Kapitulo 3: Leksyon 1—Ang Mensahe sang Pagpanumbalik sang Ebanghelyo ni Jesucristo
“Kapitulo 3: Leksyon 1—Ang Mensahe sang Pagpanumbalik sang Ebanghelyo ni Jesucristo,” Iwali ang Akon Ebanghelyo: Giya sa Pagpaambit sang Ebanghelyo ni Jesucristo (2023)
“Kapitulo 3: Leksyon 1,” Iwali ang Akon Ebanghelyo
Kapitulo 3: Leksyon 1
Ang Mensahe sang Pagpanumbalik sang Ebanghelyo ni Jesucristo
Litrato
Ang Unang Panan-awon
Mahimo nga Makapanghunahuna ang mga Tawo
May Dios bala matuod?
Paano ko mabatyagan nga mas malapit sa Dios?
Paano ko mahibal-an ang kamatuoran sa makalilibog nga kalibutan karon?
Paano ako mabuligan sang relihiyon?
Ngaa kadamo kaayo sang mga simbahan?
Ngaa kadamo kaayo sang akon mga kabudlayan?
Paano ako makakita sang kalinong sa tinion sang kagamo?
Paano ako mangin mas malipayon?
Sa ano makabulig ang propeta sa kalibutan sa karon nga panahon?
Halin sa pagsugod sang kalibutan, ginapahayag sang Dios ang ebanghelyo sa Iya mga anak paagi sa mga propeta. Ginhimo Niya ini paagi sa Iya Anak nga si Jesucristo. Sang dumaan nga panahon, ginpahayag ni Jesus ang ebanghelyo sa mga propeta pareho kay Adan, Noe, Abraham, kag Moises. Pero kadamo sang mga nagsikway sini.
Duha ka libo katuig ang nagligad, si Jesucristo Mismo ang nagtudlo sang Iya ebanghelyo kag ginpasad ang Iya Simbahan. Ginsikway man sang mga tawo si Jesus. Pagkatapos lang gid sang Iya kamatayon, may dako kaayo nga pagtalikod sa kamatuoran kag Simbahan sang Ginuo. Ang kabug-osan sang ebanghelyo kag ang awtoridad sang priesthood nadula na sa duta.
Madamo nga siglo ang nagligad, nagtawag ang Dios sang isa pa ka propeta, si Joseph Smith. Ginpanumbalik sang Dios ang kabug-osan sang ebanghelyo paagi sa iya kag ginhatagan sia sang awtoridad nga i-organisar liwat ang Simbahan ni Jesucristo.
Ang kabug-osan sang ebanghelyo ni Jesucristo sa duta isa sang pinakadako nga bugay sa aton panahon. Ginabuligan kita sang ebanghelyo nga masabat ang pinakadalom nga mga pamangkot sa kabuhi. Ang buhi nga mga propeta nagagiya sa aton sa tunga sang mabudlay nga mga panahon. Ang awtoridad sang priesthood sang Dios ara na liwat sa duta para bugayan ang Iya kabataan.
Litrato
mga misyonero nga nagatudlo sang pamilya
Mga Panugyan sa Pagtudlo
Ini nga seksyon nagahatag sang sampol nga outline para buligan ka nga maghanda sa pagtudlo. May ari man ini sang halimbawa nga mga pamangkot kag mga imbitasyon nga pwede mo gamiton.
Samtang nagahanda ka sa pagtudlo, pamensara sing mainampuon ang tagsa ka sitwasyon kag espirituhanon nga panginahanglan sang tagsa ka tawo. Desisyoni kon ano ang makabulig gid nga itudlo. Maghanda nga ipaathag ang mga termino nga basi indi maintiendihan sang mga tawo. Magplano base sa kalawigon sang tiempo nga ihatag sa imo, tandai nga dapat malip-ot lang ang mga leksyon.
Pilia ang balaan nga mga kasulatan nga imo gamiton sa pagtudlo. Ang seksyon sang leksyon nga “Pundasyon nga Doktrina” nagalakip sang madamo nga makabulig nga balaan nga mga kasulatan.
Pamensara kon ano nga mga pamangkot ang imo gamiton samtang nagatudlo. Planoha nga ang mga imbitasyon nga imo itanyag makapaisog sa tagsa ka tawo nga mag-akto.
Hatagi importansya ang ginpangako nga mga bugay sang Dios, kag ipaambit ang imo testimonya parte sa imo ginatudlo.
Ano ang Pwede Mo Itudlo sa mga Tawo sa Sulod sang 15–25 ka Minutos
Magpili sang isa ukon madamo pa sa masunod nga mga prinsipyo nga itudlo. Ang pundasyon nga doktrina sang tagsa ka prinsipyo ara sa katapusan sining outline.
Ang Dios Amo ang Aton Mapinalanggaon nga Amay nga Langitnon
Ang Dios amo ang aton Amay nga Langitnon, kag Iya kita mga kabataan. Ginhimo Niya kita sa Iya dagway.
Personal kita nga kilala sang Dios kag palangga Niya kita.
Ang Dios may mahimayaon, perpekto nga lawas sang unod kag tul-an.
Gusto sang Dios nga bugayan kita sang kalinong kag kabug-osan sang kalipay nga magatiner sa katubtuban.
Tungod palangga kita sang Dios, ginpadala Niya ang Iya Anak nga si Jesucristo, para tubuson kita sa sala kag kamatayon.
Ginapahayag sang Dios ang Ebanghelyo paagi sa mga Propeta sa Tagsa ka Dispensasyon
Ang Dios nagatawag sang mga propeta agud mangin Iya mga representante sa duta.
Sang una nga panahon, nagtawag ang Dios sang mga propeta pareho kay Adan, Noe, Abraham, kag Moises.
Ang buhi nga propeta nagabaton sang rebelasyon halin sa Dios para itudlo kag maggiya sa aton sa karon nga panahon.
Ang Dutan-on nga Pag-alagad kag Pagbayad-Sala ni Jesucristo
Si Jesucristo Anak sang Dios.
Sang Iya dutan-on nga pag-alagad, gintudlo ni Jesus ang Iya ebanghelyo kag gintukod ang Iya Simbahan.
Nagtawag si Jesus sang dose ka Apostoles kag ginhatagan sila sing awtoridad para pangunahan ang Iya Simbahan.
Sa katapusan sang Iya kabuhi, ginbayran ni Jesus ang aton mga sala paagi sa Iya pag-antos sa Hardin sang Getsemani kag sang Paglansang sa Iya. Pagkatapos sang kamatayon ni Jesus, nabanhaw Sia.
Tungod sa nagabayad-sala nga sakripisyo ni Jesus, sarang kita mapatawad kag matinloan sang aton mga sala kon maghinulsol kita. Nagahatag ini sa aton sang kalinong kag ginapatigayon sini ang pagbalik naton sa presensya sang Dios kag pagbaton sang kabug-osan sang kalipay.
Tungod sa Pagkabanhaw ni Jesus, tanan kita mabanhaw pagkatapos naton nga mapatay. Nagakahulugan ini nga ang espiritu kag lawas sang kada tawo magaupod liwat kag mabuhi sa katubtuban.
Ang Pagtalikod sa Kamatuoran
Sang nagkalamatay ang mga Apostoles ni Jesus, nangin lapnagon kaayo ang pagtalikod sa ebanghelyo kag sa Simbahan ni Jesucristo.
Sa sini nga tion, ginbag-o sang mga tawo ang madamo nga mga pinanudlo sa ebanghelyo. Ginliwat man sang mga tawo ang mga ordinansa sang priesthood, pareho sang bunyag. Ang awtoridad sang priesthood kag ang Simbahan nga gintukod ni Jesus wala na sa duta.
Ang Pagpanumbalik sang Ebanghelyo ni Jesucristo paagi kay Joseph Smith
Ginhandum ni Joseph Smith nga mahibal-an kon diin nga simbahan ang matuod nga Simbahan sang Dios para magpamiyembro sia diri. Nagpakita ang Amay nga Langitnon kag si Jesucristo sa Iya sang 1820. Ining hitabo ginatawag nga Unang Palanan-awon.
Gintawag sang Dios si Joseph Smith para mangin propeta, pareho sang pagtawag Niya sang mga propeta sang una nga panahon.
Ang ebanghelyo ni Jesucristo ginpanumbalik paagi kay Joseph Smith.
Ang iban pa nga langitnon nga mga mensahero nagpanumbalik sang priesthood, kag ginhatagan si Joseph sang awtoridad nga i-organisar ang Simbahan ni Jesucristo.
Padayon si Jesucristo nga nagapamuno sang Iya Simbahan sa karon nga panahon paagi sa buhi nga mga propeta kag apostoles.
Ang Libro ni Mormon: Isa pa ka Katipan Nahanungod kay Jesucristo
Ang Libro ni Mormon isa ka grupo sang balaan nga kasulatan nga ginsulat sang dumaan nga panahon sang mga propeta sa kadutaan sang Amerika. Ginlubad ini ni Joseph Smith paagi sa dulot kag gahum sang Dios.
Upod ang Biblia, ang Libro ni Mormon nagasaksi sa pag-alagad, pinanudlo, kag misyon ni Jesus bilang aton Manluluwas.
Mas makapalapit kita sa Dios paagi sa pagbasa sang Libro ni Mormon kag pagsunod sa mga pagsulundan sini.
Mahibal-an naton nga ang Libro ni Mormon pulong sang Dios paagi sa pagbasa sini, pagbinagbinag sini, kag pagpangamuyo parte sini. Ini nga proseso makabulig man sa aton nga mahibal-an nga si Joseph Smith isa ka propeta.
Magpangamuyo agud Mahibaloan ang Kamatuoran paagi sa Balaan nga Espiritu.
Ang pangamuyo baslanay nga komunikasyon sa tunga sang Dios kag sang Iya mga anak.
Paagi sa sinsero nga pangamuyo, mahibal-an naton nga ang mensahe sang Pagpanumbalik sang Ebanghelyo ni Jesucristo matuod.
Kon magpangamuyo kita, itudlo kag kumpirmahon sang Balaan nga Espiritu ang kamatuoran sa aton.
Litrato
mga misyonero nga nagatudlo sang mga pamatan-on
Mga Pwede Mo Ipamangkot sa mga Tawo
Ang masunod nga mga pamangkot mga halimbawa sang pwede mo ipamangkot sa mga tawo. Ining mga pamangkot makabulig sa imo nga makaangkon sang makahulugan nga paghinambalanay kag maintiendihan ang mga panginahanglan kag panan-aw sang tawo.
Ano ang imo ginapatihan parte sa Dios?
Paano makabulig sa imo ang makabatyag nga malapit sa Dios?
Ano ang nahibal-an mo parte kay Jesucristo? Paano nakaimpluwensya sa imo ang Iya kabuhi kag mga pinanudlo?
Paano ka magpangita sang masaligan nga mga sabat sa makalilibog nga kalibutan sa karon?
Paano makabulig sa imo ang ihibalo nga may buhi nga propeta sa duta karon nga panahon?
Nakabati ka na parte sa Libro ni Mormon? Pwede bala namon iistorya kon ngaa importante ini?
Pwede mo bala iistorya ang imo mga ginapatihan parte sa pangamuyo? Pwede bala kami mag-istorya parte sa amon mga ginapatihan parte sa pangamuyo?
Mga Imbitasyon nga Pwede Mo Ihatag
Ipangamuyo mo bala sa Dios nga buligan ka nga mahibal-an kon matuod ang amon gintudlo? (Tan-awa sa “Mga Punto sa Pagtudlo: Pangamuyo” sa katapusan nga seksyon sining leksyon.)
Masimba ka bala sini nga Domingo para matun-an pa gid ang parte sa amon gintudlo?
Basahon mo bala ang Libro ni Mormon kag magpangamuyo para mahibal-an kon pulong ini sang Dios? (Pwede ka magpanugyan sang partikular nga mga kapitulo ukon bersikulo.)
Pwede bala kita magtalana sang tion para sa amon madason nga pagbisita?
Pundasyon nga Doktrina
Ini nga seksyon may ara sang doktrina kag balaan nga mga kasulatan nga imo tun-an para pabakuron ang imo ihibalo kag testimonya sa ebanghelyo kag buligan ka sa pagtudlo.
Litrato
pamilya
Ang Dios Amo ang Aton Mapinalanggaon nga Amay nga Langitnon
Ang Dios amo ang aton Amay nga Langitnon, kag Iya kita mga kabataan. Ginhimo Niya kita sa Iya dagway. May ara Sia sang ginhimaya, perpekto nga “lawas nga unod kag mga tul-an nga matandog pareho sang iya sang tawo” (Doktrina kag mga Kasugtanan 130:22).
Personal nga kilala kita sang Dios, kag palangga Niya kita masobra pa sangsa aton mahangpan. Naintiendihan Niya ang aton mga pagtilaw, mga kasubo, kag mga kahuyang, kag nagatanyag Sia nga suportahan kita para malampuwasan ang mga ini. Nagakalipay Sia sa aton progreso kag buligan kita sa paghimo sing husto nga mga pagpili. Gusto Niya nga makighambal sa aton, kag pwede kita makighambal sa Iya paagi sa pangamuyo.
Ginhatag Niya sa aton ining eksperiyensya sa duta agud nga magtuon kita, magtubo, kag mangin mas pareho sa Iya. Upod ang perpekto nga gugma, gusto Niya nga makabalik kita sa Iya pagkatapos naton mapatay. Pero, indi naton ini mahimo nga kita lang. Tungod palangga kita sang Dios, ginpadala Niya ang Iya Anak nga si Jesucristo, para tubuson kita. “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, … [agud] nga ang kalibutan maluwas paagi sa iya” (Juan 3:16–17).
Gusto sang Dios nga bugayan kita sang kalinong kag kabug-osan sang kalipay nga magatiner sa katubtuban. Nagpahamtang Sia sang plano nga nagahatag sa aton sang oportunidad para mabaton ining mga bugay. Ginatawag ining plano nga plano sang kaluwasan (tan-awa sa leksyon 2).
Moses and the Tablets [Si Moises kag ang mga Tapi-tapi nga Bato], ni Jerry Harston
Ginapahayag sang Dios ang Ebanghelyo paagi sa mga Propeta sa Tagsa ka Dispensasyon
Ang mga Propeta mga Representante sang Dios sa Duta
Isa ka importante nga paagi nga ginapakita sang Dios ang Iya pagpalangga para sa aton amo ang pagtawag sang mga propeta, paghatag sa ila sang awtoridad sang priesthood, kag pag-inspirar sa ila nga maghambal para sa Iya. Ang mga propeta mga representante sang Dios sa duta. Ang propeta sa Daan nga Katipan nga si Amos nagsulat nga “ang Ginuong Dios indi maghimo sing bisan ano nga butang kon indi niya anay mapahayag ang iya plano sa iya mga alagad nga mga propeta” (Amos 3:7). Pila sa mga bugay nga mabaton naton halin sa buhi nga mga propeta nalista sa idalom.
Mga Saksi ni Jesucristo. Ang mga propeta espesyal nga mga saksi ni Jesucristo, nga nagapamatuod sa Iya bilang aton Manluluwas kag Manunubos.
Mga Pinanudlo. Ang mga propeta nagabaton sang direksyon halin sa Dios para buligan kita nga makilala ang kamatuoran sa sayop. Ginatudloan nila kita nga tumanon ang mga kasugoan sang Dios kag maghinulsol kon magkulang kita. Ginapakamalain nila ang sala kag nagapaandam sa mga konsikwensya sini.
Ang mga ginatudlo sang mga propeta nagaalsa sa aton padulong sa Dios kag nagabulig sa aton nga mabaton ang mga bugay nga gusto Niya para sa aton. Ang pinakadako naton nga proteksyon sa katalagman ara sa pagsunod sa pulong sang Ginuo nga ginhatag paagi sa Iya mga propeta.
Awtoridad sang Priesthood. Ang propeta karon amo ang nagapamuno nga nagakapot sang priesthood sa kalibutan. Ang priesthood amo ang awtoridad kag gahum sang Dios. Ang propeta may awtoridad sa paghambal kag paggiho sa ngalan sang Dios para sa kaluwasan sang Iya mga anak.
Paggiya sang Simbahan. Ang Simbahan ni Jesucristo gintukod sa pundasyon sang mga propeta kag apostoles (tan-awa sa Mga Taga-Efeso 2:19–20; 4:11–14).
Ang mga Propeta sang Una nga Panahon
Si Adan amo ang una nga propeta sa duta. Ginpahayag sang Dios ang ebanghelyo ni Jesucristo sa iya kag ginhatagan sia sang awtoridad sang priesthood. Gintudlo ni Adan kag Eva sa ila kabataan ining mga kamatuoran kag ginpaisog sila sa pagpatubo sang pagtuo kag sa pagpangabuhi sang ebanghelyo.
Sang ulihi ang mga kaliwat ni Adan kag Eva nagrebelde kag nagtalikod sa ebanghelyo. Nagresulta ini sa kondisyon nga ginatawag apostasiya, ukon pagtalikod sa kamatuoran. Kon nagakatabo ang malapnagon nga apostasiya, ginabawi sang Dios ang Iya awtoridad sang priesthood, nga kinahanglanon sa pagtudlo kag paghikot sang mga ordinansa sang ebanghelyo.
Nasulat sa Daan nga Katipan ang madamo nga tinion sang malapnagon nga apostasiya. Para matapos ini nga mga tinion, nagalab-ot ang Dios sa Iya mga anak paagi sa pagtawag sang isa pa ka propeta. Ginapahayag Niya liwat ang mga kamatuoran sang ebanghelyo sa sining mga propeta kag ginahatagan sila sang awtoridad sang priesthood. Ang iban sining mga propeta amo sila ni Noe, Abraham, kag Moises. Ang masubo, sa sulit-sulit nga hitabo, sang ulihi ginsikway na gid sang mga tawo ang mga propeta kag nagtalikod sa kamatuoran.
Mga Topiko sang Ebanghelyo: “Mga Propeta,” “Pagpanumbalik sang Simbahan”
Litrato
O My Father [O Amay Ko], ni Simon Dewey
Ang Dutan-on nga Pag-alagad kag Pagbayad-Sala ni Jesucristo
Si Jesucristo Anak sang Dios. Si Jesus kag ang Iya Pagbayad-Sala sentro sa plano sang Dios para sa aton. Upod sa Iya Pagbayad-Sala ang Iya pag-antos sa Hardin sang Getsemani, ang Iya pag-antos kag kamatayon sa krus, kag ang Iya Pagkabanhaw.
Halin sang panahon ni Adan kag Eva, ginapaabot na sang mga tawo ang pagkari ni Jesucristo bilang ila Manluluwas kag Manunubos. Ginpadala sang Amay nga Langitnon si Jesus sa duta masobra 2,000 na ka tuig ang nagligad.
Nagpangabuhi si Jesus nga perpekto kag wala’y-sala. Gintudlo Niya ang Iya ebanghelyo kag gintukod ang Iya Simbahan. Nagtawag Sia sang Dose ka Apostoles kag ginhatagan sila sang awtoridad sang priesthood para magtudlo kag maghimo sang sagrado nga mga ordinansa, pareho sang bunyag. Ginhatagan man Niya sila sang awtoridad para pangunahan ang Iya Simbahan.
Sa katapusan sang Iya kabuhi, ginbayran ni Jesus ang aton mga sala paagi sa Iya pag-antos sa Getsemani kag sang Paglansang sa Iya. Tungod sang nagabayad-sala nga sakripisyo ni Jesus, pwede kita matinloan sa aton mga sala kon maghinulsol kita. Ginapatigayon sini ang pagbalik naton sa presensya sang Dios kag pagbaton sang kabug-osan sang kalipay.
Pagkatapos nga ginlansang si Jesus sa krus, nabanhaw Sia, kag gindaog ang kamatayon paagi sa gahum sang Amay nga Langitnon. Tungod sa Pagkabanhaw ni Jesus, tanan kita mabanhaw pagkatapos naton nga mapatay. Buot silingon nga ang espiritu kag lawas sang kada tawo magaupod liwat, kag ang kada isa sa aton mabuhi sa katubtuban sa perpekto, nabanhaw nga lawas. (Tan-awa sa “Ang Pagbayad-Sala ni Jesucristo” sa leksyon 2.)
Litrato
si Propetang Joseph Smith
Gintudlo ni Propetang Joseph Smith, “Ang pundasyon nga mga prinsipyo sang aton relihiyon amo ang testimonya sang mga Apostoles kag mga Propeta, nahanungod kay Jesucristo, nga Sia napatay, ginlubong, kag nabanhaw sang ikatatlo nga adlaw, kag nagkayab pa-langit; kag ang tanan nga may kaangtanan sa aton relihiyon mga sanga lamang sini” (Teachings of Presidents of the Church: Joseph Smith [2007], 49).
Mga Topiko sang Ebanghelyo: “Jesucristo,” “Pagbayad-Sala ni Jesucristo”
Ang Pagtalikod sa Kamatuoran
Pagkatapos sang kamatayon ni Jesucristo, gintinguhaan sang Iya mga Apostoles nga amligan ang doktrina ni Cristo kag padayunon ang kahusay sa Simbahan. Pero, madamo nga miyembro sang Simbahan ang nagtalikod sa mga Apostoles kag sa doktrina nga gintudlo ni Jesus.
Sang ginpamatay ang mga Apostoles, may nangin lapnagon kaayo nga pagtalikod sa ebanghelyo kag sa Simbahan ni Jesucristo. Ini nga pagtalikod sa kamatuoran ginatawag kon kaisa nga ang Dako nga Apostasiya. Tungod sini, ginbawi sang Dios ang awtoridad sang priesthood sa duta. Upod sini nadula man ang awtoridad nga kinahanglanon sa pagpanguna sa Simbahan. Ang resulta, nadula man sa duta ang Simbahan nga ginpatindog ni Jesus.
Sa sini nga tion, ginbag-o sang mga tawo ang madamo nga mga pinanudlo sa ebanghelyo. Madamo sang ihibalo parte sa matuod nga kinaiya sang Amay nga Langitnon, ni Jesucristo, kag sang Balaan nga Espiritu ang nagliwat na ukon nadula. Ginliwat man sang mga tawo ang mga ordinansa sang priesthood, pareho sang bunyag.
Pila ka siglo ang nagligad, gintilawan nga repormahon sang mga tawo nga nagapangita sang kamatuoran ang ginliwat nga mga pinanudlo kag mga kagawian. Nagpangita sila sang mas dako nga espirituhanon nga kasanag, kag ang iban sa ila nagpahayag sang kakinahanglan sang pagpanumbalik sang kamatuoran. Ang ila mga pagpaninguha nagresulta sa pag-organisar sang madamo nga mga simbahan.
Ini nga panahon nagresulta sa dugang nga paghatag importansya sa relihiyoso nga kahilwayan, nga nagbukas sang alagyan para sa pagpanumbalik sang kamatuoran kag awtoridad halin sa Dios.
Ang mga propeta kag apostoles nagpropesiya sadto parte sa pagtalikod sa kamatuoran (tan-awa sa 2 Mga Taga-Tesalonica 2:1–3). Ginpropesiya man nila nga ang ebanghelyo kag ang Simbahan ni Jesucristo ipanumbalik sa duta (tan-awa sa Mga Binuhatan 3:20–21). Kon wala sang pagtalikod sa kamatuoran, indi kinahanglan ang pagpanumbalik.
Ang Pagpanumbalik sang Ebanghelyo ni Jesucristo paagi kay Joseph Smith
Ang Unang Palanan-awon kag ang Pagtawag kay Joseph Smith bilang Propeta
Sa mga siglo nga wala ang kabug-osan sang ebanghelyo ni Jesucristo sa duta, padayon ang Amay nga Langitnon nga nagalab-ot sa Iya mga kabataan. Sa kadugayan, ginhanda Niya ang alagyan para mabugayan sila liwat sang kabug-osan sang Iya ebanghelyo. Sang husto na ang mga sirkumstansya, gintawag niya si Joseph Smith bilang propeta nga magapanumbalik sang ebanghelyo kag Simbahan ni Jesucristo.
Nagaistar si Joseph Smith sa este sang Estados Unidos sa panahon sang grabe nga interes sa relihiyon. Ang mga miyembro sang iya pamilya mga debotado sa Dios kag nagapangita sang kamatuoran. Madamo nga simbahan ang nagasiling nga ara sa ila ang kamatuoran, kag gusto ni Joseph mahibal-an kon diin ang husto (tan-awa sa Joseph Smith—Kasaysayan 1:18). Ang Bibilia nagtudlo nga may “isa ka Ginuo, isa ka pagtuo, isa ka bautismo” (Mga Taga-Efeso 4:5). Si Joseph nagsimba sa lainlain nga mga simbahan, nagalibog ang iya ulo kon diin nga simbahan sia maupod. Sang ulihi siling niya:
“Tuman gid ang kagamo kag pag-ilinaway sa tunga sang nagkalain-lain nga mga sekta nga imposible para sa isa ka tawo nga pareho ka bataon sa akon … nga makalab-ot sa isa ka pagpamat-od kon sin-o ang husto kag sin-o ang sala. …
“Sa tunga sining pagbinaisay sang mga pulong kag kagamo bangod sang lain-lain nga mga opinyon, masami ako nagapanumdum: Ano ang himuon? Diin sa tanan sining mga sekta ang husto; ukon, sala bala sila tanan? Kon may isa sa ila nga husto, diin ini, kag paano ko ini mahibal-an? (Joseph Smith—Kasaysayan 1:8, 10).
Pareho sang madamo nga tawo, may mga pamangkot man si Joseph Smith parte sa kaluwasan sang iya kalag. Gusto niya nga mapatawad ang iya mga sala kag mangin matinlo sa atubang sang Dios. Samtang ginapangita niya ang kamatuoran sa lainlain nga mga simbahan, nabasahan niya sa Biblia, “Kon may yara sa inyo nga nakulangan sing kaalam, papangayoa sia sa Dios, nga nagahatag sing maalwan sa tanan nga tawo kag wala nagabasol, kay hatagan sia sini” (Santiago 1:5).
Bangud sining bersikulo, nagdesisyon si Joseph nga pamangkuton ang Dios kon ano ang iya himuon. Sang tigpamulak sang 1820 nagkadto sia sa kakahuyan malapit sa ila balay kag nagluhod sa pagpangamuyo. May apat ka panaysayon sang palanan-awon nga natabo, nga ginsulat ni Joseph Smith ukon sang mga escriba sa idalom sang iya direksyon (tan-awa sa Gospel Topics Essays, “First Vision Accounts [Mga Panaysayon parte sa Unang Palanan-awon]”). Sa panaysayon nga ginakilala bilang balaan nga kasulatan, ginlaragway niya ang iya eksperiyensya bilang masunod:
Litrato
Ang Unang Palanan-awon, ni Linda Christensen kag Michael T. Malm
“Nakakita ako sang haligi sang kasanag sa ibabaw mismo sang akon ulo, nga masobra pa sa kasanag sang adlaw, nga amat-amat nga nagpanaog tubtob nga nagsilak ini sa akon. … Sang nagsilak sa akon ang kasanag nakakita ako sang duha ka mga Persona, nga ang kasanag kag himaya imposible nga ilaragway, nga nagatindog sa ibabaw nakon sa kahawaan. Ang isa sa ila nagahambal sa akon, nga ginatawag ang akon ngalan kag nagsiling, nga nagatudlo sa isa—Ini ang Akon Hinigugma nga Anak. Pamatii Sia!” (Joseph Smith—Kasaysayan 1:16–17).
Sa sining palanan-awon, ang Dios nga Amay kag ang Iya Anak nga si Jesucristo, nagpakita kay Joseph Smith. Ginhambalan sia sang Manluluwas nga indi mag-entra sa bisan ano nga simbahan.
Sa isa pa ka panaysayon sining palanan-awon, ginhambal ni Joseph nga ginsilingan man sia sang Manluluwas nga: “Napatawad na ang imo mga sala. … Yari karon ako ang Ginuo sang himaya. Ginlansang ako sa krus para sa kalibutan agud ang tanan nga nagapati sa akon ngalan makaangkon sang kabuhi nga Wala’y katapusan.”
Pagkatapos sang palanan-awon, nabinagbinag ni Joseph, “Napuno ang akon kalag sang pagpalangga, kag sa madamo nga adlaw nagakasadya gid ako kag ang Ginuo yara sa akon” (Joseph Smith History, circa Summer 1832, 3, josephsmithpapers.org; spelling kag punctuation gin-moderno).
Paagi sining palanan-awon, si Joseph Smith nangin saksi ni Jesucristo. kag nakatuon sang importante nga mga kamatuoran parte sa Pangulohan sang Dios. Halimbawa, natun-an niya nga ang Amay nga Langitnon kag si Jesucristo separado nga mga persona. Sang gintawag Nila sia sa iya ngalan, natun-an niya nga kilala sia Nila sing personal. Sang ginhambalan si Joseph nga ginpatawad na sia, natun-an niya nga maluluy-on ang Dios. Napuno sia sing kalipay tungod sining eksperiyensya.
Pareho sang ginhimo sang Dios sa nagliligad nga mga propeta, gintawag Niya si Joseph Smith nga mangin propeta kay paagi sa iya ang kabug-osan sang ebanghelyo ipanumbalik sa duta. Ini nga pagpanumbalik magabulig sa mga anak sang Dios nga makakita sang kalipayan sa sining kabuhi kag sa kabuhi nga walay katapusan sa kalibutan nga magaabot—tanan paagi kay Jesucristo.
Pagpanumbalik sang Priesthood kag mga Yabi sang Priesthood
Litrato
Upon You My Fellow Servants [Sa Inyo nga Isigka-Alagad Ko],ni Linda Curley Christensen kag Michael T. Malm
Pagkatapos sang pagpakita sang Amay kag sang Anak, iban pa nga langitnon nga mga mensahero ang ginpadala kay Joseph Smith kag sa iya kaupod nga si Oliver Cowdery. Si Juan Bautista nagpakita bilang nabanhaw nga tinuga kag gintugyan ang Aaronic Priesthood kag ang mga yabi sa ila. Dala sa Aaronic Priesthood ang awtoridad sa pagbunyag.
Litrato
The Voice of Peter, James, and John [Ang Tingug nanday Pedro, Santiago kag Juan], iya ni Welden C. Andersen
Wala madugayi sadto, si Pedro, Santiago, kag Juan—tatlo sa orihinal nga mga Apostoles ni Cristo—nagpakita bilang nabanhaw nga mga tinuga kag gintugyan ang Melchizedek Priesthood kag ang mga yabi sini kay Joseph Smith kag Oliver Cowdery. Ini nga priesthood amo man ang awtoridad nga ginhatag ni Cristo sa Iya mga Apostoles sang una.
Litrato
Image of Moses Elias and Elijah descending into the Kirtland temple and appearing to Joseph Smith.
Sa Kirtland Temple, si Moises, Elias, kag Elias (Elijah) nagpakita kay Joseph Smith kag Oliver Cowdery kag gintugyan sa ila ang dugang nga awtoridad kag mga yabi sang priesthood nga kinahanglanon para matuman ang buluhaton sang Dios sa ulihing mga adlaw. Ginhatag ni Moises ang mga yabi sa pagtipon sang Israel. Ginhatag ni Elias ang dispensasyon sang ebanghelyo ni Abraham. Ginhatag ni Elias (Elijah) ang mga yabi sa paghugpong. (Tan-awa sa Doktrina kag mga Kasugtanan 110:11–16; tan-awa man sa Libro sang Pangkabilogan nga Pagsulundan, 3.1.)
Organisasyon sang Simbahan
Ginsugo si Joseph Smith nga i-organisar liwat ang Simbahan ni Jesucristo sa duta. Paagi sa iya, nagtawag si Jesucristo sang dose ka Apostoles.
Ginatawag sang mga propeta sa panahon sang Biblia ang panahon nga nagakabuhi kita karon bilang katapusan nga inadlaw ukon ulihing mga adlaw. Amo ini ang tiyempo antes lang gid sa Ikaduha nga Pagkari ni Jesucristo. Amo nga ang ngalan sining Simbahan amo Ang Simbahan ni Jesucristo sang mga Santos sa Ulihing mga Adlaw (tan-awa sa Doktrina kag mga Kasugtanan 115:3–4; tan-awa man sa 3 Nefi 27:3–8).
Buhi nga mga Propeta kag mga Apostoles Karon nga Panahon
Pareho nga nagtawag si Jesus sang Apostoles sa Iya dutan-on nga pag-alagad para pangunahan ang Iya Simbahan, nagtawag man Sia sang Apostoles para pangunahan ini karon nga panahon. Ang Unang Pangulohan kag ang Korum sang Dose ka Apostoles bilang mga propeta, mga manugpanan-aw, kag mga manugpahayag sang rebelasyon.
Ang pinakadugay na nga Apostoles lamang ang ginatawag nga propeta tungod sia ang nagapamuno sa bilog nga Simbahan kag may pinasahi nga awtoridad nga maghambal para sa Ginuo. Sia ang awtorisado nga bulos kay Joseph Smith. Sia kag ang mga Apostoles sa karon nagausoy sang ila awtoridad kay Jesucristo sa wala mabugto nga pasunod sang mga ordinasyon halin sang gin-ordin si Joseph Smith sa idalom sang mga kamot sang langitnon nga mga mensahero.
Mga Topiko sang Ebanghelyo: “Pagpanumbalik sang Simbahan,” “Pagpanumbalik sang Priesthood”
Ang Libro ni Mormon: Isa pa ka Katipan Nahanungod kay Jesucristo
Ang Libro ni Mormon isa ka dumaan nga koleksyon sang balaan nga kasulatan pareho sang Biblia. Ang Biblia isa ka saksi ni Jesucristo, kag ang Libro ni Mormon ikaduha nga saksi sang Iya pag-alagad, sang Iya mga pinanudlo, kag sang Iya misyon bilang aton Manluluwas.
Si Joseph Smith gingiyahan sang langitnon nga mensahero nga si Moroni sa isa ka bungyod kon diin nalubong ang dumaan nga rekord sa madamo nga mga siglo. Ining rekord, nga nasulat sa bulawan nga mga lamina (manipis nga panid sang metal), nagaunod sang mga sinulatan sang mga propeta parte sa pagpakig-angot sang Dios sa pila ka dumaan nga mga pumuluyo sang kadutaan sang Amerika. Ginlubad ni Joseph Smith ini nga rekord paagi sa dulot kag gahum sang Dios.
Ang mga propeta sa Libro ni Mormon nakahibalo parte sa misyon ni Jesucristo kag nagtudlo sang Iya ebanghelyo. Pagkatapos nga mabanhaw ni Jesus, nagpakita Sia sa sining mga tawo kag personal nga nag-alagad sa ila. Gintudloan Niya sila kag gintukod ang Iya Simbahan.
Ang Libro ni Mormon nagabulig sa aton nga mas maglapit sa Dios samtang ginatun-an naton, ginaintiendi, kag ginapangabuhi ang mga ginatudlo sini. Siling ni Propetang Joseph Smith nga, “ang isa ka tawo magmangin mas malapit sa Dios paagi sa pagsunod sang mga pagsulundan sini [sang libro], sangsa diin man nga libro” (Teachings: Joseph Smith, 64).
Litrato
lalaki nga nagabasa
Para mahibal-an naton nga ang Libro ni Mormon pulong sang Dios, kinahanglan naton ini basahon, binagbinagon, kag magpangamuyo parte sini. Isa ka propeta sa Libro ni Mormon ang nagpromisa nga ipahayag sang Dios ang kamatuoran sang libro sa aton kon magpangamuyo kita nga sinsero ang tagipusuon, may tunay nga tinutuyo, kag may pagtuo kay Cristo (tan-awa sa Moroni 10:3–5). Ang pagtuon sang Libro ni Mormon kinahanglanon para sa nagapadayon nga pagbag-o.
Kon basahon naton ang Libro ni Mormon kag ipangamuyo ini, matun-an naton ang mga kamatuoran parte kay Jesucristo nga magabugay sa aton mga kabuhi. Mahibal-an man naton nga si Joseph Smith propeta sang Dios kag ang ebanghelyo kag ang Simbahan ni Jesucristo ginpanumbalik paagi sa iya.
Litrato
Pangulong Russell M. Nelson
“Ginapromisa ko nga kon tun-an ninyo sing mainampuon ang Libro ni Mormon adlaw-adlaw, makahimo kamo sang mas maayo nga mga desisyon—adlaw-adlaw. Ginapromisa ko nga kon inyo hunahunaon sing maayo ang inyo ginatun-an, ang mga bintana sang langit magabukas, kag mabaton ninyo ang mga sabat sa inyo kaugalingon nga mga pamangkot kag direksyon sa inyo kaugalingon nga kabuhi. Ginapromisa ko nga sa inyo adlaw-adlaw nga pagpaayaw sa Libro ni Mormon, mahimo kamo nga mapangapinan batok sa mga kalainan sang aton panahon” (“Ang Libro ni Mormon: Ano ang Kasubong sang Inyo Kabuhi Kon Wala Ini? Ensign ukon Liahona, Nob. 2017, 62–63).
Magpangamuyo agud Mahibaloan ang Kamatuoran paagi sa Balaan nga Espiritu.
Tungod Amay naton ang Dios, buligan Niya kita nga makilala ang kamatuoran. Mahibal-an naton nga ang mensahe sang Pagpanumbalik sang ebanghelyo ni Jesucristo matuod kon basahon naton ang Libro ni Mormon kag magpangamuyo sa Dios. Kon magpangamuyo kita nga may pagtuo kag may matuod nga katuyuan, sabton Niya ang aton mga pamangkot kag giyahan ang aton mga kabuhi.
Masami ginasabat sang Dios ang aton mga pangamuyo paagi sa Balaan nga Espiritu. Samtang nagapangamuyo kita, ang Balaan nga Espiritu nagatudlo kag nagakumpirma sang kamatuoran. Ang mga komunikasyon halin sa Balaan nga Espiritu gamhanan. Masami nagaabot ini bilang malinong nga pasalig paagi sa aton mga balatyagon, panghunahuna, kag pagpabatyag (tan-awa sa 1 Mga Hari 19:11–12; Helaman 5:30; Doktrina kag mga Kasugtanan 8:2).
Ang sige-sige nga pagtuon sang balaan nga kasulatan (partikular na sang Libro ni Mormon), semanal nga pagkadto sa sakramento nga miting, kag sinsero nga pangamuyo nagabulig sa aton nga mabatyagan ang gahum sang Balaan nga Espiritu kag madiskubrehan ang kamatuoran.
Malip-ot kag Hustohan lang Kalaba nga Outline sang Leksyon
Ang masunod nga outline sampol sang pwede mo itudlo kon gamay lang ang imo oras. Sa paggamit sining outline, magpili sang isa ukon mas madamo pa nga mga prinsipyo nga itudlo. Ang pundasyon nga doktrina sang tagsa ka prinsipyo ara sa ibabaw sa leksyon.
Samtang nagatudlo ka, magpamangkot kag magpamati. Maghatag sang mga imbitasyon nga makabulig sa mga tawo nga magtuon kon paano mas magpalapit sa Dios. Isa ka importante nga imbitasyon sa tawo amo nga makigkita liwat sa inyo. Ang kalabaon sang leksyon depende sa imo nga ipamangkot kag sa imo pagpamati.
Litrato
mga misyonero nga nagaistorya sa isa ka tawo
Ano ang Pwede Mo Itudlo sa mga Tawo sa 3-10 ka Minutos
Ang Dios amo ang aton Langitnon nga Amay, kag Iya kita ginhimo sa Iya dagway. Personal Niya kita nga kilala kag palangga Niya kita. Gusto Niya kita bugayan sang kalinong kag kabug-osan sang kalipay nga magatiner sa katubtuban.
Si Jesucristo Anak sang Dios. Ang iya misyon amo nga ipatigayon nga matinloan kita sa aton mga sala, malampuwasan ang kamatayon, kag makabaton sang kabuhi nga wala katapusan.
Ang Dios nagatawag sang mga propeta agud mangin Iya mga representante sa duta. Sang una, nagtawag Sia sang mga propeta pareho kay Adan, Noe, Abraham, kag Moises. Ang buhi nga propeta nagabaton sang rebelasyon halin sa Dios para itudlo kag maggiya sa aton sa karon nga panahon.
Sang dutan-on nga pag-alagad ni Jesus, gintukod Niya ang Iya Simbahan. Sang nagkalamatay ang mga Apostoles ni Jesus, may nangin lapnagon kaayo nga pagtalikod sa ebanghelyo kag sa Simbahan ni Jesucristo. Ginliwat sang mga tawo ang madamo nga mga pinanudlo sang ebanghelyo kag mga ordinansa sang priesthood, pareho sang bunyag.
Gintawag sang Dios si Joseph Smith para mangin propeta, pareho sang pagtawag Niya sang mga propeta sang una nga panahon. Ang Amay nga Langitnon kag si Jesucristo nagpakita sa iya. Ang ebanghelyo ni Jesucristo ginpanumbalik paagi sa iya.
Ang Libro ni Mormon isa ka koleksyon sang balaan nga kasulatan. Pareho sa Biblia, isa ini ka testamento parte kay Jesucristo kag nagabulig sa aton nga mas maglapit sa Dios samtang ginabasa naton ini kag ginapangabuhi ang mga ginatudlo sini. Ginlubad ini ni Joseph Smith paagi sa dulot kag gahum sang Dios.
Paagi sa sinsero nga pangamuyo, makapakig-angot kita sa Dios. Mahibal-an naton kon ang mensahe sang Pagpanumbalik sang ebanghelyo ni Jesucristo matuod.