Pagpasidungog ug Pagpakita og Gugma alang sa Manluluwas
Imahe
lawas sa gilansang nga Kristo giputos og puti nga panapton sa paglubong
Sa dihang namatay si Jesus, “nauyog ang yuta ug napikas ang mga bato” (Mateo 27:51), apan usa ka butang nga mas mahinungdanon ang nahitabo sa templo: ang tabil ngadto sa Balaan sa mga Balaan napikas sa duha ka bahin. Human sa kamatayon sa Manluluwas, ang Iyang mga disipulo naningkamot pag-ayo aron makuha ang Iyang lawas ug mainampingong giandam kini alang sa paglubong. Kini nga leksiyon gituyo aron matabangan kamo nga masabtan ug mapamalandongan unsa ang nabuhat ni Jesukristo alang kanimo ug unsa ang imong mabuhat aron makapakita og pagpasidungog og pagpasalamat alang Kaniya.
Pagpasidungog niadtong mipanaw na
Ang mga tawo sa lainlain nga kultura adunay lainlain nga mga paagi sa paghandom ug pagpasidungog sa usa ka tawo kinsa namatay na. Paghunahuna og usa ka tawo nga imong gihigugma nga mitaliwan na, o pamalandongi kon unsa kini mahisama kon ang usa ka tawo nga suod nimo mitaliwan.
Unsa ang imong gusto (o ganahan ka ba) nga kanunay nga mahinumdoman bahin sa imong minahal?
Unsa ang imong buhaton aron magpasidungog o magpakita og pagmahal niadtong mga namatay na?
Ang mga tudling sa kasulatan niini nga leksiyon naghulagway sa kamatayon sa Manluluwas sa krus ug ang mga hitabo nga nahitabo dihadiha pagkahuman. Paggahin og gamay nga higayon sa pagpamalandong sa mosunod nga mga pangutana:
Unsa kaha ang imong bation kon nakasaksi ka sa pagkamatay ni Jesus?
Unsa ang imong gibati sa Iyang pagkamatay karon?
Sa unsang paagi nga gusto nimo nga hinumdoman ug pasidunggan Siya?
Sa imong pagtuon karon, tinguhaa ang giya sa Espiritu Santo aron matabangan ka nga mahibalo unsaon nimo paghinumdom, pagpasidungog, ug pagpakita og paghigugma alang sa Manluluwas.
Simbolismo sa tabil sa templo
Sa takna sa kamatayon ni Jesus adunay linog ug lain pang pisikal nga mga panghitabo, lakip na ang pagkadaot sa templo. Basaha ang Mateo 27:50-51 ug ikonsiderar ang pagmarka sa detalye bahin sa templo nga nasulat ni Mateo.
Imahe
Yano nga drowing sa plan view sa templo uban sa tabil
Ang karaang templo adunay duha ka lawak nga gibulag sa usa ka tabil, o kurtina. Kausa sa usa ka tuig, sa Adlaw sa Pag-ula, ang high priest milabay gikan sa Balaan nga Dapit pinaagi sa tabil sa templo ug misulod sa Balaan sa mga Balaan. Kini nga lawak nagrepresentar sa presensiya sa Dios. Niini nga lawak, ang high priest mowisik sa dugo nga halad tungod sa sala diha sa halaran aron sa pag-ula sa mga sala sa Israel (tan-awa sa Levitico 16).
Unsa kaha ang gisimbolo sa pagkagisi sa tabil didto sa Balaan sa mga Balaan?
Si Elder Bruce R. McConkie (1915–85) sa Korum sa Napulog Duha ka Apostoles mipasabot sa simbolikanhon nga kamahinungdanon niini nga hitabo:
Imahe
Elder Bruce R. McConkie
Ang Balaan sa mga Balaan bukas na karon alang sa tanan, ug ang tanan, pinaagi sa maulaon nga dugo sa Kordero, makasulod na karon sa labing taas ug labing balaan sa tanang dapit, niana nga gingharian diin ang mahangtorong kinabuhi nahimutang. … [Ang tanang tawo] mahimong angayan moagi sa tabil ngadto sa presensiya sa Ginoo aron makaangkon og bug-os nga kahimayaan.
(Bruce R. McConkie, Doctrinal New Testament Commentary, 3 vols. [1965–73], 1:830)
Usa sa kamatuoran nga atong makat-onan gikan sa unsay nahitabo sa Mateo 27:51 mao nga si Jesukristo naghimong posible alang kanato nga mobalik sa presensiya sa Langitnong Amahan ug mahimong sama Kaniya. Ang Apostol nga si Pablo nagtudlo usab nga ang paggisi sa tabil naghulagway niini nga kamatuoran (tan-awa sa Mga Hebreo 10:19–20).
Pamalandongi ang bili nga gibayran sa imong Manluluwas aron pag-abli sa tabil ug mahimong posible alang kanimo nga makabalik ngadto sa gingharian sa Iyang Amahan.
1. Irekord ang mosunod diha sa imong journal sa pagtuon:
Pagsulat og pipila ka mga paagi diin ang Manluluwas personal nga nakatabang kanimo aron motubo ug molambo ug mahimong mas sama sa imong Langitnong Amahan aron ikaw sa kadugayan makabalik sa Iyang presensiya.
Jesus gipasidunggan sa Iyang mga disipulo
Sa dihang si Jesus namatay, ang Iyang mga disipulo nagtinguha sa paghinumdom ug pagpasidungog Kaniya. Pagbasa mahitungod kon giunsa sa pipila ka mga disipulo pagpakita sa ilang gugma alang kang Jesus.
Mateo 27:57–60: si Jose nga taga-Arimatea, usa ka dato nga disipulo ug usa ka miyembro sa Sanhedrin, ang kinatas-ang tigdumala sa konseho sa mga Judio
Juan 19:39–40: si Nicodemo, nga usa ka Pariseo ug sakop sa Sanhedrin
Lucas 23:55–56: si Maria Magdalena ug ang ubang mga babaye
Ang mosunod nga mga impormasyon makatabang kanimo nga mas masabtan ang mga aksiyon niini nga mga disipulo.
Imahe
Tanaman nga lubnganan, Jerusalem, Israel
Si Jose nga taga-Arimatea, bisan tuod og dili bukas nga sumusunod ni Kristo, nagpakita og kaluoy ug kaisog pinaagi sa pagpangayo sa lawas ni Jesus. Ang lubnganan, nga gihatag ni Jose alang sa lawas sa Manluluwas gikubkob gikan sa bato, lagmit sa dakong gasto.
Imahe
mirra
Ang mira usa ka humot nga ugang tagok nga gigamit sa pag-andam sa lawas sa namatay. Ang gidaghanon sa mira ug mga aloe nga gidala ni Nicodemo aron pagdihog sa lawas sa Manluluwas susama sa gigamit sa mga harianon nga mga lubong.
Imahe
Lawas ni Kristo gipahimutang diha sa lubnganan
Ang mga babaye miandam og mga pahumot ug mga ighahaplas sa paghuman sa pag-andam sa lawas ni Jesus tungod kay ang iyang lubong gihimo nga dinalian.
Unsa ang gipakita sa mga aksiyon niini nga mga tawo bahin sa ilang mga pagbati alang sa Manluluwas?
Pagpakita sa imong gugma alang sa imong Manluluwas
Bisan og ang Manluluwas dili nato kauban sa pisikal nga paagi, makakita gihapon kita og mga paagi sa pagpakita sa atong gugma ngadto Kaniya.
2. Kompletoha ang mosunod diha sa imong journal sa pagtuon:
Pagsulat o pagdrowing og usa o daghan pang mga butang nga pamati nimo nga kinahanglan nimong buhaton aron sa pagpasidungog ug pagpakita og pagmahal alang sa Manluluwas. Sama sa gibuhat ni Jose nga taga-Arimatea, kang Nicodemo, ug kang Maria Magdalena ug ang lain pang mga babaye, kini malagmit nagkinahanglan og sakripisyo.
Opsiyonal: Gustong Makakat-on pa og Dugang?
Unsa ang nabuhat sa Manluluwas alang kanako?
Si Presidente Dallin H. Oaks sa Unang Kapangulohan nagpamubo sa pipila sa mga nabuhat sa Manluluwas alang sa matag usa kanato:
Imahe
Presidente Dallin H. Oaks
Ubos sa plano sa atong Langitnong Amahan, Siya “milalang sa mga langit ug yuta” (Doktrina ug mga Pakigsaad 14:9) aron nga ang matag usa kanato makabaton og mortal nga kasinatian nga gikinahanglan sa pagkaplag sa atong balaang kapalaran. Isip kabahin sa plano sa Amahan, ang Pagkabanhaw ni Jesukristo mibuntog sa kamatayon aron sa pagsiguro sa imortalidad sa matag usa kanato. Ang maulaong sakripisyo ni Jesukristo mihatag sa matag usa kanato sa oportunidad sa paghinulsol sa atong mga sala ug mobalik nga putli ngadto sa atong langitnong panimalay. Ang Iyang mga sugo ug mga pakigsaad nagpakita kanato sa agianan, ug ang Iyang pagkapari naghatag sa katungod sa pagpahigayon sa mga ordinansa nga gikinahanglan aron makab-ot kana nga padulngan. Ug ang atong Manluluwas andam nga misinati sa tanang mortal nga kasakit ug mga kahuyang nga Siya masayod kon unsaon pagpalig-on kanato diha sa atong mga kasakit.
Unsa ang pipila ka mga paagi nga akong mapakita ang akong gugma sa Manluluwas?
Si Sister Becky Craven sa Kinatibuk-ang Kapangulohan sa Young Women mipahayag:
Imahe
Sister Rebecca L. Craven
Kon kita nahigugma Kaniya sama sa atong gipangangkon, dili ba nato mapakita kana nga gugma pinaagi sa mas mabinantayon pa nga pagtuman sa Iyang mga sugo?
Ang pagkamabinantayon sa pagsunod sa ebanghelyo wala dayon magpasabot nga mahimong pormal ug seryuso. Ang buot ipasabot niana mao ang pagkahimong takos diha sa atong mga hunahuna ug pamatasan isip mga disipulo ni Jesukristo. Samtang mamalandong kita sa kalainan tali sa mainampingon ug dili kaayo magtagad sa atong pagtuman sa ebanghelyo, ania ang pipila ka mga ideya nga ikonsiderar:
Nagmabinantayon ba kita sa atong pagsimba sa adlawng Igpapahulay ug sa atong pagpangandam sa pag-ambit sa sakramento matag semana?
Makahimo ba kita nga mas magmabinantayon sa atong mga pag-ampo ug pagtuon sa ebanghelyo o mas aktibo nga mogamit sa Dali Sunod Kanako––Alang sa mga Indibidwal ug mga Pamilya?
Mabinantayon ba kita sa atong pagsimba sa templo, ug mainampingon ug tuyong mituman sa mga pakigsaad nga atong gihimo atol sa pagbunyag ug diha sa templo? Mabinantayon ba kita sa atong panagway ug ligdong ang atong sinul-oban, labi na sa sagrado nga mga lugar ug mga sirkumstansiya? Mabinantayon ba kita kon sa unsang paagi kita magsul-ob sa atong sagrado nga mga garment sa templo? O ang mga uso sa kalibotan ang modiktar og mas dili kaayo magtagad nga kinaiya?
Mabinantayon ba kita kon sa unsang paagi kita mangalagad ngadto sa uban ug unsaon nato pagbuhat ang atong mga calling diha sa Simbahan, o kita walay pagbati o dili kaayo magtagad sa atong tawag sa pagserbisyo?
Mabinantayon ba kita o dili kaayo magtagad kon unsa ang atong gibasa ug unsa ang atong gitan-aw sa TV ug sa atong mga mobile device? Mabinantayon ba kita sa atong mga pulong? O yano nga modawat sa law-ay ug bastos nga mga butang?
Ang Alang sa Kalig-on sa mga Kabatan-onan nga pamphlet naglakip og mga sumbanan nga, kon mabinantayon nga sundon, magdala og daghang mga panalangin ug makatabang kanato nga magpabilin sa dalan sa pakigsaad.
(Becky Craven, “Mabinantayon batok Dili Kaayo Magtagad,” Liahona, Mayo 2019, 10)