O le tasi o auala na fesoasoani ai Ioane le Papatiso i tagata e saunia i latou lava e talia Iesu Keriso o le valaaulia lea o i latou e salamo. O le lesona lenei ua faamoemoe e fesoasoani e te malamalama atili ai i le salamo ma le olioli e aumai e le salamo e le aunoa.
Tapenaga a le Tagata Aoga:Valaaulia tagata aoga e tomanatu i o latou uiga faaalia ma aafiaga o le salamo, e ala i le mafaufau loloto i fesili e pei o nei: “O a faalogona ma lagona e te mauaina pe a e mafaufau i le salamo? Aisea?”“O a ni ou aafiaga na i ai i le salamo?”“O a ni au fesili o i ai e uiga i le salamo?”
Gaoioiga e Mafai ona Aoao Ai
O le salamo e mafai ona avea ma se autu maaleale. Faaeteete ia fesoasoani i tagata aoga e aoao e aunoa ma le faasoaina o auiliiliga o agasala ua mavae. Ia malamalama e ono i ai ni tagata aoga e matele i lagona matuia o le lē aoga ma le tausalaina. Fesoasoani i tagata aoga ia malamalama ma lagona le alofa, le alofa mutimutivale, ma le fesoasoani a le Faaola o loo avanoa mo i latou uma taitoatasi.
O le a se mea e aumaia ia oe le olioli?
Tomanatu i mea e aumaia ai le olioli ia te oe. Mafaufau e lisi le tele o faataitaiga e mafai ona e tolaulauina i le 30 sekone.
Mafaufau e faataga tagata aoga e faasoa mai nisi o a latou tali.
Na aoao mai e Peresitene Russell M. Nelson mea nei e uiga i auala e mafai ai ona tatou maua le olioli i o tatou olaga:
Ata
Official portrait of President Russell M. Nelson taken January 2018
A tatou filifili e salamo, ua tatou filifili e suia! Tatou te faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua le olioli—le olioli o le togiolaina ia te Ia.
O le salamo o se suia e ala i le liliu ese mai le agasala ma faalatalata atili i le Atua e ala i le Togiola a Iesu Keriso (tagai i le Taiala i Tusitusiga Paia, “ Salamo,” scriptures.ChurchofJesusChrist.org).
Na e lisiina le salamo i mea e aumaia ai ia te oe le olioli? Aisea pe aisea na lē lisiina ai?
Valaaulia tagata aoga e faaopoopo nisi o latou manatu e faatatau i le salamo e ala i le faasoa mai o latou tali mai le faatinoga fautuaina o tapenaga a le tagata aoga. Mafaufau po o a fesili e sili ona talanoaina e le vasega, e faasoa ai tali e lē mailoa po o ai na tusia, pe faaaoga e avea o se tomanatu faaletagata lava ia e tusia faalilolilo ai i a latou api talaaga mo suesuega.
Afai e te le i mafaufau i le salamo o se mea e aumaia ia te oe le olioli, o a faalogona po o lagona e oo mai pe a e mafaufau i le salamo? Aisea?
Aisea e ono lē lagona vave ai e se tasi le olioli a o salamo?
Mafaufau loloto i ni au fesili e uiga i le salamo. I se taimi mulimuli ane o le lesona, o le a i ai sou avanoa e sailiili ai mo tali o nei fesili.
“Ina salamo ia outou. … Ina teuteu ia outou le ala o le Alii”
Ina ia fesoasoani e saunia tagata e talia Iesu Keriso, na valaaulia e Ioane le Papatiso i latou ina ia salamo (tagai i le Mataio 3:1–3).
I le lesona talu ai, na e suesueina faamaumauga a Mareko ma Mataio e faatatau ia Ioane le Papatiso. Na faaopoopo e Luka isi auiliiliga faaopoopo e faatatau ia Ioane. Faitau le Luka 3:10–14, ma vaavaai pe na faapefea ona fesoasoani Ioane i tagata e salamo.
O a suiga na valaaulia e Ioane tagata e fai?
Faamata o le a se fesoasoani a nei suiga i tagata e liliu ese ai mai le agasala ma sauni e talia ma mulimuli ia Iesu Keriso?
Suesue i le faamatalaga lenei mai a Peresitene Russell M. Nelson. A o e suesue i ai, matau po o a aoaoaga a le Agaga Paia o aoao atu e faatatau i le salamo ma le Faaola o Iesu Keriso.
Mafaufau e faaali atu le faamatalaga lea pe fai ni tufaaga mo tagata aoga.
Ata
Official portrait of President Russell M. Nelson taken January 2018
Ua toatele naua tagata e mafaufau i le salamo e pei o se faasalaga—o se mea e ao ona aloese ai vagana ai tulaga e sili ona matuiā. Ae o lenei lagona o le faasalaina e mafua mai ia Satani. E taumafai o ia e taofi i tatou mai le faalagolago ia Iesu Keriso, o lē tu mai ma aao mafola, ma le faamoemoe ma le naunautai e faamalolo, faamagalo, faamama, faamalosia, ma faapaiaina i tatou.
O le upu mo le salamo i le gagana Eleni o le Feagaiga Fou o le metanoeo. O le sopemua (prefix) o le upu o le meta- o lona uiga o le “sui.” O le sopemulia’i (suffix) o le -noeo e fesootai i upu Eleni e uiga ma le “mafaufau,” “iloa,” “agaga,” ma le “mānava.”
O lea la, a fetalai mai Iesu ia te oe ma a’u ia “salamo” [ Luka 13:3, 5 ], o loo Ia valaauliaina i tatou ia sui o tatou mafaufau, lo tatou iloa, o tatou agaga—e oo lava i le auala tatou te mānava ai. O loo Ia talosagaina i tatou ia sui le ala tatou te alolofa ai, mafaufau ai, auauna ai, faaaoga ai o tatou taimi, taulimaina ai a tatou avā, aoao ai a tatou fanau, e oo i le tausiga o o tatou tino.
E leai se mea e sili atu ona faasaoloto, sili atu ona faamalualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e faatasi ona tupu; ae o se faagasologa. O le auala autu lea e maua ai le fiafia ma le filemu o le mafaufau. Pe a tuufaatasi ma le faatuatua, e tatala e le salamo le faitotoa tatou te maua ai le mana o le Togiola a Iesu Keriso.
Pe o e savali ma le filiga i le ala o feagaiga, pe ua e see ese pe laa ese mai le ala o feagaiga, pe ua le mafai ona iloa atu le ala mai le mea o loo e i ai nei, ou te aioi atu ia te oe ia salamo. Ia maua le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi.
O le a se mea e tumatila ia te oe mai le aoaoga a Peresitene Nelson e faatatau i le salamo ma Iesu Keriso?
Mafaufau e valaaulia tagata aoga e vaai faalemafaufau o loo tu le Faaola ma aao mafola, o loo naunau e fesoasoani, faamagalo, faamalolo, ma faamalosi ia i latou. Valaaulia i latou e vaai faalemafaufau i le olioli o finagalo o Ia latou te lagonaina a o taumafai e salamo.
O anafea na e molimauina ai faamanuiaga o le salamo i lou lava tagata po o isi?
Aisea e te manatu ai o loo faamoemoe lava le Faaola o le a tatou salamo ma naunau e faamagalo i tatou?
Mo nisi minute o loo sosoo mai, o le a e filifili ai ma suesue se itu patino o le salamo o le a fesoasoani ia te oe e faalatalata atili ai ma avea atili ai oe e pei o Iesu Keriso, ma faateleina ai lou avanoa mo Lona mana ma le filemu, ma lagona se olioli sili atu. O ni vaega faapitoa nei o le salamo e te ono manao e suesue i ai. Filifili se tasi o nei vaega e te suesue ai, pe suesue se tasi o au oe lava fesili e faatatau i le autu o le salamo.
Mafaufau e faasino i fesili a tagata aoga e uiga i le salamo lea na latou manatunatu loloto muamua i ai ma faaaogaina i latou i tulaga o, pe faaopoopo atu i le, o fesili suesue nei.
E faapefea ona ou salamo?
E faapefea ona ou maua atili le olioli i le salamo?
E faapefea ona ou manumalo i le fefe e salamo?
O le a se mea masani, o aso taitasi e taulai ai i le salamo, po o le a se foliga vaaia o lena taulaiga i lou olaga?
O punaoa faapitoa nei e fesoasoani ia te oe e faaloloto atili lou malamalamaaga i le salamo. O loo maua nei punaoa i le ChurchofJesusChrist.org po o i luga o le polokalama faatekinolosi o le Gospel Library. O nei punaoa faapea ma isi e mafai ona faaaoga e taialaina lau suesuega o le vaega o le salamo ua e filifilia. Mafaufau e faamauina i lalo faamatalaga ma faailoga auiliiliga e pito i sili ona taua ia te oe.
Filifili po o a punaoa o maua ma e sili ona talafeagai e tuuina atu i tagata aoga. fai e tatau ai, faasino i tagata aoga le auala e sue ai faamaumauga eseese.
Mo Le Malosi o le Autalavou[tamaitusi, 2011], “Salamo,” 28–29
Autu o le Talalelei, “Salamo,” “Faamagaloga,” topics.ChurchofJesusChrist.org
Taiala o Autu, “ Repent, Repentance,” scriptures.ChurchofJesusChrist.org
Taiala i Tusitusiga Paia, “ Salamo, Salamo,” scriptures.ChurchofJesusChrist.org
Lauga i konafesi aoao e pei o Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,”Ensignpo o leLiahona, Me 2019, 67–69
Dale G. Renlund, “Salamo: O Se Filifiliga Fiafia,”Ensignpo o leLiahona, Nov. 2016, 121–24
Mafaufau e faagalulue tagata aoga i ni vaega taitoalua pe i ni vaega toalaiti e fefaasoaai ma aoao e le tasi le isi i mea ua latou aoaoina. E mafai ona latou faaaogaina fesili nei:
O le a se mea na e aoao mai i au suesuega?
O le a sau fautuaga e ave i se tasi o loo faafaigata ona malamalama pe aisea e manaomia ai ona salamo? O le a se mea e te manao e latou te iloa ma malamalama i ai e uiga ia Iesu Keriso?
O le a se mea na fesoasoani ia te oe e atiae pe faamalosia lau molimau i le olioli o le salamo e ala ia Iesu Keriso?
Tala ma Faamatalaga o Talaaga
Luka 3:7 . Aisea na faaigoa ai e Ioane tagata o le “fanau a gata feai”?
O le gata feai Palesitina o le gata taatele e aupito ’ona i Isaraelu. O gata feai e feoai i le po ma e masani ona sue meaai e ala i le lalafi ona fetolofi lemu ae lea e osofai o latou fili. A latou lagona le faamatauina, ona taaiai lea e gata feai o latou tino, sisī, ma osofaia o latou fili. E faapena foi, na lagona le faamatauina o le Au Faresaio ma Satukaio e Ioane ona na ia taitai esea tagata mai a latou aoaoga taufaasese.
I tusitusiga paia, e i ai taimi e faatusa ai tagata i laau e fua mai ai fua lelei po o fua leaga. O le uiga o le “fua mai … fua e tatau ma le salamo” o le suia lea o tatou naunautaiga ma gaioiga ina ia mulimulitai i aoaoga a le Atua.
I totonu o Roma i aso anamua, o telona o tagata ao lafoga mo le malo o Roma. O telona sa tele ina inosia e tagata Iutaia, aua i le vaai a tagata sa pei i latou o ni tagata faalata i lo latou lava atunuu ma ona sa masani ona ao faasili e telona tupe o lafoga nai lo le aofaiga e tatau ai (tagai i le Faaliliuga a Iosefa Samita, Luka 3:19–20 [i le faamatalaga faaopoopo i le Tusi Paia]; Luka 3:12–13). O isi telona na faafaigofie ona talia le talalelei (tagai i le Mataio 9:9–10 ; Luka 19:1–10 ; Taiala i Tusitusiga Paia, “ Telona,” scriptures.ChurchofJesusChrist.org).
E faaolaina e le salamo i tatou?
Ata
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
E lē na o le salamo lava ia e faaolaina ai le tagata. O le toto o Iesu Keriso e faaolaina ai i tatou. E lē na o suiga moni ma faamaoni o a tatou amio e faaolaina ai i tatou, ae e “faaolaina i tatou i le alofa tunoa, pe a uma mea uma e mafai ona tatou faia” ( 2 Nifae 25:23). Peitai, o le salamo moni, o le tulaga lea e manaomia ina ia mafai ai ona oo mai le faamagaloga a le Atua i o tatou olaga. O le salamo moni e mafai ai ona maua “se ao malamalama [mai] se po ua pito i sili ona pogisa” (Spencer W. Kimball,The Miracle of Forgiveness[1969], 362).
(Dieter F. Uchtdorf, “Vaega Tonu o le Toe Foi Saogalemu,”Ensignpo o leLiahona, Me 2007, 100)
Goioiga Faaopoopo e Aoao Mai Ai
O se isi faatinoga o le tuu atu lea i tagata aoga e suesue se vaega faapitoa o le salamo
Tuu atu i tagata aoga le faatonuga lea:
Vaai faalemafaufau e faapea, ua lagona e le epikopo ua i ai uiga faaalia lē lelei o le autalavou i totonu o lau uarota e faatatau i le salamo. I le sauni atu mo se fonotaga lata mai a le aufono a le autalavou a le uarota, ua ia talosagaina oe e te sau sauni ma ni fesili ma tali mai le vaaiga faaleautalavou e faatatau i le autu o le salamo. O le a faaaoga e le au epikopo nei autu e fausia ai se faigalotu e fesoasoani i le autalavou. I le galue ai taitoatasi pe faatasi ma le fesoasoani a isi tagata aoga, e tusi ni fesili ma tali talafeagai e faatatau i le salamo ua e manatu o le a sili ona fesoasoani i le autalavou o loo i totonu o lau uarota. I au tali, ia aofia ai ni mau faapitoa ma upusii faaperofeta o le a aoga ona iloa ma malamalama ai le autalavou.
