Faalogo ma le Alofa

Faamatala

E mafai ona e faasoa atu o le faalogo ma le alofa o le tomai lea e faalogo ai i isi e faaaoga ai e le gata i ou taliga ae faapea foi ou mata ma lou loto. O le faia o se taumafaiga magafagafa e faalogo i le mea o loo fai mai ai le isi tagata ma matau pe faapefea ona latou fesootai atu, e mafai ona fesoasoani i le tagata ia lagonaina le alofaina ma le faamaoniaina. O le faalogo ma le alofa e valaaulia ai le Agaga e faamanuia i tatou i le meaalofa o le iloatino. E mafai ona tatou malamalama ma lagonaina manaoga o isi.

Na aoao mai Sister Reyna I. Aburto:

O le faalogo atu ma le alofa o se tasi lea o meaalofa silisili e mafai ona tatou ofoina atu, ma atonu o le a mafai ona tatou fesoasoani e tauave pe aveesea ai ao mamafa ia e taotaomia ai ē pele ia i tatou ma uo ina ia mafai, e ala i lo tatou alolofa, ona latou toe lagona ai le Agaga Paia ma vaaia ai le malamalama e sau mai ia Iesu Keriso. (Reyna I. Aburto, “I Mala i Manū, Iesu, Afio Mai!,” Liahona, Nov. 2019, 58)

Ina ia faaleleia ou tomai o le faalogo, e mafai ona e:

• Tuu ese mea faalavefau (e pei o masini eletonika).

• Vaai i le tagata pe a latou tautatala ma taulai atu i a latou upu ma gagana o le tino.

• Ia gauai atu i le mea o loo fai mai ai le isi tagata nai lo le fuafuaina o mea o le a sosoo ona e fai atu ai.

• Fai atu fesili tulitatao e faaitiitia ai le lē malamalama.

• Faaali atu lou fiafia moni e ala i le toe ta’u atu o mea na fai mai ai le tagata ina ia latou iloa ua e malamalama ia i latou.

• Tuuese le faamasinoga ma faitioga.

Faataitaiga

Mafaufau e faaali atu le lisi o tomai o le faalogo i luga ma valaaulia tagata aoga e tagai i ai a o e faaalia le ala e faalogo ai ma le alofa.

Faatulaga ni nofoa se lua i luma o le vasega ma valaaulia se volenitia e nofo faafesagai ma oe. E mafai ona e faaalia le auala e avea ai ma se tagata e faalogo lelei a o ta’u atu e le tamaitiiti aoga volenitia ia te oe se mea sa aoga i se lesona talu ai nei po o a latou suesuega patino o le talalelei.

Faataitai

Valaaulia tagata aoga e faatulaga i latou lava i ni paga po o ni vaega toalaiti ma faataitai o latou tomai o le faalogo lelei e ala i le feauauai e faasoa ma faalogo. E mafai ona latou faataitaia lenei tomai e ala i le talanoaina o se lesona talu ai nei po o a latou suesuega faaletagata lava ia o tusitusiga paia. Pe e mafai foi ona latou filifili e talanoaina se tasi o fuaitau nei o mau ma lana fesili o loo avatu faatasi ai.

Fuaitau faaopoopo mo faataitaiga:

• Isaia 12:2. O anafea na e faatoilaloina ai pe faatoilalo ai e se tasi e te iloa le fefe ma faatuatuaina le Alii i se tulaga faigata?

• Ioane 16:33. O le a se mea e fesoasoani ia te oe pe a e lagona le popole e uiga i le tulaga o le lalolagi?

• 1 Nifae 8:33. E faapefea ma pe o le a e taulimaina foi le tauemuina ona o ou talitonuga?

• Mataupu Faavae ma Feagaiga 121:1 O le a sau tala e fai atu e fesoasoani ai i se uo po o se tagata o le aiga e lagona e pei e le o faafofoga mai le Atua?

Valaaulia tagata aoga e talanoaina po o le a le mea na lelei le aoga ma po o le a le mea sa faigata pe a faataitaia lenei tomai. O i latou na faasoa mai atonu e faamatalaina o latou lagona a o taumafai isi e faalogo ma le alofa.

Valaaulia ma Toe Tulitatao

Valaaulia tagata aoga e faataitai lenei tomai i a latou fegalegaleaiga i le āluga o le vaiaso. E mafai foi ona latou faamauina mea e fai e isi e faalogo ai ma le alofa. I se vasega o le a sosoo ai, valaaulia tagata aoga e faasoa mai pe na faapefea ona faaleleia lo latou faalogo ma le alofa.