Youth studying the scriptures in their seminary class.
ʻE lava ke tokoni atu ʻa e lēsoni ko ʻení ke mahino kiate koe ʻa e mahuʻinga ʻo e ngāue ʻi he tui kia Sīsū Kalaisí ʻi hoʻo ako ʻi he seminelí. ʻI hoʻo ako ʻa e lēsoni ko ʻení, te ke ako ai ʻa e founga ke ke maʻu ʻa e aʻusia lelei taha ʻi he seminelí.
Lau ‘a e talanoa fakatātā ko ʻení:
ʻOku ʻi ai ha ongo finemui ʻe toko ua ʻi he kalasi semineli tatau pē. ʻOku ongoʻi ʻe he finemui ʻe taha ʻa e ivi tākiekina ʻo e Laumālie Māʻoniʻoní pea mo e ʻofa ʻa e ʻEikí ʻi he seminelí. ʻOkú ne maʻu ha tali ki heʻene ngaahi fehuʻí, ʻoku tupulaki ʻene fakamoʻoni ki he Fakamoʻuí mo Hono Siasí, pea ʻokú ne fakalakalaka ʻi ha ngaahi founga mahuʻinga ʻi heʻene moʻuí. Neongo ia, ka ko e finemui ʻe tahá ʻoku faʻa taʻeoliʻia ia ʻi he seminelí pea ʻokú ne ongoʻi ʻoku ʻikai ke ne maʻu ha meʻa lahi mei ai.
Ko e hā ha ngaahi ʻuhinga ʻe niʻihi ʻoku kehekehe ai e aʻusia ʻa e ongo finemui ko ʻení ‘i he semineli?
Ke tokoni atu ke ke fakafuofuaʻi mo siviʻi hoʻo ako ʻiate koe pē ʻa e ongoongoleleí, fakakaukau ki he ongoʻi fehuʻi ko ʻení:
Ko e hā ʻokú ke lolotonga fakahoko ke ke ako fakalaumālie aí?
ʻOkú ke ongoʻi nai ʻokú ke maʻu ‘a e ngaahi ola ʻokú ke fie maʻú?
ʻI hoʻo ako e lēsoni ko ʻení, fakakaukau ki ha ngaahi founga ʻokú ke fie ako mo tupulaki ai he taʻú ni ʻi he seminelí. ʻOku kau ʻi he akó ha faʻahinga founga pē ʻoku tau fakalakalaka ai ʻi heʻetau moʻuí. Te ke lava foki ʻo fakakaukau ki ha ngaahi meʻa ʻokú ke hohaʻa ki ai, pe ko haʻo ngaahi fehuʻi. Fakafou ‘i he lotu fakamātoató, fekumi ai ki he fakahinohino ʻa e Laumālie Māʻoniʻoní ke ne tokoniʻi koe ke ke ʻiloʻi ʻa e founga ke fakaʻaongaʻi ai ʻa e lēsoni ko ʻení ʻi hoʻo moʻuí.
Ko e taha ʻo e ngaahi meʻa ‘okú ne tākiekina lahi taha kitautolu ʻi heʻetau akó, ko e lahi ʻo ʻetau falala mo e muimui kia Sīsū Kalaisí. Ko e tefitoʻi moʻoni ʻe taha ʻe nofotaha ai e lēsoni ko ʻení ko e ʻi heʻetau feinga ke ako mālohi ʻi he tui kia Sīsū Kalaisí, ʻe lava ke tāpuekina, mo tau fakalakalaka fakataautaha ai. ʻI hoʻo lau ʻa e lea ko ʻeni ʻa ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá, fekumi ki ha ngaahi fakakaukau fekauʻaki mo e ʻuhinga ʻo e ako ʻi he tui kia Sīsū Kalaisí.
ʻĪmisi
Elder David A. Bednar, Quorum of the Twelve Apostles official portrait. 2020.
ʻI heʻetau vakai atu ki he kahaʻú, mo ʻamanaki atu ki he māmani puputuʻu mo moveuveu ʻa ia ʻoku tau nofo aí, ʻoku ou tui ʻe mahuʻinga kiate kitautolu kotoa ke fakalahi hotau ivi fekumi ki he akó ʻaki ‘a e tuí. … ʻOku nofotaha ‘a e tokanga ʻa e tui moʻoní ‘i he ʻEiki ko Sīsū Kalaisí, pea ʻoku iku maʻu pē ia ki he ngāué. … ʻOku fie maʻu ʻe he ako ʻi he tuí ha ivi fakalaumālie, fakaeʻatamai, pea mo fakatuʻasino ka ʻoku ʻikai ko e tali fakafiefiemālie pē. ʻOku ʻi he fakamātoato mo e hokohoko atu ʻo ʻetau ngāue makatuʻunga ‘i he tuí, ʻa ʻetau fakahaaʻi ki heʻetau Tamai Hēvaní mo Hono ʻAlo ko Sīsū Kalaisí, ʻa ʻetau loto fie-ako mo fie-tali ʻa e fakahinohino mei he Laumālie Māʻoniʻoní.
(David A. Bednar, “Seek Learning by Faith,”Ensign or Liahona, Sept. 2007, 61, 63–64)
Ko e hā naʻá ke ako mei he lea ko ʻení?
Te ke maʻu ʻa e lelei lahi taha mei hoʻo ako fakalaumālié, ʻi he taimi ʻokú ke feinga ai ke ako mo tukutaha hoʻo tokangá mo e feingá kia Sīsū Kalaisí. ʻOku fakahaaʻi ʻe he ngaahi potufolofola mo e ngaahi vitiō ko ʻení ʻa e niʻihi fakafoʻituitui naʻa nau omi kia Sīsū Kalaisi pea naʻá Ne tāpuekina kinautolu. Lau ha fakamatala fakafolofola ʻe taha pe lahi ange, pea sio ʻi ha foʻi vitiō ʻe taha pe lahi ange, kapau ʻe lava. ʻOku maʻu ʻa e ngaahi vitiō kotoa pē ʻi he ChurchofJesusChrist.org. ʻI hoʻo lau mo mamatá, fakakaukau ki he founga ʻoku fekauʻaki ai e ngaahi aʻusia ʻa e niʻihi fakafoʻituitui ko ʻení mo hono ako ʻo e ongoongoleleí.
Vitiō: “Kole mei he ‘Otuá (Kaveinga ʻo e Mutualé ki he 2017)” (3:21)
Vitiō: “ʻE Lava ʻe he Seminelí ʻo Liliu ‘a e Moʻui” (4:13)
1. Fili ha tokotaha mei he fakamatala fakafolofola naʻá ke akó pe vitiō naʻá ke mamata aí, pea tali ‘a e ngaahi fehuʻi ko ʻení:
Ko e hā naʻe fakahoko ʻe he tokotaha ʻi he ngaahi veesi pe vitiō ko ʻení ke fakahaaʻi ʻaki ʻene tui kia Sīsū Kalaisí? Naʻe fakahaaʻi fēfē nai ʻe heʻenau ngaahi ngāué ʻa ʻenau tuí?
Ko e hā ‘a e ngaahi faingataʻa naʻe ikunaʻi ʻe he tokotahá?
Naʻe tāpuakiʻi fēfē nai kinautolu ʻe he ʻEikí?
Ko e hā ‘a e meʻa te ke lava ʻo ako mei he aʻusia ʻa e tokotahá ni ke ke fakaʻaongaʻi ʻi hoʻo ako ʻa e ongoongoleleí?
Fakakakato ʻa e ʻekitivitī ko ení ʻi hoʻo tohinoa akó:
2.
Vahevahe ha laʻipepa ki ha kōlomu ʻe tolu, pea fakahingoa ʻa e ngaahi kōlomú Kimuʻa he Kalasí, Lolotonga e Kalasí, mo e Hili ʻa e Kalasí. Fakakaukau ki he meʻa kuó ke fakahokó pe ko e meʻa ʻe lava ke ke fakahoko kimuʻa he kalasí, lolotonga e kalasí, pea mo e hili ‘a e kalasí ke tokoniʻi koe ke ke ako ʻi he tui kia Sīsū Kalaisí. Fekumi ʻi he faʻa lotu ki he fakahinohino ʻa e Laumālie Māʻoniʻoní lolotonga hoʻo fakakaukau ki ha ngaahi sīpinga peá ke tohi pe tā hoʻo ngaahi sīpingá, ʻi he kōlomu takitaha.
Ko hoʻo taumuʻa fakatāutahá
ʻI hoʻo ako ʻi he seminelí, te ke maʻu ai ha ngaahi faingamālie ke:
Teuteu ki he kalasí. Ko e fekumi ki ha fakahā ʻo fakafou ʻi he Laumālie Māʻoniʻoní pea mo hono lau fakaʻaho ʻo e folofolá, ko ha niʻihi ia ʻo e ngaahi founga lelei taha ke mateuteú. ʻE lava foki ke fakaafeʻi koe ke ke fakalaulauloto ki he ngaahi fehuʻí kimuʻa pea kamata e kalasí pe ako ha kiʻi konga nounou mei he Haʻu, ʻo Muimui ʻIate Aú.
Fakaʻaongaʻi hono ngāue ʻaki ‘o e tui kia Sīsū Kalaisí lolotonga ‘a e kalasí. ʻE fakaafeʻi koe ke ke fakaʻaongaʻi ‘a e tui kia Sīsū Kalaisí, pea ako mālohi ʻo fakatatau ki Heʻene ngaahi akonakí, ʻi hono ako ‘a e folofolá, fakahoko ‘o e ngaahi ʻekitivitií, vahevahe hoʻo ngaahi fakakaukaú, mo fekumi ʻi he faʻa lotu ki ha ueʻi fakalaumālie mei he Laumālie Māʻoniʻoní ke fakaʻaongaʻi e ngaahi moʻoni ʻokú ke akó ki hoʻo moʻuí.
Toe siviʻi ʻa e meʻa ʻokú ke akó. Te ke maʻu maʻu pē ha ngaahi faingamālie ke fokotuʻu haʻo ngaahi taumuʻa pē ʻaʻau pea vakaiʻi hoʻo akó mo e fakalakalaká. Te ke lava foki ʻo fai ha ngaahi fehuʻi mo fekumi ki ha fakahinohino fekauʻaki mo ha faʻahinga palopalema pe hohaʻa.
Vahevahe. ʻE fakaʻaiʻai koe ke ke vahevahe ʻa e meʻa ʻokú ke akó mo e niʻihi kehé, kau ai ho fāmilí.
‘I hoʻo tohinoa akó pe ʻi he laʻipepa naʻá ke hiki pe tā ai ha ngaahi ʻekitivitī ʻe tokoni ke ke ako mo ofi ange ai ki he ʻEikí, hiki ʻa e meʻa ʻokú ke fie fakahoko kimuʻa, lolotonga, pea mo e hili ʻa e kalasí ke ke ako ʻi he tuí. ʻE lava ke faingofua ʻeni ʻo hangē ko hano siakaleʻi pe fokotuʻu ha foʻi fetuʻu ʻi he tafaʻaki ʻo e ngaahi fakakaukau ʻokú ke ongoʻi ʻoku finangalo ‘a e ʻEikí ke ke ʻahiʻahiʻí. Fakakaukau ke tuku hoʻo taumuʻá ʻi ha feituʻu te ke toutou sio ki ai pea manatuʻi iá.
Fili pē: Fie Ako Lahi Ange?
Te u fakalahi fēfē nai hoku fatongia ki heʻeku ako ʻaʻakú?
Naʻe akoʻi ʻe ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá :
ʻĪmisi
Elder David A. Bednar, Quorum of the Twelve Apostles official portrait. 2020.
ʻOku ʻi ai ‘a e fatongia fakafoʻituitui ‘o e mēmipa takitaha ‘o e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke ako mo moʻui ʻaki ‘a e ngaahi akonaki ʻa e ʻEikí. … ʻOku ʻikai totonu ke tau ʻamanaki ʻe hanga ʻe he faʻunga ʻo e Siasí ʻo akoʻi pe talamai kiate kitautolu ‘a e meʻa kotoa pē ʻoku tau fiemaʻu ke ʻilo mo fakahoko ke tau hoko ai ko ha kau ākonga mateaki mo kātaki ʻi he loto-toʻa ki he ngataʻangá. Ka, ko hotau fatongia fakatāutahá ke ako e meʻa ʻoku totonu ke tau akó, ke moʻui ʻaki ‘a e meʻa ʻoku tau ʻilo ʻoku totonu ke tau moʻui ʻakí, pea mo aʻusia e tuʻunga ʻoku fie maʻu ʻe he ʻEikí ke tau aʻusiá.
Ko e hā ʻoku totonu ai ke u feinga mālohi ke ako ʻi he seminelí?
Naʻe akonaki ʻa Palesiteni Russell M. Nelson ʻo pehē:
ʻĪmisi
Official portrait of President Russell M. Nelson taken January 2018
Ko e lahi ange hoʻo muimui ki he sīpinga ʻa Sīsū Kalaisí, ko e lahi ange ia hoʻo lavameʻá.
Ko e hā leva ha meʻa te ne tokonia koe ke ke hoko ai ko ha ākonga faivelenga ʻo Sīsū Kalaisi? Ko e tali ʻe taha ko e seminelí mo e ʻinisititiutí—ʻo ʻikai ko e maʻukalasí pē ka ko e kau fakamātoato ki he kalasí mo muimui faivelenga ki ha faʻahinga ngāue kuo vahe ange. …
ʻE hoko ʻa e ʻosi mei he seminelí mo e ʻinisititiutí ke fakalahi ai ho ivi malava ke lavameʻa ʻi he ngaahi meʻa mahuʻinga taha te ke fakahoko ʻi hoʻo moʻuí. ʻE ʻoʻou ʻa e fiefia moʻoní!
Naʻe akoʻi ʻe ʻEletā Richard G. Scott (1928–2015) ‘o e Kōlomu ‘o e Kau ʻAposetolo ‘e Toko Hongofulu Mā Uá ‘a e meʻá ni ʻo fekau’aki mo e kau atu ki ha polokalama ako ki he ongoongoleleí:
ʻĪmisi
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.
Ko e fili ʻa e [tokotaha akó] ke kau atú, ko hono fakaʻaongaʻi ia ʻo e tauʻatāina ke filí, ʻa ia ʻokú ne fakaʻatā ʻa e Laumālie Māʻoniʻoní ke ne fakahā mai ha pōpoaki fakataautaha ʻoku fakataumuʻa ki he ngaahi fiemaʻu fakafoʻituitui ‘a e [tokotaha akó]. ʻI hono fakatupu ha ʻātakai ʻe kau mai ai e kalasí ki he lēsoní, ʻe lahi ange ai ‘a e faingamālie ke akoʻi ʻe he Laumālié ha ngaahi lēsoni ‘e mahuʻinga ange ʻi he meʻa ʻe lava [ʻe he faiakó] ʻo fakahoko ki he kalasí.
ʻE ‘omi leva ‘e he‘enau kau ko iá e fakahinohino ‘a e Laumālié ki he mo‘ui ‘a e [kau akó]. ʻI he taimi … ‘e hikinima ai … ‘a e tamaiki akó ke tali ha fehuʻí, neongo he ʻikai te nau fakatokangaʻi ia, ka ʻoku nau fakahaaʻi ki he Laumālie Māʻoniʻoní ‘a ʻenau loto fie-akó. ʻE hoko hono ngāue ʻaki ‘o e tauʻatāina ke filí ke ne fakaʻatā ʻa e Laumālié ke fakaʻaiʻai mo ʻoange kiate kinautolu ha fakahinohino mālohi ange lolotonga hoʻomou fakatahá. ʻOku fakaʻatā ʻe he kau maí ʻa e fakafoʻituituí keaʻusia‘a hono tataki ʻe he Laumālié. ʻOku nau ako ke ʻiloʻi mo ongoʻi ʻa e tataki fakalaumālié.