?
រួមបញ្ចូល
សូមមើលផែនការមេរៀនបន្ទាប់របស់អ្នក ។ សូមចំណាយពេល ១០ នាទីកែសម្រួលសំណួរ ដើម្បីជួយសិស្សឲ្យភ្ជាប់សេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់ទៅនឹងសេចក្តីពិតដែលកំពុងបង្រៀន ។
តើចង់បានបន្ថែមទៀតទេ ?
-
ឆាដ អេច វិប « We Talk of Christ, We Rejoice in Christ » ( ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថានសាសនាប្រចាំឆ្នាំ នៅថ្ងៃទី ១២ ខែ មិថុនា ឆ្នាំ ២០១៨ ) នៅលើគេហទំព័រ broadcasts.ChurchofJesusChrist.org
-
ឆាដ អេច វិប « Empathy » ( ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថានសាសនាប្រចាំឆ្នាំ នៅថ្ងៃទី ២៦ ខែ មករា ឆ្នាំ ២០២១ ) នៅលើគេហទំព័រ broadcasts.ChurchofJesusChrist.org
ជំនាញ
ផ្តល់ការអញ្ជើញដែលជួយសិស្សឲ្យស្គាល់សេចក្តីស្រឡាញ់ ព្រះចេស្ដា និងសេចក្តីមេត្តាករុណារបស់ព្រះអម្ចាស់នៅក្នុងបទពិសោធន៍របស់ពួកគេផ្ទាល់ ។
កំណត់និយមន័យ
អ្នកអាចជួយសិស្សឲ្យមកកាន់ព្រះយេស៊ូវគ្រីស្ទបាន ដោយការអញ្ជើញពួកគេឲ្យស្គាល់សេចក្តីស្រឡាញ់ ព្រះចេស្ដា និងសេចក្តីមេត្តាករុណារបស់ព្រះអម្ចាស់នៅក្នុងបទពិសោធន៍របស់ពួកគេផ្ទាល់ ។ បន្ទាប់ពីអ្នកបានរកឃើញនូវបទគម្ពីរមួយ ដែលបានពិព័ណ៌នាពីសេចក្តីស្រឡាញ់ ព្រះចេស្តា ឬសេចក្តីមេត្តាករុណារបស់ទ្រង់រួចហើយ ៖
-
សូមបង្ហាញនូវទំនុកចិត្តថា សិស្សនឹងដកពិសោធន៍នូវសេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះគ្រីស្ទនៅក្នុងជីវិតពួកគេ ។
-
សូមទុកពេលឲ្យសិស្សនឹកចាំពីគ្រាមួយ នៅពេលដែលពួកគេមានអារម្មណ៍ថាមានសេចក្តីស្រឡាញ់ ព្រះចេស្តា ឬសេចក្តីមេត្តាករុណារបស់ព្រះអង្គសង្គ្រោះនៅក្នុងបទពិសោធន៍របស់ពួកគេផ្ទាល់ ( គ្រាទាំងនេះអាចនៅក្នុងអតីតកាល ឬបច្ចុប្បន្នកាល ) ។
-
សូមសួរប្រសិនបើមានអ្នកស្ម័គ្រចិត្តចង់ឡើងចែកចាយបទពិសោធន៍ផ្ទាល់ខ្លួនមួយ ។
ពេលដែលសិស្សកាន់តែមានសមត្ថភាពស្គាល់ពីតួនាទីរបស់ព្រះគ្រីស្ទនៅក្នុងបទពិសោធន៍ផ្ទាល់ខ្លួនរបស់ពួកគេ នោះពួកគេនឹងមានអារម្មណ៍កាន់តែខិតជិតទ្រង់ ហើយទំនាក់ទំនងរបស់ពួកគេជាមួយនឹងទ្រង់ក៏នឹងត្រូវបានពង្រឹងផងដែរ ។
គំរូ
នេះគឺជាឧទាហរណ៍នៃអ្វីដែលវាអាចមាន ៖
-
គោលលទ្ធិ និងសេចក្ដីសញ្ញា ៦១:១ ពិពណ៌នាព្រះយេស៊ូវគ្រីស្ទថាជា « អ្នកដែលមានអស់ទាំងព្រះចេស្តា » ។ ដើម្បីជួយសិស្សឲ្យស្គាល់នូវព្រះចេស្តារបស់ទ្រង់ក្នុងបទពិសោធន៍ផ្ទាល់របស់ពួកគេ អ្នកអាចនឹងនិយាយថា « ខ្ញុំជឿថា ប្អូនម្នាក់ៗធ្លាប់មាននូវបទពិសោធន៍ជាច្រើន ដែលប្អូនៗបានទទួលអារម្មណ៍នៃព្រះចេស្តារបស់ព្រះអង្គសង្គ្រោះក្នុងជីវិតរបស់ប្អូន ។ សូមចំណាយពេលបីនាទីទៀតសរសេរអំពីគ្រាមួយដែលប្អូនៗបានទទួលអារម្មណ៍ពីព្រះចេស្ដារបស់ទ្រង់ » ។ បន្ទាប់ពីសិស្សភាគច្រើនបានបញ្ចប់លំហាត់សរសេររួច អ្នកអាចសួរថា « ប្រសិនបើវាមិនផ្ទាល់ខ្លួនពេកទេ តើមាននរណាម្នាក់មានឆន្ទៈក្នុងការចែកចាយបទពិសោធន៍របស់ពួកគេជាមួយសិស្សក្នុងថ្នាក់ដែរឬទេ ? »
អនុវត្ត
សូមឆ្លើយសំណួរមួយ ឬច្រើនខាងក្រោមនេះ ៖
-
លូកា ៥ មាននូវគំរូមួយចំនួនអំពីព្រះចេស្តាព្យាបាលរបស់ព្រះអង្គសង្គ្រោះ ។ សូមអាន លូកា ៥:១២–១៧ ។ សូមរៀនសរសេរការអញ្ជើញមួយ ឬពីរ ដែលនឹងជួយសិស្សឲ្យសញ្ជឹងគិត នៅពេលពួកគេបានទទួលបទពិសោធន៍ពីព្រះចេស្តាព្យាបាលរបស់ព្រះគ្រីស្ទដូចគ្នាដែរ ។
-
សូមបើកទៅមេរៀនកម្មវិធីសិក្សាបន្ទាប់របស់អ្នក ។ សូមស្វែងរកកន្លែងមួយនៅក្នុងបណ្តុំបទគម្ពីរ ជាកន្លែងដែលអ្នកអាចអនុវត្តការសរសេរការអញ្ជើញមួយ ឬពីរ ដើម្បីជួយសិស្សឲ្យពិចារណាអំពីពេលដែលពួកគេបានដកពិសោធន៍ដោយផ្ទាល់នូវសេចក្តីស្រឡាញ់ ព្រះចេស្តា ឬសេចក្តីមេត្តាករុណារបស់ព្រះអម្ចាស់ ។
ពិភាក្សា ឬសញ្ជឹងគិត
-
តើអ្នកបានធ្វើការអញ្ជើញអ្វីខ្លះនាពេលថ្មីៗនេះ ដើម្បីជួយសិស្សឲ្យស្គាល់សេចក្ដីស្រឡាញ់ ព្រះចេស្តា និងសេចក្ដីមេត្តាករុណារបស់ព្រះគ្រីស្ទនៅក្នុងជីវិតផ្ទាល់ខ្លួនរបស់ពួកគេ ?
-
តើអ្នកអាចចាំថាត្រូវផ្តល់ការអញ្ជើញប្រភេទនេះនៅក្នុងបទពិសោធន៍បន្ទាប់របស់អ្នកជាមួយសិស្សដោយរបៀបណា ?
-
ដោយសារតែបទពិសោធន៍ដែលអ្នកមានជាមួយនឹងសេចក្តីស្រឡាញ់ សេចក្ដីមេត្ដាករុណា និងព្រះចេស្ដារបស់ព្រះគ្រីស្ទ តើការណ៍នោះជំរុញអ្នកឲ្យបន្ត ឬប្រហែលជាបង្កើនការខិតខំប្រឹងប្រែងរបស់អ្នក ដើម្បីជួយសិស្សរបស់អ្នកឲ្យមើលឃើញទ្រង់នៅក្នុងជីវិតរបស់ពួកគេដោយរបៀបណា ?
រួមបញ្ចូល
សូមជ្រើសរើសបណ្តុំបទគម្ពីរនាពេលខាងមុខមួយ ដែលបង្ហាញពីសេចក្តីមេត្តាករុណា សេចក្តីស្រឡាញ់ ឬព្រះចេស្តារបស់ព្រះគ្រីស្ទ ។ សូមបង្កើតការអញ្ជើញមួយដោយប្រុងប្រយ័ត្នក្នុងផែនការមេរៀន ដើម្បីជួយសិស្សឲ្យមើលឃើញព្រះអង្គសង្គ្រោះនៅក្នុងបទពិសោធន៍ផ្ទាល់ខ្លួនរបស់ពួកគេ ។
តើចង់បានបន្ថែមទៀតទេ ?
-
« ជួយសិស្សឲ្យមកកាន់ព្រះយេស៊ូវគ្រីស្ទ » ការបង្រៀនតាមរបៀបរបស់ព្រះអង្គសង្គ្រោះ ( ឆ្នាំ ២០២២ ) ទំព័រ ៨–៩
-
ឌៀថើរ អេហ្វ អុជដុហ្វ « The Gift of Grace » Ensign ឬ Liahona ខែ ឧសភា ឆ្នាំ ២០១៥ ទំព័រ ១០៧–១១០
-
រ័សុល អិម ណិលសុន « The Everlasting Covenant » Liahonaខែ តុលា ឆ្នាំ ២០២២ ទំព័រ ៤–១១