Kenese 1–2; Mose 2–3; Aperaamo 4–5: Lesona 7

Kenese 1:1–25

O Le Foafoaga

O le mamalu ma le matagofie o lo tatou lalolagi o loo molimau mai i Foafoa mamalu o e e mafai ona suia se mea e “aunoa ma se foliga, ma e le aoga,” (tagai Kenese 1:2) i mea ofoofogia o lenei lalolagi. E mafai ona fesoasoani lenei lesona i tagata aoga e lagona ai le alofa ma le lotofaafetai mo le Tama Faalelagi ma Iesu Keriso a o latou suesue i le Foafoaga o le lalolagi.

Sauniuniga a le tagata aoga: Valaaulia tagata aoga e mafaufau loloto i le matagofie o le lalolagi ma foafoaga uma a le Atua. Valaaulia i latou e aumai se ata po o le saunia e talanoa e uiga i se mea i lenei lalolagi latou te fiafia i ai.

Gaoioiga e ono Mafai ona Fai e Aoao Ai

Manatua: E ui o tala o le Foafoaga o le lalolagi o loo maua foi i le Mose 2 ma le Aperaamo 4, o lenei lesona o le a taulai atu i le tala o loo tusia i le Kenese 1.

Foafoa ma foafoaga maoae

Ina ia amata le vasega, mafaufau e faaali atu ata o se fale matagofie o se nofoaga lauiloa i lo outou vaiaai. E mafai ona e faia ni fesili e pei o nei:

• O le a sou manatu o le a le mea e mananao ai tagata e asiasi i se fale faapenei?

• O le a sou manatu i lagona o tufuga o fale matagofie pe a fiafia tagata i a latou galuega?

Ona mafai lea ona e faaali atu se ata o se laufanua matagofie e lata ane i lo outou vaiaai. Valaaulia tagata aoga e fai mea nei e fesoasoani ai e saunia i latou mo le lesona o le aso.

Mafaufau pe o a ni ou lagona po o ni ou mafaufauga pe a e vaai i le matagofie ma le mamalu o le lalolagi. Mafaufau pe faafia ona e faaaluina se taimi e faamemelo ai pe faafetaia ai nei mea ofoofogia faalelalolagi. A o e suesue i le aso, valaaulia ma le agaga tatalo le Agaga Paia e fesoasoani ia te oe ia lagona le alofa ma le lotofaafetai i le Tama Faalelagi ma Iesu Keriso mo le foafoaga o lenei lalolagi.

O Le Foafoaga

A o lei faalauiloaina atu le gaoioiga suesue lenei, mafaufau e valaaulia tagata aoga e faasoa mai mea ua latou iloa e uiga i le foafoaga o le lalolagi. Ona faasino lea o le vasega i le fuaiupu lenei mai le “O Le Keriso Soifua: O Le Molimau a le Au Aposetolo.” Valaaulia tagata aoga e tusi lenei upumoni i a latou api talaaga mo suesuega po o se fasifaamatalaga i a latou tusitusiga paia. E mafai foi ona tusia lenei mea i le laupapa.

I le “O Le Keriso Soifua: O Le Molimau a le Au Aposetolo,” ua tatou aoao ai:

I lalo o le taitaiga a Lona Tama, o [Iesu Keriso] o le foafoa o le lalolagi. (“O Le Keriso Soifua: O Le Molimau a le Au Aposetolo,” ChurchofJesusChrist.org)

O leKenese 1 o loo i ai nisi o faamatalaga e uiga i le foafoaina e Iesu Keriso o le lalolagi. Faitau le tala o vaitau foafoa muamua e ono mai le Kenese 1, ma vaavaai mo mea ua tatou aoaoina e uiga i le Foafoa ma le foafoaga.

A o suesue e tagata aoga ia fuaiupu nei, e mafai ona e valaaulia i latou e faailoa ma maka “aso” taitasi o le Foafoaga i a latou tusitusiga paia. O se tasi o auala e faia ai lenei mea o le kopi lea o le siata lenei i luga o le laupapa ma tuui tagata aoga le taimi e faatumu ai. E mafai ona e faatulagaina tagata aoga i ni vaega toalaiti ma tofi atu i vaega taitasi se seti se tasi o fuaiupu e suesue i ai mai le siata.

Atonu e fesoasoani le faamalamalama atu o le upu “aso” e faasino i se vaitaimi o le foafoaga, ae le o se vaitaimi patino (tagai Aperaamo 4, lea o loo faaigoa ai vaitaimi foafoa o le “taimi”). Manatua: O le foafoaga o le tane ma le fafine o le a talanoaina i se loloto sili atu i lesona “Kenese 1:26–27” ma le “Kenese 1:28–2:25.“

Ia faaeteete ina ia aua nei umi tele lenei vaega o le lesona ina ia lava ai le taimi o tagata aoga e taulai atu ai i le vaega ua faaulutalaina “O le matafaioi a le Faaola o le Foafoa.”

Aso 1: Kenese 1:1–5	Na vavae ai le malamalama mai le pouliuli
Aso 2: Kenese 1:6–8
Aso 3: Kenese 1:9–13
Aso 4: Kenese 1:14–19
Aso 5: Kenese 1:20–23
Aso 7: Kenese 1:24–27

• O a ni manatu po o ni lagona na ia te oe e uiga i le Faaola a o e suesue i nei fuaiupu?

Atonu e i ai ni fesili a tagata aoga e uiga i nisi o auiliiliga o le Foafoaga. Fesoasoani ia latou malamalama o tala o le Foafoaga e le o faamoemoe e tuuina atu ai se faamalamalamaga aiai, faasaienitisi o faagasologa patino, periota o taimi, po o mea na tutupu o loo aofia ai. Atonu e fesoasoani le faitau o le Mataupu Faavae ma Feagaiga 101:32–34 ma faamautinoa i tagata aoga o le a faaali mai e le Faaola mea uma i Lona taimi.

O le matafaioi a le Faaola i le [avea ai ma] Foafoa

Tuu atu i tagata aoga se avanoa e faaloloto ai lo latou talisapaia o Iesu Keriso o le Foafoa. O se tasi o auala e faia ai lenei mea o le tusi lea o se ata o le lalolagi i luga o le laupapa ma faaali atu mau faasino nei mo tagata aoga e suesue i ai. E mafai ona e valaaulia i latou e suesue nisi po o fuaiupu uma ma o mai i le laupapa e tusi ni fasifuaitau anoa latou te maua faataamilo i le ata o le lalolagi.

A o suesue e tagata aoga nei fuaiupu, valaaulia i latou e gauai totoa atu i le ala e mafai ai e le Agaga ona molimau atu ia i latou i le matafaioi a le Faaola i le avea ai ma Foafoa.

Filifili se tasi pe sili atu o fuaiupu nei e suesue ai, ma vaavaai ai mo aoaoga e mafai ona faaleleia ai lou malamalamaaga ma le talisapaia o Iesu Keriso i le avea ai o le Foafoa.

Alema 30:43–44

Mataupu Faavae ma Feagaiga 38:1–3

Mataupu Faavae ma Feagaiga 59:18–20

Mataupu Faavae ma Feagaiga 76:22–24

Mose 1:33, 39

Mose 6:63

Valaaulia tagata aoga e faasoa mai o latou malamalamaaga. O se tasi o auala e mafai ona e faia ai lenei mea o le faaali atu lea o fesili nei mo tagata aoga e talanoaina.

• O a nisi o upu po o fasifuaitau anoa mai fuaiupu sa e suesueina? Aisea?

• O le a se mea ua fesoasoani ai nei fuaiupu ia te oe e aoao ai pe lagona ai e uiga i le Tama Faalelagi ma Iesu Keriso?

Valaaulia le vasega e tomanatu pe na faapefea ona aafia o latou olaga i le matafaioi a le Faaola i le avea ai ma Foafoa. I le avea ai o se vaega o lenei taimi e toe manatunatu ai, e mafai ona e mafaufau e faaali atu le “Sa Tatou Nonofo faatasi ma le Atua” (4:00), o loo maua i le ChurchofJesusChrist.org.

E mafai foi ona e faaaogaina le tala mai ia Peresitene Boyd K. Packer i le “Punaoa Faaopoopo.”

Faaali atu le lotofaafetai mo le Foafoa

O lenei vaega o le lesona ua faamoemoe e fesoasoani i tagata aoga e faailoa atu lo latou alolofa ma le lotofaafetai ia Iesu Keriso ona o Lana matafaioi o le avea ai ma Foafoa. Ina ia fesoasoani ia i latou e faia lenei mea, mafaufau e faaaoga se tasi pe sili atu o gaoioiga nei. E mafai ona e faaali atu filifiliga e te filifilia ma valaaulia tagata aoga e filifili se tasi e faamaea.

• Tusi se solo po o se tusiga i le api talaaga e faaalia ai le lotofaafetai mo Iesu Keriso ma Ana foafoaga.

• Tusi se ata e faatusa i ou lagona agai i le Faaola ma Ana foafoaga.

• Filifili se viiga e faatatau i le Faaola ma Ana foafoaga. Suesue i upu o le musika. E mafai ona e suesue i le “Iesu Keriso—Le Foafoa” i le vaega o Autu o le tusipese. E mafai ona e tusia se fuaiupu faaopoopo i le viiga e atagia ai ou lagona e uiga i le Tama Faalelagi, Iesu Keriso, ma le Foafoaga.

A uma ua lava se taimi, valaaulia tagata aoga e faasoa mai mea ua latou aoaoina ma lagona mai le gaoioiga.

Vaavaai mo avanoa e faaaoga ai musika paia e valaaulia ai le uunaiga a le Agaga. O musika musuia e mafai ona fatuina ai se lagona o le migao ma fesoasoani ai i tagata aoga ia lagonaina le mana o upumoni o loo latou aoaoina. Afai na filifilia e tagata aoga ni viiga anoa e faailoa atu ai lo latou alolofa ma le lotofaafetai ia Iesu Keriso, e mafai e le vasega ona usu faatasi se viiga se tasi pe sili atu foi, ma e mafai e le vasega ona faasoa mai le fuaiupu faaopoopo na latou tusia.

(Mo nisi aoaoga faafaiaoga i le faaaogaina o musika musuia, tagai i le “Fatuina o faatulagaga ma avanoa mo tagata aoao ina ia aoaoina e le Agaga Paia” i le Tomai o le Atinaega o Faiaoga.)

E mafai foi ona e valaaulia tagata aoga e faitau le solo po o le tusiga sa latou tusia i le api talaaga. E mafai ona e faaali atu i tamaiti aoga galuega tau ata na fatuina ma valaaulia i latou e faasoa mai mea na latou faaalia ma pe aisea foi. Mafaufau e faaiu le vasega i le faasoa atu o ou lagona e uiga i le matafaioi a le Faaola i le Foafoaga.

O Punaoa Faaopoopo

E mafai faapefea ona fesoasoani le Faaola ia te a’u ona o Ia o le Foafoa?

Sa faaaoga e Peresitene Boyd K. Packer (1924–2015) o le Korama a Aposetolo e Toasefululua le tala lenei e faamamafa ai le mana o le matafaioi a le Faaola o se Foafoa.

I le aluga o tausaga, i le avea ai ma se suiga, sa ou vaneina ai ni manulele laupapa. O nisi taimi e alu ai se tausaga atoa e faamaea ai se [manu se] tasi. Ou te aumaia ni atafaatusa ma fua ia fulumanu ma suesue i lanu ona vaneina loa lea. O le a ou vaneina se faatulagaga mo i latou. Sa matuai taugalemu lava. O nisi taimi pe a ou le mautonu, e fai mai lo’u toalua, “Aisea e te le alu ai e vane se manulele!” Sa o se mea matua to’amalie i lo‘u olaga.

Sa ma o ma Elder A. Theodore Tuttle i le taulaga i se tasi aso. Sa ia te a’u se tasi o a’u vanega. Sa ou aveina i totonu e faaali atu i se tasi. Sa ma tuuina i luga o le nofoa pito i tua. I se magaala, sa taofi faafuasei ai e [Elder Tuttle] le taavale ma patatū ai i lalo le ata vane i luga o le fola ma nuti ai. Sa ia faaafe i tua le taavale ma tilotilo i ai. Sa matuā mafatia o ia. Sa ou le’i mafatia.

E aunoa ma le mafaufau i ai, sa ou fai atu, “Faagalo. O a’u na faia. E mafai ona ou [toe] faia.” Ma sa ou [toe faia lava]. Na ou faia e sili atu le malosi nai lo le mea sa i ai. Sa ou faaleleia atili.

E leai se mea e uiga i lou olaga ua gausia pe malepelepe e faapea e le mafai e [Iesu Keriso] ona toe faaleleia ma o le a toe faaleleia lava. E tatau ona e filifili. Afai o nisi o outou ua faia ni mea sese ma ua outou manatu ua nutimomoia outou ma ua le mafai ona tuufaatasia, tou te le iloa aoaoga faavae o le Ekalesia. E te le iloa po o le a le uiga o le Togiola ma po o ai le Alii ma le mana o loo avea ai o Ia i lou olaga. (“The Instrument of Your Mind and the Foundation of Your Character” [Brigham Young University devotional, Fepuari 2, 2003])

O le a lo tatou tiutetauave i le tausiga o foafoaga a le Atua?

Na aoao mai Epikopo Gérald Caussé o le Au Epikopo Pulefaamalumalu:

I le avea ai o ni tausimea o foafoaga a le Atua, ua i ai so tatou tiute e faamamalu ma tausia i latou.

I le avea ai o fanau a le Atua, ua tatou maua ai le tiutetauave ia avea ma tausimea, tausifanua, ma leoleo o Ana foafoaga paia.

Ua faataga i tatou e lo tatou Tama Faalelagi e faaaoga ia punaoa faalelalolagi e tusa ai ma lo tatou lava loto malie. Peitai, e le tatau ona faamatalaina lou faitalia o se laisene e faaaoga pe tafilisaunoa ai i punaoa o lenei lalolagi e aunoa ma le poto po o le taofiofia.

Na saunoa Peresitene Russell M. Nelson e faapea: “I le avea ai ma e mauaina le Foafoaga paia, o le a se mea tatou te faia? E tatau ona tatou tausia le lalolagi, ia avea ma ni tausimea atamamai iai, ma faasaoina mo tupulaga o le lumanai.” (Liahona, Iulai 2000, 104)

I talaatu i le na o se tulaga tatau faasaienitisi po o faapolotiki, o le tausiga o le fogaeleele ma lo tatou siosiomaga faalenatura o se tiutetauave paia ua faamatuuina mai ia i tatou e le Atua, lea e tatau ona faatumuina ai i tatou i se lagona loloto o la tatou matafaioi ma le lotomaualalo. O se vaega taua foi o lo tatou avea ai ma soo. E mafai faapefea ona tatou faamamaluina ma alolofa i le Tama Faalelagi ma Iesu Keriso e aunoa ma le faamamaluina ma alolofa i a La’ua foafoaga? (“O La Tatou Tausiga Faalelalolagi,” Liahona, Nov. 2022, 57–58)

O fea e mafai ona ou maua ai tali i fesili e uiga i le foafoaga?

“O le a le talitonuga o le Ekalesia e uiga i le evolusi?,” New Era, Oke. 2016, 41

“O le a le talitonuga o le Ekalesia e uiga i tainasoa?,” New Era, Fep. 2016, 41

“The Origin of Man,” Improvement Era, Nov. 1909, 78; Ensign, Feb. 2002, 29.

“Foafoaga,” Autu ma Fesili i le ChurchofJesusChrist.org

Gaoioiga Faaopoopo e Aoao Ai

O isi tala faatusi paia o le Foafoaga

E ono fesoasoani le valaaulia o tagata aoga e saili isi tala o le Foafoaga ma faaopoopo i la latou suesuega o le Kenese 1:1–25. Mafaufau e tusi le Mose 2:1–25 ma le Aperaamo 4:1–25 i luga o le laupapa. Vaelua tutusa le vasega ma valaaulia afa taitasi e suesue se tasi o fuaitau, maka upu ma fasifuaitau e faaopoopo i lo latou malamalama i le faagasologa foafoata’i. Ona mafai lea e tagata aoga ona faasoa mai mea na latou maua i le isi afa o le vasega.

Saienisi ma le Mauaina o le Malamalama Faaleagaga

Ina ia fesoasoani i tagata aoga e faataitai le taliina o fesili atonu o i ai ia i latou po o isi e uiga i le Foafoaga, mafaufau e tuuina atu le vaaiga faataitai lenei po o se mea e talitutusa. Valaaulia tagata aoga e faatutumu faamatalaga e talafeagai ai le vaaiga faataitai i atugaluga o ia i latou pe ono feagai ai ma isi [tagata]. Ona valaaulia lea o tagata aoga e faaaoga ia mataupu faavae o le Mauaina o le Malamalama Faaleagaga e fesoasoani e tali ai fesili.

Ua faasoa mai e lau uo o Lorenzo e faapea, i le vasega saienisi sa ia aoaoina ai nisi o mea e uiga i mea e foliga mai e le ogatusa ma mea sa ia faitauina i le Kenese 1.

• O a nisi o upumoni ua tatou iloa e ono fesoasoani ia Lorenzo?

• O a ni punaoa mamana ua filifilia o le a e faasoa atu e mafai ona fesoasoani ia Lorenzo e tausia ai se vaaiga e faavavau ma galue ai i le faatuatua?

E mafai ona e faasino tagata aoga i upusii ma tusiga o loo maua i le “Punaoa Faaopoopo” ma fuaitau o mau e pei o le Mataupu Faavae ma Feagaiga 101:32–34.

Ua molimau mai mea uma ia Keriso

Ina ia fesoasoani ia malamalama tagata aoga pe faapefea ona molimau mai foafoaga o lenei lalolagi ia Iesu Keriso, e mafai ona e valaaulia i latou e faitau ma maka le Mose 6:63. Ona fai lea i tagata aoga e lisi i luga o le laupapa nisi o foafoaga o le lalolagi. O le galulue faatasi ai ma se paga po o ni vaega toalaiti, e mafai e tagata aoga ona filifili se aitema mai le laupapa ma talanoaina pe faapefea ona molimau atu ia Iesu Keriso. Afai e manaomia e tagata aoga se taitaiga faaopoopo, e mafai ona e faaaogaina se faataitaiga e pei o se [fugalaau o le] mataolela e minoi e mulimuli i le la i le aso atoa. E tatau ona tatou mautinoa i taimi uma tatou te mulimuli ia Iesu Keriso o le punavai o le malamalama uma.

Mo nisi manatu, e mafai ona e faaali atu se tasi o fautuaga o le vitio o loo i lalo.

Filifiliga o le vitio

O filifiliga nei o vitio e mafai ona faaaoga e fesoasoani ai i tagata aoga ia lagonaina le matagofie ma le mamalu o le lalolagi ma le lotofaafetai mo foafoaga a le Atua.

“O Le Foafoaga o le Lalolagi” (2:05)

“O Lo Tatou Aiga” (1:34)

“Lelei Ona Ola” (3:30)

“O Le Foafoaga” (5:14)

“Ua Sili Oe” (5:07)