ម៉ាថាយ ២៣
ព្រះអង្គសង្គ្រោះថ្កោលទោសចំពោះការលាក់ពុត
ក្នុងអំឡុងសប្តាហ៍ចុងក្រោយនៃការងារបម្រើក្នុងព្រះជន្មរមែងស្លាប់របស់ព្រះអង្គសង្គ្រោះ ទ្រង់បានថ្កោលទោសចំពោះ ការលាក់ពុតរបស់ពួកអាចារ្យ និងពួកផារិស៊ី ។ មេរៀននេះអាចជួយអ្នកឲ្យចៀសវាងពីការលាក់ពុត ហើយធ្វើជាអ្នកដើរតាមព្រះយេស៊ូវគ្រីស្ទដោយបន្ទាបខ្លួន ។
តើការលាក់ពុតគឺជាអ្វី ?
សូមស្រមៃថាមានកែវទឹកចំនួនបី ដែលអ្នកអាចជ្រើសយកមកផឹកទឹកបាន ។ កែវទឹកទីមួយកខ្វក់នៅផ្នែកខាងក្រៅ កែវទឹកទីពីរកខ្វក់នៅផ្នែកខាងក្នុង ចំណែកកែវទឹកទីបីជាកែវទឹកស្អាត ។
-
តើកែវទឹកកខ្វក់ទាំងនោះតំណាងឲ្យមនុស្សលាក់ពុតយ៉ាងដូចម្ដេច ?
ពាក្យ មនុស្សលាក់ពុត ត្រូវបានបកប្រែពីភាសាក្រិកមកមានន័យថា « តួសម្ដែង » ហើយសំដៅទៅលើបុគ្គលដែលធ្វើពុត និយាយបំផ្លើសផ្នែកមួយ ឬបន្តមានទង្វើប្រកបដោយការបោកបញ្ឆោតជាដរាប ។ វា « ជាទូទៅចង្អុលបង្ហាញពីបុគ្គលម្នាក់ដែលធ្វើពុតជាអ្នកជឿសាសនា តែតាមពិតពុំមែនទេ » ( Bible Dictionary « Hypocrite » ) ។ វាក៏អាចសំដៅទៅលើមនុស្សម្នាក់ ដែលធ្វើពុតមិនជឿលើសាសនា តែតាមពិតគាត់ជឿផងដែរ ។
នៅពេលអ្នកសិក្សា ម៉ាថាយ ២៣ សូមរកមើលសេចក្ដីពិតដែលនឹងជួយអ្នកឲ្យចៀសវាងពីការលាក់ពុត ហើយប្រែក្លាយកាន់តែ ដូចជាព្រះយេស៊ូវគ្រីស្ទ ។
ជាផ្នែកមួយនៃសារលិខិតជាសាធារណៈចុងក្រោយរបស់ព្រះអង្គសង្គ្រោះ នាសប្ដាហ៍ចុងក្រោយនៃការងារបម្រើក្នុងព្រះជន្មរមែងស្លាប់របស់ទ្រង់ នោះទ្រង់បានថ្កោលទោសដល់ការលាក់ពុតរបស់ពួកអាចារ្យ និងពួកផារិស៊ី ។ ទ្រង់បានចង្អុលបង្ហាញថា ពួកអាចារ្យ និងពួកផារិស៊ី « [ អង្គុយ ] នៅទីបង្រៀនរបស់លោកម៉ូសេ » ( ម៉ាថាយ ២៣:២ ) ដែលមានន័យថា ពួកគេកាន់កាប់តំណែងនៃសិទ្ធិអំណាចដើម្បីបង្រៀនគោលលទ្ធិ ហើយបកស្រាយ និងគ្រប់គ្រងក្រឹត្យវិន័យ ។ ពួកគេចាត់ទុកខ្លួនឯងស័ក្តិសមជាងអ្នកឯទៀតក្នុងសាលាប្រជុំ ។
សូមអាន ម៉ាថាយ ២៣:៣–៧ ដោយស្វែងរកថាតើព្រះអង្គសង្គ្រោះបានមានបន្ទូលដូចម្ដេចអំពីពួកអាចារ្យ និងពួកផារិស៊ីដែលជាមនុស្សលាក់ពុត ។ មុនពេលអ្នកអាន វាអាចនឹងមានប្រយោជន៍ក្នុងការដឹងថា « ស្លាកកត់ក្រឹត្យវិន័យ » ( ខទី ៥ ) គឺជាប្រអប់ស្បែកតូចៗដែលសាសន៍យូដា បានចងលើថ្ងាស និងដៃឆ្វេង ។ នៅខាងក្នុងស្លាកកត់ក្រឹត្យវិន័យនោះមាននូវផ្ទាំងស្បែកសម្រាប់សរសេរអក្សរដែលមានផ្ទុកនូវខគម្ពីរជាក់លាក់នានានៃបទគម្ពីរដែលដកស្រង់ពីព្រះគម្ពីរសញ្ញាចាស់ ។ សាសន៍យូដាបានពាក់ស្លាកកត់ក្រឹត្យវិន័យ ដើម្បីជួយពួកគេឲ្យចងចាំដើម្បីធ្វើតាមបទបញ្ញត្តិរបស់ព្រះ ។
បន្ទាប់ពីអានរួច អ្នកក៏គួរមើលវីដេអូ « Phylacteries » ( ១:០៦ ) ដែលមាននៅលើគេហទំព័រ ChurchofJesusChrist.org ផងដែរ ។
-
យោងតាម ខទី ៥ ហេតុអ្វីពួកអាចារ្យ និងពួកផារិស៊ីពង្រីកស្លាកកត់ក្រឹត្យវិន័យរបស់ពួកគេ និង « រំយោលអាវគេឲ្យវែងៗ » ?
ព្រះអម្ចាស់មិនបានថ្កោលទោសជនដែលបានពាក់ស្លាកកត់ក្រឹត្យវិន័យនោះទេ ប៉ុន្តែទ្រង់បានថ្កោលទោសដល់ជនដែលប្រើវាដោយលាក់ពុត ឬពង្រីកវាឲ្យធំ ដើម្បីឲ្យមនុស្សដទៃទៀតមើលឃើញវា ឬបង្ហាញឲ្យឃើញថាខ្លួនគេសំខាន់ជាងអ្នកដទៃ ។
១. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើការថ្វាយបង្គំព្រះតែសកម្មភាពខាងក្រៅមានគ្រោះថ្នាក់អ្វីខ្លះ ដោយសារអ្នកចង់ឲ្យអ្នកដទៃឃើញ ?
-
ហេតុអ្វីបានជាអ្នកគិតថា ព្រះសព្វព្រះទ័យឲ្យអ្នកថ្វាយបង្គំទ្រង់ដោយស្មោះត្រង់ និងដោយចេតនាសុចរិត ?
បន្ថែមលើការព្រមានប្រជាជនកុំឲ្យធ្វើតាមអាកប្បកិរិយារបស់ពួកអាចារ្យ និងពួកផារិស៊ី នោះព្រះអង្គសង្គ្រោះក៏បានមានបន្ទូលដោយផ្ទាល់ ទៅកាន់ពួកអាចារ្យ និងពួកផារិស៊ីផងដែរ ។ ទ្រង់បានប្រកាសពីសេចក្ដីវេទនាជាច្រើន ដែលនឹងកើតមានដល់ពួកគេដោយសារការលាក់ពុតរបស់ពួកគេ ( សូមមើល ម៉ាថាយ ២៣:១៣–៣៣ ) ។ វេទនា មានន័យថាជាស្ថានភាពនៃសេចក្តីមានទុក្ខ វេទនារម្មណ៍ និងទុក្ខព្រួយ ។
សូមអាន ម៉ាថាយ ២៣:២៣–២៨ ដោយស្វែងរកអ្វីដែលព្រះអង្គសង្គ្រោះបានមានបន្ទូលប្រាប់ពួកផារិស៊ី ។
២. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើខគម្ពីរទាំងនេះបន្ថែមដល់ការយល់ដឹងរបស់អ្នកអំពីការលាក់ពុតយ៉ាងដូចម្ដេច ?
-
តើអ្នកនឹងនិយាយអ្វីទៅកាន់នរណាម្នាក់ ដែលបារម្ភអំពីការធ្វើជាមនុស្សលាក់ពុត នៅពេលពួកគេធ្វើខុស ខណៈដែលកំពុងខិតខំរស់នៅតាមដំណឹងល្អ ?
របៀបដែលយើងអាចចៀសវាង និងយកឈ្នះលើការលាក់ពុត
ផ្ទុយពីពួកអាចារ្យ និងពួកផារិស៊ី ព្រះអង្គសង្គ្រោះមិនដែលប្រព្រឹត្តដោយលាក់ពុតឡើយ ។ ទ្រង់បានបង្រៀនប្រជាជនកុំឲ្យចាត់ទុកខ្លួនឯងថាល្អជាងអ្នកដទៃ ព្រោះពួកគេទាំងអស់សុទ្ធតែជាបុត្រាបុត្រីរបស់ព្រះទាំងអស់គ្នា ហើយស្មើភាពគ្នានៅចំពោះព្រះភ័ក្រ្តទ្រង់ ។ ទ្រង់បានថ្លែងទីបន្ទាល់ថា ព្រះវរបិតាសួគ៌គឺជាអង្គបង្កបង្កើតរបស់យើង ហើយថាទ្រង់ផ្ទាល់គឺជាព្រះគ្រីស្ទ ដែលត្រូវបានបញ្ជូនមកដោយព្រះវរបិតា ហើយជាចៅហ្វាយដ៏ពិតរបស់យើងដែលបានប្រទានព្រះជន្ម ( សូមមើលការបកប្រែដោយ យ៉ូសែប ស្ម៊ីធ ម៉ាថាយ ២៣:៦ [ នៅក្នុង ម៉ាថាយ ២៣:៩ ]; ម៉ាថាយ ២៣:៨–១០ ) ។
សូមអាន ម៉ាថាយ ២៣:១១–១២ ហើយរកមើលការបង្រៀនដែលអាចជួយយើងឲ្យយកឈ្នះ និងចៀសវាងពីការលាក់ពុត ។ នៅក្នុង ខទី ១២ ពាក្យ តម្កើងឡើង មានន័យថាលើកខ្លួនឡើង ហើយ បន្ទាបចុះ មានន័យថាធ្វើឲ្យចុះទាប បន្ទាបបន្ថោក ឬមិនសូវគោរព ។
-
តើអ្នកគិតថា ព្រះអង្គសង្គ្រោះកំពុងបង្រៀនអំពីគោលការណ៍អ្វីនៅក្នុងខគម្ពីរទាំងនេះ ?
ព្រះអង្គសង្គ្រោះបានបង្រៀនថា ប្រសិនបើយើងបន្ទាបខ្លួន ហើយបម្រើអ្នកដទៃ នោះព្រះអម្ចាស់នឹងលើកយើងឡើង ។ ទ្រង់នឹងជួយយើងឲ្យក្លាយកាន់តែដូចជាទ្រង់ ហើយដោយការគោរពតាមបទបញ្ញត្តិរបស់ទ្រង់ និងការប្រែចិត្តដ៏ពិត នោះព្រះនឹងប្រទានឲ្យយើងនូវភាពតម្កើងឡើងក្នុងនគរសេឡេស្ទាល ។
៣. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើព្រះយេស៊ូវគ្រីស្ទគឺជាគំរូនៃការបន្ទាបខ្លួនក្នុងការបម្រើអ្នកដទៃ និងការចៀសវាងពីការលាក់ពុតយ៉ាងដូចម្ដេច ?
-
តើការបន្ទាបខ្លួន និងការបម្រើអ្នកដទៃអាចជួយអ្នកឲ្យចៀសវាងពីការលាក់ពុត ហើយប្រែក្លាយកាន់តែដូចជាព្រះអង្គសង្គ្រោះយ៉ាងដូចម្ដេច ?
សូមអាន និងសញ្ជឹងគិតពីសេចក្តីថ្លែងការណ៍ខាងក្រោមនេះ ។ សូមកំណត់សេចក្តីថ្លែងការណ៍មួយ ឬពីរដែលអ្នករកឃើញញឹកញាប់បំផុត ។
-
ខ្ញុំធ្វើពុតជាមនុស្សម្នាក់ដែលមិនមែនជាខ្ញុំ ។
-
ខ្ញុំធ្វើល្អដើម្បីឲ្យអ្នកដទៃចាប់អារម្មណ៍ ។
-
ខ្ញុំច្រើនតែគិតថាខ្ញុំល្អជាងអ្នកដទៃ ។
-
ទោះជាខ្ញុំធ្វើខុសក៏ដោយ ក៏ខ្ញុំព្យាយាមរស់នៅតាមដំណឹងល្អដោយស្មោះត្រង់ដែរ ។
-
ខ្ញុំព្យាយាមបម្រើអ្នកដទៃ ហើយមិនព្យាយាមស្វែងរកភាពល្បីល្បាញឡើយ ។
-
ខ្ញុំព្យាយាមបន្ទាបខ្លួន ហើយមិនឃើញថាខ្លួនឯងល្អជាងអ្នកដទៃទេ ។
សូមស្វែងរកការណែនាំមកពីព្រះវិញ្ញាណបរិសុទ្ធ កាលដែលអ្នកកំណត់ផ្នែកណាមួយ ដែលអ្នកអាចធ្វើឲ្យប្រសើរឡើង ។ សូមចងចាំថា ព្រះវរបិតាសួគ៌ និងព្រះយេស៊ូវគ្រីស្ទស្រឡាញ់អ្នក ហើយទទួលស្គាល់រាល់ការខិតខំដោយស្មោះដើម្បីរស់នៅតាមដំណឹងល្អ ។ នៅពេលអ្នកទូលសូមជំនួយពីព្រះវរបិតាសួគ៌ នោះទ្រង់នឹងជួយអ្នកឲ្យយកឈ្នះលើភាពទន់ខ្សោយ ឬការលាក់ពុតណាមួយ ។
ជម្រើស ៖ ចង់រៀនសូត្របន្ថែមទៀតទេ ?
តើព្រះអង្គសង្គ្រោះទតទៅពួកអាចារ្យ និងពួកផារិស៊ីដែលជាមនុស្សលាក់ពុតយ៉ាងណាដែរ ?
នៅក្នុងសុន្ទរកថារបស់លោក « The Voice of Warning » អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានបង្រៀនអំពីរបៀបដែលព្រះយេស៊ូវបានថ្កោលទោសចំពោះភាពលាក់ពុតរបស់ពួកអាចារ្យ និងពួកផារិស៊ី ( Ensign ឬ Liahona ខែ ឧសភា ឆ្នាំ ២០១៧ ទំព័រ ១០៨–១១ ) ។
តើខ្ញុំជាមនុស្សលាក់ពុតទេ ប្រសិនបើខ្ញុំធ្វើខុស ខណៈដែលខ្ញុំកំពុងព្យាយាមរស់នៅតាមដំណឹងល្អនោះ ?
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
បងប្អូនប្រុសស្រីទាំងឡាយ ជាញឹកញាប់យើងគ្រប់គ្នាប្រាថ្នាចង់មានជីវិតដូចជាព្រះគ្រីស្ទ ជាងយើងទទួលបានជោគជ័យក្នុងការរស់នៅ ។ បើយើងសារភាពរឿងនោះដោយស្មោះត្រង់ ហើយព្យាយាមកែលម្អ យើងមិនមែនជាមនុស្សលាក់ពុតទេ យើងគឺជាមនុស្សលោកធម្មតា ។
( ជែហ្វ្រី អ័រ ហូឡិន « Be Ye Therefore Perfect—Eventually » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ៤២ )