O loo savavali alii talavou ma tamaitai talavou i Togalaau Fe’ilafi i le Navy Pier i Sikako. O loo i ai niu ma isi laau i tua atu.
Pe sa i ai ea se taimi na e lagonaina ai le faigata ona lotogatasi ma isi tagata o le Ekalesia? O le Au Paia i Roma na soifua i le taimi o Paulo na tupuga mai i ituaiga tupuaga ma aganuu eseese. E i ai taimi sa i ai ni feeseeseaiga ma fevesiaiga i va o le tasi ma le isi. I le tali atu, sa uunaia ai i latou e Paulo ina “ia loto gatasi le tasi i le isi” (Roma 12:16). O lenei lesona e mafai ona fesoasoani ia te oe e maua ai auala e faatupu atili ai le lotogatasi ma tagata o le Ekalesia a le Faaola.
Faailoaina o mataupu faavae. A iloa e tagata aoga faailoa mataupu faavae o le talalelei i tusitusiga paia, e mafai ona latou masani atili ai i upumoni o le a taitai atu ai i latou i le Faaola. O le faailoaina o mataupu faavae o le talalelei e manaomia ai taumafaiga ma faatinoga magafagafa. A o faailoa mai e tagata aoga nei mataupu faavae, toe ta’u atu i le manino ma le faigofie nei upumoni e fesoasoani ai i tagata aoga ia latou manatuaina i le lumanai.
Sauniuniga a le tagata aoga: Valaaulia tagata aoga e faitau le Mataupu Faavae ma Feagaiga 38:27 ma mafaufau pe aisea e finagalo ai le Alii ia lotogatasi tagata o Lana Ekalesia.
Gaoioiga e ono Mafai Ona Aoao Ai
E mafai ona tatou lotogatasi uma
Faasoa atu le tulaga faataitai lenei i le vasega, pe faasoa atu se isi tala po o se faataitaiga e faaalia ai se luitau taitutusa.
Na papatisoina Mika ma lona aiga i le tolu tausaga ua mavae. Sa umi se taimi mo le aiga o Mika e faamasani ai i se olaga fou o ni tagata o le Ekalesia, ae sa latou mauaina le lagolago malosi o fegalegaleaiga ma le taliaina mai tagata o le latou paranesi. Talu ai nei, na talia ai e le tamā o Mika se galuega fou, ma siitia atu ai lona aiga i se isi nofoaga. Sa auai Mika i le lotu ma gaoioiga a le autalavou i lana uarota fou mo ni nai vaiaso, ae sa faigata ona lagonaina le taliaina o ia iina. E foliga e agalelei le autalavou, ae o le toatele o i latou e pei ua leva ona avea ai ma tagata o le Ekalesia, ma sa taumate Mika pe faamata latou te faamasinoina o ia ona o ni ona faaletonu ma lona le masani lelei i le Ekalesia.
O le a se fautuaga e te avatu ia Mika e fesoasoani ai ia te ia i lenei tulaga?
O le a se fautuaga e te tuuina atu i le autalavou i le uarota fou a Mika?
Na tusi atu e Paulo lana tusi i tagata o le ekalesia i Roma i se taimi na amata ai ona tapuai faatasi tagata o le Ekalesia mai tapuaiga ma talaaga faaleaganuu eseese. Sa i ai taimi na feeseeseai ai nei Au Paia o le tasi ma le isi po o le faamasinoina le tonu o isi tagata o le Ekalesia e ese a latou filifiliga mai ia i latou. O se tasi o lesona e mafai ona tatou aoao mai i aoaoga a Paulo i le Roma 12–15 e faapea e ui ina i ai ia i tatou uma ni eseesega, e mafai e tagata o le Ekalesia ona taumafai ia lotogatasi e ala i aoaoga a Iesu Keriso.
O le a se mea e faigata ai ona lagona le lotogatasi ma isi tagata o le Ekalesia?
Valaaulia tagata aoga e mafaufau i a latou sauniuniga mo le vasega a o lei tuuina atu le isi fesili. Atonu e fesoasoani foi le tuu atu ia i latou e faitau leotele le Mataupu Faavae ma Feagaiga 38:27 .
Aisea e te manatu e taua ai i le Alii le lotogatasi o tagata o Lana Ekalesia?
Mafaufau pe o le a sou lagona e uiga i lou fesootai ma tagata o lau uarota po o le paranesi, o au uo i le seminare, po o isi tagata o le Ekalesia. I le taimi o lenei lesona, mafaufau pe mafai faapefea ona e lotogatasi atili ma isi tagata o le Ekalesia a le Faaola.
O aoaoga a Paulo e uiga i le lotogatasi
Faaali atu seti o fuaiupu nei mo tagata aoga e suesue i ai. Atonu e fesoasoani le atofa o seti taitasi o fuaiupu i se vaega toaitiiti o tagata aoga.
Ina ia fesoasoani i tagata aoga e teuloto atili mea o loo latou suesueina, mafaufau e valaaulia i latou e filifili se fuaiupu se tasi po o se fasifuaitau ma fatu se ata faatusatusa e faailoa ai le mea o loo aoao mai e lena fuaiupu. Mo se faataitaiga, e mafai e tagata aoga ona tusi se ata pe fai se tuufaatasiga o ata e faatusa i ai le fuaiupu.
Valaaulia tagata aoga e faasoa mai mea na latou aoaoina mai i a latou suesuega. Afai na fatuina e tagata aoga se ata faatusatusa, valaaulia i latou e faasoa atu i isi. Faaaoga fesili e pei o nei e fai ai se talanoaga anoa e uiga i le lotogatasi.
O le a se mea na e aoaoina mai fuaiupu na e suesueina e mafai ona fesoasoani ia te oe ia faatupuina ai le lotogatasi ma isi?
E mafai faapefea e le faia o taumafaiga ina ia lotogatasi ma isi ona fesoasoani ia i tatou ia avea atili ai e faapei o Iesu Keriso?
O a ni aafiaga mai lou olaga po o olaga o isi ua faaalia ai ia te oe le taua o le lotogatasi ma isi tagata o le Ekalesia?
Mafaufau e matamata i le vitio “A Friend to All” (4:01), e maua i le ChurchofJesusChrist.org. I lenei vitio, na faamatalaina ai e Elder Ulisses Soares o le Korama a Aposetolo e Toasefululua nisi o aafiaga na oo i lona aiga a o avea i latou ma tagata fou o le Ekalesia. A o e matamata, mafaufau pe faapefea ona faatupu atili lou lagolago ma faauo atu i tagata o le Ekalesia.
O le a se mea sa tulaga ese ia te oe mai le savali a Elder Soares? Aisea?
Faaaoga mea ua e aoaoina
Mafaufau i mea ua e aoaoina ma lagonaina e uiga i le lotogatasi a o e suesue ai i le aso. Faaaoga sina taimi e fai ai se fuafuaga e uiga i le auala o le a e faaaofiaina ai nei aoaoga i lou olaga. Tusi i lalo se sini e uiga i le auala o le a e taumafai ai mo le lotogatasi i se tasi pe sili atu o tulaga nei:
Faatasi ai ma tagata o lau vasega a Tamaitai Talavou po o le korama a le perisitua
Faatasi ai ma tagata o lau vasega seminare
Faatasi ai ma isi tagata o lau uarota po o le paranesi
E ono mafai foi ona fesoasoani le tusi i lalo o soʻo se faalavelave e te lua feagai i le ausiaina o lau sini. E mafai faapefea ona e faatoilaloina na faalavefau? E mafai faapefea ona fesoasoani le Alii?
Valaaulia ni nai volenitia e faasoa mai a latou fuafuaga i le vasega. Vaavaai mo ni auala e avatu ai le faamalo ia i latou mo o latou manatu, ma uunaia tagata aoga e tulitatao a latou fuafuaga. Molimau atu e uiga i upumoni sa talanoaina i lenei aso.
Manatu ma Talaaga o Faamatalaga
O le a se mea e mafai ona tatou aoaoina mai luitau na feagai ma le Ekalesia i Roma i le taimi o Paulo?
Na faamalamalama mai e Elder Quentin L. Cook o le Korama a Aposetolo e Toasefululua:
Ata
Atatosi Aloaia o Elder Quentin L. Cook. Valaauina i le Korama a Aposetolo e Toasefululua i le aso 6 Oketopa 2007.
O la tatou aganuu Faale-Ekalesia e afua mai i le talalelei a Iesu Keriso. O le Tusi a le Aposetolo o Paulo i Tagata Roma e maoae. …
… Ua apoapoai atu Paulo i tagata Iutaia ma Nuu Ese ina ia tausi poloaiga ma alofa le tasi i le isi ma tautino atu o lena amiotonu e taitai atu ai i le faaolataga.
O le aganuu a le talalelei a Iesu Keriso e le o se aganuu a tagata Nuu Ese po o se aganuu faaIutaia. E le fuaina i le lanu o le pa’u o se tagata po o le mea e nofo ai se tagata. A o tatou olioli ai i aganuu mavaevae, e tatau ona tatou lafoai vaega o na aganuu e feteenai ma le talalelei a Iesu Keriso.
O le a se mea e ono tupu a o tatou faia ni taumafaiga e avea ma tagata lotogatasi o le Ekalesia a le Faaola?
Sa aoao mai Elder Jorge T. Becerra o le Fitugafulu:
Ata
Atatosi aloaia o Elder Jorge T. Becerra, o le Korama Muamua a Fitugafulu.
I uarota ma paranesi taitasi tatou te manaomia tagata uma—o i latou atonu e malolosi ma i latou atonu o feagai ma faigata. E manaomia tagata uma i le faagaeetiaina taua o le “tino [atoa] o Keriso.” E tele taimi ou te tomanatu ai po o ai e le o i ai ia tatou faalapotopotoga eseese o le a latou faamalolosia i tatou ma faaatoatoaina ai i tatou.
Na faasoa mai e Sister Sharon Eubank o le Au Peresitene Aoao o le Aualofa le tala lenei:
Ata
Atatosi Aloaia o Sister Sharon Eubank. Na pueina i le 2017.
I le 1842, sa galulue malosi ai le Au Paia e fausia le Malumalu o Navu. Ina ua uma ona faavae le Aualofa ia Mati, sa tele ina sau le Perofeta o Iosefa Samita ia latou fonotaga e sauniuni ai i latou mo feagaiga paia, soofaatasi e le o toe mamao ona latou osia lea i le malumalu.
I le aso 9 o Iuni, sa “saunoa le Perofeta o le a ia talai atu le alofa mutimutivale[.] Pe a faapea ua teena e Iesu Keriso ma agelu ia i tatou ona o mea iti ma le faatauvaa, faamata o le a le mea o le a tupu ia i tatou? E tatau ona tatou alolofa mutimutivale ma faatuatuanai i mea iti.” Na faaauau le saunoaga a Peresitene Samita, “O se mea ou te faanoanoa ai o le leai o se mafutaga tele—afai e mafatia se tagata e toatasi e lagona e tagata uma—o le soofaatasi o lagona tatou te maua ai le mana o le Atua” [“Minutes and Discourse, 9 June 1842,” 61, Joseph Smith Papers] .
O lena fuaiupu itiiti na taia ai a’u e pei o se uila emo. O le soofaatasi o lagona tatou te maua ai le mana o le Atua. O lenei lalolagi ua le o le tulaga ou te manao ia i ai. E tele mea ou te manao e faaaafia ma faaleleia atili. Ma o le mea moni, e tele naua mea faafeagai i mea ou te faamoemoe i ai, ma o nisi taimi ou te lagona ai le faavaivai. Talu ai nei, sa ou faia ai ni fesili sailiili: E mafai faapefea ona ou malamalama atili i tagata o loo matou fegalegaleai? siomia ai au? E faapefea ona ou fatuina lena “soofaatasi o lagona” ae e matou te matua eseese i soo se tulaga? O le a se mana mai le Atua e mafai ona ou maua pe afai ou te soofaatasi teisi ai ma isi?
“To Love Them All” (3:22), e maua i le ChurchofJesusChrist.org. Na saunoa Elder Patrick Kearon o le Au Peresitene o Fitugafulu e uiga i le faaaofia ma faauoga i le Ekalesia.
“Till We All Come in the Unity of the Faith” (2:21), e maua i le ChurchofJesusChrist.org. Ua saunoa Brother Ahmad S. Corbitt o le Au Peresitene Aoao o Alii Talavou e uiga i le faatupulaia o ituaiga o tagata eseese o loo i ai i le Ekalesia.
Gaoioiga Faaopoopo e Aoao Ai
Ua faamoemoe le Atua e tuuto o tatou ola mo Ia ma ia taofia le taufaamasani atu i le lalolagi
Ina ia aoao atu lenei upumoni o loo maua i le Roma 12:1–2, aumai i le vasega ni koneteina se lua e eseese foliga ma se ipu vai. Liligi le vai mai le tasi koneteina i le isi, faasino atu le auala o loo faafetaui ai le vai i le foliga o le koneteina.
Faamatala faapea i le faataitaiga lea, o le vai e faatusa i tagata, ma o koneteina e faatusa i talitonuga ma faiga eseese a le lalolagi. Valaaulia tagata aoga e tali mai i le fesili lenei: “O a ni tulaga matautia e mafai ona oo mai i le faaauau pea ona faamasani atu i talitonuga ma faiga faalelalolagi?”
O le isi amataga mo le lesona: lesona faatino o le salu
Aumai se salu i le vasega pe faaali atu se ata o se salu.
Ata
O se salu i se potu i Cove Fort, Iuta.
Fai se talanoaga e uiga i le lelei o le faaaogaina o se salu e faamama ai se fola o le fale. O le a le mea e tupu pe a e taumafai e faamama i se tuaniu e tasi? Valaaulia tagata aoga e mafaufau i le faatatauga o le tele o tuaniu o le salu ua fusia faatasi e mafai ona fesoasoani tatou te malamalama ai e uiga i le lotogatasi.
