ʻI he fehangahangai ʻa Paula mo e ngaahi tukuakiʻi loí mo e ngaohikovia fakatuʻasinó, naʻe ʻikai ke ne tuka ai. Tatau ai pē pe naʻe haʻi sēini pe ʻomi ʻa Paula ki he ʻao ʻo e kau takí mo e ngaahi tuʻí, naʻá ne vahevahe faivelenga ʻene fakamoʻoni mālohi kia Sīsū Kalaisi mo ʻEne ongoongoleleí. ʻOku fakataumuʻa ʻa e lēsoni ko ʻení ke tokoniʻi koe ke ke fakatupulaki ha holi lahi ange ke muimui ki he sīpinga ʻa Paulá ʻi hoʻo fakamoʻoni kia Sīsū Kalaisi mo ʻEne ongoongoleleí ʻi hoʻo moʻui fakaʻahó.
Ko hono vahevahe ʻo e fakamoʻoní
ʻI ha tuʻunga fakalotu pe fakalaumālie, ʻoku faʻa ʻuhinga ʻa hono fakamoʻoniʻi pe fai ʻo e fakamoʻoní ki hono vahevahe ʻo e ngaahi tui fakataautaha ʻo e ʻilo fakalaumālié ʻo hangē ko ia ne fai ʻe he Laumālie Māʻoniʻoní (vakai, Fakahinohino ki he Ngaahi Folofolá, “ Fakamoʻoniʻí ” mo e “ Fakamoʻoní ”).
Ko e fē ha taimi kuó ke ongoʻi ai ʻa e mālohi ʻo hono vahevahe hoʻo fakamoʻoní pe fanongo ki hano vahevahe ʻe ha [niʻihi] kehe ʻenau fakamoʻoní? Kuo tokoniʻi fēfē nai koe ʻe he meʻá ni?
ʻOkú ke loto-fiemālie fēfē nai ke vahevahe hoʻo fakamoʻoní mo e niʻihi kehé? Ko e hā ka momou ai ha taha ke vahevahe ʻene fakamoʻoní?
Ko e hā ha ngaahi fehuʻi mo ha ngaahi meʻa ʻokú ke hohaʻa ki ai fekauʻaki mo hoʻo fakamoʻoni ki he niʻihi kehé fekauʻaki mo hoʻo tuí?
Te ke ako ʻi he lēsoni ko ʻení ʻa e fakamoʻoni ʻa Paula ki he Fakamoʻuí mo e founga naʻe tokoniʻi ai ʻe he Fakamoʻuí ʻa e moʻui ʻa Paulá. Te ke ako foki ki he founga naʻe tali ʻaki ʻe he niʻihi kehé ʻa e fakamoʻoni ʻa Paulá. ʻI hoʻo akó, fakakaukau ki he founga ʻe lava ke faitāpuekina ai ʻe he Fakamoʻuí hoʻo moʻuí ʻi hoʻo loto-fiemālie ke vahevahe hoʻo fakamoʻoni kiate Ia mo ʻEne ongoongoleleí, neongo pe ko e hā ʻa e mālohi hoʻo fakamoʻoní.
Ko e fakamoʻoni ʻa e ʻAposetolo ko Paulá
Neongo hono tā, tolomakaʻi, mo tuku pōpula halaʻi ʻo Paulá, ka naʻá ne toutou vahevahe ʻene fakamoʻoni kia Sīsū Kalaisi mo ʻEne ongoongoleleí. ʻI hoʻo lau ʻa e talanoa kia Paulá, feinga ke fakakaukauloto ki he meʻa ʻoku hoko ʻi he fakamatalá.
Ko e ako ke fakakaukaulotó. Ko e fakakaukaulotó ko ha taukei ako folofola mahuʻinga ia ʻe lava ʻo tokoni atu ke ke ongoʻi vāofi ange ai mo e meʻa ʻoku hoko ʻi he fakamatala fakafolofolá. Ke fakakaukaulotó, sioloto pē naʻá ke ʻi ai lolotonga ʻa e talanoá. ʻI hoʻo laú, sioloto ki he ngaahi ʻata, ngaahi ongo, mo e ngaahi ongo fakaeloto naʻá ke mei aʻusiá.
ʻOku ʻi he ngaahi potufolofola ko ʻení ha ngaahi konga ʻo e fakamoʻoni ʻa Paulá pea mo e ngaahi tali ʻa kinautolu naʻa nau fanongo kiate iá. Fili ha taha ʻo e ngaahi potufolofola ke laú, pea fakakaukau ki he founga naʻe mei liliu ai koe ʻe heʻene fakamoʻoní kapau naʻá ke ʻi ai.
Fakamoʻoni ʻa Paulá
Ko e tali ʻa e kakaí
Fakamoʻoni ʻa Paulá
Naʻe haʻi ʻa Paula ʻaki ha ngaahi sēini hili hono puke pōpula ia ʻi Selusalemá. Naʻe fakangofua ia ke ne lea ki he kakaí lolotonga ʻene tuʻu ʻi tuʻa ʻi he Kolotau ʻAnitoniá.
Naʻe puke pōpula ʻa Paula ʻi tuʻa ʻi he temipale ʻi Selusalemá pea naʻe ʻomi ia ki he ʻao ʻo e kau taki ʻo e kau Siú. Naʻe fakafehuʻi ia ʻe he kau taki ko ʻeni ʻo e kau Siú pea tuku pōpula ia. Naʻe ʻilo ʻe he ʻeikitau Loma naʻá ne puke pōpula ʻa Paulá ha alea ʻi he lotolotonga ʻo ha kau Siu ke fakapoongi ʻa Paula, ko ia naʻá ne fekauʻi atu leva ʻa Paula ki Sesalia. ʻI Sesaliá, naʻe fakangofua ai ʻa Paula ke ne lea ʻo taukapoʻi ia ʻi he ʻao ʻo e kōvana Loma ko Filiké.
Hili ha taʻu ʻe ua hono tuku pōpula ʻo Paulá, naʻá ne hā ʻi he ʻao ʻo e kōvana foʻoú ʻo tuʻutuʻuni ha faingamālie ke fakamoʻoni ai ʻi he ʻao ʻo Sisá. Naʻe fokotuʻutuʻu ʻe he Tuʻi ko ʻAkilipá ke fanongo ki he fakamoʻoni ʻa Paulá kimuʻa peá ne fononga ki Lomá.
Hiki ʻi hoʻo tohinoa akó ʻa e meʻa naʻá ke akó. Fakapapauʻi ke fakakau ‘a e ngaahi poini ko ‘ení:
Ko e hā ha ngaahi meʻa pau naʻe makehe kiate koe fekauʻaki mo e fakamoʻoni ʻa Paula kia Sīsū Kalaisi mo ʻEne ongoongoleleí?
Ko e hā ha meʻa naʻá ke tanganeʻia ai fekauʻaki mo Paula ʻi he ngaahi veesi ko ʻení?
ʻOkú ke pehē ko e hā naʻe maʻu ai ʻe Paula ʻa e loto-toʻa mo e mālohi ke fakamoʻoni kia Kalaisi ʻi he ngaahi tūkunga faingataʻa peheé?
ʻOkú ke pehē ko e hā ʻoku mahuʻinga ai ke vahevahe ʻete fakamoʻoní neongo ʻe fakasītuʻaʻi ia ʻe he niʻihi kehé?
Lau ʻa e fakamatala ko ʻení, fakalaulauloto ki he founga ʻe lava ke tokoniʻi ai koe ke ke maʻu ʻa e loto-toʻa ke fakamoʻoni ʻo hangē ko ia naʻe fai ʻe Paulá.
Naʻe vahevahe ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni, ʻi heʻene fakamamafaʻi neongo ʻoku ʻikai fiemaʻu ke haohaoa hono vahevahe ʻetau fakamoʻoní mo e niʻihi kehé ka ʻoku lava ke toutou fakahoko ia.
ʻĪmisi
Laʻitā fakaʻofisiale ʻo ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, 2006. Naʻe uiuiʻi ko e Tokoni Ua ʻi he Kau Palesitenisī ʻUluakí, ʻi he ʻaho 3 ʻo Fēpueli 2008. Laʻitā fakaʻofisiale ʻi he 2008 ʻo fetongi ʻa e tā naʻe faitaaʻi ʻi he 2004.
Ko e hā pē ha founga ʻe ngali fakanatula mo angamaheni kiate koé, vahevahe ki he kakaí ʻa e ʻuhinga ʻoku mahuʻinga ai kiate koe ʻa Sīsū Kalaisi mo Hono Siasí. …
ʻIloʻi ʻoku ʻikai ko ho fatongiá ke fakaului ʻa e kakaí. Ko e fatongia ia ʻo e Laumālie Māʻoniʻoní. Ko ho fatongiá ke vahevahe ʻa e meʻa ʻokú ke tui mo ongoʻí pea moʻui ʻaki maʻu pē hoʻo tuí.
2. Fakakakato ʻa e ʻekitivitī ko ʻení, pea tali ʻa e fehuʻi ʻi laló ʻi hoʻo tohinoa akó:
ʻAi ha kōlomu ʻe ua ʻi hoʻo tohinoa akó. Fakakaukauʻi mo lekooti ʻi ha kōlomu ʻe taha hoʻo fakamoʻoni fakatāutahá, kau ai ha ngaahi aʻusia fakataautaha kuo nau fakamālohia mo langaki hake hoʻo fakamoʻoni ki he Tamai Hēvaní, Sīsū Kalaisi, mo ʻEna ongoongoleleí. Hiki ʻi he kōlomu ʻe tahá ha faʻahinga fakakaukau mo ha ngaahi ongo fekauʻaki mo e founga te ke lava ai ʻo vahevahe ʻa e fakamoʻoni ko ʻení mo e niʻihi kehé ʻi hoʻo moʻui fakaʻahó, ʻo hangē ko ia naʻe fai ʻe Paulá.
Ko e hā ha ngaahi founga naʻe hoko ai ʻa e Fakamoʻuí ko ha sīpinga ʻo hono vahevahe ʻo e fakamoʻoní neongo ʻa e tali pe fakafōtunga ʻa e niʻihi kehé? (vakai, Tokāteline mo e Ngaahi Fuakava 138:25–26).
Mahalo te ke ongoʻi momou pe tailiili fekauʻaki mo hono fakamoʻoniʻi ʻo e Fakamoʻuí. ʻE tokoni fēfē nai ia kiate koe ke ke fakakaukau ki he ongo ʻa e Fakamoʻuí fekauʻaki mo hoʻo feinga ke fakamoʻoni kiate Iá?
Fili Pē: Fie Ako Lahi Ange?
Ko e fē ha feituʻu te u ako lahi ange ai ki he ʻuhinga ʻo e fakamoʻoní mo e founga ke fakamālohia ai ʻeku fakamoʻoní?
Ke maʻu ha tokoni ke mahino ʻa e ʻuhinga ʻo e fakamoʻoní mo e founga ke fakamālohia ai hoʻo fakamoʻoní, lau ʻa e fakamatala ʻi he Ngaahi Tefito ʻo e Ongoongoleleí “Fakamoʻoni” (topics.ChurchofJesusChrist.org).
Ki ha ngaahi sīpinga ʻo e founga naʻe fakamālohia ai ʻe he niʻihi kehé ʻenau fakamoʻoní, fakakaukau ke mamata ʻi he foʻi vitiō “Increase Your Testimony (Fakatupulaki Hoʻo Fakamoʻoní)” (4:59), ʻoku maʻu ʻi he ChurchofJesusChrist.org.
Ko e hā ʻoku mahuʻinga ai ke u loto-toʻa ʻi heʻeku fakamoʻoní?
Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
Tā fakaʻofisiale ʻo ʻEletā Kuenitini L. Kuki Ui ki he Kōlomu ʻo e Kau ʻAposetolo ʻe Toko Hongofulu Mā Uá ʻi he ʻaho 6 ʻo ʻOkatopa 2007.
Ko e “toʻa ʻi he fakamoʻoni ʻo Sīsuú” [ Tokāteline mo e Ngaahi Fuakava 76:79 ] ko e sivi faingofua mo mahuʻinga ia ki he niʻihi te nau maʻu ʻa e ngaahi tāpuaki ʻo e puleʻanga fakasilesitialé mo kinautolu ʻi he puleʻanga fakatelesitiale maʻulalo angé. …
ʻOku hoko ʻetau loto-toʻa ʻi heʻetau fakamoʻoni kia Sīsuú, ko ha founga ia ke maʻu ai e ʻaloʻofa ʻa e Fakamoʻuí mo e puleʻanga fakasilesitialé.
Te u lava fēfē nai ʻo vahevahe ʻeku fakamoʻoní ʻi ha ngaahi founga angamaheni mo fakanatula?
Ki ha ngaahi sīpinga ʻo e founga ke vahevahe ai hoʻo fakamoʻoní ʻi ha ngaahi founga angamaheni mo fakanatulá, fakakaukau ke mamata ʻi he foʻi vitiō “Sharing Your Beliefs (Vahevahe Hoʻo Ngaahi Tuí)” (2:02), ʻoku maʻu ʻi he ChurchofJesusChrist.org. Te ke lava foki ʻo fakakaukau ke vakaiʻi ʻa e peesi uepisaiti ko e “Share the Gospel: Share Online,” ʻoku lava ke maʻu ʻi he ChurchofJesusChrist.org, pe lau ʻa e fakamatala “Ministering Principles: How to Share Testimony More Naturally” (Ensign, Mar. 2019, 8–11).