“O Tusi Paia, e Mafaia ona Faapoto Ia Te Oe e iu ai i le Faaolataga”
Ata
A young man sits on his bed and reads the scriptures. He is dressed in a blue suit and reading in Spanish.
O le suesue soo i tusitusiga paia e mafai ona faamanuiaina ai lou olaga i le tele o auala, e aofia ai le fesoasoani ia te oe e faatonufolau i le tele o luitau o aso e gata ai. O lenei lesona o le a fesoasoani ia te oe e tauloto ai mau faasino o aoaoga faavae ma le fasifuaitau autu o le mau mo le 2 Timoteo 3:15–17 , faamatala le aoaoga faavae, ma faaaoga mataupu faavae o le mauaina o le malamalama faaleagaga i se tulaga moni o le olaga.
Faatinoina o se tala. O le faatinoina o se tala e mafai ona fesoasoani i tagata aoga ia maua se aafiaga taua e faamalamalama ai upumoni o le talalelei ma malamalama atili ai i le ala e mafai ai ona latou faatino i tulaga moni o le olaga.
Sauniuniga a le tagata aoga: Valaaulia tagata aoga e mafaufau e uiga i soo se luitau e taofia ai i latou mai le suesueina o tusitusiga paia i aso taitasi. Uunaia i latou e mafaufau i ni auala e mafai ai e mataupu faavae o le mauaina o le malamalama faaleagaga ona fesoasoani ia i latou e fofo ai o latou faafitauli.
Gaoioiga e ono Mafai Ona Aoao Ai
O lenei lesona o le fuaitau o le atamai i aoaoga faavae ua fuafuaina ia aoaoina pe a maea ona fai le lesona o le “2 Timoteo 3,” o le lesona faatatau mo le fuaitau o le atamai i aoaoga faavae o le 2 Timoteo 3:15–17. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e talafeagai i le vaiaso lava lena.
Tauloto ma faamatala
Tusi se ata o se tusi o tusitusiga paia o loo matala ia faaaoga uma ai pe faaaoga ai le tele o le avanoa i se fasipepa. I le pito i luga o lau ata, tusi ai le 2Timoteo 3:15–17. I totonu o lau atatusi, tusi ai le fasifuaitau autu o le mau e faapea O tusitusiga paia … e mafai ona faapoto ia te oe e iu ai i le faaolataga. Ufiufi le fasifuaitau i se mea ma toe tusi mai i lou manatua. Siaki pe o sa’o lelei ma toe fai le gaoioiga mo ni nai taimi seia oo ina e faatumuina lau ata.
A uma ona tusi e tagata aoga a latou ata, mafaufau e vaevae tagata aoga i ni paga ma valaaulia i latou e feauauai i le tusiina o le fasifuaitau autu o le mau.
I le lesona talu ai na e aoaoina ai e faapea a o tatou suesue i tusitusiga paia, e mafai ona tatou maua le poto lea o le a taitai atu ai i tatou i le faaolataga e ala i le faatuatua ia Iesu Keriso. Toe faitau le 2 Timoteo 3:15–17 , ma vaavaai mo faamaoniga o lenei mataupu faavae, faapea foi ma isi faamanuiaga e mafai ona tatou maua mai i le suesueina o tusitusiga paia.
Mafaufau e vaevae tagata aoga i ni vaega toalaiti ina ia mafai ona latou faatinoina i se tala faatino le ata faataitai lenei. Taumafai e fealuai solo i le potu e faalogo pe faapefea e “faifeautalai” ona aoao atu le “tagata sailiili.” Mafaufau e fesili atu mulimuli ane po o a ni mea na lagona e tagata aoga sa faigofie pe faigata e uiga i lea aafiaga.
Manatu faapea o oe o se faifeautalai o loo aoaoina se tamaitai talavou e igoa ia Susana. Sa talia e Susana le savali o le Toefuataiga ae sa musu e faitau i fuaitau o tusitusiga paia na fautuaina atu e oulua ma lau soa. I le taimi o se asiasiga, ua e fesili atu ia Susana po o le a se mea o taofia ai o ia mai le faitauina o tusitusiga paia. Sa tali mai e le fiafia o ia e faitau tusitusiga paia ma e na te iloaina e faafiu tagata.
I le faaaogaina o le 2 Timoteo 3:15–17 , tusi se tali e faamalamalama ai faamanuiaga ma aoga o le suesue i tusitusiga paia i se auala e ono faaosofia ai Susana. Afai e mafai, mafaufau e faaopoopo ni aafiaga ma molimau patino e fai ma se vaega o lau tali.
Faataitai le faaaogaina
Afai e te aoteleina mataupu faavae e tolu o le mauaina o le malamalama faaleagaga i se fuaiupu se tasi mo i latou taitasi, o le a sau tala e fai atu?
Afai e manaomia, faaaoga ni nai minute e toe faamanatu ai parakalafa 5–12 o le “Mauaina o le Malamalama Faaleagaga” i le vaega o lePepa Autu o le Atamai i Aoaoga Faavae (2022).
Mafaufau e valaaulia se tagata aoga e filifili solo mai ma faitau leotele se tasi o fuaiupu o le aotelega mai soo se mataupu faavae e tolu o le mauaina o le malamalama faaleagaga. Fai atu i le vasega e faailoa mai po o le fea o mataupu faavae e faatatau i ai le fuaiupu. Toe fai le gaoioiga lenei mo ni nai taimi.
E tusa lava pe tatou te iloa ma malamalama i faamanuiaga o le suesueina o tusitusiga paia, o nisi taimi e mafai ona faigata ona faatino e le aunoa ma atoatoa.
O a nisi o luitau e mafai ona faigata ai ona suesue e le aunoa ma atoatoa ia tusitusiga paia?
Mafaufau e tusi tali a tagata o le vasega i luga o le laupapa.
I le taimi o le gaoioiga o mulimuli mai, mafaufau e tuuina atu se tatalo le leoa mo lau vasega ina ia latou taliaina uunaiga a le Agaga ina ia mafai ai ona faaaoga mataupu faavae o le mauaina o le malamalama faaleagaga mo i latou lava.
Saili le taitaiga a le Agaga Paia e fesoasoani ia te oe e faailoa se faafitauli se tasi pe lua e taofia ai oe mai le suesueina e le aunoa ma le atoatoa o tusitusiga paia. (Afai e te le fetaiai ma ni faafitauli, mafaufau i ni faafitauli e ono feagai ma se uo po o se tagata o le aiga.)
Tusi i lalo ia le itiiti ifo ma le tolu ni auala e mafai ona e faaaogaina ai mataupu faavae o le mauaina o le malamalama faaleagaga e fesoasoani ai ia te oe e faatoilalo nei faafitauli. Atonu o le a fesoasoani fesili ma manatu nei.
Mafaufau e tusi fesili nei e tolu i luga o le laupapa.
E mafai foi ona e valaaulia tagata aoga e mafaufau pe faapefea e le suesue e le aunoa ma le faamaoni o tusitusiga paia ona aafia ai lo latou alualu i luma e faavavau. E mafai ona latou mafaufau i soo se aafiaga lelei ua uma ona latou maua ma po o a upumoni e faavavau sa latou aoaoina mai na aafiaga.
E mafai faapefea ona e iloiloina faafitauli i au suesuega o tusitusiga paia mai se vaaiga e faavavau?
E mafai faapefea e upumoni o loo i le 2 Timoteo 3:15–17 ona fesoasoani ia te oe e maua ai se vaaiga e faavavau pe afai o e tauivi ai ma le suesueina o tusitusiga paia?
E mafai faapefea ona e saili le malamalama atili e ala i punavai mamana filifilia?
O nisi nei o ni nai manatu:
Saili fuaitau e uiga i le suesueina o tusitusiga paia i le Taiala i Tusitusiga Paia o loo maua i le ChurchofJesusChrist.org, ma vaavaai mo faamanuiaga ma folafolaga e mafai ona fesoasoani i lou faafitauli. O tusitusiga paia e pei o le Iosua 1:8 ; 2 Nifae 32:3 ; ma le Mataupu Faavae ma Feagaiga 1:37 atonu e aoga.
Fesili atu i se tasi e te faatuatuaina pe aisea latou te suesue ai a latou tusitusiga paia i aso taitasi ma pe faapefea ona latou fautuaina oe e faatoilalo lou faafitauli.
Sue faamatalaga mai le Au Pulega Aoao po o tusiga i mekasini a le Ekalesia e mafai ona fesoasoani. Mo se faataitaiga, o le faamatalaga lenei e mafai ona fesoasoani i se tasi o loo tauivi e sue se taimi mo le suesueina o tusitusiga paia.
O Elder Richard G. Scott (1928–2015) o le Korama a Aposetolo e Toasefululua, na aoao mai:
Ata
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.
O le fafagaina i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e toe faatulagaina mea e te faamuamua ia maua ai se taimi mo le suesueina o le afioga a le Atua. Afai o le tulaga lea, ia fai loa!
(Richard G. Scott, “Ia Avea le Faaaogaina o le Faatuatua ma Mea e te Faamuamuaina,” Ensign po o le Liahona, Nov. 2014, 93)
Faaaoga ni nai minute e amata ai i se tasi o mea o loo e mafaufauina.
E mafai faapefea ona e galue i le faatuatua e faatoilalo ai faafitauli i le suesueina atoatoa o tusitusiga paia i aso taitasi? Lisi ni manatu se tele i lau api faamaumau mo suesuega.
A lava se taimi, valaaulia ni nai tagata aoga e faasoa mai se tulaga iloga o o latou aafiaga i le taimi o lenei lesona. Faamanatu ia i latou o le tele lava, pe afai e le o i tatou uma, e feagai ma faafitauli i le suesueina atoatoa o tusitusiga paia i aso taitasi, ma o le faasoaina atu o o latou manatu, malamalamaga, ma aafiaga e mafai ai ona fesoasoani i isi tagata o le vasega. Faasoa foi ni manatu patino ma molimau.
Toe faamanatu le atamai i aoaoga faavae
I le taimi o se lesona o le a sosoo ai, faaaoga ni nai minute e toe faamanatu ai le tusi faasino o le mau ma le fasifuaitau autu o le mau mo lenei fuaitau o le atamai i aoaoga faavae e faaaoga ai le gaoioiga tauloto lava lea e tasi mai le amataga o lenei lesona.
Galuega Faatino Faaopoopo e Aoao Mai Ai
Punavai mamana filifilia
A o mafaufau tagata aoga i auala e saili ai le fesoasoani e ala i punaoa mamana ua filifilia, mafaufau e valaaulia se tagata aoga e suesue i upega tafailagi e iloa ai pe fia ni tusi mo le “fesoasoani ia te oe lava” o loo maua i le taimi nei. Atonu o le a latou vaai i le fia sefulu afe e filifili mai ai. Mafaufau e fai atu fesili e pei o nei:
Aisea e te manatu ai o loo tele naua tusi fesoasoani mo le tagata lava ia i le lalolagi?
E mafai faapefea ona avea tusitusiga paia ma se punavai mamana o le fesoasoani ma le taitaiga mo o tatou olaga?
Valaaulia tagata aoga e fefaasinoa’i le 2 Timoteo 3:15–17 ma le Mataupu Faavae ma Feagaiga 88:118 , ma fesili atu i tagata aoga po o le a so latou manatu i le uiga o le fetalaiga a le Alii i “tusi sili ona lelei.” Mafaufau e faamanatu i tagata aoga e tele punaoa taua i le lalolagi e fesoasoani ia i tatou e atiina ae ai le poto ma faatoilalo ai luitau. Valaaulia tagata aoga e toe faamanatu ia parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae ma faailoa mai upu po o fasifuaitau o loo faamamafa mai ai mau paia o se punavai taua o le poto ma le malamalama mo o latou olaga.
O se faataitaiga o le faatinoina i le faatuatua
Mafaufau e fesili atu i tagata aoga po o le a se mea e mafai ona latou faia e faatino ai le faatuatua pe afai latou te tauivi e malamalama i tusitusiga paia. A uma ona faasoa mai e tagata aoga o latou manatu, mafaufau e faaopoopo nisi o faataitaiga nei po o faataitaiga uma foi.
Tatalo mo le malamalama a o lei suesue.
Faitau ulutala o mataupu ina ia maua ai se vaaiga aoao.
Faataitai ona saili ia malamalama i tusitusiga paia i le lotu ma i le seminare e ala i le fai atu o fesili i faiaoga.
Faitau faatasi i nisi o taimi ma se tasi e te faatuatuaina, e pei o se matua, o le e mafai ona fesoasoani e faamalamalama atu tusitusiga paia ia te oe.
Faaaoga tusi lesona o loo maua i le polokalama o le Gospel Library po o i luga o le ChurchofJesusChrist.org, e pei o le Tusi Lesona a le Tagata Aoga Seminare.