1 Samuel 8–10; 13; 15–16: Leksiyon 73

1 Samuel 16

“Ang Ginoo Nagtan-aw sa Kasingkasing”

Gipadayag sa Ginoo kang Samuel nga Iyang gipili si David nga manununod ni Saul isip hari sa Israel. Pinaagi niini nga kasinatian, nakat-onan ni Samuel nga lahi ang pagtan-aw sa Ginoo kanato kay sa sagad nga pagtan-aw sa mga tawo sa usag usa. Kini nga leksiyon makatabang sa mga estudyante nga mabati ang kaimportante sa pagtan-aw sa ilang kaugalingon ug sa uban sama sa pagtan-aw sa Langitnong Amahan ug ni Jesukristo.

Pagpangandam sa estudyante: Dapita ang mga estudyante sa pagbasa sa 1 Samuel 16:7. Hangyoa sila nga ilista tupad sa bersikulo ang mga kalainan tali sa unsay gihatagan og bili usahay sa mga tawo ug unsay gihatagan og bili sa Langitnong Amahan kanato.

Posibleng mga Kalihokan sa Pagkat-on

Natagong bili

Ikonsiderar ang pagsugod sa klase pinaagi sa pagtabang sa mga estudyante nga makaamgo nga dili nato kanunayng makita ang bili sa usa ka butang pinaagi lang sa sudlanan niini. Aron mahimo kini, pwede kang magpakita og duha ka parehas nga aytem nga naa sa duha ka managlahing sudlanan, o pwede kang magpakita og mga aytem nga lainlain og bili nga naa sa duha ka magkaparehas nga sudlanan. Sa dili pa ipadayag ang mga sulod, dapita ang usa ka estudyante nga mopili kon hain nga sudlanan ang mas gusto nila. Pangutan-a sila kon nganong kana nga sudlanan ang ilang gipili. Dayon ipadayag ang mga sulod sa duha ka sudlanan.

• Unsay posibleng mga problema ang mahitabo sa paghukom sa ubang tawo, o bisan ang paghukom sa atong kaugalingon, nga gibase lang kon unsay atong makita?

• Sa unsang paagi lahi ang panglantaw sa Dios kanato kay sa atong panglantaw sa usag usa?

Ikonsiderar ang pagpakita sa mosunod nga mga pag-aghat sa personal nga pagpamalandong.

Pamalandonga ug kompletoha ang mosunod nga mga pag-aghat diha sa imong journal sa pagtuon:

1. Dihang una nakong nahimamat ang usa ka tawo, morag ang una nilang mabantayan mao ang .

2. Nagtuo ko nga makita sa Langitnong Amahan kanako ang mosunod nga mga hiyas nga dili makita sa uban: .

3. Dihang una nakong nahimamat ang ubang tawo, lagmit mabantayan nako ang .

4. Kon makita nako ang uban sama sa pagtan-aw sa Langitnong Amahan, makatabang kini nako nga .

Samtang imong tun-an ang 1 Samuel 16 karon, pagmainampoon nga dapiton ang Espiritu Santo nga tabangan ka nga mabati ang kaimportante sa pagtan-aw sa imong kaugalingon ug sa uban sama sa pagtan-aw sa Dios.

Gipadala sa Ginoo si Samuel aron dihogan ang sunod nga hari

Aron tugotan ang tanang estudyante nga aktibong makaapil, ikonsiderar ang pagparespares sa mga estudyante. Dapita ang managpares nga basahon ang duha ka tudling sa ubos ug hisgotan ang nagsunod nga mga pangutana. Sa dili pa magbasa ang mga estudyante, seguroa nga nakahibalo sila nga tungod sa pagkamasinupakon ni Saul, ang Ginoo misalikway kaniya isip usa ka hari sa Israel (tan-awa sa 1 Samuel 13:13–14; 15:26–28).

Basaha ang 1 Samuel 16:1–5 aron makita kon nganong gipadala sa Ginoo si Samuel ngadto sa Betlehem.

• Kon ang Ginoo mihatag kanimo sa responsibilidad ni Samuel nga magdihog og bag-o nga hari, unsa nga mga hiyas ang imong pangitaon diha sa mga anak nga lalaki ni Jesse?

Basaha ang mga bersikulo 6–13, nga pangitaon ang mga kamatuoran nga gitudlo sa Ginoo samtang misulay si Samuel sa pag-ila sa umaabot nga hari.

• Unsay imong nakat-onan niini nga asoy nga importanteng masabtan sa mga tawo karon?

  Dihang mahuman na og pakigbahin ang managpares sa ilang nakat-onan, dapita ang matag pares nga magsulat og usa ka kamatuoran diha sa pisara uban sa numero sa bersikulo diin nila kini nakaplagan.

  Ang mga estudyante mahimong magsulat og lainlaing mga kamatuoran sa kaugalingon nilang mga pulong, sama sa makita sa Dios ang atong tinuod nga potensyal pinaagi sa pagtan-aw diha sa atong mga kasingkasing imbes sa atong panggawas nga panagway.

• Unsay imong nakat-onan gikan sa mga kasulatan ug sa mga lider sa Simbahan bahin sa mga hiyas nga gihatagan og bili sa Ginoo?

• Sa imong hunahuna, sa unsang paagi lahi ang atong relasyon sa uban kon tan-awon nato ang atong kaugalingon ug ang usag usa nga mas sama sa pagtan-aw sa Ginoo kanato?

Tabangi ang mga estudyante nga mapalawman ang ilang pagsabot

Ang mosunod nga mga opsiyon maoy lainlaing mga pamaagi nga mapalawom sa mga estudyante ang ilang pagsabot sa gitudlo sa Ginoo diha sa 1 Samuel 16:7. Pilia ang mga pamaagi nga para nimo labing maayo para sa imong mga estudyante.

Sa dili pa ipresentar ang opsiyon o mga opsiyon nga imong gipili, ikonsiderar ang pagtabang sa mga estudyante nga isulti ang ilang matun-an sa tinuod nga kinabuhi. Mahimo nimo kini pinaagi sa pagpresentar og mubo nga sitwasyon nga makatabang ang mga estudyante. Pananglitan, pwede nimo silang hangyoon nga pangitaon ang mga butang nga ila tingaling ipakigbahin sa usa ka tawo nga mibati nga walay nagtagad o sayop nga nahukman sa mga tawo sa iyang palibot. O pwede nimong dapiton ang mga estudyante nga pangitaon ang mga butang nga ila tingaling ipakigbahin sa usa ka tawo nga mibati nga wala gayod makasabot ang Ginoo kanila.

Opsiyon 1

Ikonsiderar ang pagpares-pares sa mga estudyante. Patun-i sa matag estudyante ang lainlaing pahayag. Dayon, pwedeng ipakigbahin sa mga estudyante ang ilang nakat-onan ngadto sa ilang kapares. Pwede nimong ipakita o ihatag ang mga kopya sa mga pahayag.

Si Presidente Dieter F. Uchtdorf, kanhi sa Unang Kapangulohan, miingon:

Ang interes sa Langitnong Amahan wala mag-agad kon unsa mo ka kwartahan o katahom o kahimsog o kamaalamon. Nagtan-aw Siya ninyo dili sama sa pagtan-aw sa kalibotan kaninyo; nagtan-aw Siya kon si kinsa gayod kamo. Siya nagtan-aw sa inyong kasingkasing. Ug nahigugma Siya kaninyo kay kamo Iyang anak. (“Ang Inyong Talagsaong Biyahe sa Pagpauli,” Liahona, Mayo 2013, 128)

Si Sister Michelle D. Craig, kanhi sa Kinatibuk-ang Kapangulohan sa Young Women, mipasabot:

Si Jesukristo motan-aw sa kasingkasing sa mga tawo. Siya motan-aw sa mga indibidwal, sa ilang mga panginahanglan, ug kinsa sila mamahimo. Diin ang uban nakakita og mga mananagat, mga makasasala, o mga kobrador sa buhis, si Jesus nakakita og mga disipulo; diin ang uban nakakita og tawo nga nasudlan sa mga daotan, si Jesus mibaliwala sa nangagi, miila sa tawo, ug miayo kaniya.

Bisan sa atong nagkapuliki nga kinabuhi, makasunod kita sa ehemplo ni Jesus ug motan-aw sa mga indibidwal—sa ilang mga panginahanglan, sa ilang pagtuo, sa ilang pakigbisog, ug kinsa sila mamahimo. (“Mata aron sa Pagtan-aw,” Liahona, Nob. 2020, 16)

Opsiyon 2

Pwedeng pangitaon sa mga estudyante ang listahan sa mga tudling sa doktrinal nga kahanas diha sa Mahinungdanon nga Dokumento sa Doktrinal nga Kahanas (2023) para sa mga tudling nga makatabang nila aron masabtan kon unsa ang gibati sa Dios kanato ug kon unsa Siya ka hingpit nga nakaila kanato. Pwedeng maggrupo og tinag-upat ang mga estudyante, nga pangitaon sa matag estudyante ang magamit nga mga tudling gikan sa usa sa upat ka sumbanan nga mga kasulatan. (Ang mga pananglitan nga pwede nilang ipakigbahin maglakip sa Abraham 3:22–23; Jeremias 1:4–5; Mga Hebreohanon 12:9; Alma 7:11–13; Doktrina ug mga Pakigsaad 18:10–11.)

Opsiyon 3

Pagpakita og bidyo sa mga estudyante nga makatabang nila nga masabtan kon sa unsang paagi ang Dios nagtan-aw kanato o nga nagpakita sa usa ka tawo nga nagtan-aw sa uban sama sa Iyang gihimo. Dapita ang mga estudyante sa paghunahuna ug sa pagpangandam sa pagpakigbahin og tinuod nga mga sitwasyon sa kinabuhi nga ilang magamit ang unsay ilang nakat-onan gikan sa bidyo. Ang bidyo nga “Atong Tinuod nga Pagkatawo” (3:39), nga anaa sa ChurchofJesusChrist.org, maoy usa sa mga pananglitan nga imong magamit.

Personal nga mga kasinatian

Kini nga seksiyon makatabang sa mga estudyante nga mabati ang kaimportante sa pagtan-aw sa ilang kaugalingon ug sa uban sama sa pagtan-aw sa Langitnong Amahan ug ni Jesukristo. Ang paghinumdom ug pagpakigbahin sa mga kasinatian makadapit sa Espiritu Santo nga pamatud-an ang mga kamatuoran nga nakat-onan sa mga estudyante.

Makatabang tingali ang pagpakita sa mosunod nga mga opsiyon.

Pagpili og usa sa mosunod nga mga opsiyon ug irekord ang imong mga hunahuna diha sa imong journal sa pagtuon. Seguroa nga ilakip ang imong nakat-onan bahin sa Dios karon gikan sa mga kasulatan o sa mga lider sa Simbahan.

• Isulat ang bahin sa usa ka tawo nga daw nakakita og maayo kanimo, bisan kon siya nakahibalo sa imong mga kahuyangan ug mga kasaypanan. Sa unsang paagi ang ilang impluwensiya nakaapektar sa imong gibati bahin sa imong kaugalingon? Sa unsang paagi ang ilang impluwensiya nagpahinumdom nimo kon sa unsang paagi ang Langitnong Amahan ug si Jesukristo nagtan-aw kanimo?

• Pagsulat mahitungod sa usa ka tawo nga imong gimahal ug gidayeg samtang mas nailhan nimo siya. Unsay imong nakita karon kanila nga wala tingali makita sa uban o wala nimo makit-i dihang una pa lang nimo silang nahimamat? Gibati ba nimo ang bisan unsang impresyon gikan sa Espiritu Santo kon sa unsang paagi nimo sila matabangan nga tan-awon ang ilang kaugalingon sa paagi nga imong tan-awon sila o sa paagi nga ang ilang Langitnong Amahan ug si Jesukristo nagtan-aw kanila?

Pagdapit og mga boluntaryo nga ipakigbahin ang pipila sa ilang girekord diha sa ilang mga journal sa pagtuon.

Dugang nga mga Kapanguhaan

Sa unsang paagi ang pagtan-aw sa uban parehas sa pagtan-aw sa Dios makaimpluwensiya sa akong pagtratar kanila?

Si Presidente Henry B. Eyring sa Unang Kapangulohan miingon:

Tudloan kamo [sa Manluluwas] nga makita [ninyo ang uban] pinaagi sa Iyang mga mata, nagpasabot nga ilapas ang pagtan-aw sa panagway ug motan-aw sa kasingkasing (tan-awa ang 1 Samuel 16:7). … Kon maglakaw kamo uban sa Manluluwas sa igong panahon, makakat-on kamo sa pagtan-aw sa tanan isip anak sa Dios nga walay limit ang potensyal, bisan unsa pa ang iyang mga nangagi. Ug kon padayon kamong maglakaw uban sa Manluluwas, makapalambo kamo og laing gasa nga naa Kaniya—abilidad sa pagtabang sa mga tawo nga makakita niana nga potensyal diha sa ilang kaugalingon ug maghinulsol. (“Lakaw Uban Kanako,” Liahona, Mayo 2017, 85)

Si Elder S. Mark Palmer sa Seventy mitudlo:

Kon magkat-on kita sa pagtan-aw sa uban sama sa pagtan-aw sa Ginoo kanila kay sa makita lang sa atong mata, ang atong gugma kanila molambo ug ingon man ang atong tinguha sa pagtabang nila. Makita nato ang potensyal sa uban nga wala nila makita sa ilang kaugalingon. Uban sa Kristohanon nga gugma dili kita mahadlok sa pagsulti, tungod kay ang “hingpit nga gugma nagahingilin sa kahadlok” [1 Juan 4:18]. Ug kita dili gayod mohunong, nga maghinumdom nga kadtong labing lisud higugmaon maoy sagad nagkinahanglan og gugma. (“Ug si Jesus, sa Nagsud-ong Siya Kaniya, Nahigugma Kaniya,” Liahona, Mayo 2017, 116)

Sa unsang paagi kita mahimong mas mahisama sa Langitnong Amahan sa paagi sa atong pagtan-aw ug pagtratar sa uban?

Si Sister Michelle D. Craig, kanhi sa Kinatibuk-ang Kapangulohan sa Young Women, mipasabot:

Mangayo nga makatan-aw sa uban sama sa Iyang pagtan-aw—ang Iyang tinuod nga mga anak nga lalaki ug mga anak nga babaye nga dunay walay kinutuban ug balaan nga potensyal. Dayon molihok pinaagi sa pagmahal, pagserbisyo, ug pagmatuod sa ilang ka bililhon ug potensyal kon giaghat. Samtang mahimo kining sundanan sa atong kinabuhi, makita nato ang atong kaugalingon nga mahimong “tinuod nga mga sumusunod ni … Jesukristo” [Moroni 7:48]. Ang uban makahimo sa pagsalig sa atong mga kasingkasing ngadto sa ilang mga kasingkasing. Ug niini nga sundanan madiskobrehan usab nato ang atong kaugalingong tinuod nga pagkatawo ug katuyoan. (“Mata aron sa Pagtan-aw,” Liahona, Nob. 2020, 17)

Dugang nga mga Kalihokan sa Pagkat-on

Laing paagi sa pagsugod

Aron matabangan ang mga estudyante nga makita ang problema sa paghukom sa uban base sa panggawas nga panagway o sa ilang sitwasyon, ikonsiderar ang pagpakita og imahe sa usa ka tawo nga sama sa mosunod. Hangyoa ang mga estudyante sa pagtag-an kon unsay gidahoman sa mga tawo bahin niining tawhana (pagkatawo, kinaiya, kon unsaon nila pagtratar ang uban, kon kasaligan ba sila, ug kon unsay ilang gibati bahin sa Dios, ug uban pa).

Dayon pakitai sila og litrato sa usa ka tawo nga malipayon ug malamposon tan-awon, sama sa mosunod. Hangyoa ang mga estudyante sa pagtag-an kon unsay gidahoman sa mga tawo bahin niining tawhana.

Dapita ang mga estudyante sa pagpakigbahin kon unsa ka dakong problema ang paghukom sa uban base sa ilang panggawas nga panagway o sitwasyon. (Pwede nimong pahinumdoman ang mga estudyante nga pipila sa labing buotan, labing matarong nga mga tawo nga nagkinabuhi sukad sayop nga gihukman, lakip ni Abinadi, Joseph Smith, ug gani si Jesukristo.)

Hangyoa ang mga estudyante nga hisgotan kon nganong makita sa Langitnong Amahan kon kinsa gayod kita.

Dayon ipadayon ang leksiyon pinaagi sa paggamit sa mga pag-aghat sa personal nga pagpamalandong nga naa sa sinugdanan sa leksiyon.

Uban pang bidyo para sa “Opsiyon 3”

Pwede nimong ipasalida ang usa sa mosunod nga mga bidyo para sa “Opsiyon 3” sa leksiyon:

Ang “Pagtan-aw sa mga Bentana” (2:19) makatabang sa mga estudyante nga makita ang kaimportante sa pagsusi sa kaugalingon natong kinabuhi imbes hukman ang uban.

Ang “Pag-ampo para sa mga Mata nga Makakita sama sa Iyang Makita” (6:26) makatabang sa mga estudyante nga mas mahisama kang Jesukristo kon sa unsang paagi nila tan-awon ang uban.

1 Samuel 16:14–23. Ang impluwensya sa musika

Aron tabangan ang mga estudyante nga mailhan ang impluwensiya sa musika sa atong kinabuhi, ikonsiderar ang paghangyo sa duha o tulo ka estudyante nga ipakigbahin ang paborito nilang linya sa usa ka himno o kanta gikan sa website sa Musika sa Kabatan-onan. Ikonsiderar ang pagdapit sa klase nga kantahon o paminawon ang linya. Hangyoa ang mga estudyante nga ipakigbahin kon nganong makahuloganon para nila ang liriko. Hangyoa ang mga estudyante nga ipakigbahin kon sa unsang paagi makapabayaw nila ang musika. Pwede kang mopakigbahin og makapabayaw nga musika nga nakatabang nimo nga mabati ang Espiritu Santo o sa pagpangandam para sa sakramento.

Dayon dapita ang mga estudyante nga basahon ang 1 Samuel 16:14–23, nga pangitaon ang impluwensiya sa musika ngadto kang Saul. (Seguroa nga nahibalo ang mga estudyante nga giklaro sa Hubad ni Joseph Smith sa bersikulo 14, 15, 16, ug 23 nga ang daotang espiritu nga nagsamok kang Saul dili gikan sa Dios.)

Hangyoa ang mga estudyante nga ipakigbahin kon sa unsang paagi nila gigamit ang makapabayaw nga musika aron tabangan ang ilang kaugalingon sa ilang kinabuhi.

Mga Senaryo

Aron tabangan ang mga estudyante nga magamit ang ilang nakat-onan, ikonsiderar ang pagpresentar kanila og pipila ka senaryo sa kataposan sa leksiyon. Pangutan-a ang mga estudyante kon sa unsang paagi ang mga kamatuoran nga ilang nakat-onan sa 1 Samuel 16 makatabang sa maong mga sitwasyon. Apil sa mga pananglitan ang:

1. Ang imong ward bag-ohay lang nga nagtawag og bag-ong bishop o presidente sa Young Women. Ang ilang tawag morag nakapakurat sa daghang tawo. Nadunggan nimo nga miingon ang usa ka tawo nga dili angayan ang bag-ong lider sa maong posisyon.

2. Bag-o lang nahuman ang imong interbiyo sa usa ka sakop sa bishopric. Iyang gihatag kanimo ang usa calling nga para nimo dili ka angayan nga modawat. Nangayo ka niya og panahon nga hunahunaon ug iampo kini ayha maghimo og kataposan nga desisyon.

3. Samtang nagserbisyo ka isip usa ka misyonaryo, usa ka babaye nga morag nasuko ang miduol nimo diha sa dalan. Siya kusog nga nangutana kon unsay imong ikasulti kaniya bahin ni Jesus.