Resurrected Christ with arms outstretched stands above a throng of people of all races and times, some prone, some standing. The people on the right side of Christ are in the attitude of worship. The people on the left side of Christ are in anguish. Scenes of ruin are in the foreground and background. The Washington D.C. temple is pictured in the upper left corner.
Pe na i ai se taimi na e mafaufau ai pe o le a faape’i le Faamasinoga Mulimuli? Na valoia e le Aposetolo o Ioane lena aso tele. O lenei lesona ua faamoemoe e fesoasoani e te malamalama atili ai i le Faamasinoga Mulimuli ma saunia ai ia maua se aafiaga matagofie o le tulai ai i luma o Iesu Keriso i lena aso.
Mataituina o lagona o tagata aoga. Ia nofouta i tagata aoga o e atonu o loo lagona le popole a o talanoaina ni upumoni patino o le talalelei. I le gasologa o le lesona, saili ni auala e faamautinoa atu ai ia i latou le alofa ma le agaalofa o le Tama Faalelagi ma Iesu Keriso.
Sauniuniga a le tagata aoga: Valaaulia tagata aoga e faitau le Faaaliga 20:12 ma o mai saunia i le vasega ma ni a latou fesili o i ai e uiga i le Faamasinoga Mulimuli.
Gaoioiga E Ono Mafai Ona Aoao Ai
O Le Faamasinoga Mulimuli
Mafaufau e faaali atu le ata i le amataga o le lesona.
O le a sau vaai faalemafaufau i lagona o tagata eseese i le Faamasinoga Mulimuli? Aisea?
O le a sou manatu o le a le mea e filimaoti i ai le saunia o se tasi mo lena aso?
O a ni auala ua ofo mai e Iesu Keriso e fesoasoani ai ia i tatou e saunia mo lena aso?
I lau api faamaumau mo suesuega, tusi ai mea ua e faamoemoe e te mafaufau i ai ma lagona i le taimi e te tu ai i luma o le Atua ina ia faamasinoina. O a ni ou lagona e tusa ai ma lou saunia lelei?E alolofa le Tama Faalelagi ma Iesu Keriso ia i tatou ma e finagalo ia faatumulia i tatou i le filemu ma le olioli i le Aso o le Faamasinoga. La te saunoa mai ia i tatou e ala mai i tusitusiga paia ma e ala mai i taitai o le Ekalesia i ona po nei e aoao i tatou pe o le a faape’i le Faamasinoga ma pe faapefea ona saunia i ai.
Ina ua uma ona vaai i se faaaliga o le Meleniuma (tagai i le Faaaliga 20:1–3) ma le Toetutu o e amiotonu (tagai i le Faaaliga 20:4–6), sa vaai Ioane i le Faamasinoga Mulimuli. Faitau le Faaaliga 20:11–12 , ma vaavaai mo mea na faaali mai e le Atua i le Aposetolo o Ioane e uiga i le Faamasinoga Mulimuli.
O a upumoni na e aoaoina mai ia Ioane e uiga i le Faamasinoga Mulimuli?
O se tasi o upumoni e mafai ona tatou aoao mai i lenei fuaitau e faapea, o le a faamasinoina i tatou e le Atua mai tusi na tusia e tusa ai ma a tatou galuega.
O Fesili e uiga i le Faamasinoga Mulimuli
I lau api faamaumau mo suesuega, tusi i lalo ni au fesili e uiga i lenei fuaitau po o isi mea e te manao e malamalama atili i ai e uiga i le Faamasinoga Mulimuli.
Mafaufau e valaaulia tagata aoga e faasoa mai ni isi o a latou fesili i le vasega.
Faaalu ni nai minute e saili ai mo ni tali i au fesili. Atonu e te filifili e saili mo upu autu i le Taiala i Autu po o le Taiala i Tusitusiga Paia, po o le Lomifefiloi o le Tusi Paia. Pe e mafai foi ona e saili i luga o le ChurchofJesusChrist.org po o le polokalama o le Potutusi o le Talalelei. O ni isi nei o fesili ma punaoa fautuaina e mafai ona e faaaofia i lau suesuega:
A o suesue tagata aoga, mafaufau e savalivali solo i le potu ma vaavaai mo i latou atonu o manaomia le fesoasoani. Afai e aoga, mafaufau e suesue lemu mo sina taimi ma se tagata aoga e toatasi pe toalua ma faasoa i soo se faamatalaga aoga o loo maua i le vaega o le “Tala Auiliili ma Faamatalaga o Talaaga” o le lesona.
Faamalosiau i tagata aoga e tusi mea ua latou aoaoina i a latou api faamaumau mo suesuega po o i totonu o a latou tusitusiga paia i autafa o le Faaaliga 20:12 . Atonu foi latou te mananao e tusifaamaumau i a latou tusitusiga paia ia fesili ma punaoa e fesoasoani e tali ai na fesili.
Mo ni faiga faaeseese, o fesili nei e fa e mafai ona faaalia i vaega eseese o le potu faatasi ai ma punaoa fautuaina o loo lisi atu i lalo o fesili taitasi. Ona mafai lea e tagata aoga ona faapotopoto atu i le fesili latou te filifilia ma suesue i ai faatasi ma tagata o le vasega. I se isi foi faiga, o fesili taitasi e fa e mafai ona tusia i luga o se teutusi faatasi ai ma se fasipepa e tuu i totonu o loo tusia ai punaoa [fautuaina]. O nei teutusi e mafai ona tuu i luma o le potu. E mafai e tagata aoga ona filifili se teutusi ma se fesili latou te fia iloa, suesue i ai e faaaoga ai punaoa fautuaina o loo i totonu, ona toe faafoi lea o le teutusi ma filifili se isi teutusi e ese . (Atonu e manaomia le saunia o ni teutusi se tele mo fesili taitasi.)
1. O a ni isi o tusi na vaai Ioane o faaaoga e le Alii e faamasino ai?
Valaaulia ni tagata aoga e faasoa mai i le vasega ni mea na latou aoaoina. O ni isi o fesili nei e mafai ona faaaoga e fesoasoani e amata ai se talanoaga.
O le a se mea sa e aoaoina e uiga i le Faamasinoga Mulimuli?
E mafai faapefea e le malamalama ma le talitonu i lenei aoaoga faavae ona aafia ai a tatou faatinoga?
O le fea o uiga o le Faaola e fesoasoani ia te oe e te faatuatuaina ai o Ia e avea o lou Faamasino? E mafai faapefea ona Ia fesoasoani ia te oe e saunia mo le Faamasinoga Mulimuli?
O lau tusi o le ola
Toe faitau le Faaaliga 20:12 ma mafaufau e faailoga le fasifuaitau “o le tusi o le ola.” I se tasi itu, o le tusi o le ola o se faamaumauga o olaga o tagata taitoatasi.
Mo le gaoioiga lenei, mafaufau e tusi se faataitaiga i luga o le laupapa o se faasinoala mo tagata aoga.
Afai o faaaoga e tagata aoga ni itulau taapeape nai lo o a latou api faamaumau mo suesuega, e mafai ona latou gaulua tutusa a latou pepa ina ia sili atu ai ona foliga i se tusi. Ona mafai lea ona latou faaigoaina le faavaa i fafo “O La’u Tusi o le Ola.”
Tusi le ulutala “O La’u Tusi o le Ola” i le pito i luga o se itulau avanoa i lau api faamaumau mo suesuega, ona vaevae lea o le itulau i ni koluma se lua. Faaigoa le koluma agavale “Ua ou fiafia sa ou faia,” ma fai se lisi i lena koluma o mea patino e te faafetai ai i le i ai i lau tusi o le olaga. O lenei mea e mafai ona aofia ai:
Sauniga ua e mauaina.
O galuega lelei ua e faia.
O ou manaoga amiotonu.
O le atinaaega o lau sootaga ma Iesu Keriso.
Vaai faalemafaufau i le logolelei o le a i ai se aso e toe faamanatu ai e le Faaola faatasi ma oe le talafaamaumau o lou amiotonu!
Faaigoa nei loa le koluma taumatau o le itulau “O le a ou manao e.” Tusi i lalo pe mafaufau loloto i galuega amiotonu ma sauniga e te manao e faaopoopo i lau tusi a o lei oo i le Faamasinoga. Ia aofia ai foi filifiliga ma uiga e te manao e tapeese mai le tusi o le ola e ala i le Togiola a Iesu Keriso.
Ua faia e le Faaola ia mafai ona fetuunai mea ua faamaumauina e uiga ia te oe i le tusi o le ola. Faitau i le Mataupu Faavae ma Feagaiga 58:42–43 i folafolaga na Ia faia ia i latou o e salamo faamaoni.
E faapefea e nei folafolaga ona aafia ai ou lagona e uiga i le Faamasinoga Mulimuli ma e uiga i lo tatou Faamasino?
Sa saunoa mai Peresitene Dieter F. Uchtdorf, a o i ai i le Au Peresitene Sili:
Ata
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
O le Aso o le Faamasinoga o le a avea ma se aso o le alofa mutimutivale ma le alofa—o se aso e faamaloloina ai loto nutimomoia, o le a suia ai loimata faanoanoa i loimata o le lotofaafetai, o le taimi o le a faia ai mea uma ia tonu.
Ioe, o le a i ai le faanoanoa matuitui ona o le agasala. Ioe, o le a i ai faanoanoaga e oo foi i le tiga ona o o tatou masei, lo tatou valea, ma lo tatou lotomaaa na mafua ai ona tatou le mauaina o avanoa mo se lumanai matua sili atu ona lelei.
Ae e ia te a’u le mautinoaga o le a le gata ina faamalieina i tatou i le faamasinoga a le Atua; ae o le a tatou ofo ma maofa foi i Lona alofa tunoa le i’u, alofa mutimutivale, agalelei ma le alofa mo i tatou, o Lana fanau.
Mafaufau loloto i mea ua musuia oe e fai e saunia ai e tulai i luma o le Faaola i le Aso o le Faamasinoga.
Molimau atu o le Faamasinoga Mulimuli o le a avea ma se aafiaga ofoofogia mo i latou uma o e salamo i a latou agasala ma taumafai pea e faateleina lo latou faatuatua i le Faaola.
Tala Auiliili ma Faamatalaga o Talaaga
Gaoioiga Faaopoopo e Aoao Ai
O Iesu Keriso o le Faamasino atoatoa
Ina ia fesoasoani i tagata aoga ia iloa o faamasinoga faaiu o tagata taitoatasi e tatau ona tuu atu ia Iesu Keriso, valaaulia le vasega e fatu ni nai faamatalaga auiliili o se olaga o se tagata faatalafatu. O faamatalaga auiliilie ono aofia ai valaauga o le Ekalesia na latou umia, o le lelei o lo latou olaga a’oga, o o latou uiga, ma ni isi o o latou malosiaga ma vaivaiga.
Ona fesili atu lea i tagata aoga pe latou te lagonaina le toamalie e filifili ai po o le a le malo o le mamalu e tatau ona alu i ai lenei tagata faatalafatu. Fesili atu po o le a se isi mea e manaomia ona latou iloa e faia ai se faamasinoga amiotonu.
Valaaulia tagata aoga e talanoaina mea ua silafia e le Faaola e uiga ia i tatou lea e mafai ai e Ia ona faia se faamasinoga amiotonu e uiga i o tatou olaga. Fesili atu pe aisea latou te faafetai ai i le iloaina ai o le a avea o Ia ma o latou Faamasino patino.
O le a saisaitia Satani i le taimi o le Meleniuma
Mafaufau e faaali atu se filifili po o se ata o se filifili. Fai atu i tagata aoga e faitau le Faaaliga 20:1–3 , ma vaavaai mo tali i fesili nei:
O ai o loo noatia i se filifili i nei fuaiupu?
O le a le umi o le a saisaitia ai o ia?
O le a se mea o le a le toe mafai ona ia faia?
Valaaulia tagata aoga e faitau le 1 Nifae 22:26 e vaai ai i se tasi o mafuaaga o le a saisaitia ai Satani.
Na aoao mai e Peresitene Spencer W. Kimball (1895–1985) “pe a saisaitia Satani i se aiga se tasi—pe a saisaitia Satani i se olaga se tasi—ua amatalia le Meleniuma i lena aiga, i lena olaga” (O Aoaoga a Spencer W. Kimball, ed. Edward L. Kimball [1982], 172).
Valaaulia tagata aoga e faitau le Alema 48:11–13, 17 e vaai ai i se faataitaiga o se tagata amiotonu ua uma ona ia “saisaitia” faatosinaga a Satani i lona olaga.
Valaaulia tagata aoga e mafaufau loloto pe mafai faapefea ona latou liliu atu i le Alii ma faaitiitia faatosinaga a Satani i o latou olaga.