Aisea e te manatu ai tatou te talanoa soo ai pea e uiga i le avea ai ma fanau a le Atua? E faapefea e lenei malamalamaaga ona aafia ai lou olaga? A o faamanatu atu e Paulo i le Au Paia Eperu e uiga i le aoaiga na latou maua mai o latou tama faalelalolagi, sa ia aoao atu i latou e uiga i le Tama Faalelagi, le “Tama o Agaga” ( Eperu 12:9). O lenei lesona ua faamoemoe e fesoasoani ia te oe e iloa atili ai le Tama Faalelagi ma malamalama ai i le ala e mafai ai e lou iloa o le sootaga ma Ia ona aafia lelei ai lou olaga.
Iloaina ai o faasinomaga ma faamoemoega paia o tagata aoao taitoatasi. Taumafai ina ia mafai ona e vaai atu i tagata aoga e faapei ona silasila le Atua ia i latou. A o lagona e tagata aoga le faatuatuaina ma le lagolagoina, o le a uunaia i latou e ausia o latou gafatia faamoemoeina o ni soo o Iesu Keriso.
Sauniuniga a le tagata aoga: Valaaulia tagata aoga e faitau upu o le pese “O le Atua Lo’u Tama” (Viiga, nu. 184) ma mafaufau pe faapefea e lenei malamalama i lo latou faasinomaga ona aafia ai o latou olaga.
Gaoioiga e ono Mafai Ona Aoao Ai
O se lesona e faateia ai mai leona i se lotoā manu
I se faigalotu i le lalolagi atoa mo talavou matutua, sa faasoa mai ai e Sister Kathy Clayton, le faletua o Elder L. Whitney Clayton o le Fitugafulu, lona aafiaga i le asiasi atu i se lotoā manu i Atenitina lea sa mafai ai ona ia ulu atu i pa taitasi ma fegalegaleai ma manu feai e pei o leona. Ina ua fesiligia e Sister Clayton le mafuaaga na faataga ai manu matautia i ia fegalegaleaiga vavalalata ma tagata, sa ia aoaoina se mea na faateia ai o ia. Atonu e te manao e matamata le vitio o le “A Regal Identity” o loo maua i le ChurchofJesusChrist.org, mai le faailotaimi 1:22 i le 3:26, pe faitau le anotala lenei.
Ata
Kathy Ann Kipp Clayton, wife of Elder L. Whitney Clayton who is a General Authority Seventy. This is taken in 2019.
[O faiaoga] sa latou tatai atu lo’u mafaufau i ni nai taifau laiti sa faapena foi ona nofoia ia pa. Sa latou ta’u mai ia te au o se tasi o mea sa latou faia o le tausia lea o leona faatasi i tafatafa o na taifau i taimi uma lava. A o laiti lava leona, sa lapopoa atu ia taifau ouou vale nai lo leona laiti. Sa talitonu taifau o i latou e pule, ma sa latou tulisi’a ma le faalealofa ia leona ma gali gu i o latou mulivae. Sa masani i tamai leona ona faapupuna i le tulimanu ma aga e faapei ua matua fefefe lava i taifau laiti leaga.
Ina ua tutupu a‘e leona, sa faaauau pea ona latou faapupuna i le tulimanu ma fefefe i taifau laiti. I le faaaogaina ai o se fela’u o se atigivae, e faigofie e soo se tasi o na leona lapopoa ona a’a ese na taifau ma felelei ese mai le pa, ae sa lei vaaia e leona i latou lava e pei ona sa avea moni ai i latou. Sa latou matua le iloaina ma le faaonoono lo latou faasinomaga taualoa. Sa taotaomia i latou ma faatapulaaina i se manatu sese e uiga i o latou gafatia. Sa latou manatu e laiti ma vaivai i latou, o lea na latou faataga ai taifau leaga, ma finafinau e pulea ma faafefe i latou.
(Kathy Kipp Clayton, “A Regal Identity” [faigalotu i le lalolagi atoa mo talavou matutua, 13 Setema, 2015], broadcasts.ChurchofJesusChrist.org)
O a faatusatusaga faaleagaga e mafai ona tatou faia ma le tala ia Sister Clayton?
E faapefea ona faapei i tatou i nisi taimi o leona i lenei lotoa manu?
O le Atua “o le Tama o agaga”
A o talanoa atu Paulo i tagata Eperu e uiga i le ala e tali atu ai i le aoaiga, po o le faatonuga, mai le Atua (tagai i le Eperu 12:6–8), sa ia aoao atu se upumoni taua e uiga i lo tatou sootaga ma le Tama Faalelagi. A o e suesue i le aso, ia gauai toto’a i uunaiga mai le Agaga e mafai ona fesoasoani e te malamalama atili ai i lenei upumoni.
Faitau le Eperu 12:9 , ma mafaufau e faailoga upu po o fasifuaitau o loo aoao mai ai e uiga i la tatou sootaga ma le Tama Faalelagi. Ia maitau o le fasifuaitau “i le usiusitai” e faasino i le faamatuu atu po o le tosinaina e se tasi.
Mai lenei fuaiupu ua tatou aoao ai o le Atua o le Tama o o tatou agaga.
E faapefea e le malamalama ai i lenei upumoni ona aafia ou lagona e uiga ia te oe faapea ma isi?
Na faasoa mai e Elder Tad R. Callister o le Fitugafulu se faataitaiga o le ala e mafai ai e le manatuaina o lo tatou faasinomaga o ni fanau a le Atua ona aafia ai i tatou:
Ata
Brother Tad R. Callister, Sunday school General President. Official Portrait 2018.
I se sauniga faaleaoaoga talu ai nei mo le Au Pulega Aoao, sa fai mai ai le fesili: “E mafai faapefea ona tatou fesoasoani ia i latou o loo tauivi ma ponokalafi?”
O Elder Russell M. Nelson sa tulai ma tali atu, “Aoao i latou i lo latou faasinomaga ma lo latou faamoemoega.”
O lena tali na ootia ai au, e le gata o se tali i lena fesili patino ae o se tali talafeagai i le tele o luitau tatou te feagai i le olaga.
(Tad R. Callister, “Our Identity and Our Destiny” [Sauniga lotu a le Iunivesete o Brigham Young, 14 Aok, 2012], 1, speeches.byu.edu)
E mafai faapefea e le malamalama i lo tatou faasinomaga o ni fanau a le Atua ona fesoasoani ia i tatou i luitau tatou te feagai?
O a nisi o faatosinaga faalelalolagi e mafai ona faalavelave ia i tatou mai le manatuaina o lo tatou faasinomaga paia?
O le a se mea e mafai ona fesoasoani ia i tatou e manatua ma faamamalu ai lo tatou faasinomaga paia?
O se malamalamaaga tonu o le Tama Faalelagi
Mafaufau mo sina taimi e uiga i lou lava malamalama i le Tama Faalelagi ma lou sootaga ma Ia. Mafaufau po o a faamanuiaga ua e oo i ai ma e mafai ona oo i ai i le lumanai ona o oe o Lona atalii/afafine. Mafaufau po o le a se mea e ono ese i lou olaga pe afai e sili atu lou iloaina o Ia ma lagonaina le latalata atili atu ia te Ia.
Sa faamamafa mai e Brother Brian K. Ashton, sa i ai muamua i le Au Peresitene Aoao o le Aoga Sa, le aafiaga o le i ai o se malamalamaaga sa‘o i le Tama Faalelagi ma lo tatou sootaga ia te Ia:
Ata
Brother Brian K. Ashton - Sunday school General Presidency Second Counselor. Official Portrait 2018.
O le i ai “o se manatu sa’o i uiga, atoatoaga, ma uiga paia o le [Tama Faalelagi]” e taua lea i le faatinoina o le faatuatua ia lava e maua ai le faaeaga [Lectures on Faith (1985), 38]. O se malamalamaaga sa’o i uiga o le Tama Faalelagi e mafai ona suia ai le auala tatou te vaai ai ia i tatou lava ma isi ma fesoasoani ai tatou te malamalama i le alofa naua o le Atua mo Lana fanau ma Lona finagalo sili e fesoasoani ina ia avea ai i tatou faapei o Ia. O se manatu sese e uiga i Lona natura e mafai ona tatou lagonaina ai e peiseai o le a matuā le mafai lava ona tatou toe foi atu i Lona afioaga.
(Brian K. Ashton, “O Le Tama,” Ensign po o le Liahona, Nov. 2018, 93–94)
O se tasi o auala e mafai ai ona tatou maua se malamalamaaga sa‘o e uiga i lo tatou Tama Faalelagi o le suesue lea o tusitusiga paia e uiga ia te Ia.
Faaaoga ni nai minute e faitau ai ma mafaufau loloto i nisi o tusitusiga paia o loo aoao mai ai le uiga o le Atua. E mafai ona e faaaogaina mau faasino o tusitusiga paia nei, pe e mafai foi ona e saili mo nisi i le Topical Guide, “God, Attributes of” (o lenei ulutala o loo lisi ai isi ulutala e te saili i ai) po o le Taiala i Tusitusiga Paia, “Atua, AigaAtua” (o le soavaega i le Atua le Tama). I lau api faamaumau mo suesuega, lisi ai mea o loo aoao mai e nei tusitusiga paia ia te oe i uiga ma uiga auaumama o le Tama Faalelagi ma lou sootaga ma Ia.
O a ni mea moni na e aoaoina e uiga i le Atua sa sili ona anoa ia te oe? Aisea e anoa ai?
E mafai faapefea e mea ua e aoaoina ona aafia ai ou lagona po o ai oe ma le tagata e mafai ona avea ai oe?
O a mea ua musuia oe e fai e fua i mea sa e aoaoina ma lagonaina i lenei aso?
Tala Auiliili ma Faamatalaga o Talaaga
E mafai faapefea e le iloaina o a’u o se atalii/afafine o le Atua ona fesoasoani ai ia te a’u?
Sa aoao mai Peresitene Dallin H. Oaks o le Au Peresitene Sili:
Ata
Official Portrait of President Dallin H. Oaks taken March 2018.
Mafaufau i le mamana o le manatu o loo aoao mai i la tatou pese faapelepele “O le Atua Lo’u Tama” [Viiga, nu. 184]. … O le tali lea i se tasi o fesili tele o le olaga, “O ai a’u?” O a’u o se atalii/afafine o le Atua e i ai sona gafa i la le agaga i ni matua faalelagi. O lena tupuaga e na te faamatalaina lo tatou gafatia totofi e faavavau. O lena manatu mamana o se vaifofo aoga. E mafai ona faamalosia ai i tatou taitoatasi e faia filifiliga amiotonu ma saili ai i mea silisili o loo ua ia i tatou.
(Dallin H. Oaks, “Powerful Ideas,” Ensign, Nov. 1995, 25)
Aisea tatou te le talanoa atili ai e uiga i lo tatou Tina i le Lagi?
“O le Ekalesia a Iesu Keriso o le Au Paia o Aso e Gata Ai ua aoao mai e faapea o tagata soifua uma, o alii ma tamaitai, o ni fanau pele i la le agaga a ni matua faalelagi, o se Tama Faalelagi ma se Tina Faalelagi. …
“E pei o le tele o isi upumoni o le talalelei, o lo tatou malamalama o i ai nei e uiga i se Tina i le Lagi e le atoatoa. Ae ui i lea, ua lava le malamalama ua tuuina mai ia i tatou e talisapaia ai le paia o lenei aoaoga faavae ma malamalama ai i le mamanu paia ua faatuina mo i tatou o ni fanau a ni matua faalelagi” (Gospel Topics Essays, “Mother in Heaven,” ChurchofJesusChrist.org).
E faapefea ona aoao mai le soifuaga o Iesu Keriso e faatatau i le uiga o le Tama Faalelagi?
Na aoao mai Elder Jeffrey R. Holland o le Korama a Aposetolo e Toasefululua:
Ata
Official Portrait of Elder Jeffrey R. Holland. Photographed January 2018.
I mea uma lava na afio mai Iesu e fetalai ai ma fai, e aofia ai ma aemaise lava i Lana taulaga togiola ma le ositaulaga, na Ia faaali mai ai ia i tatou po o ai ma pe faape’i foi le Atua lo tatou Tama Faavavau, i Lana tuuto atoa atu i Lana fanau i soo se augatupulaga ma i soo se atunuu. Sa taumafai Iesu e ala i le upu ma galuega e faaali ma faapatino mai ia i tatou le natura moni o Lona Tama, lo tatou Tama oi le Lagi. …
O le fafagaina la o e fia aai, faamalolo i e mamai, aoaiina o tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama, o Ia o le e “alofa tunoa ma alofa mutimutivale, e telegese lona toasa, e onosai ma tumu i le agalelei” [Lectures on Faith (1985), 42]. I Lona soifuaga aemaise lava i Lona maliu, na faailoa mai ai e Keriso, “O le alofa lenei o le Atua ua ou faaali atu ia te outou, e faapena foi ma lo’u nei lava alofa.” I le faatinoina atoatoa e le Alii o le tausiga atoatoa a le Tama, i lo Laua puapuagatia faatasi ma le faanoanoa tutusa mo agasala ma lototiga o i tatou, uma, tatou te iloa ai le uiga tupito o loo i totonu o le folafolaga: “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. E lei aauina mai e le Atua lona Alo i le lalolagi ina ia faasala i le lalolagi; a ia faaolaina le lalolagi ia te ia” [ Ioane 3:16–17 ].
Mafaufau e faaali atu se ata o se matua ma se tamaitiiti ma valaaulia tagata aoga e manatunatu i le taua o le sootaga i le va o se matua ma se tamaitiiti. Fai fesili e pei o le “O le a le ituaiga o aafiaga a se matua i le olaga o se tamaitiiti?” ma le “Na faapefea e ou matua ona aafia le ituaiga tagata ua i ai oe ma le tagata o le a avea ai oe?” Fautuaina le vasega e mafaufau loloto i la latou sootaga faatasi ai ma le malamalama i le Atua ma mafaufau pe mafai faapefea e le iloaina lelei o Ia ona aafia ai o latou olaga. Manatua: Afai e te filifili e fai lenei gaoioiga, ia nofouta i le mea moni e faapea, o nisi tagata aoga atonu e leai se sootaga lelei ma o latou matua. Mo i latou, o le fai atu o se isi fesili e pei o le “O le a le ituaiga o aafiaga e te manao e avea ai oe i olaga o sau lava fanau?” atonu e aoga.
