Ioane 6:22–58

“O A’u o le Areto o le Ola”

Ata

Jesus Christ seated at a table. In one hand He is holding a piece of bread. With the other He is gesturing towards Himself. There is a plate of bread on the table in front of Him and a goblet.

I le aso na sosoo ai ma le vavega o le fafagaina o le toalima afe, o le toatele na sailia Iesu, “e lē ona ua [latou] vaai i faailoga, a e ona ua [latou] aai i areto,” ma ua toe fia aai (Ioane 6:26). Na aoao e le Faaola i latou, “O au nei le areto o le ola: o lē sau ia te au, e lē laina lava ia” (Ioane 6:35). E mafai ona fesoasoani lenei lesona ia te oe e maitauina ai auala e mafai ai ona e sau i le Faaola ina ia faatumuina ai e Ia ou manaoga faaleagaga.

Galuega tusitusi. O le valaaulia o tamaiti aoga e tali i fesili faatupu manatu i tusitusiga e mafai ona fesoasoani ia i latou e faaloloto ma faamanino ai o latou manatu. A o tali atu tagata aoga i fesili e ala i le tusitusi a o lei faasoaina atu o latou manatu i le vasega, latou te maua ai se taimi e fatufatu ai o latou manatu ma maua uunaiga mai le Agaga Paia.

Tapenaga mo tagata aoga. Valaaulia tagata aoga e mafaufau e uiga pe faapefea ona faatusa Iesu Keriso i le areto ma ia o mai tapena e faasoa i o latou malamalamaaga.

Galuega Faatino e Mafai ona Fai e Aoao Mai Ai

“O a’u o le areto o le ola”

Mafaufau pe aumai se areto (ma, afai e manaomia, se isi filifiliga mo tagata aoga e lē mafai ona taumafaina le kulukeni) mo tagata aoga e taumafaina. Faaali fesili nei mo tagata aoga e vaai i ai a o omai i totonu. Valaaulia i latou e faaaoga o latou mafaufauga mai le galuega faatino o tapenaga mo tagata aoga e fesoasoani ai ia i latou a o faagasolo le lesona.

Ata

Bread

O le a le tele o areto ua e manatu e mafai ona e taumafaina?
E tusa lava pe o le a le tele o areto e te taumafaina i le taimi nei, o le a le mea e iu lava ona tupu?

I le taimi na fafagaina ai e le Faaola le aofaiga o tagata e sili atu ma le lima afe i le faaaogaina na o ni areto e lima ma ia e lua, na tali atu nisi tagata i lenei vavega i le toe sailia o Ia mo se isi taumafataga ae lē mo mafuaaga faaleagaga (tagai i le Ioane 6:5–14); Faaliliuga a Iosefa Samita, Ioane 6:26 [i le Ioane 6:26, vaefaamatalaga a]). Na faasao e Iesu i latou na sailia o Ia mo nisi areto ae lē sailia o Ia mo le ola e faavavau. Na latou fesiligia Lona tagata ma Lona agavaa e foai ia i latou le ola e faavavau (tagai i le Ioane 6:30, 41–42).

Faitau i le Ioane 6:32, 35 e vaai ai pe na faapefea ona faasao e le Faaola tagata. Mafaufau e faailoga i au tusitusiga paia ia faalagiga o le Faaola o “le areto moni mai le lagi” ma “le areto o le ola.” E mafai ona e faaopoopoina nei faalagiga i lau tusi talaaga ua faaigoaina “Faalaiga ma Matafaioi a Iesu Keriso.” (Atonu na e amatalia lenei tusitusiga a o faagasolo le lesona i le Ioane 1:1–51.)

Aisea ua e manatu ua faaigoaina ai e le Faaola Ia lava o le “areto moni mai le lagi” po o le “areto o le ola”?
O le a se mea ua e aoaoina mai ia Iesu Keriso i le fuaiupu 35 ?

Ua aoao mai e le Ioane 6:35 e faapea afai tatou te o mai ia Iesu Keriso ma faatuatua ia te Ia, e mafai ona Ia faamalieina ai lo tatou fia aai ma fia feinu faaleagaga.

Mafaufau pe tusi pe faaali atu fesili nei i luga o le laupapa.

Tali i fesili nei i totonu o lau api faamaumau suesuega:

O a nisi o mafuaaga ua e manaomia ai Iesu Keriso i aso taitasi uma? O a ni auala o e “fia ai” faaleagaga ai i le taimi nei?
O a mea o e faia i le taimi nei e saili ai le fesoasoani a le Faaola e faamalieina lena fia ai? O a mea o loo sologa lelei? O a mea e lē o sologa lelei?

A o faaauau ona e suesue, saili mo le tataiga a le Agaga Paia e fesoasoani ai ia te oe e mataulia auala e mafai ai ona e sau i le Faaola ma ona Ia faatumuina ai lou fia ai faaleagaga. Faitau i le Ioane 6:47–58, ma vaavaai mo mea o loo valaauliaina ai tatou e le Faaola e fai ma mea ua Ia folafolaina e taui ai. Mafaufau pe faapefea e nei valaaulia ma folafolaga ona fesoasoani ia te oe e malamalama atili ai pe faapefea ona taliaina le meaalofa a le Faaola o le faamalieina lea o lou fia ai ma fia inu faaleagaga. Atonu foi e te manao e matamata le “I Am the Bread of Life,” o loo i le ChurchofJesusChrist.org, mai le taimi 3:20 i le 5:08 ma mulimuli ai i au tusitusiga paia. Mafaufau e fatu se siata e pei o lenei e fesoasoani ai ia te oe.

Mafaufau pe faaali lenei siata i luga o le laupapa ma faatumu faatasi ma le vasega. O nisi o valaaulia a le Faaola o le ia faatuatua ia te Ia ( Ioane 6:47) ma ai i le areto o le ola ( fuaiupu 51). O nisi o folafolaga e aofia ai ma le ola e faavavau ( fuaiupu 50) ma le tumau o Ia ia te i tatou ( fuaiupu 56).

O valaaulia a le Faaola	O folafolaga a le Faaola

O a mea e aoao atu ai Ana valaaulia ma folafolaga ia te oe e uiga ia te Ia?

O le faamaumauga a Enosa i le Tusi a Mamona o loo faaata mai ai pe faapefea ona faamalieina e le Faaola lo tatou fia aai faaleagaga. Mafaufau pe valaaulia tagata aoga e faitau i le Enosa 1:1–8 ma faasoa mai i mea ua latou mauaina. E mafai ona felafolafoai tagata aoga i mea na faia e Enosa e faamalieina ai lona fia ai ma pe na faapefea ona faamanuiaina e le Alii Enosa. E mafai foi ona manatunatu tagata aoga pe faapefea e le faataitaiga a Enosa ona fesoasoani ia i latou e talia le fafagaina faaleagaga e maua mai le Areto o le Ola.

O le taumafaina o le tino ma le toto o le Faaola

O le tele o tagata na faalogo i le lauga a le Faaola na i ai fesili po o le a le uiga o le aai i le tino a le Faaola ma le feinu i Lona toto (tagai i le Ioane 6:52, 60).

Faitau i le faamatalaga o lenei a Elder D. Todd Christofferson o le Korama a Aposetolo e Toasefululua ina ia malamalama atili ai i le uiga o upu a le Faaola ma pe faapefea ona tatou taliaina Lana valaaulia.

Ata
Portrait of Elder D. Todd Christofferson. Photographed in March 2020.

O le ai i Lona tino ma inu i Lona toto o se ala uiga ese lea o le faaali atu o le ala e tatau ai ona tatou matua aumaia atoatoa o le Faaola i o tatou olaga—i o tatou lava tagata—ina ia tasi i tatou. …

… Ua manino ai lava, tatou te aai i Lona tino ma feinu i Lona toto pe a tatou taliaina mai ia te Ia le mana ma faamanuiaga o Lona Togiola.

O le mataupu faavae a Keriso ua ta’u mai ai le mea e tatau ona tatou fai ina ia maua ai le alofa tunoa togiola. O le talitonu lea ma faatuatua ia Keriso, ia salamo ma papatiso, ma maua le Agaga Paia, “ona oo mai ai lea o se faamagaloga o a outou agasala i le afi ma i le Agaga Paia” [ 2 Nifae 31:17 ]. …

Ua ou tautala atu e uiga i le mauaina o le alofa tunoa togiola o le Faaola e aveesea ai a tatou agasala ma pisia o na agasala o ia i tatou. I se tulaga faatusa, o loo i ai se faauigaga sili atu o le aai i Lona tino ma feinu i Lona toto, ma o lena faauigaga o le teuloto o tomai ma uiga o Keriso, aveesea o le natura faaletagata ma avea ma Au Paia “e ala i le togiola a Keriso le Alii” [ Mosaea 3:19 ]. …

… O le ai i le tino ma inu i le toto o Keriso o lona uiga ia tulimatai atu i le paia.

(D. Todd Christofferson, “O Le Areto Ola Na Alu Ifo Mai le Lagi,” Ensign po o le Liahona, Nov. 2017, 36–38)

E faapefea ona e faamatalaina le uiga o le ai i le tino ma inu i le toto o le Alo o le Atua?
O le a se taimi na mulimulitaia ai e oe po o nisi le fautuaga a Elder Christofferson ma lagonaina ai le faamalieina e le Faaola o le fia ai faaleagaga? O a mea na e faia i nei aafiaga ua e lagona na valaauliaina ai le Faaola e faamalieina lena fia ai?

Faaata i lou mafaufau na e i ai i le taimi na fai ai le lauga a le Faaola i le Ioane 6:22–58 . Tusi se tusi talaaga e peiseai sa e i ai i o. Ia aofia i lau tusitusiga mea o le a mulimuli mai nei:

Mea na e aoaoina e uiga i le Faaola ma mea na e aoaoina mai ia te Ia
Soo se aafiaga sa i ai ia te oe i taimi na faamalieina ai e Iesu Keriso ou manaoga faaleagaga (pe o soo se aafiaga na i ai i isi tagata)
Gaoioiga na uunaia ai oe e le Agaga Paia e fai ma pe aisea

A i ai se taimi, uunai tagata aoga e faasoa i a latou tusitusiga ma le vasega pe o ni paga po o vaega toalaiti. Mafaufau pe faauma i se molimau i le Faaola o le Areto o le Ola ma valaaulia tagata aoga e molimau mai foi.

Manatu ma Faamatalaga o Talaaga

Aisea sa ono faataulai ai e Iesu tagata i o latou manaoga faaleagaga nai lo o latou manaoga faaletino?

A o auauna ai o se sui o le Au Fitugafulu, na aoao mai Elder Carlos H. Amado:

Ata
Former official portrait of Elder Carlos H. Amado of the First Quorum of the Seventy, 2008. Retouched version done in March 2009.

I le avea ai o se Ekalesia, e ao ona tatou fafaga i e fia aai, avatu le mapusaga i e o mamai, faaoofu i e ua lē lavalava, ma avatu se malutaga i e ua leai ni mea e nonofo ai. O le taulaga anapogi, tatou te avatu ai le faamama avega i tulaga o manaomia i se taimi vave mo tagata o le ekalesia, ma o le fuafuaga o le uelefea tatou te fesoasoani ai e taulima manaoga mo se taimi umi. A oo ina i ai faalavelave faalenatura, o le tautua o fesoasoaniga mo tagata e ala atu ai la tatou fesoasoani mo o tatou uso ma tuafafine e lē auai i la tatou tapuaiga.

E aunoa ma le tuulafoaia o nei manaoga faaletino, O Le Ekalesia a Iesu Keriso o le Au Paia o Aso e Gata ai, e ala i le poloaiga a le Alii, e faatumauina le auaunaga aupito ofoofogia ma le tamalii, lea e faamanuiaina ai tagata uma e ala i le aoaoina o i latou i le aoaoga faavae a Keriso ma valaaulia i latou ina ia mauaina sauniga faaola, ina ia mafai ai ona latou maua le “tino ola pea ma le ola faavavau” ( Mose 1:39).

(Carlos H. Amado, “Auauna Atu, o se Uiga Auaumama Paia,” Ensign po o le Liahona, Me 2008, 35–36)

Ioane 6:56 . O le a le uiga o le saunoaga a le Faaola ina ua Ia aoao mai e tumau o Ia ia te i tatou?

Na aoao mai Elder David A. Bednar o le Korama a Aposetolo e Toasefululua:

Ata
Elder David A. Bednar, Quorum of the Twelve Apostles official portrait. 2020.

E ese le iloa o Iesu Keriso na afio mai i le lalolagi e maliu mo i tatou—o se itu taua faalefaavae i le mataupu faavae a Keriso. Peitai, e tatau foi ona tatou iloa talisapaia le finagalo o le Alii, e ala i Lana Togiola ma le mana o le Agaga Paia, ia ola i totonu ia i tatou—e le gata ia taitaiina ai i tatou ae ia faamamanaina ai foi i tatou.

(David A. Bednar, “O Le Togiola ma le Malaga o le Olaga Faitino,” Ensign, Aperila. 2012, 42)

Galuega Faatino Faaopoopo e Aoao Mai Ai

O loo finagalo le Tama e o mai tagata uma i Lona Alo ia faaolaina

Mafaufau pe valaaulia tagata aoga e suesue i le Ioane 6:39–40 ma ia feauauai ona faasinoina nei fuaiupu ma le Mose 1:39 ma le Ioane 3:16–17 . Valaaulia i latou e mafaufau loloto pe faapefea ona fesoasoani nei fuaiupu ia i latou e malamalama atili ai i le finagalo o le Tama Faalelagi ia faaolaina Lana fanau uma. E mafai ona latou tepa taulai i mea o loo aoao mai e nei fuaiupu ma folafolaga o loo i ai i totonu e uiga i le Tama Faalelagi ma le misiona a Iesu Keriso o le Areto o le Ola.

Ioane 6:24–27, 48–50 . O le filifilia o mea faaleagaga pe faavavau nai lo o mea faalelalolagi pe faaletino

Mafaufau pe valaaulia tagata aoga e saili mo nei fuaiupu ma mafaufau i mafuaaga e alai ona tatou filifilia mea faalelalolagi po o mea faaletino nai lo o mea faaleagaga. E mafai ona latou feauauai ona faasinoina nei fuaiupu ma mau e pei o le 2 Korinito 4:18, Mosaea 2:41, Mataupu Faavae ma Feagaiga 25:10, ma isi. Mafaufau pe talosagaina i latou e iloilo a latou faaiuga e fai i aso taitasi. Valaaulia i latou e manatunatu i mea ua latou iloa e uiga i le Faaola ma i le ata o le faaolataga e mafai ona fesoasoani ai ia i latou e tepa taulai atili i mea faaleagaga. E mafai ona latou matauliaina auala e mafai ona latou faamuamua atili ai mea faaleagaga nai lo mea ua latou faia i le taimi nei.