Fakataukei Fakatokāteliné: Sione 3:16

Ko e Fakalelei ʻa Sīsū Kalaisí

ʻĪmisi

Jesus Christ kneeling as He prays and atones in the Garden of Gethsemane. Christ is depicted wearing red and blue robes. He has His hands clasped and is resting them on a large rock. A small stream of light coming through the darkened and cloudy background shines on the face of Christ. Light emanates around Christ’s head.

ʻI he lēsoni kuo ʻosí, naʻá ke ako ai fekauʻaki mo e ʻofa lahi naʻe fakahā mai ʻe he Tamai Hēvaní kiate kitautolu ʻi Hono fekauʻi mai Hono ʻAló ke hoko ko hotau Fakamoʻui mo e Huhuʻí. ʻE ʻoatu ʻe he lēsoni ko ʻení ʻa e faingamālie ke fakatupulaki hoʻo taukei ʻi he tokāteline ko ʻení ʻaki hono ako maʻuloto ʻa e fakamoʻoni fakafolofolá mo e kupuʻi lea mahuʻingá, fakamatalaʻi ʻo e tokāteliné, mo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Ako maʻuloto mo fakamatalaʻi

Ko ha tatau movetevete ʻeni ʻo e fakamoʻoni fakafolofolá mo e kupuʻi lea fakafolofola mahuʻinga ki he Sione 3:16. Fakatonutonu ‘a e ngaahi foʻi leá ʻaki hono hiki e fakamoʻoni fakafolofola totonú mo e kupuʻi lea fakafolofola mahuʻinga ʻi hoʻo tohinoa akó.

ʻa e ʻOtuá ʻAlo foaki naʻe ʻofa ki pē taha 16 He naʻá hono naʻe fakatupú Sione ne māmani pehē 3

Hili hoʻo fokotuʻutuʻu lelei ʻa e kupuʻi leá, toʻo ha kiʻi taimi ke ako maʻuloto ʻa e fakamoʻoni fakafolofolá mo e kupuʻi lea mahuʻinga ʻi he folofolá.

Tau pehē pē ‘i ha kiʻi momeniti siʻi ko ha faifekau taimi kakato koe. Kuo fakaafeʻi koe ki ha ʻapi ʻe ha ongomeʻa mali anga fakakaumeʻa kuo teʻeki ai ke na fanongo fekauʻaki mo e Fakalelei ʻa Sīsū Kalaisí. Fakaʻaongaʻi e meʻa kuó ke ako mei he lēsoni kimuʻá fekauʻaki mo e ʻofa ʻa e ʻOtuá ʻi hono fekauʻi mai Hono ʻAló, ko e hā te ke vahevahe mo e ongomeʻa mali ko ʻení?

Fakatātaaʻi ʻa e tūkunga ko ʻení mo ha taha lahi, pe tali ki he tūkungá ʻi hoʻo tohinoa akó.

Ko hono fakaʻaongaʻi

Fakaʻaongaʻi ha kiʻi taimi ke toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié mo e ʻEkitivitī ko ʻení.

Fakafonu ʻa e ngaahi meʻa ʻoku fakaʻatā atu ki he ngaahi kupuʻi lea takitaha ko ʻení.

Ngāue ʻi he t__.

Vakaiʻi e ngaahi fakakaukaú mo e ngaahi f___ ʻaki ha f____ ʻoku t_____.

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo f_______ f______.

Fakakaukau ki he tūkunga ko ʻení.

Hili ʻene foki tōmui tuʻo ua hokohoko ki ʻapí, naʻe faingataʻa kia Sēlai ha fepōtalanoaʻaki mo ʻene ongomātuʻá. ʻOkú ne ʻiloʻi ʻoku fakaʻau ke faingataʻa ki heʻene ongomātuʻá ke na falala kiate ia. ʻOkú ne ʻiloʻi foki kuó ne fai ha ngaahi fili, kapau naʻe ʻilo ʻe heʻene ongomātuʻá fekauʻaki mo kinautolu, ‘e iku ke toe siʻisiʻi ange ‘ena falala kiate iá. ʻOku ongoʻi halaia ʻa Sēlai, ka ʻoku ngali faingofua ange he taimí ni ke tukunoaʻi e ngaahi palopalema ko ʻení. Pea toe tānaki atu, ʻokú ne fakatokangaʻi ʻoku faingataʻa ange ke ne fakahoko mo ongoʻi e ngaahi meʻa fakalaumālié, ʻa ia ʻokú ne pehē ai ʻoku ʻikai moʻoni ʻa e Tamai Hēvaní pe kuó Ne tafoki meiate ia koeʻuhí ko ʻene ngaahi filí. ʻI he taimí ni, ʻoku ʻikai ʻilo ʻe Sēlai ʻa e meʻa ke faí pe feituʻu ke tafoki ki aí.”

Ko e hā ʻokú ne fakatupu ʻeni ke hoko ko ha tūkunga faingataʻa kia Sēlaí?
Kapau naʻá ke ʻi he tuʻunga ʻo Sēlaí, ko e hā ha niʻihi ʻo hoʻo ngaahi fehuʻi pe hohaʻa lahi tahá?

Fakakaukau ki he founga ʻe lava ke tokoni ai ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke tali ʻe Sēlai ʻa e tūkunga naʻá ne ʻi aí. ‘O ka fie maʻu, tuku ha kiʻi taimi ke toe vakaiʻi e ngaahi palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2022) ke ako lahi ange fekauʻaki mo e ngaahi tefitoʻi moʻoni ko ʻení.

Ngāue ʻi he tuí

Ko e hā ʻe lava ke fai ʻe Sēlai ke ngāue ai ʻi he tuí ʻi he tūkunga ko ʻení?
Ko e hā te ke talaange ke tokoniʻi ia kapau naʻá ne ongoʻi ʻoku fuʻu faingataʻa ʻa e ngāue ʻi he tuí?

Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.

Kuo ʻosi ongoʻi ʻe Sēlai ʻoku hangē kuo uesia hono vā mo ʻene ongomātuʻá pea mo e ʻOtuá koeʻuhí ko e ngaahi fili kuó ne faí. Hangē ʻe toe kovi ange e meʻa kotoa kapau ‘e talanoa tauʻatāina ki heʻene ongomātuʻá mo e ʻOtuá.

Ko e hā ha ngaahi founga ʻoku hala pe taʻekakato ai e fakakaukau ʻa Sēlaí?
Ko e hā ʻokú ke ʻilo fekauʻaki mo e Tamai Hēvaní, Sīsū Kalaisi, pe ko e palani ʻo e fakamoʻuí ʻe ʻaonga ke manatuʻi ʻe Sēlaí?
Kapau ko e faʻē pe tamai koe ʻa Sēlaí, ko e hā ha faʻahinga ongo te ke maʻu kiate ia? Ko e hā te ke fie maʻu ke mahino ki ho ʻofefine faingataʻaʻiá fekauʻaki mo e ongo ʻokú ke maʻú?

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Fakaʻaongaʻi ha ngaahi miniti siʻi ke kumi ha ngaahi potufolofola pe fakamatala mei he kau taki ʻo e Siasí ʻe ala tokoni kia Sēlai. Kapau ʻe fie maʻu, fakakaukau ke fakaʻaongaʻi ʻa e ngaahi maʻuʻanga tokoni hangē ko e Fakahinohino ki he Ngaahi Folofolá pe Ngaahi Tefito ʻo e Ongoongoleleí ke tokoniʻi koe (vakai ki he, ChurchofJesusChrist.org). ʻE lava foki ke ʻaonga hono ngāue ʻaki ha niʻihi ʻo e ngaahi folofola naʻá ke ako ʻi he lēsoni kimuʻá, hangē ko e Sione 3:14–17 pe Tokāteline mo e Ngaahi Fuakava 18:10–11.

Ko e hā haʻo meʻa naʻe ako fekauʻaki mo Sīsū Kalaisi mei hoʻo akó ʻe tokoni kia Sēlaí?
Ko e hā ha kupuʻi lea pau ʻe ua mei hoʻo akó ʻe ʻaonga kia Sēlaí? Ko e hā hono ʻuhingá?