Samtang nagpadayon si Jesukristo sa Wali sa Bukid, gitudlo Niya kon giunsa Niya pagtuman ang balaod ni Moises, ug gipadayag Niya ang mas taas nga balaod sa ebanghelyo. Kini nga leksiyon makatabang kanimo nga magpakabuhi sa mas taas nga balaod ni Kristo aron mahimo kang mas mahisama sa Langitnong Amahan.
Si Jesukristo nagtudlo sa mas taas nga balaod sa ebanghelyo
Kanus-a nakatabang kanimo ang pagkaanaa sa mas taas nga lugar sa pagpausbaw sa imong pagtan-aw?
Unsa ang imong nakit-an nga wala nimo makita kaniadto?
Sama nga ang pagtan-aw gikan sa mas taas nga lugar makahatag kanato og mas maayong panglantaw, ang Manluluwas nagtudlo sa Iyang mga disipulo og mas taas nga balaod aron hatagan sila og mas maayong panglantaw. Kining mas maayong panglantaw makatabang kanato nga mahimong mas mahisama Kaniya ug sa Langitnong Amahan.Sa Mateo 5:17–20 ang Manluluwas nagtudlo nga Siya mianhi sa pagtuman sa balaod ni Moises—dili sa pagwagtang sa bisan unsang malungtarong mga kamatuoran diha sa balaod. Gipahiuli ni Jesukristo ang kahingpitan sa ebanghelyo nga nawala tungod sa kadaotan ug sa apostasiya. Gisakto Niya ang sayop nga mga pagtulon-an ug gituman ang mga panagna nga gihimo sa mga propeta sa Daang Tugon. Ang Mateo 5:21–47 naglakip sa mga pagtulon-an sa Manluluwas mahitungod sa mga balaod ug mga tradisyon nga gipalambo sa mga Judeo ubos sa balaod ni Moises. Niini nga mga bersikulo, gipasabot ni Jesukristo ang tinuod nga kahulogan sa mga balaod ni Moises ug gitudlo Niya ang mas taas nga paagi sa pagkamatarong.
Basaha ang Mateo 5:38-42, nga mangita og usa ka ehemplo sa sugo gikan sa balaod ni Moises ug ang taas nga balaod nga gitudlo ni Jesus sa Iyang mga disipulo.
Unsa ang usa ka butang nga gituki sa Manluluwas isip bahin sa balaod ni Moises ug uban pang mga tradisyon nga gitakda sa mga tawo?
Unsang mas taas nga balaod ang gihatag sa Manluluwas agi og hulip niini?
Sa unsa nga paagi nga ang pagtuman niining mas taas nga balaod mas makatabang sa usa ka tawo kay sa daan nga balaod aron mahimong mas mahisama sa Langitnong Amahan?
1. Ikonsiderar ang imong personal nga mga sitwasyon, ug mainampoong mopili og usa sa mosunod nga mga kalihokan nga angayng kompletohon.
Kalihokan A: Unsaon nako pagkontrol ang akong kasuko?
Pamalandongi ang kataposang higayon nga nasuko ka.
Ngano kaha sa imong hunahuna nga importante man ang pagkontrol sa kasuko?
Basaha ang Mateo 5:21-24, ug pangitaa ang mas taas nga balaod nga gitudlo sa Manluluwas mahitungod sa kasuko.
Aduna bay bisan unsa nga imong ikonsiderar nga markahan niini nga mga bersikulo? Kon mao, ngano man?
Imahe
Former Official Portrait of Elder Lynn G. Robbins. Photographed March 2017. Replaced October 2019 (with Telescope ID: 2298123)
Giklaro ni Presidente Thomas S. Monson (1927–2018) ang atong tahas sa pagkontrol sa atong kasuko.
Imahe
Official portrait of President Thomas S. Monson, 2008.
Ang pagkasuko mao ang pagnunot ngadto sa impluwensya ni Satanas. Walay usa nga makapahimo kanato nga masuko. Ato kining pagpili. Kon magtinguha kita nga makabaton og tukma nga espiritu uban kanato sa tanang higayon, kinahanglan kitang mopili sa paglikay gikan sa pagkasuko. Ako mopamatuod nga kana posible.
(Thomas S. Monson, “Disiplinaha ang Imong Mga Pagbati, O Akong Igsoon,” Liahona, Nob. 2009, 68)
Kon gipili nimo ang kalihokan A, tubagi ang mosunod nga mga pangutana diha sa imong journal sa pagtuon.
Sa unsang mga paagi nga ang Manluluwas usa ka ehemplo sa pagpakabuhi niining mas taas nga balaod?
Unsa ang imong mabuhat aron magamit ang gahom sa Manluluwas aron matabangan ka sa pagpakabuhi niining mas taas nga balaod?
Kalihokan B: Nganong angay man nakong tangtangon ang akong malaw-ay nga mga hunahuna?
Imahe
A dandelion weed.
Unsa kaha ang mahitabo kon ang mga sagbot dili ibton gikan sa usa ka hardin?
Sa unsang paagi kaha nga sama sa mga sagbot sa usa ka hardin ang dili angay nga mga ideya sa atong mga hunahuna?
Basaha ang Mateo 5:27–28, ug pangitaa ang mga sala nga gipasidaan sa Manluluwas.
Si Elder Jeffrey R. Holland sa Korum sa Napulog Duha ka Apostoles naghisgot sa gibug-aton sa sala nga kahigal:
Imahe
Official Portrait of Elder Jeffrey R. Holland. Photographed January 2018.
Nganong ang kahigal usa man ka makamatay nga sala? Kana, agig dugang sa hingpit nga epekto niana diha sa atong mga kalag, nagtuo ako nga sala kini tungod kay mohugaw kini sa labing taas ug labing balaan nga pakigrelasyon nga gihatag sa Dios dinhi kanato sa mortalidad—ang gugma nga gibatunan sa lalaki ug sa babaye alang sa usag usa ug ang tinguha nga ang magtiayon kinahanglan magbaton og mga anak ngadto sa usa ka pamilya gituyo nga magmahangturon. … Ang gugma mohimo kanato og kinaiya sa pagduol ngadto sa Dios ug sa ubang mga tawo. Ang kahigal, sa laing bahin, dili gayud diosnon ug magmaya sa kaugalingong pagpatuyang. Ang gugma mohimo kanato nga manggihatagon ug bukas ang kasingkasing; ang kahigal mohimo kanato nga gutom.
(Jeffrey R. Holland, “Walay Luna alang sa Kaaway sa Akong Kalag,” Liahona, Mayo 2010, 44–45)
Ingon nga kita makatangtang sa mga sagbot gikan sa usa ka hardin, makatangtang usab kita sa dili maayong ideya sa atong mga hunahuna. Basaha ang Mateo 5:29–30. Ang Hubad ni Joseph Smith sa Mateo 5:33–34 nagpasabot nga si Jesus mihatag niini nga kasulatan isip usa ka sambingay kalabot sa atong mga sala ug nga kinahanglang isalikway nato ang atong mga sala, aron dili kita ipahimulag ug itambog sa kalayo . Ikonsiderar ang pagmarka sa gitudlo sa Manluluwas.
Unsa ang imong nabasa nga importante diha kanimo? Unsa ang imong mga pangutana mahitungod niini nga mga bersikulo?
Kon gipili nimo ang kalihokan B, tubagi ang mosunod nga mga pangutana diha sa imong journal sa pagtuon.
Sa unsa nga mga paagi nga ang pagtangtang sa mga sala sa atong mga kinabuhi mahimong sama sa pagtangtang sa mata o pagputol sa kamot?
Unsang mga problema ang lagmit nga masinati nato kon mapakyas kita sa pagsunod sa tambag sa Manluluwas nga tangtangon ang mga sala sa atong kinabuhi?
Unsa ang imong mabuhat aron magamit ang gahom sa Manluluwas aron matabangan ka sa pagtangtang sa kahigal o uban pang dili maayong mga hunahuna?
Kalihokan C: Unsaon man nako pagtratar ang mga tawo nga dili nako ikasinabot?
Paghunahuna og tawo nga dili nimo ikasinabot kaayo.
Sa imong hunahuna, sa unsang paagi nga makaimpluwensiya sa imong relasyon sa imong Langitnong Amahan ang pagbaton og dili maayong mga pagbati para niining tawhana?
Basaha ang Mateo 5:43-47, ug pangitaa ang mas taas nga balaod nga gitudlo ni Jesus nga makatabang kanimo.
Unsa nga mga pulong ang nagpatigbabaw diha kanimo? Ngano kaha nga importante man kadto?
Si Presidente Dieter F. Uchtdorf mipasabot nga si Jesukristo ang perpektong ehemplo niini. Mahimo nimong tan-awon ang video nga “The Merciful Obtain Mercy” gikan sa code sa oras nga 10:46 hangtod sa 11:57, nga anaa sa ChurchofJesusChrist.org, o basaha ang teksto sa ubos.
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Sa kanunay, si Kristo ang atong ehemplo. Sa Iyang mga pagtulon-an sama sa Iyang kinabuhi, gipakita Niya kanato ang dalan. Gipasaylo Niya ang dautan, ang bulgar, ug kadtong nagtinguha sa pagpasakit ug paghimo og dautan Kaniya.
Miingon si Jesus nga sayon higugmaon ang nahigugma kanato; bisan ang daotan makahimo niana. Apan mitudlo si Jesukristo og mas taas nga balaod. Ang Iyang mga pulong milanog ngadto sa gatusan ka mga tuig ug magamit nato karon. Alang kini sa tanan nga gustong mahimo Niyang mga disipulo. Alang kini kaninyo ug kanako: “Higugmaa ang inyong mga kaaway, panalangini ang nagtunglo kaninyo, pagbuhat og maayo kanila nga nasuko kaninyo, ug pag-ampo kamo para kanila nga nagpasipala kaninyo, ug naglutos kaninyo” [Mateo 5:44; tan-awa usab sa mga bersikulo 45–47].
Kon puno ang atong kasingkasing sa gugma sa Dios, kita mahimong “mapuanguron sa usag usa, mga malulot og kasingkasing, magpinasayloay [sa usag usa], maingon nga [kita gipasaylo] sa Dios tungod kang Kristo” [Mga Taga-Efeso 4:32].
(Dieter F. Uchtdorf, “Ang Maloloy-on Magadawat og Kalooy,” Liahona, Mayo 2012, 76)
Kon gipili nimo ang kalihokan C, tubagi ang mosunod nga mga pangutana diha sa imong journal sa pagtuon.
Unsa ang gibati sa Manluluwas niadtong dili mabinationg nagtratar Kaniya?
Unsa ang imong mga kasinatian sa pagsulay sa paghigugma sa imong mga kaaway o sa pag-ampo para niadtong dili mabination kanimo?
Unsa kaha ang imong mabuhat aron magamit ang gahom sa Manluluwas aron matabangan ka sa paghigugma sa imong mga kaaway?
Pagpakabuhi sa mas taas nga balaod
Pamalandongi kon unsang elemento sa mas taas nga balaod sa imong hunahuna ang kinahanglan nimong ipokus nga sundon. Ikonsiderar ang pagpangayo sa Langitnong Amahan og pasaylo ug tabang samtang maningkamot ka nga maghinulsol ug magsunod niini nga balaod. Pangayoa ang giya sa Espiritu aron mahibaloan ang mga aksiyon nga angayng buhaton. Mahimo kang makigsulti sa imong mga ginikanan, bishop, o laing lider sa Simbahan aron matabangan ka nila sa pagpakabuhi subay niini nga balaod.
Ang jot mao ang pinakagamay nga letra sa alpabeto sa Hebreo. Ang tittle usa ka gamay nga marka nga nagpaila sa lain-laing paglitok sa mga pulong sa sinulat nga pinulongan. Gituki sa Manluluwas kini nga mga elemento sa pagsulat aron ipaila nga tumanon Niya ang kada bahin sa balaod ni Moises hangtod sa pinakagamay nga detalye.
Ang pagpanapaw mahitabo kon ang duha ka tawo adunay sekswal nga relasyon samtang ang usa o duha sa sad-an nga mga partido minyo sa laing tawo. (Tan-awa sa Giya ngadto sa mga Kasulatan, “Panapaw,” scriptures.ChurchofJesusChrist.org.)
Mateo 5:43. Asa naggikan ang pamahayag nga “Higugmaa ang imong higala, ug dumti ang imong kaaway”?
Ang sugo nga “higugmaa ang imong silingan” anaa sa Levitico 19:18, pero walay kasulatan sa Daang Tugon ang nagsugo nga dumtan ang atong kaaway. Makita nga gipamulong sa Manluluwas ang unsay komon sa Iyang panahon.
