Toe Vakaiʻi Hono 12 ʻo e Fakataukei Fakatokāteliné

Kumi mo Fakaʻilongaʻi: 1 Kolinitō 6:19–20 ki he Fakahā 20:12

ʻĪmisi

Ko ha nima ʻo ha talavou ʻokú ne pukepuke ha penivahevahe lanu kulokula, lolotonga ʻene lau mo ako ʻa e folofolá ʻi hono fungá. (horiz)

Ko e taha ʻo e ngaahi taumuʻa ʻo e fakataukei fakatokāteliné ke tokoniʻi koe ke ke kumi mo fakaʻilongaʻi ʻa e ngaahi fakamoʻoni fakafolofolá mo e ngaahi kupuʻi lea fakafolofola tefito ʻi he ngaahi veesi folofola fakataukei fakatokāteline ko iá. ʻE ʻoatu ʻe he lēsoni ko ʻení ha ngaahi faingamālie ke ke kumi mo fakaʻilongaʻi ʻa e ngaahi potufolofola fakataukei fakatokāteline ʻe 13 ʻoku maʻu ʻi he konga hono ua ʻo e Fuakava Foʻoú.

Ngaahi fakamoʻoni fakafolofolá mo e ngaahi kupuʻi lea fakafolofola tefitó

Fakakaukauloto ʻoku sio hoʻo kaungāmeʻá ʻokú ke ako mo fakaʻilongaʻi hoʻo folofolá. Hili haʻane sio ki ha peesi ʻoku lahi ai ha ngaahi fakaʻilonga, ʻokú ne fehuʻi atu pe ko e hā ʻokú ke fakaʻilongaʻi ai ʻa e ngaahi veesi ʻi hoʻo folofolá.

Te ke tali fēfē nai ki hoʻo kaungāmeʻá?

Ko hono fakaʻilongaʻi pe laineʻi ʻo e folofolá ko ha founga lelei ia ke fakafaikehekeheʻi ai ʻa e ngaahi potufolofola pau mei he niʻihi kehé, pea ʻokú ne ʻai ke faingofua ange hoʻo maʻu ʻa e ngaahi potufolofola ko iá ʻi he kahaʻú. Te ke maʻu ha faingamālie ʻi he lēsoni ko ʻení ke kumi mo fakaʻilongaʻi ʻa e ngaahi potufolofola fakataukei fakatokāteline ʻe 13 ʻoku maʻu ʻi he konga hono ua ʻo e Fuakava Foʻoú. Ke tokoni atu ke ke fai ʻení, fakakaukau ke hiki tatau ʻa e saati ko ʻení ki hoʻo tohinoa akó.

Fakataukei Fakatokāteline ʻo e Fuakava Foʻoú: 1 Kolinitō–Fakahā

1 Kolinitō 6:19–20	“Ko homou sinó ko e fale tapu ʻo e Laumālie Māʻoniʻoní.”
1 Kolinitō 11:11	“ʻOku ʻikai ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí.”
1 Kolinitō 15:20–22	“ʻOku hangē ʻoku mate kotoa pē ʻia ʻĀtamá, ʻe pehē foki ʻe moʻui kotoa pē ʻia Kalaisi.”
1 Kolinitō 15:40–42	ʻI he Toetuʻú, ʻoku ʻi ai ʻa e ngaahi nāunau ʻe tolu.
ʻEfesō 1:10	“ʻI he kakato ʻo e ngaahi kuongá naʻá ne tuʻutuʻuni, ke ne fakakātoa fakataha ʻa e meʻa kotoa pē ʻia Kalaisi.”
ʻEfesō 2:19–20	ʻOku fokotuʻu ʻa e Siasí “ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.”
2 Tesalonika 2:1–3	“ʻA e ʻaho ʻo Kalaisí … ʻe ʻikai hoko ʻa e ʻaho ko iá, ʻo kapau ʻe ʻikai tomuʻa hoko ʻa e liliu koví.”
2 Tīmote 3:15–17	“ʻA e ngaahi tohi māʻoniʻoní … ʻoku faʻa fakapoto koe ki he fakamoʻuí.”
Hepelū 12:9	Ko e Tamai Hēvaní ʻa e “Tamai ʻo e ngaahi laumālié.”
Sēmisi 1:5–6	“Ka ai hamou taha ʻoku masiva ʻi he potó, ke kole ʻe ia ki he ʻOtuá.”
Sēmisi 2:17–18	“Tuí, kapau ʻoku ʻikai ʻi ai ʻa e ngaahi ngāué, ʻoku mate ia.”
1 Pita 4:6	“Naʻe malanga ʻaki ai ʻa e ongoongoleleí kiate kinautolu foki kuo maté.”
Fakahā 20:12	“Pea naʻe fakamāuʻi ʻa e pekiá … ʻo fakatatau ki heʻenau ngaahi ngāué.”

Toe vakaiʻi e ngaahi potufolofola fakataukei fakatokāteline ʻe 13 ko ʻení mo e ngaahi kupuʻi lea fakafolofola tefitó, pea fakakaukau ke fakaʻilongaʻi kinautolu ʻi hoʻo folofolá.

1. Fili ha potufolofola fakataukei fakatokāteline ʻe tolu ʻokú ke ongoʻi ʻe tokoni atu ke ke ofi ange ai ki he Tamai Hēvaní mo Sīsū Kalaisi. Lau ʻa e ngaahi potufolofolá, pea fakamatalaʻi ʻa e meʻa ko ʻení:

Ko e meʻa ʻoku akoʻi mai ʻe he potufolofolá fekauʻaki mo e Tamai Hēvaní pe ko Sīsū Kalaisí.
Ko e ngaahi moʻoni mei he potufolofolá ʻokú ke ongoʻi ʻe mahuʻinga ke ke ʻiloʻí pea mo hono ʻuhingá.

ʻI he ngaahi ʻaho siʻi ka hokó, kamata ako maʻuloto ha niʻihi ʻo e ngaahi fakamoʻoni fakafolofolá mo e ngaahi kupuʻi lea fakafolofola tefitó mei he sātí. Fakakaukau ki ha ngaahi founga ʻe lava ke faitāpuekina ai hoʻo moʻuí mo e moʻui ʻa kinautolu ʻokú ke ʻiló ʻi hoʻo ʻiloʻi ʻa e ngaahi veesi ko ʻení.