Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Mōsese 4:5–32; 5:1–15, Konga 2: “Koeʻuhí Ko Hoʻo Hingá ʻE Lava Ai Ke Huhuʻi Koe”

“Mōsese 4:5–32; 5:1–15, Konga 2: ‘Koeʻuhí Ko Hoʻo Hingá ʻE Lava Ai Ke Huhuʻi Koe,’” Fuakava Motuʻá – Tohi Lēsoni maʻá e Faiako Seminelí (2026)

“Mōsese 4:5–32; 5:1–15, Konga 2: ‘Koeʻuhí Ko Hoʻo Hingá ʻE Lava Ai Ke Huhuʻi Koe,’” Fuakava Motuʻá – Tohi Lēsoni maʻá e Faiako Seminelí

Sēnesi 3–4; Mōsese 4–5: Lēsoni 12

Mōsese 4:5–32; 5:1–15, Konga 2

“Koeʻuhí Ko Hoʻo Hingá ʻE Lava Ai Ke Huhuʻi Koe”

Ko e ako ʻa ʻĀtama mo ʻIvi fekauʻaki mo e feilaulaú

Naʻe ʻomi ʻe he Hinga ʻa ʻĀtama mo ʻIví ha ngaahi faingataʻa naʻe teʻeki ke na aʻusia ʻi he Ngoue ko ʻĪtení. Naʻe fakamavaheʻi kinaua mei he ʻao ʻo e ʻOtuá peá na aʻusia ʻeni ʻi he taimí ni ʻa e angahalá, mate fakatuʻasinó, mo ha ngaahi faingataʻa fakamatelie kehe. Ka naʻe ʻomi ʻe heʻetau Tamai Hēvani ʻofá ha Fakamoʻui ke ne ikunaʻi ʻa e ngaahi nunuʻa ʻo e Hingá. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e fiefia ʻo e huhuʻi mei he Hingá tuʻunga ʻi he Fakalelei ʻa Sīsū Kalaisí.

Teuteu ʻa e tokotaha akó: Fakaafeʻi ʻa e kau akó ke kumi ha ngaahi nunuʻa ʻo e Hinga ʻa ʻĀtama mo ʻIví ʻi heʻenau moʻuí. ʻE lava ke kau heni ʻa e fāʻeleʻí, maté, sino fakamatelié, angahalá, fiekaiá, puké, mo e ngaahi meʻa peheé. Kole ki he kau akó ke fakalaulauloto ki he founga ʻe lava ke tokoni ai ʻa Sīsū Kalaisi ʻi he nunuʻa takitaha ʻoku nau maʻú.

Ngaahi ʻEkitivitī Ako ʻOku Ala Fakahokó

Ko ʻetau fiemaʻu ha Huhuʻí

Kamata ʻa e kalasí ʻaki hono tokoniʻi e kau akó ke mahino kiate kinautolu ʻetau fiemaʻu ʻa e Fakalelei ʻa Sīsū Kalaisí. Ko e founga ʻe taha te ke lava ʻo fai ai ʻení ko hano fakaʻaongaʻi ʻa e fakakaukau ko ʻení, ʻa ia naʻe toʻo mei he lea “Ko e Fakalelei ʻa Sīsū Kalaisí” (Tad R. Callister, Liahona, Mē 2019, 85). Fakaʻaliʻali ha fakatātā ʻo ha taha ʻoku tō ki tuʻa mei ha vakapuna, pea fakaafeʻi ʻa e kau akó ke nau aleaʻi e ngaahi meʻa ko ʻení:

Fakakaukauloto naʻá ke tō ki tuʻa mei ha vakapuna, ʻoku fute ʻe lauiafe ʻi he ʻataá, ʻo ʻikai ha fakamaluʻea pe ha toe meʻangāue kehe.

Ko e hā te ke lava ʻo fai ke fakatuaiʻi hoʻo toó?
Ko e hā ha ʻamanaki lelei te ke maʻu te ke toe moʻui?

ʻI he tafaʻaki ʻe tahá, fakakaukauloto ki muʻa peá ke tō ki tuʻa mei he vakapuná, naʻe fakatui ʻe haʻo kaungāmeʻa ha fakamaluʻea ʻiate koe.

ʻE kehe fēfē nai hoʻo ongoʻi fekauʻaki mo hoʻo toó?
ʻE fēfē hoʻo ongoʻi ki ho kaungāmeʻá?

Ke tokoni ke fakafehokotaki ʻe he kau akó ʻa e fealeaʻaki kimuʻá ki heʻetau fiemaʻu ʻa e Fakalelei ʻa Sīsū Kalaisí, te nau lava ʻo aleaʻi ʻa e ngaahi fehuʻi ko ʻení mo hanau hoa. Kapau naʻe faʻu ʻe he kau akó ha fanga kiʻi tohi tufa fekauʻaki mo e ngaahi nunuʻa ʻo e Hingá ʻi he lēsoni kuo ʻosí, te ke lava ʻo ʻuluaki fakaafeʻi kinautolu ke nau toe vakaiʻi vave ʻa e fanga kiʻi tohi tufa ko ʻení. Kapau naʻe ʻikai faʻu ʻe he kau akó ha fanga kiʻi tohi tufa, te ke lava ʻo liliu ʻa e ngaahi ʻekitivitī ʻoku lave ki he fanga kiʻi tohi tufá.
Te tau fakafehoanaki fēfē ʻa e talanoa fakatātā ko ʻení ki he Hinga ʻa ʻĀtama mo ʻIví pea mo e fatongia ʻo e Fakalelei ʻa Sīsū Kalaisí ʻi he palani ʻa e Tamai Hēvaní?
Ko e hā ha niʻihi ʻo e ngaahi nunuʻa ʻo e Hingá ʻoku tau fiemaʻu ai ʻa e tokoni ʻa Sīsū Kalaisí ke ikunaʻí?

ʻO ka fiemaʻu, fakamanatu ki he kau akó, ʻoku tau aʻusia kotoa ʻa e mate fakalaumālié, tuʻunga ʻi he Hingá. ʻOku ʻuhinga ʻeni ʻoku fanauʻi kitautolu ki ha māmani ʻoku mavahe mei he ʻao ʻo e ʻOtuá pea ʻoku tau faiangahala, ʻa ia ʻokú ne toe fakamavaheʻi fakalaumālie foki kitautolu meiate Ia. Koeʻuhí ko e Hingá, ʻoku tau fehangahangai ai mo ha ngaahi faingataʻa, mahamahaki, ngaahi vaivai, pea aʻu pē ʻo tau mate fakatuʻasino.

Fakaafeʻi ʻa e kau akó ke fakalaulauloto ki he ngaahi meʻá ni:
Ko e fē ʻi he ngaahi fakamatala ko ʻení ʻoku moʻoni kiate koé?
1. ʻOku ʻikai ke u ʻilo pe ko e hā ʻoku ou fiemaʻu ai ʻa e Fakamoʻuí.
2. ʻOku mahino kiate au ʻa e ʻuhinga ʻoku ou fiemaʻu ai ʻa e Fakamoʻuí, ka ʻoku ʻikai ke u tui te u lava ʻo fakamatalaʻi ia ki ha taha kehe.
3. Te u lava ʻo fakamatalaʻi ʻetau fiemaʻu ʻa e Fakamoʻuí ki ha taha kehe.
4. ʻOku ou ongoʻi ha ʻofa mo e houngaʻia ʻia Sīsū Kalaisi pea mo e meʻa kuó Ne fai maʻakú.

Poupouʻi ʻa e kau akó ke fakaafeʻi ʻa e ivi tākiekina ʻo e Laumālie Māʻoniʻoní ʻaki ʻenau kau longomoʻui atu ki he lēsoní.

Ko e Fakalelei ʻa Sīsū Kalaisí

Koeʻuhí ko e Hingá, naʻe pau ai ke mavahe ʻa ʻĀtama mo ʻIvi mei he Ngoue ko ʻĪtení. Naʻe hokohoko atu hono tāpuakiʻi kinautolu ʻe he ʻEikí ʻaki hono ʻoange ha vala (vakai, Mōsese 4:27) mo ʻoange ha ngaahi fekau ke tokoniʻi kinautolu ke nau ikunaʻi ʻa e Hingá.

Fakakaukau ke fakaʻaliʻali ʻa e fakatātā ʻi he kamataʻanga ʻo e lēsoni ko ʻení pea lau fakakalasi ʻa e ngaahi vēsí ni. Toutou taʻofi ke fakaafeʻi ʻa e kau akó ke vahevahe ʻa e meʻa ʻoku nau akó. Hangē ko ʻení, hili hono lau ʻa e veesi 5–7, ʻe lava ke nau aleaʻi ʻa e founga ʻoku hanga ai ʻe hono foaki ʻo e ʻuluaki ʻuhiki ʻo ʻenau tākangá ʻo fakataipe ʻa e feilaulau ʻa Sīsū Kalaisí. Pe te ke ʻeke ki he kau akó pe ko e hā ʻoku nau ako mei he sīpinga talangofua ʻa ʻĀtamá mo e founga te nau lava ai ʻo fakaʻaongaʻi ʻa e sīpinga ko ʻení ʻi heʻenau moʻuí.

Lau ʻa e Mōsese 5:5–9, ʻo kumi ʻa e meʻa naʻe fekau ʻe he ʻOtuá.

Ko e hā naʻe ako ʻe ʻĀtama mo ʻIvi mei he ʻāngeló mo e Laumālie Māʻoniʻoní?

ʻE lava ke ʻiloʻi ʻe he kau akó ʻoku makatuʻunga ʻi he Fakalelei ʻa Sīsū Kalaisí hono lava ke huhuʻi kitautolu mei he Hingá. Fakakaukau ke fakaafeʻi ʻa e kau akó ke fakaʻilongaʻi ʻa e ngaahi lea pe kupuʻi lea ʻi he veesi 7 mo e 9 ʻoku nau akoʻi ʻa e foʻi moʻoni ko ʻení. Te ke lava ʻo fakamatalaʻi ange ʻoku ʻuhinga ʻa e huhuʻí ke fakahaofi pe fakatauʻatāinaʻi.

Ke tokoni ke fakaloloto ʻa e mahino ʻa e kau akó ki he moʻoni ko ʻení, fakaʻaliʻali ʻa e ngaahi fakahinohino ko ʻení pea ʻoange ki he kau akó ʻa e laʻipepa tufa ʻi laló. Te ke lava ʻo fakakulupu tautau toko tolu ʻa e kau akó pea fakaafeʻi ʻa e tokotaha ako takitaha ʻi he kulupú ke nau ako ha konga kehekehe ʻo e laʻipepa tufá. Hili iá, ʻe lava ke vahevahe ʻe he kau akó mo ʻenau kulupú ʻa e meʻa ne nau akó pea faʻu fakataha ʻa e peesi hono hoko ʻi heʻenau ngaahi tohi tufá. (Fakatokangaʻi ange: Lēsoni 21: ʻOku fokotuʻu mai ʻe he “Siviʻi 1 Hoʻo Akó” ke vakai ʻa e kau akó ki he fanga kiʻi tohi tufa ʻoku nau faʻu ʻi he ʻekitivitī ko ʻení ke tokoni ke nau fakamatalaʻi ʻa e fatongia ʻo Sīsū Kalaisi ko hotau Huhuʻí.)

ʻI loto ʻi hoʻo kiʻi tohi tufá, fakahingoa ʻa e peesi toʻomataʻú (teʻeki fakafonu) “Ko e Fakalelei ʻa Sīsū Kalaisí.”
Ako ʻa e fakamatala ʻi he laʻipepa tufá ke ʻiloʻi ʻa e founga ʻoku huhuʻi ai kitautolu ʻe he Fakalelei ʻa Sīsū Kalaisí mei he ngaahi nunuʻa ʻo e Hingá. Mahalo kuó ke hiki ʻa e ngaahi nunuʻa ʻo e Hingá ʻi he peesi kimuʻa ʻi hoʻo kiʻi tohí.
ʻI he peesi foʻou ʻo hoʻo kiʻi tohí, tohiʻi ai ha sētesi ʻe taha pe ua ʻokú ne fakamatalaʻi fakanounou ʻa e meʻa ʻokú ke ako mei he konga takitaha ʻo e laʻipepa tufá. Fekumi ki ha tokoni mei he Laumālie Māʻoniʻoní ke ke ʻiloʻi ʻa e fekauʻaki ʻa e ngaahi akonaki ko ʻení mo koé.

Fakakaukau ke fakaafeʻi ha kau ako ke vahevahe ʻa e meʻa ne nau hiki ʻi heʻenau fanga kiʻi tohi tufá. ʻE lava ke tānaki ʻe he toenga ʻo e kau akó ʻa e meʻa ʻoku nau ako mei honau kaungāakó ki heʻenau fanga kiʻi tohi tufá.

Ko e fiefia ʻo e huhuʻí

Fakaafeʻi ʻa e kau akó ke fakahingoa ʻa e takafi ki mui ʻo ʻenau fanga kiʻi tohi tufá “Ko e Fiefia ʻo Hoku Huhuʻí.” Poupouʻi kinautolu ke hiki ha tatau ʻo e fakamatala ko ʻení ki he peesi ko iá, pea tuku ha feituʻu ke tohi ai ʻi lalo.

Naʻe akonaki ʻa Palesiteni Lāsolo M. Nalesoni ʻo pehē:

ʻI he taimi te tau ongoʻi ai ʻa e tokoni ʻa e Fakalelei ʻa e Fakamoʻuí ki heʻetau moʻuí, te tau fonu ai ʻi he fiefiá. (“Fiefiá mo e Moʻui Fakalaumālié,” Liahona, Nōvema 2016, 84)

Lau ʻa e Mōsese 5:10–11, ʻo kumi ʻa e meʻa naʻe ʻilo ʻe ʻĀtama mo ʻIvi kau ki he ngaahi nunuʻa ʻo e Hingá mo e ola ʻo e Fakalelei ʻa e Fakamoʻuí.

Ko e hā ʻoku mahuʻinga kiate koe mei heʻena ngaahi leá?

ʻOange ha taimi ki he kau akó ke nau fakakakato ʻa e peesi fakaʻosi ʻo ʻenau fanga kiʻi tohí, ʻa ia te nau lava ʻo fai ʻaki hano hiki ha tatau fakataautaha ʻo e Mōsese 5:10–11. Hangē ko ʻĀtama mo ʻIví, te nau lava ʻo hiki ʻa e ngaahi ʻuhinga ʻokú na maʻu ki heʻena ongoʻi fiefia koeʻuhí ko hona Huhuʻí.

ʻE lava ke ke fakaʻosi ʻaki hano fakaafeʻi ha kau ako ke vahevahe ʻa e meʻa naʻa nau tohí.

Ngaahi Maʻuʻanga Tokoni Kehé

ʻOku tau ikunaʻi fēfē ʻa e mate fakalaumālié?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ikunaʻi ʻe he taha kotoa ʻa e mate fakalaumālié ʻi hono fakafoki mai kotoa ki he ʻao ʻo e ʻOtuá ke fakamāuʻí. Naʻe folofola ʻa Sīsū, “Pea hangē ko hono hiki hake au ʻe he tangatá [ki he kolosí] ke pehē hono hiki hake ʻa e tangatá ʻe he Tamaí, ke nau tuʻu ʻi hoku ʻaó, ke fakamāuʻi ʻi heʻenau ngaahi ngāué” (3 Nīfai 27:14). Ko kinautolu kuo ʻosi fakamaʻa mei he angahalá te nau nofo mo e ʻOtuá ʻi he puleʻanga fakalangí, ka ko kinautolu kuo teʻeki ke nau fakatomala mo taʻe-maʻá, he ʻikai ke nau lava ʻo nofo mo e ʻOtua māʻoniʻoní, pea ʻo ka hili ʻa e Fakamāú, kuo pau ke nau mavahe ʻo toe tofanga ʻi he mate fakalaumālié. ʻOku faʻa ui ʻeni ʻi he taimi ʻe niʻihi ko e mate ʻanga uá pe mate fakalaumālie ko hono tuʻo uá. (Vakai, Hilamani 14:15–18.) (“Huhuʻí,” Liahona, Mē 2013, 112, endnote 3)

Mōsese 4:27. Ko e hā ʻa e fekauʻaki ʻa e “kofu kiliʻimanú” pea mo e Fakalelei ʻa Sīsū Kalaisí?

ʻOku fakamatalaʻi ʻi he folofolá ʻa e kakai ʻoku tuʻu ʻi he ʻao ʻo e ʻOtuá mo ha ngaahi angahala ʻoku teʻeki ai fakaleleiʻí ʻo hangē ko e tuʻu ʻi Hono ʻaó “telefuá” (2 Nīfai 9:14; Molomona 9:5).

Naʻe vahevahe ʻe Palesiteni Lāsolo M. Nalesoni ʻa e founga ʻoku fakataipe ai ʻe he Fakalelei ʻa Sīsū Kalaisí ʻa hono “ʻufiʻufi” kitautolú:

ʻI he lea faka-Hepeluú, ko e foʻi lea tefito ki he fakaleleí ko e kaphar, ʻa ia ko ha lea ngāue ʻoku ʻuhinga “ke ʻufiʻufi” pe “fakamolemoleʻi.” Ko e foʻi lea ʻoku kāinga ofi mo iá ko e lea faka-Alamea mo faka-ʻAlepea ko e kafat, ʻa ia ʻoku ʻuhinga “ko ha fāʻofua vāofi.” …

ʻOku ou tangi fiefia ʻi he taimi ʻoku ou fakakaukauloto ai ki hono mahuʻinga ʻo e meʻa kotoa ko iá. ʻOku ʻuhinga ʻa e huhuʻí ki he fakaleleí—ʻa ia ʻoku maʻu ʻi he vāofi mo e ʻOtuá, ʻo ʻikai ngata pē ʻi hono fakahaaʻi ʻa ʻEne fakamolemolé, ka ʻi heʻetau uouangataha ʻi he fakakaukaú mo e ongó. (“The Atonement,” Ensign, Nov. 1996, 34)

Ngaahi ʻEkitivitī Fakalahi ki he Akó

Tatau ʻo Sīsū Kalaisí

Ke tokoni ke mahino ki he kau akó ʻa e Mōsese 5:5–7, fakaafeʻi kinautolu ke kumi ha ngaahi faitatau ʻi hono feilaulauʻi ʻe ʻĀtama mo ʻIvi ʻa e veloaki ʻo ʻena tākanga monumanú mo e feilaulau ʻa Sīsū Kalaisí. ʻE lava ke nau kumi hake ʻa e “Lami ʻa e ʻOtuá” ʻi he Fakahinohino ki he Ngaahi Folofolá pe “Jesus Christ, Lamb of God” ʻi he the Topical Guide. Pe ko hoʻo fakaafeʻi kinautolu ke fekumi ʻi he ngaahi potufolofola ko ʻení:

Keini mo ʻĒpeli

Kapau ʻokú ke ongoʻi ʻe ʻaonga ki he kau akó hono ako ʻa e fakamatala kia Keini mo ʻĒpelí, fakakaukau ke fakaʻaliʻali ʻa e fakatātā ko ʻení. Fakamatalaʻi ange ko Keini mo ʻĒpelí ko ha fānau ʻa ʻĀtama mo ʻIvi (vakai, Mōsese 5:16–17). Naʻe fakaʻau ke ʻita ʻa Keini ki hono tokoua ko ʻĒpelí peá ne tāmateʻi ia.

Fakaafeʻi ʻa e kau akó ke tauhoa ʻo fekumi ʻi he Mōsese 5:18–33. ʻE lava ke kumi ʻe ha tokotaha ako ʻe taha ʻa e ngaahi fili naʻe fai ʻe Keini ʻo tupu ai ʻene fakapoongi hono tokouá. ʻE lava ke kumi ʻe he tokotaha ako ʻe tahá ha fakamoʻoni naʻe ʻofaʻi ʻa Keini ʻe heʻene ongomātuʻá pea mo e ʻEikí.

Ko e hā naʻá ke ako fekauʻaki mo e ʻaloʻofa ʻa e ʻEikí?
Ko e hā naʻá ke ako fekauʻaki mo e ngaahi nunuʻa ʻo hono fakafisingaʻi ʻa e fakaafe ʻa e ʻEikí ke fakatomalá?

(Fakatokangaʻi ange: Te ke lava ʻo fakamatalaʻi ange koeʻuhí ko e faiangahala ʻa Keiní, naʻá ne maʻu ha fakamalaʻia naʻe kau ai ʻa hono “tāpuniʻi [ia] mei he ʻao ʻo e ʻEikí” [Mōsese 5:41]. Naʻe ʻai foki mo ha fakaʻilonga kia Keini [vakai, Mōsese 5:39–40]. ʻOku ʻikai totonu ke tau fakamahamahalo ki he ngaahi fakaikiiki ʻo e fakaʻilonga ko ʻení pe fakamahamahalo naʻe fakahoko ʻa e fakamalaʻiá kia Keini toko taha pē.)