Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Mōsese 4:5–32; 5:1–15, Konga 1: “Naʻe Fakaʻā Ai ʻa Hona Matá Fakatouʻosi”

“Mōsese 4:5–32; 5:1–15, Konga 1: ‘Naʻe Fakaʻā Ai ʻa Hona Matá Fakatouʻosi,’” Fuakava Motuʻá – Tohi Lēsoni maʻá e Faiako Seminelí (2026)

“Mōsese 4:5–32; 5:1–15, Konga 1: ‘Naʻe Fakaʻā Ai ʻa Hona Matá Fakatouʻosi,’” Fuakava Motuʻá – Tohi Lēsoni maʻá e Faiako Seminelí

Sēnesi 3–4; Mōsese 4–5: Lēsoni 11

Mōsese 4:5–32; 5:1–15, Konga 1

“Naʻe Fakaʻā Ai ʻa Hona Matá Fakatouʻosi”

Tatau ai pē pe ʻoku tau fakatokangaʻi pe ʻikai, ʻoku liliu kotoa kitautolu ʻi he ʻaho takitaha ʻe he Hinga ʻa ʻĀtama mo ʻIví. Ko hono moʻoní, ka ne taʻeʻoua ia, naʻe ʻikai ke mei fanauʻi kitautolu. ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e ngaahi ola ʻo e Hingá ʻi he palani ʻa e Tamai Hēvaní pea ʻi heʻenau moʻuí.

Teuteu ʻa e tokotaha akó: Fakaafeʻi ʻa e kau akó ke ako maʻuloto ʻa e potufolofola fakataukei fakatokāteline 2 Nīfai 2:25 pea fehuʻi ki ha mātuʻa pe taki ʻo e Siasí pe ko e hā ʻene ʻuhinga kiate kinautolú.

Ngaahi ʻEkitivitī Ako ʻOku Ala Fakahokó

Lelei pe kovi?

Ke kamata ʻa e lēsoní, tokoni ki he kau akó ke fakakaukau ki he founga ʻe lava ke hoko ai ha ngaahi meʻa faingataʻá ko ha ngaahi tāpuaki ʻi he palani ʻa e ʻOtuá. Ko e founga ʻe taha ke fakahoko ai ʻení ko hono fakaʻaongaʻi ʻa e meʻafuá ni. Te ke lava ʻo fili ke fakaʻaliʻali ha ngaahi fakatātā ʻokú ne fakahoʻata ʻa e ngaahi foʻi lea ʻe fakafuofuaʻi ʻe he kau akó.

ʻI he meʻafua ʻo e 1–10 (1 = kovi, 10 = lelei), ʻokú ke pehē ʻe anga fēfē hano fakafuofuaʻi ʻe he kakai tokolahi ʻa e ngaahi meʻa ko ʻení?

Ngāue mālohí

Ngaahi ʻAhiʻahí

Mamahi

Mate

ʻI hoʻo vakai ki he ngaahi meʻá ni mei he tafaʻaki taʻengata ʻo e palani ʻa e Tamai Hēvaní, ʻe kehe nai hoʻo fakafuofuaʻi ha taha ʻo e ngaahi meʻá ni? Kapau ʻoku ʻio, ko e hā hono ʻuhingá?

Fakakaukau ke fakaʻaliʻali ha fakatātā ʻo ʻĀtama mo ʻIvi ʻo hangē ko e fakatātā ʻi he kamataʻanga ʻo e lēsoni ko ʻení. Mahalo te ke fie tuku ia ai ʻi he toenga ʻo e lēsoní.

Ko e lahi ʻo e ngaahi faingataʻa ʻoku tau fehangahangai mo ia ʻi he moʻuí ko e ola ʻo ha fili naʻe fai ʻe heʻetau ʻuluaki mātuʻá, ʻa ʻĀtama mo ʻIvi.

ʻOkú ke pehē ʻe fakafuofuaʻi fēfē ʻe he kakai tokolahi ʻa e Hinga ʻa ʻĀtama mo ʻIví ʻi he meʻafua ʻo e 1–10? Ko e hā hono ʻuhingá?

Fakalaulauloto ki he lahi ʻo e mahino ʻokú ke maʻu ki he Hinga ʻa ʻĀtama mo ʻIví pea mo hono mahuʻinga ʻi hoʻo moʻuí. Tali ʻa e ngaahi fehuʻi ko ʻení ʻi hoʻo tohinoa akó:

ʻOkú ke ongoʻi naʻe lelei nai pe kovi ʻa e Hingá?
ʻOku tokoniʻi fēfē nai hoʻo talí ʻe he mahino ʻokú ke maʻu ki he Fakalelei ʻa Sīsū Kalaisí?

ʻI hoʻo ako ʻa e Mōsese 4–5 ʻi he ʻaho ní, fekumi ki ha ueʻi fakalaumālie mei he Laumālie Māʻoniʻoní ke tokoni ke mahino lelei ange kiate koe ʻa e Hinga ʻa ʻĀtama mo ʻIví. ʻE lava ke tokoniʻi koe ʻe he Laumālie Māʻoniʻoní ke ke ʻiloʻi ko e Hingá ko ha konga ia ʻo e palani ʻa e Tamai Hēvaní ke tokoniʻi kitautolu ke tau fakalakalaka pea hoko ʻo hangē ange ko Iá.

Ko e ngaahi ola ʻo e Hingá

Ke tokoni atu ʻi hono fokotuʻutuʻu ʻa e meʻa ʻokú ke ako fekauʻaki mo e Hingá, faʻu ha kiʻi tohi tufa ʻo fakaʻaongaʻi ʻa e ngaahi fakahinohino ko ʻení. Fakakaukauloto te ke fakaʻaongaʻi ʻa e tohitufa ko ʻení ke akoʻi ʻa e niʻihi kehé fekauʻaki mo e Hingá pea mo e ʻuhinga naʻe mahuʻinga ai ʻi he palani ʻa e Tamai Hēvaní. Mohu founga ʻi hono fokotuʻutuʻu hoʻo kiʻi tohí.

Pelu ua ʻa e laʻipepá. Faʻu ha peesi takafi ʻaki ha hingoa hangē ko e “Ko e Hingá ʻi he Palani ʻa e Tamai Hēvaní.” Tānaki atu ha tā fakatātā pe laʻiʻata ʻokú ne fakamanatu atu ʻa e Hingá, hangē ko ha fuʻu ʻakau fua pe ko ha konga fuaʻiʻakau.
ʻI loto ʻi he kiʻi tohi tufá, fakahingoa ʻa e peesi toʻohemá ko e “Ngaahi Nunuʻa ʻo e Hingá.”
Ako ʻa e Mōsese 4:13–16, 22–25, 28–29; 5:1–4. Lisi pe tā ha ngaahi fakatātā ʻo e ngaahi nunuʻa ʻo e Hingá ʻi he fānau ʻa e ʻOtuá. Fakakau ʻi hoʻo kiʻi tohí ʻa e ngaahi veesi naʻá ke ako ai fekauʻaki mo e nunuʻa takitaha.

Hili ha taimi feʻunga, fakaafeʻi ha kau ako ke vahevahe ʻenau kiʻi tohi tufá mo e kalasí. Fakaafeʻi ʻa e kau akó ke tānaki ki heʻenau fanga kiʻi tohi tufá ha faʻahinga meʻa pē ne ʻikai ke nau tohi.

Fakapapauʻi ʻoku hiki ʻe he kau akó, ʻe aʻusia ʻe ʻĀtama mo ʻIvi mo hona hakó ʻi he taimí ni ʻa e:

Ongoʻi taʻemateuteu ke ʻi he ʻao ʻo e ʻOtuá (Mōsese 4:13–16).
Malava ke maʻu ha fānau (Mōsese 4:22; 5:2–3).
Aʻusia ʻa e loto-mamahí, mamahí, mo e faingataʻá (Mōsese 4:22–24).
Fiemaʻu ke ngāue mālohi ke moʻui (Mōsese 4:25; 5:1–3).
ʻIloʻi ʻa e leleí mei he koví (Mōsese 4:28).
Mate fakatuʻasinó (Mōsese 4:25).
Fakamavaheʻi mei he ʻao ʻo e ʻOtuá (mate fakalaumālie) (Mōsese 5:4).

Fakamatalaʻi ange ko e mavahe mei he ʻOtuá ʻoku ui ia ko e “mate fakalaumālié”—ko ha meʻa ʻoku tau aʻusia kotoa.

Fakalaulauloto ki he founga ʻoku tokoniʻi ai kitautolu ʻe ha ngaahi ola pau ʻo e Hingá ke tau fakalakalaka ki he “moʻui taʻe-faʻa-maté mo e moʻui taʻengatá” (Mōsese 1:39).

ʻOku fakahaaʻi fēfē ʻe hono fakaʻatā ʻe he ʻOtuá ʻa ʻĀtama mo ʻIvi ke na hingá, ʻa ʻEne poto mo e ʻofa ki Heʻene fānaú?

Fakalaulauloto pe ko e ngaahi nunuʻa fē ʻo e Hingá ʻokú ke faingataʻaʻia taha ai ʻi hoʻo moʻuí.

Fakamatalaʻi ange ki he kau akó te nau fakaʻosi ʻenau ngaahi tohi tufá lolotonga ʻa e lēsoni hokó ʻi heʻenau ako fekauʻaki mo e fatongia ʻo e Fakamoʻuí ʻi hono ikunaʻi ʻa e ngaahi nunuʻa kovi ʻo e Hingá.

Ko e fatongia mahuʻinga ʻo e Hingá

Naʻe fakamatalaʻi ʻe he palōfita ko Līhaí ʻi he Tohi ʻa Molomoná ʻa hono mahuʻinga ʻo e Hingá.

Ako ʻa e 2 Nīfai 2:22–25, ʻo kumi ʻa e ʻuhinga naʻe hoko ai ʻa e Hingá ko ha meʻa leleí.

Ko e hā naʻá ke ako fekauʻaki mo e Hingá?

Mahalo ʻe talaatu ʻe he kau akó ha ngaahi moʻoni lahi, kae fakapapauʻi ʻoku mahino kiate kinautolu naʻe mahuʻinga ʻa e Hingá ki heʻetau fakalakalaka ʻi he palani ʻa e Tamai Hēvaní.

Mahalo te ke fie tokoniʻi foki hoʻo kau akó ke nau ʻilo naʻe fakaʻatā ʻe he Tamai Hēvaní ʻa ʻĀtama mo ʻIvi mo hona hakó ke na aʻusia ʻa e fiefiá tuʻunga ʻi he Hingá. Fakaafeʻi kinautolu ke hiki ʻa e “fiefiá” ʻi heʻenau kiʻi tohí ʻi lalo ʻi he “Ngaahi Nunuʻa ʻo e Hingá.” Fakakaukau ke fehuʻi ange pe ʻoku ʻi ai ha taha ʻi hoʻo kau akó te ne lava ʻo lau maʻuloto ʻa e 2 Nīfai 2:25.

Naʻe fakamatalaʻi ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ʻoku mahuʻinga ai ʻa e Hingá ʻi heʻetau moʻuí:

Ko e hingá ko e konga mahuʻinga ia ʻo e palani fakalangi ʻa e Tamai Hēvaní. Ka ne taʻeʻoua ia, naʻe ʻikai fanauʻi ʻe ʻĀtama mo ʻIvi ha fānau ʻi he māmaní, pea ʻikai leva ha fāmili ʻo e faʻahinga ʻo e tangatá ke nau aʻusia ʻa e fehangahangaí mo e fakalakalaká, tauʻatāina ke filí, pea mo e fiefia ʻo e toetuʻú, huhuʻí, mo e moʻui taʻengatá. (Christ and the New Covenant: The Messianic Message of the Book of Mormon [1997], 207)

Toe vakai ki he peesi “Ngaahi Nunuʻa ʻo e Hingá” ʻi hoʻo kiʻi tohi tufá.

Kuo tākiekina lelei fēfē nai hoʻo fakalakalaka taʻengatá koeʻuhí ko e Hingá?
Ko e fē ʻi he ngaahi nunuʻa ʻo e Hingá ʻoku fiemaʻu ke fakahaofi kitautolu mei aí?

Tokoni ke mahino ki he kau akó he ʻikai ke tau lava ʻo fakahaofi kitautolu mei he mate fakatuʻasinó pe mate fakalaumālié, fakataha mo ha ngaahi meʻa kehe.

Lau ʻa e sētesi ʻuluaki ʻi he 2 Nīfai 2:26, ʻo kumi ʻa e ongoongo lelei maʻá e fānau kotoa ʻa e ʻOtuá.

Ko e hā naʻá ke maʻú?

Talaange ki he kau akó ʻe nofotaha ʻa e lēsoni hokó ʻi he fatongia ʻo e Mīsaiá ʻi hono huhuʻi kitautolu mei he ngaahi nunuʻa kovi ʻo e Hingá.

Fakaafeʻi ʻa e kau akó ke fakamanatuʻi ʻa e ʻekitivitī fakafuofua mei he kamataʻanga ʻo e lēsoní. Fehuʻi ange pe te nau fakafuofuaʻi fēfē ʻi he taimí ni ʻa e Hinga ʻa ʻĀtama mo ʻIví ʻi he meʻafua ʻo e 1–10. Hili iá, ʻe lava ke fakamatalaʻi ʻe he kau akó ki honau kaungāʻapí ʻa e ʻuhinga naʻe hoko ai ʻa e Hingá ko ha meʻa leleí pea mo e founga ʻokú ne liliu ai ʻenau moʻuí mo ʻenau fakalakalaka ʻi he palani ʻa e Tamai Hēvaní.

Fakakaukau ke fakaʻosi ʻaki hoʻo fakamoʻoni ki he poto mo e ʻofa ʻa e Tamai Hēvaní ʻiate kitautolú, ʻa ia naʻá Ne fakahaaʻi ʻaki ʻEne fekauʻi Mai Hono ʻAló ke huhuʻi kitautolu mei he Hingá.

(Fakamanatu ki he kau akó ke tauhi ʻenau fanga kiʻi tohi tufá—pe ʻoatu ia kiate koe—koeʻuhí ke nau lava ʻo fakaʻosi kinautolu ʻi he lēsoni hokó.)

Ngaahi Maʻuʻanga Tokoni Kehé

Naʻe faiangahala nai ʻa ʻĀtama mo ʻIvi ʻi he taimi naʻá na kai ai ʻa e fua ʻo e ʻakau ʻo e ʻilo ʻo e leleí mo e koví?

Naʻe akonaki ʻa Palesiteni Siosefa Filitingi Sāmita (1876–1972) ʻo pehē:

Ko e hā naʻe fai ʻe ʻĀtamá? Ko e meʻa tonu pē naʻe finangalo ʻa e ʻEikí ke ne fakahokó. … Naʻe faiangahala nai ʻa ʻĀtama ʻi he taimi naʻá ne kai ai ʻa e fua tapú? … ʻIkai, naʻe ʻikai faiangahala!

… Ko ʻeku fakaʻuhingá ʻeni [Mōsese 3:16–17]: Naʻe folofola ʻe he ʻEikí kia ʻĀtama, ko ʻeni ʻa e fuʻu ʻakau ʻo e ʻilo ʻa e leleí mo e koví. Kapau ʻokú mo loto ke nofo heni, he ʻikai ke mo lava ʻo kai ʻi he fuaʻi ʻakau ko eé. Kapau ʻokú mo loto ke mo nofo heni, ʻoku ou tapui kimoua ke mo kai ia. Ka te mo lava ʻo fili maʻa moua pē, pea mo lava ʻo kai mei ai kapau ʻokú mo loto ki ai. Pea kapau te mo kai ia, te mo mate.

ʻOku ou fakatokangaʻi ha faikehekehe lahi ʻi hono maumauʻi ʻo e fonó mo e faiangahalá. (“Fall—Atonement—Resurrection—Sacrament,” in Charge to Religious Educators, 3rd ed. [1994], 124)

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

Ko ʻIvi naʻá ne tomuʻa maumauʻi ʻa e ngaahi fakangatangata ʻo ʻĪtení kae lava ke kamata ʻa e ngaahi tūkunga ʻo e moʻui fakamatelié. Ko e meʻa naʻá ne faí, neongo ko e hā hono natulá, ko ha maumaufono ia, ka ko ha fiemaʻu nāunauʻia taʻengata ia ke fakaava ʻa e matapā ki he moʻui taʻengatá. Naʻe fakahaaʻi ʻe ʻĀtama hono potó ʻi heʻene fai ʻa e meʻa tatau. Ko ia ai, “naʻe hinga ‘a ‘Ātama mo ʻIví koeʻuhí ke ‘i ai ‘a e faʻahinga ‘o e tangatá” (2 Nīfai 2:25).

ʻOku ʻi ai ha kau Kalisitiane ʻoku nau fakahalaiaʻi ʻa ʻIvi koeʻuhí ko e meʻa naʻá ne faí, ʻo pehē naʻe tōnounou mo ʻene fānau fefiné ʻi he meʻá ni. Ka ʻoku ʻikai pehē ʻa e Kāingalotu ia ‘i he Ngaahi ‘Aho Kimui Ní! Tupu mei he fakahaá, ʻoku tau fakamanatua ʻa e ngāue ʻa ʻIví mo fakaʻapaʻapa ki heʻene potó mo e loto-toʻá ʻi he konga maʻongoʻonga ʻoku ui ko e Hingá. (“The Great Plan of Happiness,” Ensign, Nov. 1993, 73)

Ko e hā naʻe ʻikai lava ai ke fanau ʻa ʻĀtama mo ʻIvi lolotonga ʻena ʻi he Ngoue ko ʻĪtení?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

ʻI he taimi naʻe maʻu ai ʻe ʻĀtama mo ʻIvi ʻa e ʻuluaki fekaú, naʻá na ʻi ha tuʻunga liliu, ʻo ʻikai kei ʻi he maama ʻo e ngaahi laumālié ka ʻi ha sino fakamatelie naʻe teʻeki ai moʻulaloa ki he maté mo teʻeki lava ke faʻu ha moʻui. Naʻe ʻikai ke na lava ʻo fakahoko ʻa e ʻuluaki fekau ʻa e Tamaí [ke fanafanau pea fakatokolahi ʻa e māmaní] taʻe te na maumauʻi ai ʻa e fiefia ʻo e Ngoue ko ʻĪtení pea mo e ngaahi faingataʻa fakalilifu mo e ngaahi faingamālie fakaʻofoʻofa ʻo e moʻui fakamatelié. (“The Great Plan of Happiness,” Ensign, Nov. 1993, 72–73)

Mōsese 4:22. Ko e hā ʻa e ʻuhinga naʻe pau ke “pule” ai ʻa ʻĀtama kia ʻIví?

Naʻe pehē ʻe ʻEletā Pulusi C. Heifeni mo Sisitā Malia K. Heifeni:

Ko e foʻi fakakaukau ʻo e fengāueʻakí mo e hoangāue tuʻunga tataú ʻoku fakavaʻe lelei ia ʻi he tokāteline ʻo e ongoongolelei kuo fakafoki maí. …

ʻOku pehē ʻi he Sēnesi 3:16 ko ʻĀtamá ke ne “pule” ʻia ʻIvi, ka ʻoku ʻikai ʻuhinga ʻeni ke pule fakaʻaufuli ʻa ʻĀtama … ʻOku fakaʻaongaʻi foki ʻe he kiate ʻi he “pule kiate koé” ʻa e bet faka-Hepeluú, ʻa ia ko hono ʻuhingá ke pule fakataha, kae ʻikai ko e pule kiate koe. Kapau ʻoku ngāue ʻaki ʻe ha tangata ha founga “puleʻi … ʻi ha kihiʻi momoʻi founga taʻe-māʻoniʻoni” (Tokāteline mo e Ngaahi Fuakava 121:37; naʻe tānaki atu hono fakamamafaʻí), ʻoku toʻo ʻe he ʻOtuá ʻa e mafai ʻo e tangata ko iá. (“Crossing Thresholds and Becoming Equal Partners,” Ensign, Aug. 2007, 26, 27)

Naʻe pehē ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá mo Sisitā Lute Laipeti Lenilani:

[Ko e husepāniti angatonú] “te ne feinga ke ngāue fakaetauhi; te ne fakahā ʻa e fehalākí mo kole ha fakamolemole; te ne vave ke fakahīkihikiʻi; te ne tokaʻi ʻa e meʻa ʻoku saiʻia ai ʻa e kau mēmipa ʻo e fāmilí; te ne ongoʻi ʻa e mafatukituki ʻo e fatongia ke tokonaki “ʻa e ngaahi fiemaʻu ʻo e moʻuí pea mo ha maluʻi” maʻa hono fāmilí; ko e fakaʻapaʻapa taupotu tahá te ne fakahoko ki hono uaifí. … Te ne tāpuakiʻi hono fāmilí. (The Melchizedek Priesthood: Understanding the Doctrine, Living the Principles [2018], 23)

Ngaahi ʻEkitivitī Fakalahi ki he Akó

Ko e palani ʻo e fakamoʻuí

Mahalo ʻe tokoni ki he kau akó ke nau fakakaukau ki he Hingá ʻi loto ʻi he puipuituʻa ʻo e palani ʻo e fakamoʻui ʻa e Tamai Hēvaní. Fakakaukau ke fakaʻaliʻali ʻa e fakatātā ko ʻení, ʻa ia mahalo kuó ke fakaʻaongaʻi ʻi he Lēsoni 2: “Ko e Palani ʻo e Fakamoʻuí,” lolotonga iá ʻoku aleaʻi fakakalasi pe fakakulupu iiki ʻe he kau akó ʻa e ngaahi fehuʻi ko ʻení.

ʻEke ange ki he kau akó ʻa e ngaahi fehuʻi ko ʻení:

Ko e hā ʻokú ke ʻilo fekauʻaki mo e konga takitaha ʻo e palani ʻa e Tamai Hēvaní ʻoku ʻasi ʻi he fakatātā ko ʻení?
Ko e hā ʻa e fatongia ʻo e Fakamoʻuí ʻi he konga takitaha?
Te ke fokotuʻu ʻi fē ʻa e Hinga ʻa ʻĀtama mo ʻIví ʻi he fakatātā ko ʻení?

Lau ʻa e Mōsese 4:6, ʻo kumi ʻa e ngaahi taumuʻa ʻa Sētane ʻi hono fakataueleʻi ʻa ʻIvi ke kai ʻa e fuá.

Ko e hā ʻa e ngaahi taumuʻa ʻa Sētané? Ko e hā naʻe ʻikai mahino kakato kiate iá?
Naʻe tokoniʻi fēfē ʻe he Tamai Hēvaní ʻEne fānaú ke nau fakalakalaka ʻaki hono fakaʻatā ʻa ʻĀtama mo ʻIvi ke na kai ʻa e fuá?

Founga ʻe taha ke fakamatalaʻi nounou ʻaki ʻa e fakamatala ʻo e Hingá

ʻOku fakataumuʻa ʻa e ʻekitivitī ko ʻení ke tokoni ki he kau akó ke ʻomi ha fakamatala nounou ʻo e ngaahi meʻa naʻe hoko ʻo aʻu ki he Hingá. Hiki ʻa e ngaahi lea ko ʻení ʻi he palakipoé: Fekauʻi, ʻAkau, Fili, Sētane, Fua, Mate, Kai, ʻIlo, Lauʻi Fiki.

Fakaafeʻi ʻa e kau akó ke nau fakamatalaʻi ʻa e talanoa ʻo e Hingá ki honau kaungāʻapí ʻo fakaʻaongaʻi ha niʻihi pe kotoa ʻo e ngaahi foʻi lea ʻi he palakipoé. Hili hono fakamatalaʻi ʻe he kau akó ʻa e Hingá, fakaafeʻi kinautolu ke toe vakaiʻi nounou ʻa e Mōsese 3:16–17 mo e 4:6–12, ʻo kumi ha toe ngaahi fakaikiiki te nau lava ʻo tānaki pe te ne lava ʻo fakatonutonu ʻenau mahinó. ʻAi ke nau fevahevaheʻaki ʻa e ngaahi fakaikiiki ne nau ako mei he ngaahi vēsí.