1 Samuelit 8–10; 13; 15–16: Mësimi 71

1 Samuelit 8

Izraeli Dëshiron një Mbret

Ashtu si shumë njerëz sot, izraelitët e lashtë luftonin me tundimin për t’u përshtatur me të tjerët në vend që t’i bindeshin Zotit. Për shumë vite në tokën e premtuar, Zoti e udhërrëfeu Izraelin nëpërmjet gjyqtarëve si Samueli. Më vonë në jetën e Samuelit, izraelitët dëshiruan të kishin një mbret “ashtu siç ndodh në të gjitha kombet” (1 Samuelit 8:5) në vend të Zotit që të sundonte mbi ta. Ky mësim mund t’i ndihmojë nxënësit të kuptojnë rëndësinë e zgjedhjes për të ndjekur Jezu Krishtin në vend të ndikimeve të botës.

Përgatitja e nxënësve: Ftojini nxënësit të bëjnë një listë të çdo trysnie nga bashkëmoshatarët me të cilën përballen, për të mos iu bindur standardeve dhe urdhërimeve të Zotit. Ftojini nxënësit të përsiatin ndryshimin që do të shkaktonte në jetën e tyre ndjekja e Jezu Krishtit në vend të dorëzimit ndaj atyre trysnive.

Veprimtari të Mundshme të të Mësuarit

Marrja e vendimeve

Për t’i ndihmuar nxënësit të mendojnë për atë që ndikon në vendimet e tyre, merreni parasysh të shkruani thënien vijuese në tabelë. Nxënësit mund ta plotësojnë thënien dhe t’u përgjigjen pyetjeve shoqëruese si klasë ose në grupe të vogla.

Disa adoleshentë dëshirojnë të për shkak se “të gjithë të tjerët po e bëjnë atë”.

• Çfarë sfidash mund të përjetojë një adoleshent nëse ajo është arsyeja e tij pse po i bën gjërat?

• Si mund të ndikojë ajo arsye për bërjen e gjërave në marrëdhënien e tij me Atin Qiellor dhe Jezu Krishtin?

Jepuni nxënësve një mundësi për të reflektuar mbi mënyrën se si trysnia nga bashkëmoshatarët mund të jetë duke ndikuar në jetën e tyre. Një mënyrë për ta bërë këtë është t’u jepni nxënësve udhëzimet vijuese dhe të paraqitni boshtin.

Mendo rreth asaj që ndikon në vendimet që merr në jetën tënde. Vizatoje boshtin vijues në ditarin tënd të studimit. Vizato një figurë të vogël të vetes sate që përfaqëson se ku do ta vendosje veten në bosht.

Për t’i ndihmuar nxënësit të dallojnë atë që mund të jetë duke ndikuar në vendime të caktuara në jetën e tyre, ata ose ju mund të jepni shembuj të vendimeve me të cilat po përballen ata. Shembuj të mundshëm përfshijnë mënyrën se si ata vishen, zgjedhjet e argëtimit e të rrjeteve sociale dhe mënyrën se si e kalojnë kohën e tyre. Mund t’i jepni me radhë këta shembuj dhe t’i ftoni nxënësit të vizatojnë figura shtesë njerëzish në bosht për secilin shembull.

Ftojini nxënësit të kërkojnë ndikimin e Frymës së Shenjtë ndërsa përsiatin vendimet e tyre ndërkohë që studiojnë kapitullin te 1 Samuelit 8.

Një mbret “ashtu siç ndodh në të gjitha kombet”

Për shumë vite në tokën e premtuar, Zoti i udhërrëfeu izraelitët nëpërmjet gjyqtarëve si Samueli. Ndërsa Samueli po plakej, pleqtë e Izraelit erdhën tek ai me një kërkesë.

Lexo te 1 Samuelit 8:4–7, duke kërkuar mënyrën se si fëmijët e Izraelit mund ta kishin përfunduar thënien nga fillimi i mësimit.

• Çfarë donin fëmijët e Izraelit?

• Si mendon, pse arsyet e tyre për të kërkuar një mbret nuk do t’i pëlqenin Samuelit?

Mund të duket befasuese që Zoti do t’i thoshte Samuelit ta dëgjonte zgjedhjen jo të mirë të popullit të tij (shih vargun 7). Ati Qiellor e nderon lirinë e zgjedhjes dhe nuk do të na detyrojë të zgjedhim të drejtën. Megjithatë, para se izraelitët të merrnin vendimin e tyre përfundimtar, Zoti i deshi aq sa t’i paralajmëronte nëpërmjet Samuelit për pasojat e zgjedhjes së tyre (shih te 1 Samuelit 8:9).

Një mënyrë se si mund t’i ndihmoni nxënësit të shohin se si shkrimet e shenjta i ilustrojnë të vërtetat e ungjillit, është duke e shkruar një të vërtetë në tabelë. Më pas vërini nxënësit të kërkojnë një fragment të shkrimit të shenjtë, duke kërkuar provën për atë të vërtetë.

Merreni parasysh ta paraqitni të vërtetën vijuese në tabelë. Nxënësit mund t’i lexojnë vargjet shoqëruese me një partner, duke ndaluar pas çdo dy vargjesh për ta diskutuar atë që gjejnë.

Zgjedhja për të ndjekur botën në vend të këshillës me dashuri të Zotit, do të çojë në vuajtje dhe keqardhje.

Ndërsa studion vargjet te 1 Samuelit 8:10–18, kërko fjalë ose fraza që ndihmojnë të jepet mësim kjo e vërtetë.

Ndërsa nxënësit u përgjigjen pyetjeve vijuese, kujtojuni atyre të mos tregojnë emra ose hollësi specifike rreth individëve që njohin personalisht. Shembujt mund të vijnë nga jeta e tyre, jeta e të tjerëve, ose nga tregime në shkrimet e shenjta apo historia e Kishës.

• Çfarë shembujsh ke parë kur zgjedhja për të ndjekur botën ka çuar në vuajtje ose keqardhje?

• Në ç’mënyrë e ke parë që zgjedhja për të ndjekur Atin Qiellor dhe Jezu Krishtin të të çojë në gëzim dhe në një marrëdhënie më të fortë me Ta?

Për t’i ndihmuar nxënësit të kuptojnë rëndësinë e ndjekjes së Atit Qiellor dhe Jezu Krishtit në vend të ndikimeve të botës, mund të shfaqni bisedën “Zgjidhni Jetën e Përjetshme” të Plakut Randall K. Benet të konferencës së tetorit 2011 në dispozicion në ChurchofJesusChrist.org, nga kodi kohor 0:00 deri në 2:08. Plaku Benet tregon pasojat që vuajti për shkak se i shpërfilli paralajmërimet.

Më pas mund të shfaqni të njëjtin material filmik nga kodi kohor 5:08 deri në 6:43 ndërsa Plaku Benet jep mësim për mënyrën se si përvoja e tij mund të gjejë zbatim në rrymat e botës që mund të tundohemi t’i ndjekim dhe mënyrën se si mund t’i shmangim ato.

Zgjedhja e Zotit në vend të trysnive të botës

Veprimtaria vijuese mund t’i ndihmojë nxënësit të zbulojnë këshillën që ka dhënë Zoti për t’i mbrojtur ata nga dorëzimi ndaj tundimeve që mund të ndiejnë trysninë t’i bëjnë ose besojnë. Mund t’i vini nxënësit të punojnë në grupe të vogla për të plotësuar hapat 1 dhe 2. Ata mund të plotësojnë më pas hapin 3 më vete.

Paraqitini udhëzimet e mëposhtme.

1. Zgjidh diçka që anëtarët adoleshentë të Kishës përreth teje mund të ndiejnë trysninë ta bëjnë ose besojnë.

2. Përdori shkrimet e shenjta, ndihmat për studimin e shkrimeve të shenjta, broshurën Për Forcën e Rinisë: Një Udhëzues për Bërjen e Zgjedhjeve ose programin Gospel Library [Biblioteka e Ungjillit] për t’iu përgjigjur pyetjeve vijuese rreth trysnisë që përzgjodhe:

   1. Çfarë këshille na ka dhënë Zoti për këtë?

   2. Çfarë bekimesh u ka premtuar Zoti njerëzve që zgjedhin Atë në vend të ndikimeve të botës?

3. Mendo për atë që ti beson rreth Atit Qiellor dhe Jezu Krishtit. Shkruaj disa fjali rreth mënyrës se si kjo njohuri mund të të ndihmojë t’i ndjekësh Ata në vend të trysnive të botës.

Pas një kohe të mjaftueshme, jepuni nxënësve një mundësi për t’ua treguar të tjerëve atë që mësuan nga studimi i tyre.

Demonstro kuptueshmëri

Kjo pjesë është hartuar për t’u dhënë nxënësve një mundësi për të demonstruar kuptueshmërinë e tyre për atë që kanë mësuar sot.

Lexo te 1 Samuelit 8:19–22, duke kërkuar mënyrën se si iu përgjigj Izraeli paralajmërimeve të Zotit rreth dëshirës së tyre për të pasur një mbret.

• Nga ajo që ke mësuar sot, çfarë do të doje t’u thoshe izraelitëve përpara se ata të bënin zgjedhjen e tyre përfundimtare?

Mund të jetë e dobishme për mësimet e ardhshme që nxënësit të dinë se Zoti e nderoi lirinë e zgjedhjes të izraelitëve dhe e udhëzoi Samuelin të thërriste Saulin si mbret të Izraelit (shihni te 1 Samuelit 9–10).

Burime Shtesë

Si mund t’i mposhtim trysnitë dhe zërat e botës?

Presidenti Rasëll M. Nelson shpjegoi:

“Zërat dhe trysnitë nga bota janë ndjellëse dhe të shumta. Por tepër shumë zëra janë mashtrues, joshës dhe mund të na heqin nga shtegu i besëlidhjeve. Për ta shmangur zemërthyerjen e pashmangshme që vijon, ju përgjërohem sot që t’i kundërviheni tërheqjes së botës, duke gjetur kohë për Zotin në jetën tuaj – në secilën dhe për çdo ditë.” (“Gjeni Kohë për Zotin”, Liahona, nëntor 2021, f. 120)

Për Forcën e Rinisë: Një Udhëzues për Bërjen e Zgjedhjeve na mëson:

“[Ati Qiellor] e di që ju mund të sillni një ndryshim në botë dhe kjo kërkon, në shumë raste, të jeni ndryshe nga bota. Kërkoni udhërrëfimin e Atit tuaj Qiellor kur bëni zgjedhje. Ai do t’ju bekojë me frymëzim nëpërmjet Frymës së Shenjtë.” (“Për Forcën e Rinisë: Një Udhëzues për Bërjen e Zgjedhjeve” [2022], f. 4)

Cilat janë pasojat e shpërfilljes së këshillës së Zotit?

Plaku Diter F. Uhtdorf, i Kuorumit të Dymbëdhjetë Apostujve, dha mësim:

“Libri i Mormonit na kujton shpesh pasojat e dorëzimit ndaj natyrës sonë mishtore në dëm të ndjekjes së Shpëtimtarit tonë. Kur e bëjmë këtë, veprimet tona çojnë në mënyrë të pashmangshme në dëshpërim, robëri, vuajtje dhe keqardhje.

Perëndia na ka dhënë dhuratën e çmuar të të qenit të lirë për të zgjedhur mënyrën se si mendojmë dhe se si veprojmë. Ne mund të mos i pranojmë fjalët e Perëndisë ose të profetëve të Tij. Madje mund të mendojmë se udha jonë është më e mirë. Kjo mund të na duket e këndshme – të paktën në fillim. Madje mund të ndihemi mirë për njëfarë kohe. Por ne nuk mund t’u shpëtojmë kurrë pasojave të vendimeve tona.” (“Avoiding Lighthouses and Searching for Light”, For the Strength of Youth, qershor 2022, f. 5)

Përse Zoti i tha Samuelit t’i dëgjonte njerëzit dhe t’u jepte një mbret?

Presidenti Ezra Taft Benson (1899–1994) shpjegoi:

“Ndonjëherë [Perëndia] ua plotëson përkohësisht njerëzve kërkesat e tyre të pamatura që ata të mund të mësojnë nga përvojat e tyre të trishtuara. Disa njerëz e quajnë këtë “parimi i Samuelit”. …

Ndonjëherë në përpjekjet tona për të imituar botën dhe në kundërshtim me këshillën e profetit, ne rendim pas ideve të rreme edukative, politike, muzikore dhe të veshjes si bota. Standardet e reja të botës marrin përparësinë, ndodh një shkatërrim gradual dhe, në fund, pas shumë vuajtjesh, një popull i përulur është gati të mësojë edhe një herë një ligj më të lartë.” (“Jesus Christ – Gifts and Expectations”, New Era, maj 1975, f. 17–18)

Veprimtari Plotësuese të të Mësuarit

1 Samuelit 8:20: Çfarë bën Jezu Krishti për ne

Mund të jetë e dobishme që nxënësit të dallojnë mënyrën se si Zoti tashmë bën për ne atë që izraelitët shpresuan se do të bënte mbreti i tyre i ri për ta te 1 Samuelit 8:20. Mund të shkruani tre tituj në tabelë: Jezu Krishti është Gjyqtari [Gjykatësi] ynë, Jezu Krishti na udhëheq dhe Jezu Krishti lufton në betejat tona. Nxënësit mund të zgjedhin më pas një nga titujt dhe të përcaktojnë shkrime të shenjta ose të tregojnë përvoja vetjake që e mbështetin atë.

Nëse nxënësit kanë nevojë për ndihmë, mund të jepni disa nga shkrimet e shenjta vijuese:

Jezu Krishti është Gjyqtari [Gjykatësi] ynë: Isaia 33:22; Doktrina e Besëlidhje 64:10–11

Jezu Krishti na udhëheq: Eksodi 13:18; Isaia 48:17; Alma 36:28

Jezu Krishti lufton në betejat tona: Jozueut 23:10; 2 Kronikave 20:15; Doktrina e Besëlidhje 105:14

1 Samuelit 9: Identiteti ynë hyjnor

Nxënësit mund ta ndiejnë rëndësinë e identitetit të tyre si fëmijë të Perëndisë duke i krahasuar ndjenjat e Saulit për veten me mënyrën se si Zoti e shihte atë. Për ta bërë këtë, nxënësit mund të lexojnë te 1 Samuelit 9:21 për të parë se si u ndie Sauli për veten kur Samueli e thirri të ishte mbreti i Izraelit. Ftojini nxënësit të lexojnë te 1 Samuelit 9:2 dhe të përcaktojnë frazat që mund të tregojnë mënyrën se si Zoti e shihte Saulin.

Merreni parasysh t’u jepni nxënësve disa minuta për të përsiatur mënyrën se si mund ta shohin veten ndryshe nga mënyra se si i shohin Ati Qiellor dhe Shpëtimtari. Për ta bërë këtë, nxënësit mund të shkruajnë përgjigjen e tyre për pyetjen vijuese:

• Si mund të më ndihmojë të parit e vetes sime nga një këndvështrim i përjetshëm të shoh natyrën time hyjnore si fëmijë i Perëndisë?

Gjithashtu, mund të shihni “Funksionon në Mënyrë të Mrekullueshme!” nga kodi kohor 12:25 deri në 14:48. Ftojini nxënësit të shënojnë çdo mbresë që u vjen ndërsa dëgjojnë Presidentin Diter F. Uhtdorf, asokohe i Presidencës së Parë.

1 Samuelit 9: Funksioni i Samuelit si shikues

Nxënësit mund të kenë dobi nga të mësuarit më shumë rreth aftësisë profetike si shikues duke parë mënyrën se si Zoti e përdori shikuesin e tij, Samuelin, për ta thirrur Saulin si mbret të Izraelit. Shpjegoni se babai i Saulit, Kishi, e kishte dërguar Saulin dhe një shërbëtor për të gjetur kafshët e tij të humbura. Pasi nuk pati sukses me gjetjen e tyre, shërbëtori sugjeroi që të shkonin për ndihmë te Samueli, “shikuesi” dhe “njeriu [i] Perëndisë” (1 Samuelit 9:8–11). Ju mund t’u kujtoni nxënësve se anëtarët e Presidencës së Parë dhe Kuorumit të Dymbëdhjetë Apostujve mbështeten si profetë, shikues dhe zbulues.

Nxënësit mund të lexojnë te 1 Samuelit 9:14–24, duke kërkuar prova për rolin e Samuelit si shikues i Zotit. Nxënësit mund të diskutojnë më pas se si profetët dhe apostujt shërbejnë si shikues në kohën tonë.

Pasojat e zgjedhjeve tona

Merreni parasysh të shfaqni një nga materialet filmike vijuese për t’i ndihmuar nxënësit të kuptojnë pasojat që rrjedhin nga ndjekja e trysnive të botës ose ndjekja e Zotit. Ato mund të përdoren pasi nxënësit të mbarojnë veprimtarinë në pjesën e mësimit “Zgjedhja e Zotit në vend të trysnive të botës”.

“Leave the Party” [“Largohu nga Festa”] (6:26). Nxënësit mund të përcaktojnë ndryshimet në pasojat që këta të rinj morën në bazë të asaj se kë zgjodhën të ndiqnin.

“Life’s Lessons Learned” [“Mësimet e Marra në Jetë”] nga kodi kohor 6:15 deri në 8:00. Plaku Xhozef B. Uirthlin (1917–2008), i Kuorumit të Dymbëdhjetë Apostujve, tregoi për një zgjedhje që bëri dhe pasojat që shmangu për shkak të saj.

Nxënësit mund të diskutojnë pasojat e mundshme që mund të kishte hasur Plaku Uirthlin po të kishte marrë një vendim tjetër.