Lē Ioeina e aunoa ma le Feeseesea’i

Faamatala

Faaali atu ma faasoa atu le saunoaga lenei a Elder Quentin L. Cook:

O le toatele o tagata o lenei lalolagi ua fefefe ma ita le tasi i le isi. E ui ina tatou malamalama i nei lagona, e tatau ona tatou faaaloalo i a tatou aoaoga ma migao i a tatou fegalegaleaiga. E moni lava lenei mea pe a tatou lē ioeina. Na aoao mai le Faaola ia tatou alolofa atu e oo lava i o tatou fili. … Ou te valaaulia i tatou uma taitoatasi, ia iloa o lo tatou feeseeseai o se fuafaatatau moni lea o ituaiga tagata tatou te i ai ma pe o tatou mulimuli moni i le Faaola. E le afaina pe a e lē ioe i se mea, ae e lē talafeagai le feeseeseai. … Afai tatou te faaali atu le alofa ma le faaaloalo e oo lava i tulaga faigata, o le a avea atili ai i tatou e faapei o Keriso. (Quentin L. Cook, “Tatou te Mulimuli ia Iesu Keriso,” Liahona, Me 2010, 84–85)

Faamalamalama atu o se tasi o auala e mafai ai ona tatou lē ioe e aunoa ma le feeseeseai o le tuuina atu lea o tali e uunaia ai le faaaloalo nai lo finauga.

Faataitaiga

Faaali atu le siata lenei, ma talanoaina o se vasega ia eseesega i le va o faamatalaga i koluma e lua.

O Tali e Valaaulia ai Finauga	O Tali e Valaaulia ai le Faaaloalo
O Tali e Valaaulia ai Finauga Ou te le ioe ia te oe ona ua e sese lava.	O Tali e Valaaulia ai le Faaaloalo Faafetai atu mo le faasoaina mai o ou manatu. E ui ina eseese o ta talitonuga, ou te faafetai ua ta lagona uma le mafanafana e faasoa atu …
O Tali e Valaaulia ai Finauga E te le malamalama. E te le iloa le mea o loo e talanoa i ai.	O Tali e Valaaulia ai le Faaaloalo E mafai ona e fesoasoani mai ia ou malamalama lelei i le mea o loo e mafaufau i ai … ?
O Tali e Valaaulia ai Finauga Ou te mautinoa o loo ia te a’u le upumoni ma o le mea ou te talitonu e sa’o.	O Tali e Valaaulia ai le Faaaloalo Ou te faaaloalo i ou talitonuga ma e mafai ona vaaia lo latou taua ia te oe. Sei ou faasoa atu le pogai e taua ai o‘u talitonuga ia te a’u.
O Tali e Valaaulia ai Finauga O oe o se tagata lē talitonu.	O Tali e Valaaulia ai le Faaaloalo Ou te le o logolelei i lau tala na fai mai nei. Pe o sao lo‘u malamalama o le uiga lenei o lau tala, e faapea… ?

Faataitai

Valaaulia tagata aoga e galulue faatasi ma se paga ma faataitai ona feauaua’i i le fatuina o tali faaaloalo i tulaga nei:

1. O Alfonso o loo i luga o se vaalele o loo faitauina le Tusi a Mamona. O le tagata o loo i ona autafa e fesili atu po o le a le mea o loo ia faitauina. Ina ua ta’u atu e Alfonso ia te ia e uiga i le Tusi a Mamona, sa ia fai mai, “Ua ou faalogo o le tusi lena o se talafatu moni lava. E sili atu le na o le pipii i le Tusi Paia.” Ua tali atu Alfonso, …

2. O le vasega inisitituti a Siuli o loo talanoa e uiga i matafaioi a alii ma tamaitai. O se tasi o alii talavou, e igoa ia Logan, ua faapea mai i se leo leotele ma le fiapule, “Talu ai o se alii e umia le perisitua, o ia e i ai le upu faaiu i mea e tutupu i lona aiga.” Ua lagona e Siuli o le manatu faaalia a Lokeni e faailoga itupa ma lē manaia. Ua sii lona lima ma fai atu, …

3. O le tagata e potu faatasi ma Mata sa faitio i tulaga faatonuina o le Ekalesia. Ua lagona e Mata le lē manaia o manatu a lana uo, talu ai o lana uo e tele ona faafitauli o se taunuuga o ana filifiliga o ituaiga sitaili [o lona] olaga. I se tasi aso na fai mai ai le uo a Mata, “O lau lotu ua taofiofia oe mai le fiafia. Ua pei oe o se pagota i manatu ua lē toe aoga.” Ua tali atu Mata, …

Faaiu lenei gaioiga i le fai atu i ni tagata aoga se toatasi pe toalua e faasoa mai mea ua la aoaoina.

Valaaulia ma Toe Tulitatao

Fautuaina le vasega e faaaoga lenei tomai o le lē Ioeina ma isi e aunoa ma le feeseesea’i i a latou talanoaga faaletalalelei. E mafai ona e tulitatao e ala i le valaaulia o ni tagata aoga e faasoa o latou aafiaga ma le vasega. E mafai ona e fesili i le vasega po o le a le mea na lelei ona fai ma po o le a le mea na faigata. Vaavaai mo avanoa e faaauau ai ona faataitai lenei tomai i le vasega.