“Kenese 1:26–27: ‘Na Faia e le Atua le Tagata i Lona Lava Faatusa,’” Tusi Lesona a le Faiaoga Seminare o le Feagaiga Tuai (2026)
“Kenese 1:26–27: ‘Na Faia e le Atua le Tagata i Lona Lava Faatusa,’” Tusi Lesona a le Faiaoga Seminare o le Feagaiga Tuai
Kenese 1–2; Mose 2–3; Aperaamo 4–5: Lesona 8
Kenese 1:26–27
“Na Faia e le Atua le Tagata i Lona Lava Faatusa”
I le vaitaimi lona ono o le foafoaga, na foafoaina ai e le Atua le tane ma le fafine. O i latou uma taitoatasi o i le lalolagi o se atalii po o se afafine faapelepele a ni matua faalelagi, ma o lea ua tofu ai ma se natura paia ma se taunuuga paia. O lenei lesona e mafai ona fesoasoani i tagata aoga ia lagonaina le taua o lo latou faasinomaga ma le gafatia o ni atalii ma ni afafine o ni matua faalelagi.
Sauniuniga a le tagata aoga: Valaaulia tagata aoga e tauloto pe toe faamanatu laina amata o autu o le Perisitua Arona ma mafaufau i le taua o faamatalaga taitasi:
Gaoioiga e ono Mafai ona Fai e Aoao Ai
Faasinomaga ma faailoga
Mafaufau e tusi se laina faasolo o taimi i le laupapa ma valaaulia tagata aoga e fatufatu ni a latou lava laina faasolo o taimi ia latou apitalaaga mo suesuega. O loo tuuina atu i lalo se faataitaiga o se laina faasolo o taimi.
Tusi se laina faalava e faasino i lou olaga ma faaigoa i ou faasinomaga eseese po o faalagiga sa ia te oe i le tuanai, taimi nei, pe o faamoemoe e mauaina i le lumanai. E mafai ona aofia ai “uo,” “tamaitiiti aoga,” po o se galuega po o se valaauga na e i ai. O se faataitaiga lenei:
-
O a ni faasinomaga po o faalagiga na e filifili e tuu i lau laina faasolo o taimi? Aisea?
-
O a ni auala e mafai ai e nei faasinomaga po o faalagiga ona aafia ai filifiliga e te faia?
Sa faamalamalama mai e Peresitene Russell M. Nelson le auala tatou te faaigoaina ai i tatou lava ma mafai ona tatou aafia ai.
O faailoga e mafai ona mālie ma faailoa ai lou lagolago mo le tele o soo se mea lelei. O le tele o faailoga o le a suia mo oe i le gasologa o taimi. Ma e le o faailoga uma e tutusa le taua. Ae afai e i ai soo se faailoga na te suitulagaina mea e sili ona taua e iloa ai oe, o taunuuga la e ono lamatia faaleagaga. (“Filifiliga mo le Faavavau” [faigalotu i le lalolagi atoa mo le autalavou matutua, Me 15, 2022), broadcasts.ChurchofJesusChrist.org.
-
O le a sou manatu e mafai faapefea e nisi o ta’uigoaga ona taofia faaleagaga nisi o faailoga?
Fanau a matua faalelagi
Faitau le Kenese 1:26–27 ma le faamatalaga lea mai le “O Le Aiga: O Se Folafolaga i le Lalolagi,” ma vaavaai mo malamalamaaga e mafai ona e aoaoina e uiga i lou faasinomaga faavavau.
O le Kenese 1:26–27 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala iloga ina ia mafai ona latou mauaina gofie.
O tagata uma—tane ma le fafine—ua faia i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi ma, i le avea ai o i latou faapea, ua tofu i latou taitoatasi ma se natura paia ma se taunuuga paia. O le itupa o se vaega taua lea o le tagata i lona mua’i olaga, olaga faitino ma lona faasinomaga e faavavau ma le faamoemoega. (“O Le Aiga: O Se Folafolaga i le Lalolagi,” ChurchofJesusChrist.org)
-
O a ni malamalamaaga na e maua e uiga i lou faasinomaga e faavavau?
O se tasi o upumoni atonu na faailoa mai e tagata aoga e faapea o i tatou o atalii ma afafine o ni matua faalelagi na faia, i lo laua faatusa. Afai latou te lei faia, valaaulia tagata aoga e tusi faalava le “Atalii/Afafine o le Atua” i a latou laina faasologa o taimi.
-
O le a sou manatu i le uiga o le faia i le faatusa o le Atua?
Na faasoa mai e Peresitene Thomas S. Monson (1927–2018) le malamalamaaga lenei e uiga i le faia i le faatusa o le Atua.
O loo i ai ni fofoga [taliga] o le Atua lo tatou Tama e faafofoga ai i a tatou talosaga. E i ai ni Ona fofoga [mata] e silasila mai ai i a tatou amioga. E i ai foi Lona fofoga [gutu] e fetalai mai ai ia i tatou. E i ai Lona fatu (loto) na te lagonaina ai le agalelei ma le alofa. E moni o Ia. O loo soifua o Ia. O i tatou o Lana fanau, na faia i lona faatusa. Tatou te foliga ia te ia ma e foliga o ia e pei o i tatou. (“Ua Ou Iloa O Lo’o Soifua Lo’u Faaola,” Ensign, Ape. 1990, 6)
-
Aisea e te manatu ai e taua le tuu o lou faasinomaga o se atalii/afafine o le Atua ia sili atu nai lo se isi lava faasinomaga o ia te oe?
Tuu atu i tagata aoga se taimi e mafaufau loloto ai i le taua o lo latou faasinomaga o ni fanau a le Atua i le taimi nei ia i latou. O le faia o lena mea e mafai ona valaaulia ai le Agaga Paia e molimau atu i le upumoni pe fesoasoani e saunia mafaufau ma loto o tagata aoga ina ia aoaoina.
-
O a ni mea faalavefau e mafai ona faigata ai ona talitonu pe manatua lou faasinomaga o se atalii/afafine o le Atua, na faia i Lona faatusa?
Mafaufau e tusi tali a tagata aoga i le fesili na tuuina atu muamua i luga o le laupapa. O tali e mafai ona i ai atonu o nisi tagata atonu e le malamalama pe aisea e taua ai le avea ma se atalii/afafine o le Atua, latou te tauivi e lagonaina le alofa o le Atua, pe faalavelaveina i latou e ni tagata faaletāua tele. Afai e i ai ni fesili a le vasega e uiga i le itupa, mulimuli i le faataitaiga a le Faaola a o e aoao atu Lana aoaoga faavae i se auala e aumaia ai le malamalama, faamoemoe, ma le faamalologa. Molimau atu e alofa le Atua i Ana fanau uma ma o le a fesoasoani i tagata aoga e faatautaia a latou fesili a o latou faaaogaina mataupu faavae o le mauaina o le malamalama faaleagaga.
Mo se manatu i le auala e fesoasoani ai i tagata aoga i fesili e uiga i le itupa, tagai i Gaoioiga Faaopoopo e Aoao ai.
Upu o tusitusiga paia ma perofeta
Tuu atu i tagata aoga le pepa e tufa atu ua faaulutalaina “O A’u o se Atalii/Afafine o le Atua.“ Valaaulia tagata aoga e saili musumusuga mai le Atua a o latou suesue e fesoasoani ia latou iloa le taua o lo latou faasinomaga paia. E faaopoopo atu i le pepa e tufa atu, e mafai ona e valaaulia tagata aoga e toe faamanatu aoaoga o loo maua i autu a Tamaitai Talavou ma le Perisitua Arona. E mafai ona faia e tagata a’oga ta’itoatasi po o i ni vaega toalaiti.
A uma ona suesue tagata aoga, e mafai ona e valaaulia i latou e faasoa mai mea na latou aoaoina i le vasega po o i ni vaega toalaiti. E mafai foi ona e faia ni fesili e pei o nei:
-
O le a se mea na e maua mai punaoa sa e suesueina sa taua ia te oe?
-
E mafai faapefea e le iloaina o lou faasinomaga o se atalii/afafine o le Atua ona aafia ai le ala e te vaai ai ia te oe lava ma isi?
-
Na faapefea e le malamalama i lou faasinomaga paia ma le gafatia ona aafia ai lou olaga?
Afai o le a manuia tagata aoga mai le vaai i se faataitaiga pe mafai faapefea e le iloaina o lo latou faasinomaga e faavavau ona aafia ai i latou, mafaufau e matamata i le “Tamomoe Agai Atu i le Malamalama” (17:34), o loo maua i le ChurchofJesusChrist.org, mai le faailo taimi 11:00 i le 15:19. I lenei vitio, na faasoa mai ai e Elder Peter M. Johnson o le Fitugafulu lona aafiaga i le aoaoina e faapea, o ia o se atalii/afafine o le Atua ma le faatosinaga a lena malamalama i lona olaga. A uma le vitio, e mafai ona e valaaulia ni nai tagata aoga e faasoa mai mea na faagaeetia ai i latou mai le savali a Elder Johnson.
Mafaufau i lou faasinomaga
Tuu atu i tamaiti aoga se taimi e toe manatunatu ai i mea ua latou aoaoina e uiga i lo latou faasinomaga ma le gafatia o ni afafine ma atalii o ni matua faalelagi. Valaaulia i latou e tusi ia latou api talaaga mo suesuega soo se uunaiga po o ni malamalamaaga ua latou maua latou te mananao e manatua. Mafaufau e faaiu i le usuina o le “O Au o se Atalii o le Atua” o se vasega, ona faasoa atu lea o lau molimau e uiga i le avea ai ma se atalii/afafine o le Atua.
Tauloto
Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma toefaamanatu i latou i lesona i le lumanai. O le fasifuaitau autu o le mau mo le Kenese 1:26–27 o le “Na foafoaina e le Atua le tagata i lona lava faatusa.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toefaamanatu o le Atamai i Aoaoga Faavae.”