Psalmeve 1–2; 8; 19–33; 40; 46: Mësimi 101

Parathënie për Librin e Psalmeve, Pjesa 2

Adhuroni Zotin dhe Lavdëroni Emrin e Tij të Shenjtë

Një mënyrë për ta adhuruar Atin Qiellor dhe Jezu Krishtin është të shprehni dashurinë dhe përkushtimin tuaj ndaj Tyre. Shumë prej psalmeve janë shembuj poetikë të adhurimit të Atit dhe të Birit në lavde, në përgjërime dhe në lutje. Ky mësim mund t’i ndihmojë nxënësit t’i shprehin ndjenjat e tyre të adhurimit për Atin Qiellor dhe Jezu Krishtin.

Përgatitja e nxënësve: Bëjuani të ditur nxënësve se ata do të kenë një mundësi për të reflektuar mbi mendimet dhe ndjenjat e tyre rreth Atit Qiellor, Jezu Krishtit dhe gjërave të shenjta në përgatitje për t’i shprehur ato ndjenja në këtë mësim. Inkurajojini nxënësit të dëgjojnë muzikë nderuese dhe të shqyrtojnë shkrime të shenjta të parapëlqyera, citate ose figura të shenjta, duke kërkuar gjëra të veçanta që mund të duan t’i tregojnë. Bërja e kësaj mund t’i përgatitë zemrën dhe mendjet e tyre për veprimtarinë në këtë mësim.

Veprimtari të Mundshme të të Mësuarit

Adhurimi i Perëndisë

Shënim: Veprimtaria në fund të këtij mësimi do të jetë pjesë e reflektimit në Mësimin 112: “Vlerësoni të Mësuarit Tuaj 7”. Sigurohuni që t’u lini nxënësve kohë të mjaftueshme që të fillojnë të punojnë për veprimtarinë gjatë orës mësimore.

Për të nisur orën mësimore, jepuni nxënësve një minutë për të përsiatur pyetjen vijuese:

• Çfarë do të thotë “adhurimi i Perëndisë” për ty?

Plaku Din M. Dejvis, asokohe në shërbim në Peshkopatën Kryesuese, tregoi disa nga mënyrat se si mund ta adhurojmë Perëndinë kur dha mësim:

“Kur ne e adhurojmë Perëndinë, ne i afrohemi Atij me dashuri, përulësi dhe admirim nderues. Ne e njohim dhe e pranojmë Atë si Mbretin tonë sovran, Krijuesin e universit, Atin tonë të dashur, pafundësisht të përzemërt.

Ne e respektojmë dhe e nderojmë Atë.

Ne i nënshtrohemi Atij.

Ne i lartësojmë zemrat në lutje të fuqishme, e çmojmë fjalën e Tij, gëzohemi në hirin e Tij dhe zotohemi ta ndjekim Atë me besnikëri të përkushtuar.” (“Bekimet e Adhurimit”, Liahona, nëntor 2016, f. 94)

• Si do ta përshkruaje ndryshimin ndërmjet thjesht frekuentimit të kishës, të tempullit, ose të seminarit, krahasuar me adhurimin e Perëndisë ndërsa i frekuenton?

Tregojuni shkurtimisht nxënësve një ose dy nga mënyrat tuaja të parapëlqyera se si njerëzit i kanë shprehur ndjenjat e tyre të adhurimit për Atin Qiellor dhe Jezu Krishtin. Shembujt përfshijnë një poemë, material filmik, vepër arti, pjesë të shkruar, ose pjesë muzikore të shenjtë. Mund të përfshini gjërat që shkruat ose krijuat vetë. Shpjegojuni nxënësve se ka shumë mënyra se si dikush mund t’i shprehë ndjenjat e adhurimit për Atin Qiellor dhe Jezu Krishtin.

Inkurajojini nxënësit të reflektojnë mbi mënyrën se si mund t’i shprehin ndjenjat e tyre të adhurimit për Atin Qiellor dhe Jezu Krishtin. Gjatë gjithë mësimit, jini i/e vëmendshëm/me dhe të ndjeshëm ndaj nxënësve që mund të mos ndiejnë një lidhje me Atin Qiellor dhe Jezu Krishtin tani.

Në ditarin e studimit, përzgjidh një ose më shumë nga pyetjet vijuese për t’u përgjigjur. Mund të përdorësh një pjesë të mesazhit të Plakut Dejvis ose fjalët e tua për të përmbledhur ndjenjat e tua.

• Si ndihesh për Atin Qiellor, Jezu Krishtin dhe gjërat e shenjta?

• Si e shpreh më së miri dashurinë, respektin ose nderimin për Atin Qiellor, Jezu Krishtin ose bekimet shpirtërore?

Në fund të mësimit sot, do të fillosh të formulosh një shprehje të ndjenjave të tua. Mbaje këtë në mendje ndërsa studion. Mendo rreth mënyrës se si mund të duash ta shprehësh atë që mëson dhe ndien. Ftoje Frymën e Shenjtë të të ndihmojë në përpjekjet e tua.

Adhurimi i Zotit në psalme

Shumë psalme janë shprehjet poetike me lutje të mendimeve të shenjta, ndjenjave, shpresave dhe dëshirave të shkruesve. Ndërkohë që shumë shkrime të shenjta shënojnë fjalët e Zotit për ne, psalmet shpesh reflektojnë fjalët e shkruesve për Të. Lexo te Psalmeve 18:1–6, duke kërkuar fjalët dhe frazat që përdori Davidi për të shprehur ndjenjat e tij rreth Zotit.

Ftojini nxënësit t’i shkruajnë në tabelë fjalët dhe frazat që zbuluan. Nxënësit mund të përcaktojnë disa fraza të ndryshme, të tilla si:

• Zoti është forca ime (vargu 1).

• Zoti është shkëmbi im, fortesa ime, çliruesi, Perëndia, forca, mburoja, fuqia e shpëtimit ose streha ime e lartë (vargu 2).

• Zoti është i denjë për t’u lëvduar (vargu 3).

• Zoti i dëgjon thirrjet tona ndaj Tij (vargu 6).

Nxënësit që i shkruan frazat mund të tregojnë arsyen përse Davidi mund të ketë dashur që lexuesit e tij ta dinin këtë rreth Zotit. Merreni parasysh t’i pyesni nxënësit se si i ka përmbushur Zoti këto role në jetën e tyre.

Ftojini nxënësit të zgjedhin njërin nga fragmentet vijuese për ta studiuar me një partner. Inkurajojini ata të ndalojnë shpesh dhe t’ia tregojnë njëri-tjetrit mendimet dhe ndjenjat e tyre.

Psalmet demonstrojnë shumë mënyra se si mund t’i shprehim ndjenjat për Zotin. Studioje njërin nga fragmentet vijuese me ngadalë, duke shenjuar fjalët dhe frazat që reflektojnë ndjenjat e tua për Zotin.

Psalmeve 8:1–9

Psalmeve 27:1–9

Psalmeve 30:1–12

Psalmeve 46:1–11

Merreni parasysh t’u tregoni nxënësve mënyra të ndryshme nga të shkruarit për të shprehur adhurim. Mund të përzgjidhni një material filmik që shpreh ndjenjat për Atin Qiellor dhe Jezu Krishtin nëpërmjet kërcimit, muzikës ose artit, të tilla si materialet filmike vijuese në dispozicion në ChurchofJesusChrist.org. Ftojini nxënësit të përsiatin atë që mendojnë se po shprehnin krijuesit nëpërmjet fjalëve, pikturave, e me radhë.

• Vallëzim: “Trust in the Lord: Music Video” [“Mirëbesoni te Zoti: Material Filmik Muzikor”] (4:11)

• Muzikë: “Here I Am, I Will Follow Jesus Christ” [“Ja Ku Jam, Unë do ta Ndjek Jezu Krishtin”] (3:07) ose “Paqe në Krisht” (4:09)

• Art: Motra Kristin M. Ji shpërndan pikturën e saj të Shpëtimtarit në Facebook (https://www.facebook.com/reel/1240140883346653?mibextid=kcDB8O)

Shprehi ndjenjat e tua të adhurimit

Jepjuani nxënësve kohën e mbetur të orës mësimore që të fillojnë të krijojnë diçka që reflekton mënyrën se si ata ndihen për Atin Qiellor dhe Jezu Krishtin. Vlerësojini nevojat e nxënësve tuaj dhe paraqitni disa ose të gjitha mundësitë vijuese.

Mund të siguroni mjete për punë artistike si letër, lapsa me ngjyra, bojëra uji, e me radhë, për nxënësit që dëshirojnë të krijojnë një paraqitje pamore të ndjenjave të tyre.

Për shkak se ky është një projekt individual, mund të ecni nëpër klasë dhe të ofroni ndihmë, udhërrëfim dhe inkurajim sipas nevojës. Nëse është e përshtatshme, merreni parasysh të luani muzikë të shenjtë, të qetë gjatë veprimtarisë.

Mund të ndihmojë të shprehni dashurinë dhe mirëbesimin tuaj për ndonjë nxënës që mund të ketë vështirësi me mendimet ose ndjenjat e tij për Zotin. Veprimtaria 6 mund të jetë një mundësi e mirë për nxënësit që janë ende të pasigurt për besimin e tyre.

Shpenzo ca kohë për t’i shprehur mendimet dhe ndjenjat për Atin Qiellor, Jezu Krishtin dhe gjërat e shenjta. Përdor një nga mundësitë vijuese, ose krijo një mundësi tënden. Mund të mos kesh kohë për ta përfunduar punën tënde në orën mësimore sot, por mund të fillosh të kompozosh një këngë ose poemë, ose të krijosh konceptin e një vizatimi ose materiali filmik. Mund të vazhdosh të punosh për mënyrën tënde të të shprehurit jashtë orës mësimore. Mund të zgjedhësh të përfshish një shkrim të shenjtë nga libri i Psalmeve që t’u duk kuptimplotë.

1. Kompozo një poemë ose një këngë që shpreh ndjenjat e tua për Atin Qiellor dhe Jezu Krishtin.

2. Bëj një material filmik ose një regjistrim zanor ku shpreh ndjenjat e tua për Atin Qiellor dhe Jezu Krishtin. Për një material filmik, mund të përfshish figura të shenjta të parapëlqyera nga Gospel Library [Biblioteka e Ungjillit].

3. Psalmistët shpesh e krahasuan Shpëtimtarin me diçka tjetër për të treguar se çfarë rëndësie kishte Ai për ta. Shembujt përfshijnë “Zoti është kështjella ime, fortesa ime” (Psalmeve 18:2) dhe “Zoti është drita ime” (Psalmeve 27:1). Bëj një listë të gjërave në jetën tënde që mund të përfaqësojnë mënyrën se si ti ndihesh për Zotin.

4. Krijo një vizatim, pikturë, meme, ilustrim ose vepër tjetër arti që reflekton ndjenjat e tua për Atin Qiellor dhe Jezu Krishtin.

5. Kërko shumë figura të shenjta dhe krijo një kolazh. Zgjidh figura që përfaqësojnë gjëra rreth Atit Qiellor, Jezu Krishtit dhe ungjillit që janë të rëndësishme për ty. Bëj një shënim për secilën figurë duke përmbledhur mendimet dhe ndjenjat e tua.

6. Shkruaji mendimet e tua për Atin Qiellor dhe Jezu Krishtin. Nëse dëshiron, mund të tregosh një përvojë që ka ndikuar në mënyrën se si ndihesh për Ta.

Mund t’i lejoni nxënësit ta tregojnë atë që krijuan sot. Mund të gjeni kohë për nxënësit që ta tregojnë punën e tyre gjatë mësimeve të ardhshme pasi t’i kenë përfunduar krijimet e tyre. Merreni parasysh t’i ftoni nxënësit të shtojnë në atë që po krijojnë ndërsa vazhdojnë të mësojnë rreth Jezu Krishtit gjatë disa mësimeve të ardhshme. Thuajuni nxënësve se ata do të reflektojnë për këtë përvojë krijuese në Mësimin 112: “Vlerësoni të Mësuarit Tuaj 7”.

Burime Shtesë

Çfarë do të thotë të adhurosh Perëndinë?

“Të adhurosh Perëndinë është t’i japim Atij dashurinë, bindjen, nderimin, shërbimin, dhe përkushtimin tonë. Zoti e urdhëroi Moisiun që të ‘adhuro[nte] Perëndinë, sepse vetëm atij do t’i shërbe[nte]’ (Moisiu 1:15). Ai ka urdhëruar gjithashtu: ‘Duaje Zotin, Perëndinë tënd, me gjithë zemrën tënde, me gjithë fuqinë, mendjen dhe forcën tënde; dhe në emër të Jezu Krishtit duhet t’i shërbesh atij’ (Doktrina e Besëlidhje 59:5). Adhurimi tregon jo vetëm dashurinë tonë për Perëndinë dhe përkushtimin ndaj Tij, ai na jep forcë që të zbatojmë urdhërimet e Tij. Ne rritemi nëpërmjet adhurimit në njohuri dhe në besnikëri.” (Gospel Topics, “Worship”, Gospel Library [Biblioteka e Ungjillit])

Si mund të na ndihmojë muzika e shenjtë ta adhurojmë Zotin?

Plaku Dejvid A. Bednar, i Kuorumit të Dymbëdhjetë Apostujve, shpjegoi:

“Më pëlqen shumë të këndoj himnin: ‘Sa i Fort’ një Themel.’ Askush në planet nuk këndon më keq se unë. Por ndërthurja e muzikës nxitëse dhe fjalëve të himnit më ndihmojnë të mësoj rreth hirit dhe fuqisë forcuese të Shlyerjes së Shpëtimtarit në një mënyrë të fuqishme. Himnet që dua më shumë përqendrohen në rivendosjen dhe japin mësime doktrinore të fuqishme. Dhe në ato mesazhe, në muzikën, si dhe në fjalët, mund ta ‘Dëgjoni Atë’. Për mua, muzika shpesh është një kanal për zërin e Zotit.” (“‘Hear Him’ in Your Heart and in Your Mind”, Inspiration [blog], 21 prill 2020, ChurchofJesusChrist.org)

Presidenti Dallin H. Ouks, i Presidencës së Parë, tha:

“Muzika e shenjtë ka një kapacitet unik për të komunikuar ndjenjat tona të dashurisë për Zotin. Ky lloj komunikimi është një ndihmë e shkëlqyer në adhurimin tonë. Shumë veta e kanë të vështirë t’i shprehin ndjenjat e adhurimit me fjalë, por të gjithë mund të bashkohen në komunikimin e ndjenjave të tilla nëpërmjet fjalëve të frymëzuara të himneve tona.” (“Worship through Music”, Ensign, nëntor 1994, f. 10)

Ndërkohë që shërbente si një anëtar i Të Shtatëdhjetëve, Plaku Meril J. Bejtmen tregoi:

“Himnet e Kishës janë një formë e adhurimit; ato shërbejnë si një lutje falënderimi dhe një shprehje e përkushtimit. Shumë himne ndërtojnë unitetin ndër shenjtorët, si dhe ndërtojnë një komunitet shenjtorësh. Ata e ftojnë Shpirtin në mbledhje dhe në jetën tonë. Ato japin mësim doktrinën. Himnet shpesh shprehin dëshminë dhe mund të jenë edhe një formë e mbrojtjes ose një burim i ngushëllimit dhe shërimit.” (“The Power of Hymns”, Ensign, korrik 2001, f. 15–16)

Veprimtari Plotësuese të të Mësuarit

Psalmeve 8

Klasa mund të shqyrtojë kapitullin te Psalmeve 8 si një shembull i adhurimit të Zotit nëpërmjet shijimit të bukurisë së krijimeve të Tij. Ftojini nxënësit të lexojnë te Psalmeve 8:1–9. Më pas lexoni ose këndoni himnin “Sa i Madh Je Ti”.

Duke u nisur nga psalmi dhe himni, ftojini nxënësit të përfundojnë të vërtetën vijuese: Zoti është …

Nxënësit mund të tregojnë ato që mësuan dhe ndien ndërsa i studiuan këto fjalë. Ata mund të tregojnë përvojat që kanë pasur duke u ndier afër Zotit në natyrë.

Mënyrat e të shprehurit me zemër

Ndërsa diskutoni mënyrat se si njerëzit e shprehin adhurimin, mund të shfaqni përzgjedhje nga materiali filmik “The Remarkable Power of Music” [“Fuqia Mbresëlënëse e Muzikës”]. Krejg Xhesop, që shërbeu si dirigjent i Tabernacle Choir në Temple Square, tregoi historitë që fshiheshin pas himneve vijuese. Përfshihen edhe interpretimet.

• “It Is Well with My Soul” [“Është Mirë Shpirti Im”] (kodi kohor 2:20 deri në 08:25)

• “Amazing Grace” [“Hir i Mahnitshëm”] (kodi kohor 08:52 deri në 14:33)

• “O Come, O Come, Emmanuel” “O Eja, O Eja Emanuel” (kodi kohor 14:34 deri në 20:38)

• “Savior, Redeemer of My Soul” [“Shpëtimtari, Shëlbuesi i Shpirtit Tim”] (kodi kohor 35:31 deri në 41:00)

Psalme në librat e tjerë të shkrimit të shenjtë

Nxënësit mund të kenë dobi nga studimi i psalmeve të shkruar nga gra dhe burra besnikë në librat e tjerë të shkrimit të shenjtë. Mund të jepni fragmentet vijuese të shkrimit të shenjtë. Ftojini nxënësit të përzgjedhin njërin për ta studiuar.

• Ana: 1 Samuelit 2:1–10

• Maria: Lluka 1:46–55

• Nefi: 2 Nefi 4:16–25

• Nefi: 2 Nefi 4:26–35

• Amoni: Alma 26:8–20

Nxënësit mund të kërkojnë dëshirat, ndjenjat dhe mendimet që tregoi autori. Pasi të lexojnë, nxënësit mund t’ia tregojnë atë që zbuluan një partneri që studioi një psalm të ndryshëm.