Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Mosesy 4:5-32; 5:1–15, Fizarana 1: “Ary samy nahiratra ny masony”

“Mosesy 4:5–32; 5:1–15, Fizarana 1: ‘Ary samy nahiratra ny masony’” Testamenta Taloha: Boky torolalana ho an’ny mpampianatra seminera (2026)

“Mosesy 4:5–32; 5:1–15, Fizarana 1: ‘Ary samy nahiratra ny masony’” Testamenta Taloha: Boky torolalana ho an’ny mpampianatra seminera

Genesisy 3–4; Mosesy 4–5:Lesona 11

Mosesy 4:5–32; 5:1–15, Tapany 1

“Ary samy nahiratra ny masony”

Na tsapantsika izany na tsy tsapantsika dia miantraika amintsika rehetra mivantana isan’andro ny Fahalavoan’i Adama sy i Eva. Raha ny marina dia tsy teraka akory isika raha tsy nitranga izany. Natokana hanampiana ny mpianatra hahatakatra ny fiantraikan’ny Fahalavoana eo amin’ny drafitry ny Ray any An-danitra sy eo amin’ny fiainan’izy ireo manokana ity lesona ity.

Fiomanan’ ny mpianatra: Asao ny mpianatra hitadidy ny andalan-tsoratra masina fifehezana fotopampianarana 2 Nefia 2:25 ary hanontany ny rainy na ny reniny na mpitarika ao amin’ny Fiangonana ny hevitr’izany amin’izy ireo.

Sahanasa fianarana azo atao

Tsara ve sa ratsy?

Hanombohana ny lesona, dia ampio ny mpianatra hihevitra ny mahatonga ireo zavatra sarotra sasany mety ho lasa fitahiana ao amin’ny drafitr’ Andriamanitra. Fomba iray hanaovana izany ny fampiasana ity mari-drefy manaraka ity. Mety hisafidy ny hampiseho ny sary izay mampiseho ireo teny halahatry ny mpianatra ianao.

Eo amin’ny mari-drefy 1–10 (1 = ratsy, 10 = tsara), ahoana araka ny hevitrao no mety handaharan’ny ankamaroan’ny olona ireto zavatra manaraka ireto?

Asa mafy

Fitsapana

Alahelo

Fahafatesana

Raha raisina amin’ny fomba fijery mibanjina ny mandrakizay ny drafitry ny Ray any An-danitra dia mety ho hafa ve ny handaharanao azy ireo? Raha eny, dia nahoana?

Asehoy ny sarin’i Adama sy Eva toy ilay iray tany am-piandohan’ny lesona. Azonao avela eo izany ho amin’ny ambin’ny lesona.

Maro amin’ireo zava-tsarotra atrehintsika eo amin’ny fiainana no vokatry ny safidy nataon’ireo ray aman-drenintsika voalohany dia i Adama sy i Eva.

Ahoana no mety handaharan’ny olona maro ny Fahalavoan’i Adama sy i Eva amin’ny mari-drefy 1–10 raha ny eritreritrao? Nahoana?

Saintsaino hatraiza ny fahatakaranao tsara ny hevitry ny Fahalavoan’i Adama sy i Eva sy ny dikan’izany eo amin’ny fiainanao. Valio ao anatin’ny diary fandalinanao ireto fanontaniana manaraka ireto:

Tsapanao ve na tsara na ratsy ilay Fahalavoana?
Amin’ny fomba ahoana no miantraika amin’ny valinteninao ny fahatakaranao ny Sorompanavotan’i Jesoa Kristy?

Eo am-pandalinanao ny Mosesy 4–5 androany, dia mikatsaha aingam-panahy avy amin’ny Fanahy Masina mba hanampy anao hahatakatra bebe kokoa ny Fahalavoan’i Adama sy i Eva. Ny Fanahy Masina no afaka manampy anao hahita fa tafiditra ao anatin’ny drafitry ny Ray any An-danitra ny Fahalavoana mba hanampiana antsika handroso sy ho tonga tahaka Azy bebe kokoa.

Ireo vokatry ny Fahalavoana

Hanampiana anao handamina ny zavatra nianaranao momba ny Fahalavoana, dia mamoròna bokikely amin’ny fampiasana ireto torolalana manaraka ireto. Alaivo sary an-tsaina ny fampiasana ity bokikely ity hampianarana ny hafa momba ny Fahalavoana sy ny antony maha-zava-dehibe izany ao amin’ny drafitry ny Ray any An-danitra. Mahaiza mamorona rehefa manamboatra ny bokikelinao.

Aforeto roa ilay taratasy. Mamoròna pejy fonony misy lohateny toy ny hoe “Ny Fahalavoana ao amin’ny drafitry ny Ray any An-danitra.” Ampio kisarisary na sary mampahatsiahy anao ny Fahalavoana, toy ny hazo fihinam-boa na voankazo iray.
Ao anatin’ny bokikely, asivo lohateny hoe “Vokatry ny Fahalavoana” eo amin’ny pejy ankavia.
Halalino ny Mosesy 4:13–16, 22–25, 28–29; 5:1–4. Tanisao na ataovy sary ny vokatry ny Fahalavoana eo amin’ny zanak’ Andriamanitra. Ampidiro ao amin’ny bokikelinao ireo andininy izay nianaranao momba ny vokatra tsirairay.

Rehefa nanana fotoana ampy tsara dia manasà mpianatra vitsivitsy hizara ny bokikelin’izy ireo amin’ny iray kilasy. Asao ireo mpianatra hampiditra ao amin’ny bokikelin’izy ireo ny zavatra izay tsy voasorany.

Ataovy azo antoka fa notanisain’ny mpianatra ny hoe i Adama sy i Eva sy ny taranany ankehitriny dia:

Hahatsapa tsy fahavononana rehefa eo anatrehan’ Andriamanitra (Mosesy 4:13–16).
Hanan-janaka (Mosesy 4:22; 5:2–3).
Hiaina alahelo sy hirifiry ary fahasahiranana (Mosesy 4:22–24).
Mila miasa mafy vao velona (Mosesy 4:25; 5:1–3).
Hahalala ny tsara sy ny ratsy (Mosesy 4:28).
Ho faty (Mosesy 4:25).
Nosarahina hiala teo anatrehan’ Andriamanitra (fahafatesana ara-panahy) (Mosesy 5:4).

Hazavao fa ny fisarahana amin’ Andriamanitra dia antsoina hoe “fahafatesana ara-panahy”, zavatra izay iainantsika rehetra.

Saintsaino fa ny fiantraikany manokana tamin’ny Fahalavoana dia afaka manampy antsika handroso mankany amin’ny “tsy fahafatesana sy ny fiainana mandrakizay” (Mosesy 1:39).

Amin’ny fomba ahoana ny famelan’ Andriamanitra an’i Adama sy i Eva ho lavo no maneho ny fahendreny sy ny fitiavany ho an’ny zanany?

Saintsaino hoe inona amin’ireo vokatry ny Fahalavoana no hitanao sarotra indrindra eo amin’ny fiainanao.

Hazavao amin’ny mpianatra fa hamita ny bokilekiny izy ireo mandritra ny lesona manaraka rehefa eo am-pandalinana ny lesona momba ny anjara asan’ny Mpamonjy amin’ny fandresena ny voka-dratsin’ny Fahalavoana.

Ny anjara asa lehiben’ny Fahalavoana

I Lehia mpaminaniny ao amin’ny Bokin’ny Môrmôna dia nanazava ny hevitry ny Fahalavoana.

Halalino ny 2 Nefia 2:22–25, ka tadiavo ny antony nahatonga ny Fahalavoana ho zavatra tsara.

Inona no nianaranao momba ny Fahalavoana?

Mety hilaza fahamarinana maromaro ny mpianatra, saingy ataovy izay hahatakaran’izy ireo fa zava-dehibe ho an’ny fivoarantsika ao amin’ny drafitry ny Ray any An-danitra ny Fahalavoana.

Mety ho tianao ihany koa ny hanampy ny mpianatrao hahita fa ny Ray any An-danitra dia namela an’i Adama sy i Eva sy ny taranany hiaina fifaliana tamin’ny alalan’ny Fahalavoana. Asao izy ireo hanoratra ny teny hoe “fifaliana” ao amin’ny bokikeliny eo ambanin’ny hoe “Ireo vokatry ny Fahalavoana.” Anontanio ny mpianatrao raha misy afaka manao tsianjery ny 2 Nefia 2:25 .

Ny Filoha Jeffrey R. Holland ao amin’ny Kôlejin’ny Apôstôly Roambinifolo dia nanazava ny antony maha-zava-dehibe ny Fahalavoana eo amin’ny fiainantsika:

Ampahany manan-danja ao amin’ny drafitry ny famonjen’ny Ray any An-danitra ny Fahalavoana. Raha tsy nisy azy io dia tsy ho nisy zanaka mety maty naterak’i Adama sy i Eva, ary tsy ho nisy fianakavian’olombelona mba hiaina ny fifanoherana sy ny fitomboana, ny safidim-pitondran-tena, ny fifaliana avy amin’ny fitsanganana amin’ny maty, sy ny fanavotana, ary ny fiainana mandrakizay. (Christ and the New Covenant: The Messianic Message of the Book of Mormon [1997], 207)

Avereno jerena ny bokikelinao ao amin’ny pejy misy ilay hoe “Ny vokatry ny Fahalavoana.”

Amin’ny fomba ahoana no miantraika amin’ny fomba tsara eo amin’ny fivoaranao mandrakizay ny Fahalavoana?
Inona amin’ny vokatry ny Fahalavoana no ilaintsika mba hanavotana antsika?

Ampio hahatakatra ny mpianatra fa, ankoatra ny maro hafa, dia tsy afaka manavotra ny tenantsika amin’ny fahafatesana ara-batana na ny fahafatesana ara-panahy isika.

Vakio ny fehezan-teny voalohany ao amin’ny 2 Nefia 2:26, ka tadiavo ny vaovao mahafaly ho an’ny zanak’ Andriamanitra rehetra.

Inona no hitanao?

Ampahafantaro ny mpianatra fa ny lesona manaraka dia hifantoka amin’ny anjara asan’ny Mesia amin’ny fanavotana antsika noho ny voka-dratsin’ny Fahalavoana.

Asao ireo mpianatra hitadidy ilay sahanasa fandaharana tany am-piandohan’ny lesona. Eto dia anontanio azy ireo ny fomba hanombanan’izy ireo ny fahalavoan’i Adama sy i Eva amin’ny mari-drefy 1–10. Afaka manazava amin’ny manoddina azy ny mpianatra avy eo hoe nahoana no zavatra tsara ny Fahalavoana sy ny fomba fiantraikan’izany eo amin’ny fiainan’izy ireo sy ny fandrosoan’izy ireo ao amin’ny drafitry ny Ray any An-danitra.

Farano ny sahanasa amin’ny fijoroanao hovavolombelona momba ny fahendren’ny Ray any An-danitra sy ny fitiavany antsika, izay nasehony tamin’ny nandefasany ny Zanany mba hanavotra antsika tamin’ny Fahalavoana.

(Lazao ny mpianatra mba hitahiry ny bokikeliny, na hamerina izany any aminao, mba hahafahan’izy ireo mamita ny famoronana izany amin’ny lesona manaraka.)

Loharanom-pitaovana fanampiny

Nanota ve i Adama sy Eva rehefa nihinana ny voan’ny hazo fahalalana ny tsara sy ny ratsy?

Nampianatra ny Filoha Joseph Fielding Smith (1876–1972) hoe:

Inona no nataon’i Adama? Ny zavatra izay tena tian’ Andriamanitra nampanaovina an’i Adama dia. … Nanota ve i Adama raha nihinana tamin’ilay voankazo voarara? Tsia, tsy nanota izy!

Izao no fanazavana omeko anao [Mosesy 3:16–17]: Hoy ny Tompo tamin’i Adama: Indro ny hazo fahalalana ny tsara sy ny ratsy. Raha te hijanona ato ianao dia tsy tokony hihinana ny voan’io hazo io. Raha te hijanona ato ianao, dia mandrara anao ny hihinana izany aho. Kanefa mahazo mifidy ho an’ny tenanao ianao, ary afaka mihinana amin’izany ianao raha toa maniry izany. Ary raha mihinana izany ianao dia ho faty tokoa.

Hitako ny fahasamihafana lehibe eo amin’ny fandikana ny lalàna sy ny fanaovana fahotana. (“Fahalavoana, Sorampanavotana,Fitsanganana amin’ny maty, Fanasan’ny Tompo,” ao amin’ny Charge to Religious Educators, edisiôna faha-3 [1994], 124)

Nanazava izao ny Filoha Dallin H. Oaks ao amin’ny Fiadidiana Voalohany:

I Eva no nandika voalohany ireo fehy tao Edena mba hanombohana ny toetra mety maty. Ny zavatra nataony, na inona na inona endrik’izany, dia tena fandikan-dalàna saingy zavatra nilaina tena manan-danja mandrakizay mba hanokafana ny varavarana mankany amin’ny fiainana mandrakizay. Nampiseho ny fahendreny i Adama tamin’ny fanaovana torak’izany koa. Noho izany dia “lavo i Adama mba hisian’ny olona” (2 Nefia 2:25).

Ny Kristianina sasany dia manameloka an’i Eva tamin’ny zavatra nataony, ka maneho fehin-kevitra fa izy sy ireo zanany vavy dia malemy noho izany. Tsy manao izany ny Olomasin’ny Andro Farany! Raha nahazo fahalalana tamin’ny alalan’ny fanambarana isika, dia mankalaza ny zavatra nataon’i Eva ary midera ny fahendreny sy ny risi-pony tao anatin’ilay fotoan-dehibe antsoina hoe Fahalavoana isika. (“The Great Plan of Happiness,” Ensign, Nôv. 1993, 73)

Nahoana no tsy afaka niteraka tao amin’ny Saha Edena i Adama sy i Eva?

Hoy ny Filoha Dallin H. Oaks ao amin’ny Fiadidiana Voalohany hoe:

Tamin’i Adama sy i Eva nandray ny didy voalohany dia tao anaty toe-piovana izy ireo, tsy tao amin’ny tontolon’ny fanahy intsony saingy manana vatana ara-nofo izay tsy mbola mety maty sy tsy mbola afaka miteraka. Tsy afaka nanatanteraka ilay didy voalohany nomen’ny Ray izy ireo [hihabetsaka sy hameno ny tany] raha tsy nandika ilay sakana manasaraka ilay fahasambarana tao amin’ny Sahan’i Edena sy ireo fitsapana mahatsiravina ary ireo fahafahana mahavariana an’ny fiainana an-tany. (“The Great Plan of Happiness,” Ensign, Nôv. 1993, 72–73)

Mosesy 4:22. Inona no hevitry ny hoe i Adama no “hanapaka” an’i Eva?

Nanazava toy izao ny Loholona Bruce C. Hafen sy ny Rahavavy Marie K. Hafen:

Ny fotokevitry ny mpivady mifampiankina sy mira lenta dia voarakitra tsara ao amin’ny fotopampianaran’ny filazantsara izay naverina tamin’ny laoniny. …

Ny Genesisy 3:16 dia milaza fa i Adama no tokony “hifehy” an’i Eva, fa tsy ho mpanao didy jadona kosa anefa i Adama amin’izany. … Ankoatra izany, ilay teny hoe “mifehy” dia mampiasa ilay teny hebreo hoe bet, izay midika hoe manapaka miaraka, fa tsy hoe manapaka ny iray. Raha misy lehilahy mampanarana ny “fiavonavonana … na manao ahoana na manao ahoana ampahan’ny tsy fahamarinana amin’izany” (Fotopampianarana sy Fanekempihavanana 121:37; nampiana fanamafisana), dia faranan’ Andriamanitra ny fahefan’izany lehilahy izany. (“Crossing Thresholds and Becoming Equal Partners,” Ensign, Aog. 2007, 26, 27)

Ny Loholona Dale G. Renlund ao amin’ny Kôlejin’ny Apôstôly Roambinifolo miaraka amin’ny Rahavavy Ruth Lybbert Renlund dia nanazava izao:

[Ny lehilahy marina] dia hikatsaka izay hanompoana; hanaiky ny hadisoany izy ary hikatsaka famelana; mora midera izy; hieritreritra izay zavatra tian’ny ankohonany manokana izy; ho tsapany ny vesatra lehiben’ny andraikitra ny hanome “izay ilaina eo amin’ny fiainana sy ny fiarovana- ny ankohonany; hitondra ny vadiny amim-panajana sy ny amim-panetrentena lehibe indrindra izy. … Ho tahiany ny ankohonany. (The Melchizedek Priesthood: Understanding the Doctrine, Living the Principles [2018], 23)

Sahanasa fianarana fanampiny

Ny drafitry ny famonjena

Mety hanampy ny mpianatra ny mahita ny Fahalavoana ao anatin’ny sahan-kevitry ny drafitry ny famonjen’ny Ray any An-danitra. Hevero ny hampiseho ity kisary manaraka ity, izay mety efa nampiasainao tao amin’ny Lesona 2: “Ny drafitry ny famonjena,” rehefa eo am-pifanakalozan-kevitra momba ireto fanontaniana manaraka ireto miaraka amin’ny iray kilasy na ao anatina vondrona kely ny mpianatra.

Apetraho amin’ny mpianatra ireto fanontaniana manaraka ireto:

Inona no fantatrao momba ny fizarana tsirairay amin’ny drafitry ny Ray any An-danitra hita amin’io kisary io?
Inona no anjara asan’ny Mpamonjy ao anatin’ny fizarana tsirairay?
Aiza no hametrahanao ny Fahalavoan’i Adama sy i Eva ao amin’io kisary io?

Vakio ny Mosesy 4:6, ka tadiavo ny fikasan’i Satana tamin’ny fakana fanahy an’i Eva hihinana ilay voankazo.

Inona ny fikasan’i Satana? Inona no zavatra tsy tena takany?
Ahoana no nanampian’ny Ray any An-danitra ny zanany handroso tamin’ny alalan’ny famelana an’i Adama sy i Eva hihinana ilay voankazo?

Fomba hafa hamintinana ny tantaran’ny Fahalavoana

Ity sahanasa ity dia natao hanampiana ny mpianatra hanome famintinana fohy ireo tranga nitarika ny Fahalavoana. Soraty eny amin’ny solaitrabe ireto teny manaraka ireto: Nandidy, Hazo, Misafy, Satana, Voankazo, Maty, Mihinana, Hendry, Ravin’aviavy.

Asao hanazava ny tantaran’ny Fahalavoana amin’ny namany ny mpianatra amin’ny alalan’ny fampiasana ireo teny sasany na ny teny rehetra eny amin’ny solaitrabe. Rehefa avy manazava ny momba ny Fahalavoana ny mpianatra, dia asao izy ireo hijery vetivety ny Mosesy 3:16–17 sy 4:6–12, ka hitady ny antsimpiriany fanampiny izay mety hiampy na mety hanitsy ny fahatakarany momba izany. Asao hifampizara ny antsipiriany tsirairay izay nianarany avy amin’ireo andininy ireo izy ireo.