« មីកា ៖ ‹ តើព្រះយេហូវ៉ាសព្វព្រះហឫទ័យឲ្យឯងប្រព្រឹត្តដូចម្តេច ? › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« មីកា ៖ ‹តើព្រះយេហូវ៉ាសព្វព្រះហឫទ័យឲ្យឯងប្រព្រឹត្តដូចម្តេច ? › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
មីកា, ណាហ៊ុម, ហាបាគុក, សេផានា ៖ មេរៀនទី ១៥២
មីកា
« តើព្រះយេហូវ៉ាសព្វព្រះហឫទ័យឲ្យឯងប្រព្រឹត្តដូចម្តេច ? »
ពួកយើងជាច្រើនឆ្ងល់ថា តើកិច្ចខិតខំដោយស្មោះអស់ពីចិត្តរបស់យើងពិតជាធ្វើឲ្យព្រះវរបិតាសួគ៌ និងព្រះយេស៊ូវគ្រីស្ទសព្វព្រះហឫទ័យឬទេ ។ ព្យាការីមីកាឆ្ងល់ថាលោកអាចធ្វើអ្វីដើម្បីផ្គាប់ចិត្តព្រះអម្ចាស់ ។ មីកាបានបង្រៀនឲ្យ « ប្រព្រឹត្តដោយសុចរិត ឲ្យស្រឡាញ់សេចក្តីសប្បុរស ហើយឲ្យដើរ … ដោយសុភាពរាបទាប » ជាមួយនឹងទ្រង់ ( មីកា ៦:៨ ) ។ មេរៀននេះអាចជួយសិស្សឲ្យដាក់ផែនការ ដើម្បីប្រព្រឹត្តដោយសុចរិត ឲ្យស្រឡាញ់សេចក្តីសប្បុរស ហើយឲ្យដើរជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ដោយសុភាពរាបទាប ។
ការរៀបចំសិស្ស ៖ អញ្ជើញសិស្សឲ្យគិតអំពីសមាជិកគ្រួសារ ឬមិត្តភក្តិពីរបីនាក់ បន្ទាប់មកគិតអំពីអ្វីជាក់លាក់ដែលពួកគេនឹងធ្វើ ដើម្បីផ្គាប់ចិត្តបុគ្គលម្នាក់ៗនោះ ។ ពួកគេអាចកត់ចំណាំពីរបៀបដែលពួកគេអាចធ្វើអ្វីផ្សេងៗគ្នាសម្រាប់បុគ្គលម្នាក់ៗ ។
សកម្មភាពរៀនសូត្រដែលអាចមាន
ការផ្គាប់ចិត្តមនុស្សផ្សេងគ្នា
មុនពេលចូលរៀន អ្នកអាចនឹងចង់សរសេរសំណួរមិនពេញលេញខាងក្រោមនៅលើក្ដារខៀន ។
សូមពិចារណាចាប់ផ្ដើមថ្នាក់ដោយការអញ្ជើញសិស្សឲ្យឆ្លើយសំណួរច្រើនដង ដោយបំពេញចន្លោះជាមួយមនុស្សផ្សេងគ្នារាល់ពេល ( ម៉ាក់ ប៉ា គ្រូបង្រៀន ប៊ីស្សព មិត្តភក្តិ ) ។ សិស្សក៏អាចចែកចាយជាគូៗ ឬក្រុមតូចៗផងដែរ ។ បន្ទាប់មក អ្នកអញ្ជើញសិស្សស្ម័គ្រចិត្តពីរបីនាក់ឲ្យចែកចាយក្នុងថ្នាក់ ។
ប្រសិនបើចាំបាច់ជាឧទាហរណ៍ អ្នកអាចចែកចាយចម្លើយផ្ទាល់ខ្លួនមួយចំនួនដោយប្រើមនុស្សផ្សេងគ្នាក្នុងជីវិតរបស់អ្នក ។
-
ប្រសិនបើអ្នកចង់ផ្គាប់ចិត្ត ______________ របស់អ្នក តើអ្នកនឹងធ្វើអ្វី ?
-
ហេតុអ្វីបានជាយើងអាចធ្វើខុសៗគ្នាអាស្រ័យលើមនុស្សដែលយើងកំពុងព្យាយាមផ្គាប់ចិត្ត ?
បន្ទាប់ពីសិស្សចែកចាយចម្លើយមួយចំនួនចំពោះសំណួរមុនៗហើយ សូមសរសេរ ព្រះវរបិតាសួគ៌ និងព្រះយេស៊ូវគ្រីស្ទ ក្នុងចន្លោះទទេនៅលើក្ដារខៀន ។
សូមជញ្ជឹងគិតពីអ្វីដែលអ្នកមានអារម្មណ៍ថា ផ្គាប់ចិត្តព្រះវរបិតាសួគ៌ និងព្រះយេស៊ូវគ្រីស្ទ ។ គិតអំពីអ្វីដែលអ្នកធ្វើនាពេលបច្ចុប្បន្ននេះ ដែលអាចផ្គាប់ចិត្តពួកគេ និងអ្វីដែលអ្នកអាចធ្វើខុសៗគ្នា ។ នៅចុងបញ្ចប់នៃមេរៀននេះ អ្នកនឹងត្រូវបានអញ្ជើញឲ្យដាក់ផែនការដើម្បីអនុវត្តតាមចំណាប់អារម្មណ៍ដែលអ្នកទទួលបាន ។
តើយើងអាចធ្វើអ្វីខ្លះដើម្បីផ្គាប់ចិត្តព្រះអម្ចាស់ ?
ដោយមានប្រសាសន៍ទៅកាន់ប្រជាជនអ៊ីស្រាអែល និងយូដា មីកាបានព្យាករណ៍អំពីការកាត់សេចក្ដី ដែលនឹងកើតមានដល់ពួកគេ ដោយសារតែអំពើទុច្ចរិតរបស់ពួកគេ ។ មីកាបានអង្វរសាសន៍អ៊ីស្រាអែលឲ្យចងចាំនូវពរជ័យដ៏អស្ចារ្យដែលពួកគេបានទទួលពីព្រះអម្ចាស់ ហើយបានអញ្ជើញពួកគេឲ្យប្រែចិត្ត ហើយត្រូវបានប្រមូលផ្ដុំទៅរកទ្រង់ ( សូមមើល មីកា ២–៥ ) ។
សូមអាន មីកា ៦:៤ ដោយរកមើលវិធីមួយចំនួនដែលព្រះអម្ចាស់បានបង្ហាញសេចក្តីស្រឡាញ់របស់ទ្រង់ចំពោះអ៊ីស្រាអែល ។
បន្ទាប់មកអាន មីកា ៧:៧–៨, ១៨–២០ ដោយរកមើលអ្វីដែលមីកាបានមានប្រសាសន៍ថា ព្រះអម្ចាស់នឹងធ្វើសម្រាប់រាស្ត្រនៃសេចក្ដីសញ្ញារបស់ទ្រង់ ។
-
តើអ្នកបានរកឃើញអ្វីខ្លះ ?
-
តើព្រះវរបិតាសួគ៌ និងព្រះយេស៊ូវគ្រីស្ទបានធ្វើកិច្ចការទាំងនេះសម្រាប់អ្នកដោយរបៀបណា ?
អ្នកអាចអញ្ជើញសិស្សឲ្យឆ្លើយសំណួរពីមុនៗនៅក្នុងសៀវភៅកំណត់ហេតុការសិក្សារបស់ពួកគេ ហើយបន្ទាប់មកចែកចាយជាមួយដៃគូ ឬសិស្សក្នុងថ្នាក់នូវអ្វីដែលពួកគេបានសរសេរ ។
បន្ទាប់ពីសិស្សចែកចាយរួចហើយ អ្នកអាចចង្អុលបង្ហាញថា នៅពេលយើងស្គាល់នូវកិច្ចការដ៏អស្ចារ្យដែលព្រះអម្ចាស់បានធ្វើសម្រាប់យើង វាជារឿងធម្មតាដែលយើងឆ្ងល់ថា តើយើងអាចបម្រើ និងផ្គាប់ចិត្តទ្រង់យ៉ាងដូចម្តេច ។ សូមពន្យល់ថា ព្យាការីមីកាមានការលំបាកជាមួយសំណួរអំពីអ្វីដែលយើងអាចធ្វើបានដើម្បីផ្គាប់ចិត្តព្រះអម្ចាស់ ។
ការអញ្ជើញឲ្យអាន និងសំណួរខាងក្រោមនេះ អញ្ជើញសិស្សឲ្យស្គាល់សេចក្តីពិតមួយពីសារលិខិតរបស់មីកា ។ ការជួយសិស្សឲ្យរកឃើញសេចក្តីពិតចេញពីវគ្គបទគម្ពីរអាចជួយធ្វើឲ្យការសិក្សាព្រះគម្ពីររបស់ពួកគេកាន់តែមានអត្ថន័យ ។ ការសិក្សាព្រះគម្ពីរប្រកបដោយអត្ថន័យ គឺជាធាតុសំខាន់មួយនៃការស្ថាបនាសេចក្តីជំនឿ និងការប្រែចិត្តជឿទៅលើព្រះយេស៊ូវគ្រីស្ទ ។ ( សម្រាប់ការបំពាក់បំប៉នបន្ថែមអំពីការសួរសំណួរដែលជួយសិស្សរកឃើញ និងបញ្ជាក់សេចក្តីពិតដែលប្រែចិត្តជឿ សូមមើល « ផ្តោតលើសេចក្តីពិតដែលដឹកនាំទៅរកការប្រែចិត្តជឿ និងស្ថាបនាសេចក្តីជំនឿលើព្រះយេស៊ូវគ្រីស្ទ » ក្នុង ជំនាញអភិវឌ្ឍន៍គ្រូបង្រៀន ) ។
ពេលខ្លះ មនុស្សមានគំនិតមិនត្រឹមត្រូវអំពីអ្វីដែលពួកគេអាចធ្វើដើម្បីផ្គាប់ព្រះទ័យព្រះអម្ចាស់ ។ ព្យាការីមីកាជួយយើងឲ្យយល់កាន់តែច្បាស់អំពីសេចក្តីស្រឡាញ់របស់ព្រះអម្ចាស់ ។
នៅក្នុង មីកា ៦:៦–៧ ព្យាការីប្រើឧទាហរណ៍ធំៗដើម្បីបង្ហាញពីរបៀបដែលគ្មានទ្រព្យសម្បត្តិខាងលោកិយអាចផ្គាប់ព្រះទ័យព្រះអម្ចាស់បានទេ ។
សូមអាន មីកា ៦:៨ ដោយរកមើលអ្វីដែលយើងអាចធ្វើដើម្បីផ្គាប់ព្រះទ័យព្រះអម្ចាស់ ។
-
តើអ្នកនឹងសង្ខេបអ្វីដែលអ្នកបានរៀនអំពីការផ្គាប់ព្រះទ័យព្រះអម្ចាស់ដោយរបៀបណា ?
សិស្សអាចនឹងប្រើពាក្យពេច៍ផ្ទាល់ខ្លួនរបស់ពួកគេដើម្បីបង្ហាញសេចក្តីពិតថា ព្រះអម្ចាស់សព្វព្រះហឫទ័យ នៅពេលយើងខិតខំប្រព្រឹត្តដោយសុចរិត ឲ្យស្រឡាញ់សេចក្តីសប្បុរស ហើយឲ្យដើរជាមួយនឹងទ្រង់ ដោយសុភាពរាបទាប ។
តើព្រះអម្ចាស់ទាមទារអ្វីខ្លះ ?
នៅចុងបញ្ចប់នៃមេរៀននេះ អ្នកនឹងអញ្ជើញសិស្សឲ្យដាក់ផែនការមួយ ដើម្បីកែលម្អកិច្ចខិតខំរបស់ពួកគេ ដើម្បីផ្គាប់ព្រះទ័យព្រះវរបិតាសួគ៌ និងព្រះយេស៊ូវគ្រីស្ទ តាមវិធីដែលបានរកឃើញនៅក្នុង ខទី ៨ ។
ដើម្បីរៀបចំសិស្សឲ្យដាក់ផែនការនេះ សូមពិចារណាប្រើប្រាស់សំណៅមេរៀន « តើព្រះអម្ចាស់ទាមទារអ្វីខ្លះ ? »
បន្ទាប់ពីសិស្សសិក្សាផ្នែកមួយ ឬច្រើននៃសំណៅមេរៀនជាមួយក្រុមហើយ អ្នកអាចអញ្ជើញពួកគេឲ្យបង្កើតតារាងជួរឈរចំនួនបីនៅលើក្ដារខៀនដែលមានស្លាក ប្រព្រឹត្តដោយសុចរិត ឲ្យស្រឡាញ់សេចក្តីសប្បុរស និងដើរដោយសុភាពរាបទាប ។ បន្ទាប់ពីបានសិក្សាសំណៅមេរៀននេះ សិស្សអាចសរសេរវិធីដែលក្មេងជំទង់ម្នាក់អាចផ្គាប់ព្រះទ័យព្រះអម្ចាស់លើក្រដាសតូចៗ ហើយបិទវានៅលើក្ដារខៀនក្រោមជួរឈរដែលដូចគ្នា ។ នៅចុងបញ្ចប់នៃសកម្មភាពនេះ សិស្សអាចអានឯកសារទាំងអស់បាន ។ ការធ្វើបែបនេះអាចជួយពួកគេជ្រើសរើសអ្វីដែលពួកគេចាប់អារម្មណ៍ដើម្បីកែលម្អ ។
ការបង្ហាញការដឹងគុណដល់ព្រះអម្ចាស់
បន្ទាប់ពីសិស្សបានពិនិត្យមើលការផ្ដល់យោបល់របស់មិត្តរួមថ្នាក់របស់ពួកគេរួចហើយ សូមដាក់បង្ហាញសេចក្តីណែនាំ និងការជំរុញដូចខាងក្រោម ។
សព្វថ្ងៃនេះ ព្រះវិញ្ញាណបរិសុទ្ធប្រហែលជាបំផុសគំនិតក្នុងគំនិតរបស់អ្នក ឬអារម្មណ៍ក្នុងចិត្តរបស់អ្នកអំពីអ្វីមួយដែលអាចជួយអ្នកប្រព្រឹត្តដោយសុចរិត ឲ្យស្រឡាញ់សេចក្តីសប្បុរស ឬឲ្យដើរជាមួយព្រះអម្ចាស់ ដោយសុភាពរាបទាប ។ ដាក់ផែនការដើម្បីធ្វើសកម្មភាពលើអ្វីដែលអ្នកបានរៀន និងទទួលអារម្មណ៍ដោយបំពេញការបំផុសខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។
-
ដើម្បីផ្គាប់ព្រះទ័យព្រះវរបិតាសួគ៌ និងព្រះយេស៊ូវគ្រីស្ទកាន់តែប្រសើរ ខ្ញុំចង់ផ្តោតលើឃ្លា « » មកពី មីកា ៦:៨ ។
-
រឿងជាក់លាក់មួយ ឬពីរដែលខ្ញុំចង់ធ្វើគឺ ៖ ។
អ្នកអាចធានាដល់សិស្សថា ព្រះវរបិតាសួគ៌ស្រឡាញ់កិច្ចខិតខំដោយស្មោះអស់ពីចិត្តរបស់យើងដើម្បីផ្គាប់ព្រះទ័យទ្រង់ ។ កិច្ចខិតខំទាំងនេះជួយយើងឲ្យប្រែក្លាយកាន់តែដូចព្រះយេស៊ូវគ្រីស្ទជារៀងរាល់ថ្ងៃ ។ អ្នកអាចនឹងចែកចាយសាក្សីរបស់អ្នកថា នៅពេលយើងបន្តព្យាយាមធ្វើឲ្យកាន់តែល្អប្រសើរឡើង នោះព្រះអង្គសង្គ្រោះនឹងស្អាងឡើងកិច្ចខិតខំដោយស្មោះអស់ពីចិត្តរបស់យើង ។