Atamai i Aoaoga Faavae: Mataio 16:15–19
Na Fetalai Iesu, “Ou te Avatu foi Ia Te Oe Ki o le Malo”
I le lesona talu ai, sa e aoao ai e uiga i le taua o ki o le perisitua ma le ala na faamatuu mai ai e le Faaola Ana ki i perofeta i le lalolagi. O le lesona lenei e maua ai le avanoa e faateleina ai lou malamalamaaga i atamai o lenei aoaoga faavae ao e tauloto mau faasino ma fasifuaitau o mau autu, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga patino o le olaga.
Gaoioiga e Mafai ona Fai e Aoao Mai Ai
Faamalamalama
Vaai faalemafaufau i se tasi e te iloa na faalogo i le faaupuga “ki o le perisitua” ae e lei malamalama i ai. I le faaaogaina o le Mataio 16:15-19, faamalamalama atu po o a ki o le perisitua ma pe aisea e taua ai. A mafai, faasoa atu lau faamalamalamaga i se uo po o se tagata o le aiga. Atonu foi e fesoasoani le faitau i nisi o faamatalaga i vaega 3.0–3.4.1.1 o le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai le ChurchofJesusChrist.org po o le polokalaa o le Gospel Library.
Tusi i lalo lau faamalamalamaga o ki o le perisitua. Afai na mafai ona e faasoa atu lau faamalamalamaga i se isi tagata, faamatala puupuu pe na faapefea.
Tauloto
Faataitai le taulotoina o le fasifuaitau o le mau autu mo le Mataio 16:15–19 : “Na fetalai Iesu, ‘Ou te avatu foi ia te oe ki o le malo.’” Afai e mafai, lolomi le pepa tufa lenei ma oti ese ki taitasi. I se isi faiga, tusi le ata o ni ki i luga o se fasi pepa ona oti ese lea. Tusi se upu se tasi o le fasifuaitau i ki taitasi. Tusi foi le mau faasino mo le atamai i aoaoga faavae, Mataio 16:15–19, i luga o se ki. Faafefiloi ia ki, ma taumafai e toe tuu i le faasologa sao. Toe fai lenei gaoioiga seia oo ina e taulotoina le mau faasino ma le fasifuaitau. Atonu e te fiafia e tausia lau lava taimi ma taumafai e faaleleia atili le televave o au taumafaiga taitasi.
Uunaia tamaiti aoga e sefe a latou ki mo se gaoioiga toe iloilo i se lesona i le lumanai.
Faataitai le faaaogaina
Toeiloilo ma tamaiti aoga ia mataupu faavae o le mauaina o le malamalama faaleagaga. O se tasi o auala e faia ai lenei mea o le valaaulia lea o se tamaitiiti aoga e faitau leotele se fuaiupu e uiga i se tasi o mataupu faavae o le mauaina o le malamalama faaleagaga mai parakalafa 5-12 o le Tusi Autu o Mau Tauloto Faaleaoaoga Faavae (2022). Ona fai atu lea i le vasega e faailoa mai le mataupu faavae autu sao. Toe fai le gaoioiga faatino lea ma tamaiti aoga eseese e fesoasoani i le vasega ina ia masani atili ai i mataupu faavae taitasi.
Faaalu sina taimi e iloilo ai mataupu faavae o le mauaina o le malamalama faaleagaga i parakalafa 5–12 o le Tusi Autu o Mau Tauloto Faaleaoaoga Faavae (2022) a o lei agai atu i le gaoioiga o le faaaogaaga faataitai.
O le vaaiga lenei e mafai ona suesueina taitoatasi, i ni vaega toalaiti, pe faatasi foi o se vasega. O le autu o le vaaiga e mafai ona suia ina ia faafetaiaia atili ai manaoga o tamaiti aoga. Mo se faataitaiga, o le vitio ua vaai i ai Vanya i faasalalauga faaleagafesootai atonu o se tagata o le Ekalesia o loo fai mai na te iloa le aso ma le taimi o le Afio Mai Faalua.
Ua vaai lau uo o Vanya i se vitio i faasalalauga faaagafesootai lea o loo faitioina ai e se tagata o le Ekalesia ia aoaoga faavae o le Ekalesia. O lenei tagata e atamai ma faatauanau ma e valaau atu i le Ekalesia e suia nisi o aoaoga faavae patino. Latou te faaaogaina foi tusitusiga paia e lagolago ai o latou manatu. E le o mautinoa e Vanya po o le a se mea e mafaufau i ai po o le auala e tali atu ai.
-
O a ni fesili po o atugaluga atonu o loo i ai ia Vanya?
Ua auina atu e Vanya ia te oe se feau tesi e fesiligia ai se fesoasoani. Mafaufau pe faapefea ona e tali atu e foia ai lona atugaluga.
Toe tusi ni feau tesi se tolu ia Vanya. Ia aofia ai mea nei:
-
Feau tesi 1: O upumoni e uiga i le auala e faaaoga ai e le Alii ia perofeta ma ki o le perisitua i le ata o le faaolataga lea e mafai ona fesoasoani ia Vanya e vaai ai i lenei tulaga mai se vaaiga e faavavau.
-
Feau tesi 2: Punaoa na atofaina mai le lagi e mafai ona faaaoga e Vanya e aoao atili ai e uiga i perofeta ma ki o le perisitua. (Ia aofia ai ia le itiiti ifo ma le tasi se fuaitau faapitoa o tusitusiga paia po o se faamatalaga faaperofeta.)
-
Feau tesi 3: Fautuaga mo auala e mafai ai e Vanya ona galue ma le faatuatua ia Iesu Keriso i le agai i luma. Afai e mafai, ia aofia ai se aafiaga patino e aofia ai ki o le perisitua ma le auala na fesoasoani ai le faaaogaina o na ki ia te oe e faalatalata atili atu ai ia Iesu Keriso.
A o galulue tamaiti aoga i lenei gaoioiga, vaavaai mo soo se tasi atonu o loo tauivi. Afai e talafeagai, talanoa filemu ma i latou pe faapefea ona latou tali atu. Afai o loo tauivi le toatele o le vasega, mafaufau e taofi le gaoioiga ma fai atu i tamaiti aoga e faasoa mai o latou manatu mo le tali atu ia Vanya. Mafaufau e faaiu le lesona i le tuuina atu o le molimau na faamatuu atu e Iesu Keriso Ana ki o le perisitua i perofeta ma aposetolo i Le Ekalesia a Iesu Keriso o le Au Paia o Aso e Gata Ai.
Iloiloga o le atamai i aoaoga faavae
I se vasega mulimuli mai, iloilo le mau faasino o aoaoga faavae ma fasifuaitau o mau autu e ala i le valaauliaina o tamaiti aoga e faaaoga ki na latou foafoaina e toe fatu ai le mau faasino ma le fasifuaitau o mau autu Afai e aoga, fai atu ia i latou e faafefiloi a latou ki ma toe tuu i le faasologa sao mo ni nai taimi.