ընտանիքները սուրբ գրություններ ուսումնասիրելիս

Սուրբ գրությունների ընտանեկան ուսումնասիրությունը բարելավելու գաղափարներ

Սուրբ գրությունների կանոնավոր ուսումնասիրությունը ընտանիքով զորեղ միջոց է, որն օգնում է ձեր ընտանիքին սովորել ավետարանը: Կարևոր չէ, թե ինչքան եք կարդում կամ որքան ժամանակ եք հատկացնում ընթերցանությանը, կարևոր է, որ հաստատուն լինեք ձեր ջանքերում: Երբ սուրբ գրությունների ուսումնասիրությունը դարձնեք ձեր ընտանեկան կյանքի կարևոր մասը, կօգնեք ձեր ընտանիքի անդամներին ավելի մոտենալ Հիսուս Քրիստոսին և կառուցել իրենց վկայությունները Նրա խոսքի հիմքի վրա:

Խորհեք հետևյալ հարցերի շուրջ.

• Ինչպե՞ս կարող եք խրախուսել ընտանիքի անդամներին ինքնուրույն ուսումնասիրել սուրբ գրությունները:

• Ի՞նչ կարող եք անել, որ խրախուսեք ընտանիքի անդամներին կիսվել իրենց սովորածով:

• Ամենօրյա ուսուցման ժամանակ ինչպե՞ս կարող եք շեշտել սկզբունքները, որոնք սովորում եք սուրբ գրություններից:

Հիշե՛ք, որ տունը իդեալական վայր է ավետարանը սովորելու և ուսուցանելու համար: Տանը դուք կարող եք սովորել և ուսուցանել ավետարանն այնպիսի եղանակներով, որոնք հնարավոր չէ կիրառել Եկեղեցու դասերին: Դրսևորեք ստեղծագործական մտածողություն, երբ ուղիներ եք փնտրում՝ օգնելու ձեր ընտանիքին սովորել սուրբ գրքերից: Օգտագործեք հետևյալ գաղափարներից մի քանիսը, որպեսզի ընդլայնեք սուրբ գրությունների ընտանեկան ուսումնասիրությունը.

Օգտագործեք երաժշտություն

Երգեք երգեր, որոնք արտահայտում են սուրբ գրություններում ուսուցանվող սկզբունքները:

քույր և եղբայր սուրբ գրություններն ուսումնասիրելիս

Կիսվեք կարևոր սուրբ գրություններով

Ընտանիքի անդամներին ժամանակ տվեք կիսվել սուրբ գրությունների հատվածներով, որոնք նրանք կարևոր են համարել իրենց անձնական ուսումնասիրության ժամանակ:

Օգտագործեք ձեր բառերը

Հրավիրեք ընտանիքի անդամներին ամփոփել իրենց բառերով այն, ինչ իմացան ձեր ուսումնասիրած սուրբ գրություններից:

Կիրառեք սուրբ գրությունները ձեր կյանքում

Սուրբ գրությունների հատվածը կարդալուց հետո խնդրեք ընտանիքի անդամներին կիսվել, թե հատվածը որքանո՞վ է կիրառելի նրանց կյանքում:

Տվեք ձեր հարցը

Հրավիրեք ընտանիքի անդամներին ավետարանին առնչվող որևէ հարց տալ, իսկ հետո փնտրեք հատվածներ, որոնք կօգնեն պատասխանել հարցին:

Ցուցադրեք որևէ սուրբ գրություն

Ընտրեք որևէ հատված, որը կարևոր եք համարում և ցուցադրեք այնպիսի տեղում, որտեղ ընտանիքի անդամները կկարողանան հաճախ տեսնել այն։ Հրավիրեք ընտանիքի անդամներին հերթով ընտրել և ցուցադրել որևէ սուրբ գրություն:

Կազմեք սուրբ գրությունների ցուցակ

Ընտանիքով ընտրեք մի քանի հատվածներ, որոնք կկամենայիք քննարկել հաջորդ շաբաթ:

Անգիր սովորեք սուրբ գրությունները

Ընտրեք սուրբ գրության որևէ հատված, որը հատկապես կարևոր է ձեր ընտանիքի համար և հրավիրեք ընտանիքի անդամներին անգիր սովորել՝ կրկնելով այն ամեն օր կամ հուշող որևէ խաղ խաղալով:

Անցկացրեք առարկայական դասեր

Գտեք առարկաներ, որոնք առնչվում են գլուխներին և հատվածներին, որոնք դուք կարդում եք ընտանիքով: Հրավիրեք ընտանիքի անդամներին խոսել այն մասին, թե յուրաքանչյուր առարկան ինչպես է առնչվում սուրբ գրությունների ուսմունքներին:

մայրը ուսուցանում է երեխային

Ընտրեք որևէ թեմա

Խնդրեք ընտանիքի անդամներին հերթով ընտրել որևէ թեմա, որը ընտանիքը կուսումնասիրի միասին: Օգտագործեք Թեմատիկ ուղեցույցը, Աստվածաշնչի բառարանը, կամ Սուրբ գրությունների ուղեցույցը (scriptures.ChurchofJesusChrist.org)՝ այս թեմայի վերաբերյալ սուրբ գրությունների հատվածներ գտնելու համար:

Նկարեք որևէ նկար

Ընտանիքով կարդացեք մի քանի հատվածներ, իսկ հետո ժամանակ տրամադրեք ընտանիքի անդամներին՝ նկարելու ինչ-որ բան, որն առնչվում է ձեր կարդացածի հետ: Ժամանակ հատկացրեք՝ քննարկելու միմյանց նկարները:

Բեմադրեք որևէ պատմություն

Պատմությունը կարդալուց հետո հրավիրեք ընտանիքի անդամներին բեմադրել այն: Այնուհետև խոսեք այն մասին, թե պատմությունն ինչպես է առնչվում այն իրավիճակների հետ, որոնք դուք ունենում եք անհատապես և ընտանիքով:

Երեց Դեյվիդ Ա. Բեդնարն ասել է․ «Յուրաքանչյուր ընտանեկան աղոթք, սուրբ գրությունների ընտանեկան ուսումնասիրության դրվագ, և յուրաքանչյուր ընտանեկան երեկո հանդիսանում է վրձնի մի հպում՝ մեր հոգիների կտավի վրա։ Ոչ մի այլ իրադարձություն չի կարող լինել ավելի տպավորիչ և հիշարժան: Սակայն, ինչպես դեղին, ոսկեգույն և դարչնագույն ներկի վրձնահարվածներն են լրացնում միմյանց և կազմում տպավորիչ գլուխգործոց, այնպես էլ թվացյալ փոքր գործեր կատարելու մեր հետևողական ջանքերը կտան նշանակալից հոգևոր արդյունքներ» (“More Diligent and Concerned at Home,” Liahona, Nov. 2009, 19–20)։