Iloilo Lou Aoaoina 12

Faaaliga 1–22

Ata

A young woman reads and studies the scriptures. She has the Book of Mormon in both Spanish and English, and a Holy Bible on a table.

O lenei lesona ua faamoemoe e fesoasoani ia te oe e iloilo ai sini ua e faatuina, ma le tuputupu ae patino na e mauaina i le taimi o au suesuega o le Feagaiga Fou.

Fesoasoani i tagata aoga e iloilo lo latou aoaoina. Tuu atu i tagata aoga avanoa e iloilo ai lo latou aoaoina. O se tasi o auala o le valaaulia lea o i latou e faasoa mai pe na faapefea ona latou tuputupu ae pe atiina ae i le avea ai o se taunuuga o a latou suesuega ma le faatuatua.

Sauniuniga a le tagata aoga: A o faamaea e tagata aoga a latou suesuega o le Feagaiga Fou, valaaulia i latou e fai se lisi o le tolu i le lima o fuaitau o mau e pito sili ona aoga sa latou suesueina i lenei tausaga.

Gaoioiga E Ono Mafai Ona Aoao Ai

O lenei lesona ua faamoemoe e fesoasoani i tagata aoga e iloilo ai lo latou tomai e faamalamalama atu aoaoga i le Feagaiga Fou, o sini ua latou faatuina, po o le auala ua suia ai o latou uiga faaalia, manaoga, ma le gafatia e ola ai i le talalelei. Afai na faamamafaina ni upumoni eseese i le vasega, e mafai ona fetuunai gaoioiga nei e faaaofia ai na aoaoga.

Mafaufau e amata le vasega i se molimau patino e uiga i le tuputupu ae ma le olioli na oo i ai e ala i le suesueina ma le aoaoina atu o le Feagaiga Fou.

O lou alualu i luma faaletagata lava ia

I lenei lesona o le a e maua ai le avanoa e iloilo ai lou aoaoina ma le auala na e faaaogaina ai mataupu faavae o loo aoaoina i le Faaaliga 1–22. O le a e toe iloiloina foi ma fuaina lou tuputupu ae i nai masina ua tuanai a o e suesueina le Galuega–Faaaliga. O gaoioiga nei e aoao ai e mafai ona fesoasoani ia te oe e iloa ai pe na faapefea ona faateleina lou alofa mo le Tama Faalelagi ma Iesu Keriso ma le ala ua avea atili ai oe e pei o i Laua.

O le tusi o Faaaliga

E mafai e tagata aoga ona iloilo e ala i le faasoa atu i se paga po o le tusi i luga o le laupapa ia se upumoni na latou maua e anoa. E mafai foi e tagata aoga ona faataamilo i le potu e faasoa atu i tagata eseese o le vasega.

Faaalu ni nai minute e iloilo ai soo se mau atonu na e makaina, faamatalaga i au tusitusiga paia, po o tusiga i api faamaumau na e faia e avea ma se vaega o lau suesuega o le tusi o Faaaliga.

O a ni isi o mea e te manatua na e aoaoina pe lagonaina a o e suesueina le tusi o Faaaliga?
O le a se mea na e aoaoina e uiga i lou Faaola o Iesu Keriso mai le tusi o Faaaliga?
O a ni isi o upumoni na e lagona le musuia e faatino o se vaega o au suesuega?

Mafaufau e lolomi pe faaali atu gaoioiga nei ma tuu atu i tagata aoga e filifili po o le fea o gaoioiga latou te mananao e galulue ai taitoatasi pe ma se paga.

O ni isi tagata aoga atonu e i ai se taimi faigata e iloilo ai pe faasoaina atu ni lagona patino e uiga i le tapuai ma le molimau. Tuu atu i tagata aoga ni avanoa e faasoa atu ai ma le loto i ai, ae ia mautinoa e aloaia lo latou faitalia.

A uma, valaaulia ni volenitia e faasoa mai ni isi o manatu ma lagona na latou maua a o latou taliina ia fesili. Ia mautinoa e uunaia tagata aoga e faaauau pea ona galulue i le loloto o a latou tapuaiga patino ma le malosi o a latou molimau ia Iesu Keriso. Mafaufau e tuuina atu se molimau patino i le pogai e taua ai le tapuai ma molimau a tagata taitoatasi i lo tatou atinaega faaleagaga.

Gaoioiga A: Tapuai ma mulimuli i le Atua ma le faamaoni

I le Faaaliga 4 – 5 , atonu na e suesueina se vaega o le faaaliga a Ioane lea na ia vaai ai i le nofoalii o le Atua faatasi ma tagata eseese ma manu faafaatusa o loo tapuai i le Tama Faalelagi ma Iesu Keriso. Atonu na valaaulia oe e mafaufau loloto pe faapefea ona e avatu le viiga i le Tama Faalelagi ma Iesu Keriso ma mafaufau i auala e mafai ona e faaleleia ai lau tapuaiga patino.

O le a se mea na e aoaoina talu ai nei pe lagonaina e uiga i le Tama Faalelagi po o Iesu Keriso ua faaosofia ai oe e te manao e tapuai atu ia i Laua?
O a ni taumafaiga ua e faia e faaleleia atili ai lau tapuaiga? Mo se faataitaiga, atonu na e saili e faaloloto lau tapuaiga e ala i le tatalo, suesue i tusitusiga paia, ai ma inu i le faamanatuga, faamamaluina o le aso Sapati, anapogi, auai i le malumalu, po o se isi auala.
Ua faapefea e nei taumafaiga ona aafia ai lou sootaga ma le Tama Faalelagi ma Iesu Keriso?

Gaoioiga E: Tetee ma faatoilalo le leaga i le faatuatua ia Keriso

O le gaoioiga lenei e mafai ona suia e iloilo ai le alualu i luma i le faatoilaloina o le lalolagi, lea sa aoaoina i le lesona “Faaaliga 2–3, Vaega 2.”

I le Faaaliga 12 – 13 , atonu na e aoao ai e faapea i le muai olaga sa tatou faaaoga uma ai lo tatou faatuatua ia Iesu Keriso e faatoilalo ai Satani. Atonu na valaaulia oe e mafaufau loloto i lou talitonuga i nei aoaoga ma mafaufau i mea e mafai ona e faia e faaauau ai ona tuu atu lou faatuatuaga ia Iesu Keriso a o tatou tau ai ma le fili iinei i le olaga faaletino.

O a ni faatinoga na e lagona e tatau ona e faia pe a uma lau suesuega?
O a ni papupuni po o ni luitau na e fetaiai ai i le faia o na faatinoga? O a ni manuia na e mauaina?
Na faapefea e le faia o nei laasaga ona fesoasoani ia te oe e latalata atili ai ia Iesu Keriso pe maua ai le malosi mai ia te Ia e faatoilalo ai Satani?

O le Feagaiga Fou: Galuega–Faaaliga

Afai sa faaaoga le sauniuniga a le tagata aoga, mafaufau e valaaulia ni nai tagata aoga e faasoa mai fuaitau o mau na latou filifilia ma faamatala pe aisea na latou filifilia ai. Tusi i luga o le laupapa ia tusi faasino o mau latou te faasoa mai ina ia mafai ona faaaoga e isi i le gaoioiga lenei.

O le ata ma parakalafa nei e ono mafai ona fesoasoani e faailoa atu ai le gaoioiga tusitusi o le tusiga.

Ata

Paul speaking to King Agrippa.

Atonu e te manatua ina ua uma ona faalogo i le molimau a Paulo ia Iesu Keriso, sa fai mai le Tupu o Akeripa, “O se mea itiiti ona e faaliliuina lea o a’u e fai ma Kerisiano.” Sa tali atu Paulo ma le lototoa, “Ou te aioi atu lava i le Atua, ia le o se mea itiiti, po o se mea tele, a ia pei o a’u nei [o se Kerisiano], e le na o oe, a e atoa foi ma e o faafofoga mai uma lava ia te au i lenei aso” ( Galuega 26:28–29).

Sa i ai ia Paulo ma isi Aposetolo le manao loloto e aumai isi ia Keriso e ala i a latou aoaoga ma molimau. O le toatele o i latou na tuuina atu o latou ola ma maliliu ai o ni maturo mo le faamoemoe o Keriso, ma tuua ai a latou aoaoga i le tusi o Galuega ma Tusi. E faamoemoe ua e valaauliaina na molimau i lou loto ma faaaoga a latou aoaoga i lou lava olaga. O lou taimi lenei e aoao atu ai ma molimau atu.

Tusi sau oe lava tusi e faatatau i soo se tasi e te filifilia. Mo se faataitaiga, e mafai ona e tusi ia te oe lava i se tausaga talu ai a o lei suesueina le Feagaiga Fou, i se uo e le malamalama pe aisea e te auai ai i le seminare, po o se tagata o le aiga e mafai ona faamanuiaina mai lau molimau i le Faaola.

E tusa lava po o ai e te filifili e te tusi i ai, ia aofia ai se fuaiupu se tasi pe sili atu mai le Galuega–Faaaliga, faatasi ai ma le ala ua faamanuiaina ai lou olaga e upumoni mai nei fuaiupu. O fesili nei e mafai ona fesoasoani e taiala ai oe, ae e mafai ona e filifili mo oe lava po o le a le mea e te tusi e uiga i ai.

Na faapefea ona fesoasoani mea sa e suesueina e te sau ai ia Keriso ma maua ai le filemu ia te Ia?
Na faapefea e mea na e suesueina ona fesoasoani ia te oe e teena pe faatoilalo le leaga i le faatuatua ia Iesu Keriso?
Na faapefea ona fesoasoani mea sa e suesueina e tali ai se fesili pe foia ai se popolega po o se faafitauli?
O le a se isi mea e te manao ia iloa e se tasi e uunaia ai i latou e suesue i le Feagaiga Fou ma o mai ia Keriso?

A maea loa tusitusiga a tagata aoga, valaaulia ni volenitia e faitau a latou tusi i le vasega. Gauai atu i le auala latou te faailoa atu ai lo latou lotofaafetai ma molimau i a latou tusi. Faafetai i tagata aoga mo mea na latou tusia ma faasoa mai. Valaaulia i latou e mafaufau e faasoa atu la latou tusi i se tasi i fafo atu o le vasega ma ia faaauau pea ona suesue i upu a perofeta i o latou olaga atoa.

Molimau atu i le Faaola, Lana afioga i tusitusiga paia, ma Lana galuega e ala mai i Ana auauna filifilia.