Job 1–3; 12–14; 19; 21–24; 38–40; 42

Job 1–3; 12–14; 19; 21–24; 38–40; 42

Kinatibuk-ang Pagpasabot

Si Job maoy usa ka tawong matinud-anon kinsa gipanalanginan pag-ayo ang kinabuhi. Sa wala damha, nawala kang Job ang iyang kabtangan, mga anak, ug maayong panglawas. Bisag lisod kini nga mga pagsulay, misalig si Job sa Ginoo, nga maoy mitabang ni Job nga tan-awon ang iyang mga pagsulay uban ang mahangtorong panglantaw. Gipanalanginan pag-ayo sa Ginoo si Job sa kataposang bahin sa iyang kinabuhi.

Tinguhaa nga makaila sa mga estudyante—sabta ang ilang mga sirkumstansiya, mga panginahanglan, ug mga kalig-on. Kon mobati ang mga estudyante nga tinuod nga nagpakabana nila ang ilang magtutudlo, mas ganahan silang mosulod sa klase nga andam sa pagkat-on ug mopakigbahin sa ilang mga panabot ug mga kasinatian. Pangitag mga kahigayonan sa pagpangutana sa mga estudyante bahin sa ilang mga interes sa dili pa, atol sa, o human sa klase. Pwede kang mangutana bahin sa mga butang nga dad-on sa mga estudyante ngadto sa klase o sa mga kalihokan diin apil sila. Alang sa dugang pa bahin sa kon sa unsang paagi mohimo og mga koneksiyon ang Manluluwas, tan-awa ang “Nakaila Kanato ang Manluluwas ug Nakasabot sa Atong mga Kahimtang, mga Panginahanglan, ug mga Kalig-on” (Pagtudlo sumala sa Pamaagi sa Manluluwas [2022], 13). Alang sa dugang pagbansay sa pagmatikod ug pagpangutana bahin sa mga interes sa estudyante, tan-awa ang “Tinguhaa nga makaila kanila—sabta ang ilang mga sirkumstansiya, mga panginahanglan, ug mga kalig-on.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Job 1–3; 12–13

Katuyoan sa leksiyon: Aron tabangan ang mga estudyante nga mas tinguhaon ang pagsalig sa Langitnong Amahan ug kang Jesukristo panahon sa mga pagsulay.

• Pagpangandam sa estudyante: Dapita ang mga estudyante sa pagpamalandong kon giunsa nila pagtubag ang ilang mga pagsulay. Hangyoa silang mosulod sa klase nga andam sa paghisgot sa ilang mga kasinatian.

• Bidyo: “Mountains to Climb” (5:05)

Job 14; 19

Katuyoan sa leksiyon: Aron tabangan ang mga estudyante nga masabtan ang paglaom nga naggikan sa Pagkabanhaw ni Jesukristo.

• Pagpangandam sa estudyante: Dapita ang mga estudyante nga maminaw o basahon ang mga liriko sa himno nga “Buhi ang Manunubos Ko, Niini Nasayud Ako.” Pwede silang mopili og paboritong hugpong sa mga pulong gikan sa himno nga makahatag og paglaom sa usa ka tawo nga nagsagubang og mga kalisdanan.

• Sulod nga ipakita: Pangutana gikan sa sinugdanan sa leksiyon; mga instruksiyon ubos sa “Pagsabot sa Pagkabanhaw”

• Mga Bidyo: “Until We Meet Again” (3:39) gikan sa time code 0:00 hangtod 2:28 ug gikan sa 2:28 hangtod 3:39; “Tungod Kaniya” (2:44)

Job 21–24; 38–40; 42

Katuyoan sa leksiyon: Aron hatagan og kahigayonan ang mga estudyante nga tabangan ang uban nga lantawon ang ilang pagsulay uban ang mahangtorong panglantaw.

• Pagpangandam sa estudyante: Ihatag sa mga estudyante ang pangutana nga “Nganong gitugotan ta sa Dios nga makasinatig mga pagsulay?” Dapita sila sa pagpangita sa mga tubag gamit ang mga balaanong kapanguhaan, sama sa mga kasulatan, mga pagtulun-an gikan sa mga lider sa Simbahan, o ilang mga ginikanan. Pwede pod nilang pangutan-on ang mga sakop sa ilang kapamilya o higala kon unsay ilang tubag sa pangutana.

• Imahe: Job

• Handout: “Pagsabot sa mga Pagsulay”

• Bidyo: “Why Do Bad Things Happen to Good People?” (4:39)

• Mga materyal para sa mga estudyante: Dice nga naay unom ka nawong para sa kada pares sa estudyante

• Sulod nga ipakita: Mga instruksiyon sa paghimo og dula sa dice