« ហេតុអ្វីសិក្សាព្រះគម្ពីរ ? » គំនិតសម្រាប់ការសិក្សាព្រះគម្ពីរ ( ឆ្នាំ ២០២១ )
« ហេតុអ្វីសិក្សាព្រះគម្ពីរ ? » គំនិតសម្រាប់ការសិក្សាព្រះគម្ពីរ
ហេតុអ្វីសិក្សាព្រះគម្ពីរ ?
ពេលយើងសិក្សាព្រះគម្ពីរដោយឧស្សាហ៍ នោះយើងកាន់តែខិតជិតព្រះយេស៊ូវគ្រីស្ទ និងយល់ពីដំណឹងល្អរបស់ទ្រង់ និងការបូជាដ៏ធួនរបស់ទ្រង់កាន់តែច្រើនឡើង ។ ព្យាការីនីហ្វៃបានលើកទឹកចិត្តយើងតាមរបៀបនេះ ៖
« ហេតុដូច្នេះហើយ អ្នករាល់គ្នាត្រូវតែឈានទៅមុខដោយខ្ជាប់ខ្ជួននៅក្នុងព្រះគ្រីស្ទ ដោយមានការភ្លឺថ្លានៃសេចក្ដីសង្ឃឹមដ៏ឥតខ្ចោះ ហើយដោយមានចិត្តស្រឡាញ់ព្រះ និងមនុស្សគ្រប់រូប ។ ហេតុដូច្នោះហើយ បើសិនជាអ្នករាល់គ្នាខិតខំជឿនទៅមុខ ដោយទទួលទាននូវព្រះបន្ទូលនៃព្រះគ្រីស្ទ ហើយកាន់ខ្ជាប់ដរាបដល់ចុងបំផុត មើលចុះ នោះព្រះវរបិតាទ្រង់មានព្រះបន្ទូលដូច្នេះថា ៖ អ្នករាល់គ្នានឹងមានជីវិតដ៏នៅអស់កល្បជានិច្ច » ( នីហ្វៃទី២ ៣១:២០ ) ។
ការបង្រៀនចេញមកពីព្រះគម្ពីរនឹងជួយយើងឲ្យត្រឡប់ទៅព្រះវរបិតាសួគ៌របស់យើងវិញ ។ ព្យាការីរបស់យើងនៅថ្ងៃចុងក្រោយ បានសុំយើងឲ្យសិក្សាព្រះគម្ពីរជាប្រចាំ ដោយផ្ទាល់ខ្លួន និងជាគ្រួសារ នៅពេលដែលអាចអនុវត្តបាន ។ ពួកលោកបានអញ្ជើញយើងឲ្យរៀនចេញពីបទពិសោធន៍របស់មនុស្សនៅក្នុងព្រះគម្ពីរ ហើយអនុវត្តដំណើររឿង និងការបង្រៀននៃព្រះគម្ពីរទៅក្នុងជីវិតយើងសព្វថ្ងៃនេះ ដូចដែលនីហ្វៃផ្ដល់ប្រឹក្សានៅក្នុង នីហ្វៃទី១ ១៩:២៣ ។ ព្យាការីទាំងបុរាណ និងសម័យទំនើប បានអញ្ជើញយើងឲ្យសិក្សាព្រះគម្ពីរ ហើយ « ទទួលទាននូវព្រះបន្ទូលទាំងឡាយនៃព្រះគ្រីស្ទ » ( នីហ្វៃទី២ ៣២:៣ ) ។
ប្រធាន រ័សុល អិម ណិលសុន ក៏បានបង្រៀនសេចក្ដីពិតដ៏សំខាន់នេះផងដែរ អំពី « ការទទួលទាន » នូវព្រះគម្ពីរទាំងឡាយ ៖
« ដើម្បីទទួលទានមានន័យច្រើនជាងការភ្លក់ ។ ទទួលទានមានន័យថា ក្រេបយកឱជារស ។ យើងក្រេបឱជារសនៃបទគម្ពីរ តាមរយៈការសិក្សាព្រះគម្ពីរនោះក្នុងស្មារតីនៃការរកមើលដោយអំណរអរ និង ការគោរពប្រតិបត្តិដ៏ស្មោះត្រង់ ។ នៅពេលយើងទទួលទានព្រះបន្ទូលទាំងឡាយនៃព្រះគ្រីស្ទ ព្រះបន្ទូលទាំងនោះបានជាប់ ‹ ក្នុងចិត្តខាងសាច់ឈាម › [ កូរិនថូស ទី២ ៣:៣ ] ។ ព្រះបន្ទូលទាំងនោះក្លាយជាផ្នែកទាំងមូលនៃលក្ខណៈរបស់យើង » ( « Living by Scriptural Guidance » Ensign ខែ វិច្ឆិកា ឆ្នាំ ២០០០ ទំព័រ ១៧ ) ។
ពេលយើងរួមចំណែកនៅក្នុងការសិក្សាផ្ទាល់ខ្លួន និងជាគ្រួសារដោយខ្ជាប់ខ្ជួន នោះយើង និងក្រុមគ្រួសារយើងអាចត្រូវបានណែនាំ ការពារ និងចម្រើនកម្លាំងដើម្បីទប់ទល់នឹងឧបសគ្គជាច្រើនក្នុងជីវិតយើង ។