“Wala Ko Kini Madawat Gikan ni Bisan Kinsa … kondili gipadayag kini kanako ni Jesukristo”
Imahe
Usa ka abaye nga nag-antos gikan sa kaugtas ug sa kabalaka
Nakabati ka ba sukad nga naglibog sa tanan nga lainlaing mga opinyon ug pilosopiya sa kalibotan? Ang mga Santos sa Galacia nakasinati og susamang mga hagit ingon nga sila gitanyagan sa mga pagtulun-an nga nagdala kanila palayo gikan sa tinuod nga ebanghelyo ni Kristo. Kini nga leksiyon makatabang kanimo nga makat-on unsaon paglikay sa panglingla ug kalibog pinaagi sa pagpaminaw sa mga pulong ni Jesukristo nga gihatag sa mga karaan ug bag-ong mga propeta.
Pag-atubang sa bakak nga mga ideya
Hunahunaa kon unsaon nimo pagsanong sa mosunod nga mga sitwasyon:
Nakakita ka og usa ka ilado nga bidyo o post nga kasamtangang gipakigbahin sa kadaghanan sa imong mga higala sa social media. Kini adunay mga ideya nga nasukwahi sa unsay gitudlo kanimo sa panimalay ug sa Simbahan.
Sa eskwelahan, pipila sa mga higala kinsa mga miyembro sa Ang Simbahan ni Jesukristo sa mga Santos sa Ulahing mga Adlaw ang naghatag og mga opinyon nga nasukwahi sa mga pagtulun-an sa Simbahan.
Unsa ka sagad makahinagbo og mga sitwasyon nga susama niini?
Unsa sa imong pamati ang kinahanglan nimong buhaton sa mga sitwasyon nga susama niini? Ngano man?
Ang mga Santos sa Galacia nakahinagbo usab sa mga pagtulun-an gikan sa kadtong mga nagtinguha sa “pagtuis sa ebanghelyo ni Kristo” (Mga Taga-Galacia 1:7). Pananglitan, pipila ka mga Judio nga Kristiyano nagdaot sa mga pagtulun-an sa ebanghelyo ug nagpasiugda og mga pagduhaduha mahitungod sa pagtulun-an ni Pablo nga ang kaluwasan magagikan lamang pinaagi ni Jesukristo.
Si Pablo nagpasidaan sa mga Santos nga Taga-Galacia batok sa bakak nga mga ideya
Si Pablo nagsulat og usa ka epistola aron pagbatok sa bakak nga mga pagtulun-an nga kasamtangang mikaylap taliwala sa mga Santos nga Taga-Galacia.
Basaha ang Mga Taga-Galacia 1:6–9. Pangitaa unsa ang gisulti ni Pablo mahitungod sa kadtong nagsangyaw og usa ka “ebanghelyo” nga nasukwahi sa unsa ang iyang gisangyaw isip usa ka Apostol ni Jesukristo.
Unsa ang imong nakita nga mahinungdanon niini nga mga bersikulo? Ngano man?
Si Pablo nagpasidaan sa mga Santos nga Taga-Galacia nga isalikway ang “maayong balita nga lahi” (Mga Taga-Galacia 1:9) gawas sa ebanghelyo ni Jesukristo.
Unsa ang pipila sa mga ehemplo sa bakak nga mga ideya sa atong panahon nga makadala sa mga tawo palayo gikan sa tinuod nga ebanghelyo ni Jesukristo?
Unsa nga tinuod nga mga baroganan ang sayop nga nasabtan o gituis sa kalibotan?
Unsa ang pipila sa posible nga mga sangpotanan sa pagpaminaw o pagsunod niining laing mga ideya o mga pagtulun-an? Kanus-a ka nakakita sa pipila niini nga mga sangpotanan?
Kon mahimo, tan-awa ang bidyo nga “Divinely Appointed Sources [Balaanong Gitudlo nga mga Kapanguhaan]” gikan sa time code 3:14 hangtod sa 4:43, aron makakita og mga pananglitan sa mga sangpotanan. Kini nga bidyo mahimong makita sa ChurchofJesusChrist.org.
Kita makadangop ngadto sa mga propeta ug apostoles alang sa kamatuoran
Sa iyang sulat, si Pablo nagpahinumdom sa mga Santos nga Taga-Galacia sa kinauyokang mga kamatuoran sa ebanghelyo ug ang tinubdan sa iyang awtoridad ug mga pagtulun-an.
Basaha ang Mga Taga-Galacia 1:1–5, 10–12, nga mangita kon unsa ang gipakigbahin ni Pablo nga mahimong makatabang sa mga Santos aron malikayan nga malingla sa bakak nga mga pagtulun-an.
Unsa nga mga kamatuoran sa ebanghelyo ang gipahinumdom ni Pablo sa mga Taga-Galacia?
1. Tubaga ang mosunod nga mga pangutana diha sa imong journal sa pagtuon:
Sa unsang paagiha sa imong hunahuna ang pagtutok sa mga kamatuoran mahitungod sa Langitnong Amahan ug ni Jesukristo sa bersikulo 3–5 mahimong makatabang kanato nga makalikay sa pagkailad?
Unsa ang gitudlo ni Pablo sa Mga Taga-Galacia sa bersikulo 1, 11–12 kon nganong kinahanglan sila motuo sa iyang gitudlo?
Si Pablo nagpahinumdom sa Mga Taga-Galacia nga siya usa ka Apostol, gitawag “dili … pinaagi sa tawo, kondili pinaagi kang Jesukristo” (Mga Taga-Galacia 1:1), ug nga siya nakadawat sa ebanghelyo “[pinaagi sa pagpadayag ni] Jesukristo” (Mga Taga-Galacia 1:12). Usa ka kamatuoran nga atong makat-onan gikan sa mga pulong ni Pablo mao nga si Jesukristo nagpadayag sa tinuod nga doktrina ngadto sa Iyang mga propeta ug apostoles.
Si Elder Neil L. Andersen sa Korum sa Napulog Duha ka Apostoles mitudlo sa kaimportante sa mga pulong sa karaan ug modernong mga propeta:
Imahe
Opisyal nga litrato ni Elder Neil L. Andersen sa Korum sa Napulog Duha ka Apostoles, 2010, Agosto.
Ang gunitanan nga puthaw mao ang pulong sa Dios. Ganahan ko maghunahuna niini nga paagiha: Ang pulong sa Dios naglangkob og tulo ka lig-on kaayong mga elemento nga naglambod ug nagsustinar sa usag usa aron makaporma og dili matarog nga sungkaran. Kining tulo ka mga elemento naglakip, una, sa mga kasulatan, o sa mga pulong sa karaang mga propeta. …
Ang ikaduhang elemento sa pulong sa Dios mao ang personal nga pagpadayag ug inspirasyon nga moabot kanato pinaagi sa Espiritu Santo. …
… Ang ikatulo nga elemento, usa ka kritikal nga pagdugang sa paglambod sa lain pang duha[,] … nga nagrepresentar sa mga pulong sa buhing mga propeta.
Unsa ang gitudlo kanato niini nga mga paningkamot sa Dios nga mahatagan kita niining mga kapanguhaan mahitungod Kaniya?
Sa unsang paagi nga ang pagpaminaw sa mga pulong ni Kristo gikan sa karaan ug modernong mga propeta makatabang nimo sa paglikay nga malingla?
Sa unsang paagi nga ang personal nga pagpadayag makatabang kanimo nga malikayan ang pagkalingla?
Kon mahimo, tan-awa ang bidyo nga “Divinely Appointed Sources [Balaanong Gitudlo nga mga Kapanguhaan]” gikan sa time code 4:44 hangtod sa 9:11 aron makita ang mga pulong sa karaan ug moderno nga mga propeta, ingon man ang personal nga pagpadayag, nakatabang sa pipila ka kabatan-onan sa pagkaplag sa kamatuoran ug paglikay sa panglingla.
Unsa ang mipatigbabaw kanimo bahin sa giunsa sa Ginoo pagtabang niini nga mga indibidwal sa pagtubag sa ilang malisod nga mga sitwasyon?
Samtang nagtan-aw ka niini nga bidyo, unsa nga mga panghunahuna o mga pagbati ang miabot kanimo nga magamit sa imong kaugalingon mga simkumstansiya sa kinabuhi?
Imong personal nga sitwasyon
Paghunahuna kon unsa ang imong nakat-onan ug gibati karong adlawa. Pangita sa panabang sa Langitnong Amahan pinaagi sa Espiritu Santo ug pag-ila sa mga paagi diin ikaw lagmit kasamtangan nga huyang nga malingla. Unsang bakak nga mga pagtulun-an o kalibotanong mga ideya ang lagmit makadaot sa imong pagpamatuod kang Jesukristo? Nagbasa ka ba, nagtan-aw, o naminaw sa bisan unsa nga mahimong makalingla kanimo?
2. Tubaga ang mosunod nga mga pangutana diha sa imong journal sa pagtuon.
Unsa man ang imong nakat-onan niini nga leksiyon nga labing makatabang kanimo? Ngano man?
Unsa nga mga kabag-ohan ang gusto nimong himoon sa imong kinabuhi nga manalipod kanimo gikan sa panglingla?
Sa unsang paagi nimo mas hingpit nga mapaminaw ang mga pulong ni Jesukristo gikan sa karaan ug modernong mga propeta? Unsa ang kalahian nga mabuhat niini alang kanimo kon imong buhaton?
Opsiyonal: Gustong Makakat-on Pa og Dugang?
Nagtudlo ba si Pablo nga kinahanglan dili kita maminaw sa mga mensahe gikan sa langitnong mga anghel?
Ang mga pagtulun-an ni Pablo diha sa Mga Taga-Galacia 1:8–10 usahay masayop sa paggamit sa pakiglantugi batok sa mga panan-awon bahin sa mga anghel ug pagsangyaw sa usa ka gipahiuli nga ebanghelyo. Hinoon, si Pablo wala magtudlo nga ang tanang pagpakita sa mga anghel angay nga isalikway, kay ang mga kasulatan nagpakita nga ang mga anghel sa pagkatinuod moabot sa ulahing mga adlaw aron masangyaw pag-usab ang ebanghelyo (tan-awa sa Pinadayag 14:6). Hinoon, gitudlo ni Pablo nga si bisan kinsa, bisan ang usa ka anghel moabot aron pagpahisalaag sa mga tawo gikan sa tinuod nga ebanghelyo, nan kana nga anghel kinahanglang isalikway (tan-awa usab sa Alma 30:53).
Nganong kinahanglan man nakong gamiton ang balaanong gitudlo nga mga tinubdan sa akong pagpangita alang sa kamatuoran?
Tan-awa ang bidyo nga “Discovering Truth [Pagkaplag sa Kamatuoran]” (4:48), nga anaa sa ChurchofJesusChrist.org. Niini nga bidyo, si Presidente Dieter F. Uchtdorf, kanhi sakop sa Unang Kapangulohan, migamit og usa ka analohiya aron sa pagpasabot sa kaimportante sa pagpangita og kamatuoran gikan sa balaang mga tinubdan imbis sa pagsalig sa kaalam sa mga tawo.
Sa unsang paagi nga ang mga pasidaan ni Pablo magamit karon?
Si Presidente Dallin H. Oaks sa Unang Kapangulohan mipasidaan:
Imahe
Opisyal nga Hulagway ni Presidente Dallin H. Oaks nga gikuha niadtong Marso 2018.
Nagpuyo kita sa panahon sa gipalapad ug gisabwag og maayo nga impormasyon. Apan dili tanan niini nga impormasyon tinuod. Kinahanglang magmatngon kita samtang mangita kita sa kamatuoran ug magpili og mga tinubdan niana nga pagsiksik. Dili gayod nato hunahunaon ang sekyular nga kabantog o awtoridad isip haum nga mga tinubdan sa kamatuoran. Kinahanglang magmatngon kita mahitungod sa pagsalig sa impormasyon o tambag nga gitanyag sa mga tigpasiugdang mga artista, iladong mga atleta, o wala hiilhing mga tinubdan gikan sa internet. Ang kabatid sa usa ka butang dili gayod isipon nga kabatid sa kamatuoran sa ubang mga aspeto.
