Sukda ang Imong Nakat-onan 9; Leksiyon 148

Sukda ang Imong Nakat-onan 9

Jeremias–Joel

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Langitnong Amahan ug ni Jesukristo. Kini nga leksiyon gituyo aron tabangan ang mga estudyante nga pamalandongan ang gitakda nilang mga tumong ug ang paglambo nga ilang nasinati sa ilang pagtuon sa Jeremias–Joel.

Pagpangandam sa estudyante: Dapita ang mga estudyante sa pagtambong nga andam sa pagpakigbahin og tudling sa kasulatan nga makahuloganon para nila gikan sa ilang pagtuon sa Daang Tugon. Hangyoa sila nga maghunahuna kon sa unsang paagi nakatabang nila ang maong tudling sa pagsunod ni Jesukristo.

Posibleng mga Kalihokan sa Pagkat-on

Ang pagtuon sa imong klase sa Jeremias–si Joel tingali nagpunting sa lain nga resulta kaysa niadtong gisukod niini nga leksiyon. Kon mao, ipahiangay ang mga kalihokan sa pagsukod sa nasinati nga pag-uswag sa mga estudyante gikan sa mga resulta nga gipunting sa imong klase.

Niini nga leksiyon, makabaton og kahigayonan ang mga estudyante nga sukdon ang ilang pag-uswag sa mosunod nga mga bahin:

1. Pagpasabot sa mga panagna kalabot sa Pagpahiuli sa ebanghelyo ni Jesukristo sa ulahing mga adlaw. (Pahinumdom: Kini nga kalihokan gibase sa mga pagtulun-an sa Leksiyon 118: “Isaias 29”; Leksiyon 140: “Ezequiel 37”; ug Leksiyon 143: “Daniel 2.”)

2. Pagbati sa gahom sa ilang balaanong misyon. (Pahinumdom: Kini nga kalihokan gibase sa mga pagtulun-an sa Leksiyon 130: “Jeremias 1.”)

3. Pag-apil sa pagpundok sa Israel. (Pahinumdom: Kini nga kalihokan gibase sa mga pagtulun-an sa Leksiyon 132: “Jeremias 16.”)

Samtang motubag sa mga pangutana ug mokomento ang mga estudyante niini nga leksiyon, paghunahuna og mga paagi aron tabangan ang mga estudyante nga tinguhaon, ilhon, ug molihok uyon sa personal nga pagpadayag. Usa ka paagi sa paghimo niini mao ang pagpangutana sa imong kaugalingon, “Unsay akong ipangutana nila?” o “Unsa pay idasig nako nila nga himoon?” Ang pagpangutana niini nga matang makadapit og inspirasyon sa Espiritu Santo nga tabangan ang mga estudyante nga molihok uyon sa personal nga pagpadayag nga ilang nadawat.

(Alang sa dugang nga pagbansay sa follow-up nga mga pangutana nga nagdapit og personal nga pagpadayag, tan-awa ang “Tabangi ang mga tigkat-on sa pagpangita, pag-ila, ug paglihok sa personal nga pagpadayag,” diha sa Pagpalambo sa mga Kahanas sa Magtutudlo).

Pagkahimong mas sama sa Manluluwas

Makatabang ka sa mga estudyante nga mangandam sa pagsukod sa ilang nakat-onan pinaagi sa paghisgot kon unsa ka sagad tang makakat-on pinaagi sa pagsundog sa uban. Pananglitan, ang mga bata makakat-on og pangunang mga kinaiya pinaagi sa pagsundog. Pwede nimong ipakigbahin ang mga leksiyon nga imong nakat-onan gikan sa pagsundog sa usa ka tawo.

• Kinsa ang gisulayan nimo og sundog? Unsay imong nakat-onan gikan sa pagsundog kanila?

Ikonsiderar ang pagpakita og hulagway sa Manluluwas samtang hisgotan ang mosunod nga mga pangutana. Sa dili pa ang panaghisgotan sa klase, mahimong makabenepisyo ang mga estudyante kon hatagan sila og panahon sa pagpamalandong niining mga pangutana o sa pagtubag niini diha sa ilang mga journal sa pagtuon.

• Unsa ang pipila ka paagi nga gisulayan nimo og sundog ang Manluluwas?

• Unsay imong nakat-onan sa seminary o sa imong personal nga pagtuon nga nakatabang nimo sa pagsundog sa Manluluwas?

Ang nahibiling bahin sa leksiyon mohatag og kahigayonan sa mga estudyante nga rebyohon ang pipila sa ilang nakat-onan sa seminary. Dapita ang mga estudyante nga padayong pamalandongan kon sa unsang paagi makatabang nila ang ilang nakat-onan aron sundon ang panig-ingnan sa Manluluwas aron mahisama Kaniya.

Ipasabot ang mga panagna bahin sa Pagpahiuli sa ebanghelyo ni Jesukristo sa ulahing mga adlaw

Kini nga seksiyon sa leksiyon gituyo aron tabangan ang mga estudyante nga ipasabot ang mga panagna bahin sa Pagpahiuli sa ebanghelyo ni Jesukristo. Kon gikinahanglan, tabangi ang mga estudyante sa pagrebyo sa mga tudling sa doktrinal nga kahanas sa Daang Tugon sa Isaias 29:13–14; Ezequiel 37:15–17; ug Daniel 2:44–45. Aron marebyo ang mga tudling, pwedeng mopili ang mga estudyante og usa sa mga pakisayran sa kasulatan ug himoon ang mosunod:

1. Basahon ang tudling sa kasulatan sa doktrinal nga kahanas.

2. Rebyohon ang ilang gimarkahan o gisulat diha sa ilang mga kasulatan o journal sa pagtuon bahin sa tudling sa kasulatan.

3. Rebyoha ang mahinungdanong hugpong sa mga pulong sa kasulatan sa doktrinal nga kahanas para sa pakisayran sa kasulatan diha sa Mahinungdanon nga Dokumento sa Doktrinal nga Kahanas (2023).

Human marebyo sa mga estudyante kini nga mga panagna sa Pagpahiuli diha sa Daang Tugon, ikonsiderar ang pagparespares kanila.

Hunahunaa nga kamo misyonaryo nga mga kompanyon nga nangandam sa pagtudlo og leksiyon bahin sa Pagpahiuli sa ebanghelyo ni Jesukristo. Magtinabangay aron makahimo og yano nga lesson plan sa inyong itudlo. Isip kabahin sa inyong lesson plan:

• Basaha ug ipasabot ang usa o kapin pa sa mga tudling sa kasulatan sa doktrinal nga kahanas sa Daang Tugon bahin sa Pagpahiuli sa ebanghelyo sa Manluluwas.

• Ilista ang duha o tulo ka rason kon nganong gikinahanglan sa kalibotan karon ang Simbahan ni Jesukristo sa mga Santos sa Ulahing mga Adlaw.

• Ipakigbahin ang imong pagbati bahin sa Pagpahiuli sa ebanghelyo sa Manluluwas sa ulahing mga adlaw.

Human ang igong panahon sa pagpangandam, dapita ang mga managkompanyon nga tudloan ang laing mga kompanyon. O pwede nimong dapiton ang pipila ka managkompanyon nga ipakigbahin sa ilang tubag ngadto sa klase. Ikonsiderar ang pagpakigbahin sa imong pagpamatuod sa Pagpahiuli sa ebanghelyo ni Jesukristo ug kon sa unsang paagi niini napanalanginan ang imong kinabuhi.

Pagbati sa gahom sa imong balaanong misyon

Dapita ang mga estudyante sa pagpamalandong sa bag-ohay lang nilang mga kasinatian nga nagpakita nga nakaila ang Dios kanila ug gihatagan sila og piho nga mga responsibilidad nga himoon sa mortalidad. Alang niadtong nakadawat na sa ilang patriyarkal nga panalangin, pwede nimo silang awhagon nga maghunahuna og mga pulong o hugpong sa mga pulong diha sa ilang patriyarkal nga panalangin nga nagpakita niini.

Aron tabangan ang mga estudyante nga mahinumdoman ang ilang nakat-onan sa nangagi bahin sa ilang balaanong katuyoan, ikonsiderar ang pagdapit nila nga himoon ang mosunod uban ang ilang kapares:

Rebyoha ang mosunod nga mga tudling sa kasulatan aron mahinumdoman ang imong nakat-onan bahin sa nahibaloan sa Ginoo kanimo ug sa imong balaanong katuyoan:

• Jeremias 1:4–5

• Doktrina ug mga Pakigsaad 138:53–56

Usa ka paagi nga matabangan nimo ang mga estudyante nga masukod ang pag-uswag ug kausaban sa ilang mga tinguha mao ang pagpakita sa mosunod nga mga pag-aghat nga ilang gigamit sa sinugdanan sa Leksiyon 130: “Jeremias 1.” Dapita ang mga estudyante nga tan-awon pag-usab ang ilang mga gisulat sa journal para niana nga leksiyon aron mahibaloan kon unsay ilang gibati niadtong panahona.

Pwede usab nimong ipabasa sa mga estudyante ang mensahe nga ilang gisulat para sa ilang kaugalingon sa kataposan sa maong leksiyon.

Unsaon nimo pagsukod ang imong kaugalingon (1 = tinuod para nako; 10 = dili tinuod para nako) sa mosunod nga mga pahayag. Irekord sa imong journal sa pagtuon kon nganong mao nay imong grado sa imong kaugalingon para sa kada pahayag.

• Motuo ko nga mas nakaila nako ang Langitnong Amahan ug si Jesukristo kay ni bisan kinsa.

• Motuo ko nga gihatagan ko Nila og balaanong katuyoan nga kaya nakong himoon uban sa Ilang tabang.

• Gusto nakong mahibaloan ug tumanon ang balaanong misyon nga gihatag kanako sa Langitnong Amahan ug ni Jesukristo.

Dapita ang mga estudyante sa pagsukod sa ilang pag-uswag sa tulo ka pahayag sa ibabaw pinaagi sa pagrekord sa bag-ohay lang nilang nakat-onan ug nasinati nga nakaimpluwensiya sa ilang mga gituohan ug mga tinguha.

Moapil sa pagpundok sa Israel

Sa Leksiyon 132: “Jeremias 16,” gidapit ang mga estudyante nga maghimo og personal nga plano sa pagpakigbahin sa ebanghelyo sa Manluluwas ngadto sa uban. Tingali ang mga estudyante nangayo og inspirasyon gikan sa Espiritu Santo kon kang kinsa pwedeng ipakigbahin nila ang ebanghelyo, ug kon unsaon ug kanus-a nila kini himoon. Aron tabangan ang mga estudyante nga hinumdoman ang leksiyon ug ang ilang plano, pwede nimong basahon ang Jeremias 16:14–16.

Ikonsiderar ang pagpakita sa mosunod nga graphic. Dapita ang mga estudyante sa paghimo og parehas nga graphic diha sa ilang journal sa pagtuon ug ibutang sa kahon ang usa o kapin pang mga pag-aghat.

Human ang igong panahon, dapita ang andam nga mga estudyante nga hisgotan ang ilang mga kasinatian uban sa klase. Pangita og mga paagi sa pagdayeg ug pagdasig sa mga estudyante para sa ilang mga paningkamot sa pagpakigbahin sa ebanghelyo sa Manluluwas. Pwede nimong hatagan og kahigayonan ang mga estudyante nga mainampoong maghimo og bag-ong plano aron padayong ipakigbahin ang ebanghelyo ni Jesukristo ngadto niadtong naglibot kanila.