Doktrinal nga Kahanas: Mateo 5:14–16
“Ipadan-ag ang Inyong Kahayag atubangan sa Mga Tawo”
Ang Manluluwas misugo sa Iyang mga disipulo nga magmahimong ehemplo sa uban pinaagi sa pagsunod Kaniya. Kini nga leksiyon makatabang kanimo sa paggamit sa mga baroganan sa pag-angkon og espirituhanong kahibalo aron mahimong ehemplo sa uban ug mahiduol sa Manluluwas.
Isag-ulo ug ipasabot
Basaha ang Mateo 5:14–16.
Pagdrowing og hulagway sa mahinungdanong hugpong sa mga pulong sa kasulatan nga “Ipadan-ag ang inyong kahayag atubangan sa mga tawo” ug ang pakisayran niini, Mateo 5:14–16. Samtang nagdrowing ka, paghunahuna og mga paagi aron ilakip ang pakisayran aron matabangan ka nga mahinumdoman kini.
Samtang nagtan-aw sa paghulagway, balika ang pakisayran ug ang mahinungdanon nga hugpong sa mga pulong sa kasulatan sa pipila ka higayon. Unya ayaw tan-awa, ug sulayi sa pagbalik ang pakisayran ug ang importanteng hugpong sa mga pulong sa kasulatan gikan sa panumdoman.
Ikonsiderar ang pagpakigbahin sa imong paghulagway ngadto sa usa ka sakop sa pamilya o higala ug ipasabot ang kamatuoran gikan sa tudling.
Pagbansay sa paggamit
Niini nga pagbansay sa paggamit, gamiton nimo ang mga baroganan sa pag-angkon og espirituhanong kahibalo aron matuki kon unsaon nga mahimong ehemplo sa uban ug dapita sila nga mopaduol sa Manluluwas.
Rebyoha ang mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).
1. Sa imong journal sa pagtuon, i-summarize sa duha o tulo ka kapahayag ang kada usa sa mga baroganan sa pag-angkon og espirituhanong kahibalo.
Basaha ang mosunod nga sitwasyon, ug hunahunaa kon unsaon kaha nimo pagtubag kon ikaw ang anaa sa sitwasyon ni Raul.
Si Raul, usa ka bag-ong na-orden nga priest, anaa kauban sa usa ka grupo sa mga higala sa dihang ang pipila kanila nagsugod sa pagsulti og malaw-ay nga mga komedya ug nagsulti og dili maayo mahitungod sa usa ka tawo nga nailhan ni Raul. Dili komportable si Raul ug nakahibalo siya nga sayop ang ilang gibuhat. Samtang naghunahuna siya kon unsay buhaton, ang iyang higala nga si Jesse, nga usa ka miyembro sa laing relihiyon ug gidayeg gayod ni Raul, miduol kang Raul ug miingon, “Uy, nganong seryoso man ka?”
Ikonsiderar ang kada usa sa mga baroganan sa pag-angkon og espirituhanong kahibalo aron matabangan ka sa pagbuhat og tubag.
Susiha ang mga konsepto ug mga pangutana nga adunay mahangtorong panglantaw
Pagpili og usa sa mga tawo sa sitwasyon (si Jesse o ang tawo nga gibiaybiay).
2. Tubaga ang mosunod nga mga pangutana diha sa imong journal sa pagtuon:
-
Unsa kaha sa imong hunahuna ang gibati sa Ginoo mahitungod sa tawo nga imong gipili?
-
Sa unsang paagi nga ang pagtan-aw niining tawhana sama sa pagtan-aw kanila sa Ginoo makaapekto sa pagtubag ni Raul sa pangutana ni Jesse?
Pagtinguha pa og dugang nga panabot pinaagi sa balaanong gitudlo nga mga tinubdan
3. Tubaga ang mosunod nga mga pangutana diha sa imong journal sa pagtuon:
-
Sa unsang paagi nga makatabang para kang Raul ang paghinumdom ug paggamit sa mga baroganan diha sa Mateo 5:14–16?
-
Sa imong hunahuna, unsa ang uban pang balaanong gitudlo nga mga tinubdan ang makatabang kang Raul?
Lihok inubanan sa hugot nga pagtuo
4. Tubaga ang mosunod nga mga pangutana diha sa imong journal sa pagtuon:
-
Ngano kaha nga lisod man para kang Raul ang paglihok inubanan sa hugot nga pagtuo niini nga sitwasyon?
-
Unsa man ang imong marekomendar nga mahimong buhaton ni Raul aron molihok inubanan sa hugot nga pagtuo?
Paghunahuna og sitwasyon nga pareho sa kang Raul nga imong giatubang karon o lagmit nga maatubang sa umaabot.
-
Sa unsang paagi nga makatabang kanimo ang imong nakat-onan karon nga mahimong ehemplo sa uban?