“Na A’u Iloa Foi Le Tasi Agelu …, Ua Ia Te Ia Le Talalelei E Faavavau”
Ata
The Melbourne Australia Temple angel Moroni.
Mafaufau e uiga i le Afio Mai Faalua o Iesu Keriso. E faapefea ona fesoasoani Le Ekalesia a Iesu Keriso o le Au Paia o Aso e Gata Ai ia te oe ia malamalama ma saunia i ai? Na valoia e le Aposetolo o Ioane mea o le a tutupu o le a avea ma se faatomuaga i le Afio Mai Faalua manumalo o le Faaola, e aofia ai le Toefuataiga o Lana Ekalesia ma le tuueseeseina o e amiotonu mai e amioleaga. O lenei lesona ua faamoemoe e fesoasoani ia te oe e malamalama ai i le ala e mafai ai e le Faaola ma Lana Ekalesia toefuataiina ona fesoasoani i le lalolagi—e aofia ai ma oe—ia saunia mo Lona Afio Mai Faalua.
O le aoao atu ma le afioga a le Atua. I soo se avanoa lava, ia uunaia tagata aoga e liliu atu i tusitusiga paia ma upu a perofeta mo se taitaiga, tali i fesili, ma le lagolago. A o faia ai e tagata aoga lenei mea, “o afioga a Keriso o le a taʼu mai ai ia i [latou] mea uma e tatau ona [latou] faia” ( 2 Nifae 32:3).
Sauniuniga a le tagata aoga: Valaaulia tagata aoga e fai se lisi o ni mea se tolu pe fa ua latou lagona o ni faamoemoega aupito sili ona taua O Le Ekalesia a Iesu Keriso o le Au Paia o Aso e Gata Ai.
Gaoioiga E Ono Mafai Ona Aoao Ai
O le faamoemoega o le Ekalesia
O le gaoioiga lenei e mafai ona avea o se tala faatino, e fai o se vasega po o ni vaega toalaiti.
Vaai faalemafaufau i [lou] i ai i se vasega i le aoga ae lagā ae ai le autu o tapuaiga faatulagaina. Ua fai se tala a se tagata o le vasega faapea, ua itiiti ma toalaiti tagata o ua iai pe auai atu i se lotu ona ua latou lagona ua le o i ai se faamoemoega moni o lotu. O lenei manatu faaalia ua mafua ai ona e mafaufau e uiga i faamoemoega uma o loo iai i Le Ekalesia a Iesu Keriso o le Au Paia o Aso e Gata Ai.
O a ni isi o mea e te lagona e tatau ona malamalama i ai isi e uiga i le mafuaaga na faatulaga ai e Iesu Keriso Lana Ekalesia?
O Le Ekalesia a Iesu Keriso o le Au Paia o Aso e Gata Ai e gafa ma le tele o faamoemoega taua atonu na oo ifo i lou mafaufau. Na faamalamalama mai e Elder D. Todd Christofferson o le Korama a Aposetolo e Toasefululua se tasi o le tele o faamoemoega taua O Le Ekalesia a Iesu Keriso o le Au Paia o Aso e Gata Ai:
Ata
Portrait of Elder D. Todd Christofferson. Photographed in March 2020.
O Le Ekalesia a Iesu Keriso o le Au Paia o Aso e Gata Ai e tulaga ese le faamalosia ma ua poloaiina e faataunuu sauniuniga talafeagai mo le Afio Mai Faalua o le Alii; sa toefuataiina mo lena faamoemoega.
E ono mafai faapefea e le malamalama ai i lenei faamoemoega ona aafia ai le ala e te vaai atu ai, faapea ma isi, i le Ekalesia atoa ma le auai atu iai?
Faaalu sina taimi e toe manatunatu ai i faamanuiaga o le Ekalesia a le Faaola ma Lana talalelei toefuataiina i lou olaga. A o e suesue, faalogologo mo musumusuga ma uunaiga mai le Agaga Paia e fesoasoani ia te oe e faaaoga nei faamanuiaga e saunia lelei ai mo le Afio Mai Faalua o le Faaola.
Na vaaia e Ioane se faaaliga o le Toefuataiga o aso e gata ai
I le avea ai ma se vaega o lana faaaliga o loo tusia i le tusi o Faaaliga, sa molimauina ai e Ioane le tele o mea taua o le a tutupu a o lei oo i le Afio Mai Faalua o le Faaola. Sa ia vaai i faitaulaga sili faamaoni e 144,000 mai itu aiga uma o Isaraelu ua faauuina e tuuina atu le talalelei ma aumai tagata i le Ekalesia (tagai i le Faaaliga 7:4–8 ; 14:1–5 ; Mataupu Faavae ma Feagaiga 77:11). Sa ia molimauina foi le tele o agelu o loo galulue e saunia le lalolagi mo le toe afio mai o le Faaola (tagai i le Faaaliga 14:6–20).
Mafaufau e faaali atu se ata o se faatagata o le agelu o Moronae a o mafaufau loloto tagata aoga i le fesili lenei.
Ata
Angel Moroni on the Meridian Idaho Temple during winter at sunrise.
Pe na i ai se taimi na e mafaufau ai pe aisea ua i ai i luga o le tele o o tatou malumalu se faatagata o Moronae ?
O nei faatagata ua faatusa i le talaiga o le talalelei toefuataiina i le lalolagi atoa. O avefeau faalelagi, e aofia ai Moronae, sa faia se matafaioi taua i le Toefuataiga o le talalelei e ala i le Perofeta o Iosefa Samita. I le Faaaliga 14 , na faasino atu ai e Ioane o le matafaioi taua o le a faia e Moronae ma isi agelu e fesoasoani ai e saunia le lalolagi mo le toe afio mai o le Faaola.
Faitau le Faaaliga 14:6 , ma vaavaai mo mea ua e aoaoina mai i le faamatalaga a Ioane e faamanatu atu ai ia te oe Moronae ma lana misiona.
O le a se mea na e mauaina? (Afai e te manao e aoao atili e uiga i le matafaioi a Moronae i le Toefuataiga, tagai i le Iosefa Samita—Talafaasolopito 1:29–54 .)
E faaopoopo atu ia Moronae, o le agelu o loo ta’ua i le Faaaliga 14:6 e mafai foi ona faatusa i le toatele o avefeau faalelagi o e na fesoasoani e toefuatai mai le talalelei a Iesu Keriso. Faitau mea nei e faailoa mai ai isi agelu o e sa faatinoina se matafaioi i le toefuataiga o le talalelei:
Mafaufau e tuu atu tagata aoga e galulue i ni paga pe i ni vaega toalaiti e toe faamanatu ai se tasi o nei fuaitau ma faailoa mai isi agelu o e sa faatinoina se matafaioi i le Toefuataiga.
Faitau le Faaaliga 14:7 , ma vaavaai po o le a le mea na fai mai ai le agelu.
O le fasifuaitau “ua oo mai le ituaso o lana faamasinoga” e faatatau i le taimi o le a faamasino ai e Iesu Keriso tagata uma o le lalolagi. O Ana faamasinoga o le a faia i le taimi o le Afio Mai Faalua (tagai i le Malaki 3:1–5) ma i le Faamasinoga Mulimuli (tagai i le 2 Nifae 9:15). Faatasi ai ma le fesoasoani a avefeau faalelagi, sa toefuatai mai ai e Iesu Keriso Lana talalelei e fesoasoani ai e saunia le lalolagi mo Lona Afio Mai Faalua.
O a ni isi o auala e fesoasoani ai le talalelei toefuataiina a le Alii ma Lana Ekalesia e saunia le lalolagi mo Lona Afio Mai Faalua? Faamatala au tali.
O a ni mea o aoao atu ia te oe e taumafaiga a le Alii e saunia i tatou mo Lona Afio Mai Faalua e uiga ia te Ia ma Ona manaoga mo oe?
O la tatou matafaioi i le sauniaina o le lalolagi mo le Afio Mai Faalua
Na faaiuina e Ioane lenei vaega o ana tusitusiga i le faamatalaina o se faaaliga vaaia sa ia te ia o se “ua pei o le Atalii o le tagata” ( Faaaliga 14:14). Faitau le Faaaliga 14:14–15 , ma vaavaai mo mea na molimauina e Ioane.
O nei fuaiupu e mafai ona faaaoga e fesoasoani ai i tagata aoga ia lagonaina le faanatinati ma le taua o le auai faatasi ma le Alii i le faapotopotoina o Isaraelu. Atonu e fesoasoani le faaali atu o le ata o se selesaito pe tusi se ata i luga o le laupapa a o faamatala atu le taua o le selesaito i le aao o le Faaola ( fuaiupu 14).
Ata
Drawing of a sickle.
O se selesaito o se naifi maai ma e pi’o [lona lau] e faaaoga e tipi ai ma selesele ai laau toto. Ina ua aoao atu e Iesu le faataoto i le saito ma le titania (tagai i le Mataio 13:24–30, 36–43), sa Ia fetalai o le saito (tagata amiotonu) o le a vavae ese mai le titania (tagata amioletonu) “i le gataaga o lenei lalolagi” ( Mataio 13:40). I lana faaaliga, na molimauina ai e Ioane le faapotopotoina o e amiotonu mai e amioleaga e sauniuni ai mo le faatafunaga o e amioleaga (tagai i le Faaaliga 14:16–20). O le fasifuaitau “Ina faaoo atu ia lau selesaito, ina sele” i le Faaaliga 14:15 e mafai ona faauigaina o le faapotopoto mai o agaga ia Iesu Keriso.
O le a sou manatu e mafai faapefea ona faatatau le valaaulia o loo faamatalaina i le fuaiupu 15 i tagata o le Ekalesia i aso nei? (Tagai Mataupu Faavae ma Feagaiga 4:4 ; 33:7 .)
Ua valaaulia i tatou e Iesu Keriso ia auai i le faapotopotoina o agaga ia te Ia e sauniuni ai mo Lona Afio Mai Faalua. Ua masani ona ta’ua lenei mea o le faapotopotoina o Isaraelu.
Faaalu sina taimi e toe faamanatu ai aoaoga talu ai nei a perofeta ma aposetolo a le Alii e faatatau i le auai ai i le faapotopotoina o Isaraelu. Ina ia faia lenei mea, e mafai ona e sailia le autu “Faapotopotoina” i saunoaga o le konafesi aoao talu ai nei i le ChurchofJesusChrist.org po o i luga o le polokalama o le Potutusi o le Talalelei. I se isi faiga, e mafai ona e toe faamanatuina se tasi pe sili atu o savali nei mai ia Peresitene Russell M. Nelson ma Sister Wendy W. Nelson. A o e suesue, vaavaai mo faamatalaga o loo faamatala ai la tatou matafaioi i le fesoasoani e faapotopoto Isaraelu ma saunia le lalolagi mo le Afio Mai Faalua.
Mafaufau e saunia ni kopi o mea nei mo tagata aoga o e atonu e le mafai ona latou mauaina ni kopi faaeletonika. Tuu atu i tagata aoga se taimi e suesue ai ona faasoa mai lea o faamatalaga na latou maua mai a latou suesuega.
“Faamoemoe o Isaraelu” (faigalotu a le autalavou i le lalolagi atoa faatasi ma Russell M. Nelson ma Wendy W. Nelson, 3 Iuni, 2018), faaopoopoga i le New Era ma le Ensign, ChurchofJesusChrist.org
O le a se tasi o faamatalaga na e maua e uiga i le faapotopotoina o Isaraelu sa faapitoa ona anoa ia te oe? Aisea?
O a ni isi o mea patino o le a e faia e saunia ai oe lava ma isi mo le toe afio mai o le Faaola? O le a faapefea ona fesoasoani nei mea ia te oe e saunia ai?
Tala Auiliili ma Faamatalaga o Talaaga
Gaioioga Faaopoopo e Aoao Ai
Faaaliga 13
Afai o le a manuia tagata aoga mai se malamalama sili atu i le taua o loo faaauau pea ona sii e Satani ia i latou o i le lalolagi, mafaufau e valaaulia i latou e faitau le Faaaliga 13 , ma vaavaai mo upu ma fasifuaitau o loo faamatala ai uiga ma faatinoga o le manu feai. O a ni mea ua aoao mai e nei upu ma fasifuaitau ia te oe e uiga ia Satani, pe faapefea ona ia galue, ma le mea o loo ia taumafai e fai? E mafai faapefea e le malamalama ai i nei faamatalaga ona fesoasoani ia te oe e iloa lelei ai ma faafetaiaia lana faatosinaga?