Akoako ʻa Hono Maʻu ʻa e Mahinó mo Hono Fakamatalaʻi ʻo e Ngaahi Moʻoní
ʻĪmisi
Two young men are talking to each other. They are seated outside.
ʻOku ʻi he ngaahi potufolofola fakataukei fakatokāteliné ha ngaahi moʻoni mahuʻinga fekauʻaki mo Sīsū Kalaisi mo ʻEne ongoongoleleí. ʻE lava ke tokoniʻi koe ʻe he lēsoni ko ʻení ke ke maʻu ha mahino lahi ange ki he ngaahi moʻoni ko ʻení mo tokoniʻi koe ke ke akoako fakamatalaʻi kinautolu ki he niʻihi kehé.
Ko Hono Fakatupulaki ha Taukeí
Ko e hā ha meʻa ʻokú ke fuʻu sai ai?
Naʻe anga fēfē hoʻo hoko ʻo lelei aí?
Naʻe fakamatala ʻa ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e founga ke fakatupulaki ai ha pōtoʻi ngāué.
ʻĪmisi
Official portrait of Elder Gary E. Stevenson of the Quorum of the Twelve Apostles, 2015.
Ke hoko ha taha ʻo fuʻu lelei ʻi ha faʻahinga meʻa pē, makehe mei he talēniti fakanatulá, ʻoku fie maʻu ke mapuleʻi lelei, feilaulau, mo ha ngaahi houa lahi ki he akó mo e fakamalohisinó.
(Gary E. Stevenson, “Ko Hoʻo Tohi Fakahinohino ʻo e Lakanga Fakataulaʻeikí,” Ensign pe Liahona, Mē 2019, 47)
ʻE ala fakaʻaongaʻi fēfē nai ʻeni ki hoʻo ako ‘o e ngaahi folofolá?
ʻOkú ke falala fēfē nai ki hoʻo malava ke fakamatala ‘a e ngaahi akonaki ‘a e Fakamoʻuí ki he kakai kehé?
Te ke fakaʻaongaʻi he ʻahó ni ʻa e ngaahi potufolofola fakataukei fakatokāteliné ke fakaloloto hoʻo mahino ki he ngaahi moʻoni naʻe akoʻi ʻe he Fakamoʻuí, pea te ke akoako hono fakamatalaʻi ʻo e ngaahi moʻoni ko ʻení ki he niʻihi kehé. ʻUluakí, mahalo ʻe tokoni ke toe vakaiʻi e ngaahi potufolofola fakataukei fakatokāteline kuó ke toki akó. Feinga ke fakatauhoa ʻa e fakamoʻoni fakafolofola fakataukei fakatokāteliné mo hono kupuʻi lea mahuʻinga totonú.
H. “Ke ke ʻofa [ki he ʻEikí] ko ho ʻOtuá. … Ke ke ʻofa ki ho kaungāʻapí.”
Ko hono maʻu ha mahino ki he potu folofolá
Fili ha potufolofola fakataukei fakatokāteline te ke fie maʻu ke mahino lahi ange kiate koe. Ke tokoni ke ke maʻu ha mahino lahi ange ki he potufolofola ko ʻení, tomuʻa lau māmālie mo lau fakalelei ia, pea fakalaulauloto ki hono ʻuhingá.
1. Fakakakato ʻeni ʻi hoʻo tohinoa akó:
Hiki ʻa e ngaahi fehuʻi lahi taha te ke lavá fekauʻaki mo e potufolofola fakataukei fakatokāteliné. (ʻOku kau ʻi he ngaahi sīpinga ʻo e ngaahi fehuʻi te ke lava ʻo ʻeké ʻa e ngaahi meʻá ni: Ko e hā e ʻuhinga ʻo e kupuʻi lea ko ʻení? Ko hai naʻe folofola ki ai ʻa e Fakamoʻuí, pea ko e hā hono ʻuhingá? Ko e hā e tefitoʻi moʻoni naʻe akoʻi ʻe he Fakamoʻuí, pea ko e hā hono ʻuhingá? Ko e fē ha taimi ʻe tokoni ai e akonaki ko ʻení kiate aú?)Fekumi ki ha tali ki hoʻo ngaahi fehuʻí ʻo fakaʻaongaʻi e ngaahi maʻuʻanga tokoni hangē ko e ngaahi potufolofola kehé, lotú, ngaahi tokoni ki hono ako ʻo e ongoongoleleí, mo e kakai ʻokú ke falala ki aí. Lekooti ha faʻahinga tali pē ʻokú ke maʻu.
ʻOku mahuʻinga ke manatuʻi ʻoku ʻikai maʻu vave ʻa e ngaahi tali kotoa pē. ʻOku fie maʻu ʻe ha niʻihi ha taimi lahi ange, ako lahi ange, mo ha fakahā fakataautaha. Ka neongo ia, ʻe lava ʻe hono fakaʻaongaʻi ʻo e ngaahi fehuʻí mo fekumi ki ha talí ʻo fakamālohia ho vā fetuʻutaki mo hoʻo Tamai Hēvaní mo tokoniʻi koe ke tupulaki ʻi hoʻo malava ke moʻui fakafalala fakalaumālie pē kiate koé.
Fakamatalaʻi ʻo e moʻoní
Fakakaukauloto ki hano lau ʻe ha kaungāmeʻa ʻa e potufolofola fakataukei fakatokāteline naʻá ke toki akó ka naʻe faingataʻa ke mahino ia kiate ia pea mo e founga ʻoku felāveʻi ai ia mo ʻenau moʻuí. ʻOku nau fehuʻi atu fekauʻaki mo ia.
2. Fakakakato ʻeni ʻi hoʻo tohinoa akó:
Hiki ha fakamatala ʻo e potufolofola fakataukei fakatokāteliné ki hoʻo kaungāmeʻá. Fakapapauʻi ke ʻiloʻi ʻa e ngaahi moʻoni mahuʻingá pea fakamatalaʻi ʻa e ʻuhinga ʻoku nau mahuʻinga ai kiate koé.
Toe vakaiʻi ʻo e akoakó
Fakakaukau ki he aʻusia ko ʻeni ʻo e fekumi ke mahino lahi ange mo fakamatalaʻi e ngaahi moʻoni ʻoku maʻu ʻi he ngaahi potufolofola fakataukei fakatokāteliné.
Naʻe kaunga fēfē hono fakaloloto hoʻo mahinó ki hoʻo malava ke fakamatalaʻi e ngaahi moʻoni ʻo e ongoongoleleí?
Ko e hā te ke lava ʻo fai ʻi he kahaʻú ke mateuteu ai ke fakamatalaʻi ki he niʻihi kehé ʻa e ngaahi moʻoni ʻoku maʻu ʻi he ngaahi potufolofola fakataukei fakatokāteliné mo e ngaahi potufolofola kehé?