Aʻusia Fakaako Fika 9: Teuteuʻi ʻo ha Lēsoní: Ko Hono Fakapapauʻi ʻo e Meʻa ke Akoʻí
Aʻusia Fakaako Fika 9
Teuteuʻi ʻo ha Lēsoní: Ko Hono Fakapapauʻi e Meʻa ke Akoʻí
Vakai Fakalūkufuá
Fakatokangaʻi ange: ʻOku fakataumuʻa e ngaahi aʻusia fakaako ʻe nima hono hokó ke tokoniʻi koe ke ke ako e founga teuteu lēsoní. ʻOku nofotaha e aʻusia fakaako fika 9–10 ʻi hono fakakaukauʻi e meʻa ke akoʻí, pea nofotaha leva e aʻusia fakaako fika 11–13 ʻi hono fakakaukauʻi e founga hono akoʻí.
ʻOku fakamatalaʻi ʻe he aʻusia fakaakó ni ʻa e ngaahi fakakaukau ko ʻení:
Ko hono akoʻi fakahokohoko ʻo e folofolá
Ko hono ʻai ke palanisi e meʻa ke akoʻí mo e founga hono akoʻí
Ko Hono Fakapapauʻi ʻo e meʻa ke akoʻí
Ngaahi Fakakaukau Mahuʻingá
ʻOku faʻa ʻi ai ha ngaahi fehuʻi ʻa e kau faiako kuo uiuiʻi foʻoú, hangē ko ʻení:
ʻOku kehekehe fēfē hono akoʻi ʻo e kalasi seminelí mo hono akoʻi e ngaahi kalasi kehé hangē ko e Tokāteline ʻo e Ongoongoleleí, Fineʻofá, kōlomu ʻo e kaumātuʻá, mo e alā meʻa peheé?
ʻOku ou teuteu fēfē ha lēsoni?
Ko e hā e lōloa e taimi ʻoku totonu ke u fili ai e meʻa ke akoʻí mo e founga ke akoʻi ai iá?
Te u fakapapauʻi fēfē ʻa e meʻa ke akoʻí?
ʻE tokoni ʻa e aʻusia fakaako ko ʻení ke tali ha niʻihi ʻo e ngaahi fehuʻi ko ʻení.
Ko Hono Ako mo Akoʻi Fakahokohoko ʻo e Folofolá
ʻOku nofotaha e ngaahi kalasi seminelí mo e ʻinisititiutí ʻi he ngaahi folofola kuo fakangofuá, ʻo akoʻi fakahokohoko ai e ngaahi tohí mo e ngaahi vahé ʻo hangē ko ʻenau ʻasi ʻi he folofolá. ʻOku fokotuʻutuʻu ʻa e ngaahi lēsoní ʻo fakatatau ki he ngaahi konga folofolá kae ʻikai ko e tefitó. Mahalo ʻe ʻi he ngaahi konga folofola takitaha ha ngaahi vahe lahi, ngaahi tefitoʻi moʻoni, mo e ngaahi tefito te ke lava ʻo fakamamafaʻi. ʻOku kehe ʻa e founga ko ʻení mei he ngaahi kalasi ʻinisititiuti ʻoku akoʻi ʻaki e founga fakakaveingá.
Sio ʻi he foʻi vitiō “Ko Hono Ako Fakahokohoko ʻo e Folofolá” (0:46), lava ke maʻu ʻi he LDS.org. ʻI he foʻi vitiō ko ʻení, ʻoku fakamatalaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi lelei ʻo hono ako fakahokohoko ʻo e folofolá.
ʻEkitivitī ʻo e Tohi Tuʻutuʻuni Ko Hono Akoʻi mo Ako ʻo e Ongoongoleleí
ʻĪmisi
handbook cover
Lau ʻa e talateu ki he vahe 3 ʻi he peesi 50–51 ʻo e Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú (2012) ke tokoni ʻi hono fakamahinoʻi atu e ʻuhinga ʻoku akoʻi fakahokohoko ai e folofolá ʻi he ngaahi kalasi semineli mo e ʻinisititiuti ʻoku nofotaha e tokangá ʻi he ngaahi tohi folofola kuo fakangofuá. ʻI hoʻo lau e vahé ni, fakaʻilongaʻi ʻi hoʻo tohi tuʻutuʻuní ʻa e ngaahi founga ʻe faitāpuekina ai koe mo hoʻo kau akó ʻi hono ako fakahokohoko ʻo e folofolá.
Te ke akoʻi ha ngaahi tefitoʻi moʻoni lahi ʻi ha lēsoni ʻe taha ʻi he taimi ʻokú ke akoʻi fakahokohoko ai ha konga folofola. ʻE lava ke maʻu ʻe he tefitoʻi moʻoni takitaha ha tuʻunga fakamamafaʻi kehekehe.
Sio ʻi he foʻi vitiō “Ko Hono Akoʻi Fakahokohoko ʻo e Folofolá” (4:28), lava ke maʻu ʻi he LDS.org. ʻOku fakatātaaʻi ʻe he foʻi vitiō ko ʻení ha ngaahi fakakaukau mahuʻinga lahi ke fakakaukauʻi ʻi he taimi ʻoku palani ai ke akoʻi fakahokohoko ha konga folofola.
Ko e Hā pea mo e Foungá: Ko Hono Fakapalanisi Hoʻo Teuteú
ʻOku mahuʻinga ke fakapalanisi hoʻo ngaahi ngāué ʻi hono fakapapauʻi fakatouʻosi e meʻa ke akoʻí mo e founga hono akoʻi iá, lolotonga hono teuteu e lēsoní.
Ko e Teuteu Taʻe-Palanisí
ʻĪmisi
meʻafua taʻe-palanisi, Ko e hā
Ko e hā
ʻI he taimi ʻoku fakamoleki ai ʻe ha faiako ha taimi mo ha ivi lahi ʻi hono fakapapauʻi pe ko e hā te ne akoʻí, he ʻikai ke ne maʻu ʻe ia ha taimi feʻunga ke fakakaukauʻi e founga ke tokoniʻi ai e kau akó ke nau kau he akó. ʻOku faʻa hoko ʻeni ko ha ngaahi lēsoni taʻeoli pea fuʻu fakatefito pē ia ʻi he faiakó.
ʻĪmisi
unbalanced scale, How
Foungá?
ʻI he taimi ʻoku fakamoleki ai ʻe ha faiako ha taimi lahi mo hono iví ʻi hono fakapapauʻi e founga ke akoʻi aí, ʻe lava ke mōlia e taumuʻa mo e mālohi ʻo e lēsoní. ʻI he tuʻunga ko ʻení, mahalo ʻe manatuʻi ange ʻe he kau akó ʻa e founga fakafaiakó kae ʻikai ko e ngaahi pōpoaki fakalaumālie mei he folofolá.
Teuteu ʻoku Palanisí
ʻĪmisi
balanced scale
“Kuo pau ke fakakaukauʻi ʻe he faiako kotoa ʻi he taimi ʻokú ne teuteu ai ha lēsoní: ʻKo e hā ʻa e meʻa te u akoʻí?ʻ mo e ʻʻE founga fēfē haʻaku akoʻi ia?”(Ko Hono Akoʻi mo Ako ʻo e Ongoongoleleí,70). Kuó ke toki akó ni ʻa e meʻa ʻoku hoko ʻi he taimi ʻoku ʻikai palanisi ai ʻa e meʻa ke akoʻí mo e foungá ʻi hoʻo teuteú. Lau he taimí ni ʻa e ngaahi vahe ko ʻení pea ke fakatokangaʻi ange ʻa e ngaahi ʻulungaanga ʻo e teuteú ʻi he taimi ʻoku palanisi ai ʻa e meʻa ke akoʻí mo e foungá.
Ko e hā
ʻOku kau ʻi hono teuteu ʻo e meʻa ke akoʻí ʻa e:
Mahino ʻa e kakano ʻo e folofolá (puipuituʻa, ʻulungaanga fakafonua, mo e taimi mo e feituʻu).
Mahino ʻa e kaveingá (talanoá, kakaí, ngaahi meʻa naʻe hokó, malangá, mo e ngaahi fakamatala fakalaumālié.
ʻIloʻi ʻo e tokāteline pe ngaahi tefitoʻi moʻoni mahuʻingá.
Foungá?
ʻOku kau ʻi hono teuteu ʻa e founga ke ʻakoʻi ʻakí, ʻa hono fakapapauʻi e ngaahi foungá, meʻa ke faí, mo e ngaahi ʻekitivitī te ke fakaʻaongaʻi ke tokoniʻi e kau akó ke nau ako (aleaʻi fakakalasi, fehuʻi, ngaahi maʻuʻanga tokoni ki he fanongó mo e mamatá, tohí, ngāue ʻi ha fanga kiʻi kulupu iiki, mo e alā meʻa peheé).
Sio ʻi he foʻi vitiō “Maʻu ʻEku Leá” (8:54), lava ke maʻu ʻi he LDS.org. ʻI he foʻi vitiō ko ʻení, naʻe toki uiuiʻi ha faʻē femoʻuekina ko Lia Malei, ke hoko ko ha faiako semineli. ʻOkú ne ongoʻi manavasiʻi fekauʻaki mo hono kumi ha taimi ke teuteu ai e lēsoní mo faiako he ʻaho kotoa pē, ʻo hangē ko ia ʻoku hoko ki he kau faiako tokolahi kuo uiuiʻi foʻoú. ʻOkú ne fifili pe ko e fē meʻa te ne kamata aí. Lolotonga hoʻo sio he foʻi vitioó, kumi pe ko hai ʻokú ne ʻalu ki ai he taimi ʻoku fie maʻu tokoni ai fekauʻaki mo hono uiuiʻí. Kumi foki pe ko e hā e faleʻi ʻoku ʻoange ki aí fekauʻaki mo e feituʻu mahuʻinga taha ke kamata aí he taimi teuteu lēsoní.
Ko Hono Fakakaukauʻi e Meʻa ke Akoʻí: Ngaahi Tuʻunga ʻe Fā
ʻI hoʻo teuteu ha lēsoni, muimui ʻi he ngaahi tuʻunga ko ʻeni ʻe fā ke tokoni ʻi hoʻo fakakaukauʻi e meʻa ke akoʻí. ʻOku fakamatalaʻi ʻa e ngaahi tuʻunga ko ʻení ʻi he tohi tuʻutuʻuni Ko Hono Akoʻi mo Ako ʻo e Ongoongoleleí konga 4.3.3 (“Fakakaukauʻi e Meʻa ke Akoʻí”), ʻi he peesi 70–74.
Fekumi ʻi he folofolá ke mahino ʻa e kakano mo e kaveinga ʻo e konga folofolá.
Feinga ke ʻiloʻi pea fekumi ke mahino ʻa e tokāteline mo e ngaahi tefitoʻi moʻoni ʻi he konga folofolá.
Fakakaukauʻi pe ko e fē ‘a e ngaahi tefitoʻi moʻoni mo e ngaahi tokāteline ‘oku mahuʻinga taha ke ako mo fakaʻaongaʻi ‘e hoʻo kau akó.
Fakakaukauʻi ʻa e tuʻunga fakamamafa ‘e fai ki he konga folofola takitaha.
ʻE nofotaha ʻa e ʻekitivitī ko ʻení ʻi he ngaahi tuʻunga ʻe fā ʻo hono fakakaukauʻi e meʻa ke akoʻí. ʻI he ngaahi konga takitaha ʻe fā ʻo e ʻekitivitií, sio ʻi he foʻi vitioó ki hono fakatātaaʻi e founga ke fakakakato ai ʻa e tuʻunga takitaha. Hili iá peá ke akoako fakahoko e meʻa kuó ke ʻiló ʻaki hoʻo faʻu ha fanga kiʻi fakamatala ki hoʻo lēsoní lolotonga hoʻo fokotuʻutuʻu e Mōsaia 27.
ʻEkitivitī Teuteu ʻo e Lēsoní
ʻĪmisi
two women studying at table
Tuʻunga 1: ʻIloʻi ʻa e Kakano mo e Kaveinga ʻo e Konga Folofolá
ʻOku ʻomi ʻe he tohi tuʻutuʻuni Ko Hono Akoʻi mo Ako ʻo e Ongoongoleleí ha ngaahi fokotuʻu ʻe fā ke fakakaukau ki ai ʻi hoʻo fekumi ke mahino ʻa e kakano mo e kaveinga ʻo ha konga folofola:
Ako fakamātoato e konga folofolá kae ʻoua kuo mahino mo ke maheni mo e kaveingá.
Fakatokangaʻi ange ʻa e ngaahi vahevahe fakanatula ʻi he konga folofolá ʻi he taimi ʻoku liliu ai e tefitó pe ngāue ke faí.
Vahevahe ʻa e konga folofolá ki ha fanga kiʻi konga pe fakakulupu e vēsí ʻo fakatatau mo e vahevahe fakanatulá.Fakatokangaʻi ange: Te ke fakaʻaongaʻi ʻa e ngaahi konga iiki ko ʻení ke fokotuʻutuʻu ʻa e lele lelei ʻo e lēsoní pea fai ha tokanga ki he kaveinga ʻoku ʻi he konga folofolá.)
Fakamatalaʻi fakanounou ʻa e meʻa naʻe hoko ʻi he konga takitaha ʻo e ngaahi vēsí.
Sio he vitiō “Lesson Preparation: Verse Segments and Summary Statements” (5:08), ʻi he LDS.org. ʻOku fakatātaaʻi ʻe Sisitā Uilisoni ʻa e ngaahi sitepú ni ʻi he foʻi vitiō ko ʻení.
Faʻu ha pepa fakamatala teʻeki ke tohi ai ha meʻa ke tatau mo e meʻa ne ke sio ai ʻi he vitioó, pe fakaʻaongaʻi ha laʻipepa tufa ʻoku ui ko e “Fakapapauʻi ʻo e Meʻa ke Akoʻí” ʻoku ʻoatu ʻi he fakahokohoko fakamotuʻalea ʻo e tohi lēsoni ko ʻení. Hili ia pea ʻai ke ʻiloʻi ‘a e kakano mo e kaveinga ‘o e konga folofolá ʻaki hono fai e ngaahi meʻá ni:
Ako ʻa e konga folofolá (Mōsaia 27) ke ke maheni mo e kakanó mo e kaveingá.
Fakatokangaʻi ange ʻa e ngaahi vahevahe fakanatulá ʻi he feituʻu ʻoku hoko ai ha liliu ʻi he tefitó pe ngāué.
Vahevahe ʻa e konga folofolá ki ha ngaahi kulupu iiki ange ʻo e ngaahi vēsí ʻo makatuʻunga ʻi he ngaahi vahevahe fakanatula ko ʻení.
ʻI hoʻo tohi fakamatalá, hiki fakanounouʻi ʻa e meʻa ne hoko ʻi he konga takitaha ʻo e ngaahi vēsí.
Tuʻunga Fika 2: ʻIloʻi pea Mahino e Ngaahi Tokāteliné mo e Ngaahi Tefitoʻi Moʻoní
Hili hoʻo fakamatalaʻi fakanounou e ngaahi konga ʻo e vēsí, te ke ʻiloʻi ai e tokāteline mo e ngaahi tefitoʻi moʻoni ʻi he konga takitaha. Hili ia peá ke hiki ha fakamatala mahino mo faingofua ʻokú ne fakanounouʻi ʻa e tokāteline mo e ngaahi tefitoʻi moʻoni kuó ke ʻiloʻí.
Sio ʻi he foʻi vitiō “Teuteuʻi ʻo e Lēsoní: ʻIloʻi ʻa e Tokāteliné mo e Ngaahi Tefitoʻi Moʻoní” (2:57), lava ke maʻu ia ʻi he LDS.org. ʻI he foʻi vitiō ko ʻení, ʻoku fakatātaaʻi ʻe Sisitā Uilisoni ʻa e founga ʻokú ne ʻiloʻi ai ʻa e tokāteliné mo e ngaahi tefitoʻi moʻoní, fakamatalaʻi fakanounou kinautolu ʻi ha ngaahi fakamatala faingofua, pea hiki ia ʻi he fokotuʻutuʻu ʻo ʻene lēsoní.
Foki ki hoʻo maʻuʻanga fakamatala ki he lēsoní ʻi he Mōsaia 27 pea fai ʻeni:
Feinga ke ʻiloʻi ʻa e tokāteline mo e ngaahi tefitoʻi moʻoni ʻi he konga veesi takitaha.
ʻI hoʻo tohi fakamatalá, hiki ʻa e tokāteline mo e tefitoʻi moʻoni takitaha ʻo ngāue ʻaki ha ngaahi fakamatala mahino mo faingofua.
ʻĪmisi
hands writing on form
Tuʻunga Fika 3: Fakakaukauʻi pe ko e Fē ʻa e Tokāteline mo e Tefitoʻi Moʻoni ʻOku Mahuʻinga Taha ke Ako mo Fakaʻaongaʻi ʻe he Fānau Akó
ʻOku faʻa lahi ange ʻa e meʻa ʻi he ngaahi konga folofolá ʻi he meʻa ʻoku lava ke aleaʻi ʻi he kalasí. Fakakaukauʻi ʻa e ngaahi meʻa ko ʻení ʻi he taimi ʻokú ke fakapapauʻi ai pe ko e fē ‘a e tokāteline mo e ngaahi tefitoʻi moʻoni ‘oku mahuʻinga taha ke ako mo fakaʻaongaʻi ‘e hoʻo fānau akó:
Ngaahi Ueʻi ʻa e Laumālie Māʻoniʻoní.
Ko e taumuʻa ʻa e tokotaha faʻu tohí
Tokāteline mo e ngaahi tefitoʻi moʻoni fakauluí
Ko e ngaahi fie maʻu mo e meʻa ʻe malava hoʻo fānau akó.
Sio ʻi he foʻi vitiō “Teuteuʻi ʻo e Lēsoní: Fili ʻa e Ngaahi Tefitoʻi Moʻoni ke Fakamamafaʻí” (5:07), lava ke maʻu ʻi he LDS.org. ʻI he foʻi vitiō ko ʻení, ʻoku fakatātaaʻi ʻe Sisitā Uilisoni ai e founga ʻokú ne fakapapauʻi ʻaki e tokāteline mo e ngaahi tefitoʻi moʻoni mahuʻinga taha ke ako mo fakaʻaongaʻi ʻe heʻene fānau akó.
Foki ki hoʻo maʻuʻanga fakamatala ki he lēsoní ʻi he Mōsaia 27 pea fai ʻeni:
Fakakaukauʻi pe ko e fē ‘a e tokāteline mo e ngaahi tefitoʻi moʻoni naʻá ke ʻilo ‘oku mahuʻinga taha ke ako mo fakaʻaongaʻi ‘e he fānau akó. ʻI hoʻo fai iá, fakakaukauʻi ʻeni:
Ngaahi Ueʻi ʻa e Laumālie Māʻoniʻoní.
Ko e taumuʻa ʻa e tokotaha faʻu tohí
Tokāteline mo e ngaahi tefitoʻi moʻoni fakauluí
Ko e ngaahi fie maʻu mo e meʻa ʻe malava hoʻo fānau akó.
ʻI hoʻo tohi fakamatalá, siakaleʻi pe fakaʻilongaʻi ʻa e tokāteline mo e ngaahi tefitoʻi moʻoni kuó ke fili ʻoku mahuʻinga taha ke ako mo fakaʻaongaʻi ʻe hoʻo fānau akó.
ʻĪmisi
hand pointing to form
Tuʻunga Fika 4: Fakakaukauʻi ʻa e Tuʻunga Fakamamafa ‘e Fai ki he Konga Folofola Takitaha
Hili hono fakapapauʻi ʻa e tokāteline mo e ngaahi tefitoʻi moʻoni ʻoku mahuʻinga taha ke ako mo fakaʻaongaʻi ʻe he fānau akó, ko e sitepu hokó leva ko hono fili e ngaahi veesi ʻo e konga folofolá ʻoku totonu ke fai ki ai e fakamamafa lahi tahá lolotonga e lēsoní. Te ke fakamamafaʻi lahi tahá e ngaahi konga ʻoku ʻi ai e ngaahi moʻoni naʻá ke ʻiloʻi ʻoku mahuʻinga tahá.
Ke tokoni atu ke ke ʻilo e faʻahinga fakamamafa te ke fai ki he veesi takitaha, fehuʻi loto pē e ngaahi fehuʻi ko ʻení, ʻa ia ʻoku kaunga ki he sīpinga ʻo e akó. ʻI he konga veesi ko ʻení, te u palani nai ke tokoniʻi ʻeku fānau akó:
Ke mahino ʻa e kakano mo e kaveinga ʻo e folofolá
Ke ʻiloʻi ‘a e tokāteline mo e ngaahi tefitoʻi moʻoni mahuʻingá?
Ke mahino ʻa e tokāteliné mo e ngaahi tefitoʻi moʻoní?
Ke ongoʻi ʻa e moʻoni mo e mahuʻinga ‘o e ngaahi tokāteline mo e ngaahi tefitoʻi moʻoni ko iá?
Ke fakaʻaongaʻi ʻa e ngaahi moʻoní ʻi heʻenau moʻuí?
Sio ʻi he foʻi vitiō “Teuteuʻi ʻo e Lēsoní: Fakapapauʻi ʻa e Tuʻunga Hono Fakamamafaʻi ʻa e Konga Veesi Takitaha” (6:57), ʻe lava ke maʻu ʻi he LDS.org. ʻI he foʻi vitiō ko ʻení, ʻoku fakatātaaʻi ʻe Sisitā Uilisoni ʻa e founga ʻokú ne fakaʻaongaʻi ai ʻa e sīpinga akó ke fakapapauʻi ʻaki e faʻahinga fakamamafa ʻe fai ki he veesi takitaha ʻi he konga folofolá.
Foki ki hoʻo maʻuʻanga fakamatala ki he lēsoní ʻi he Mōsaia 27 pea fakakakato ʻa e ngaahi ngāue ko ʻení:
ʻI hoʻo vakai ki he ngaahi konga ʻo e vēsí ʻi hoʻo tohi lekōtí, fakakaukau pe ko e hā e faʻahinga fakamamafa ʻe fai ki he konga takitaha ʻaki haʻo fehuʻi loto pē e ngaahi fehuʻi mei he sīpinga ako ko ʻení. ʻI he veesi ko ʻení, te u palani nai ke tokoniʻi ʻeku fānau akó:
Ke mahino ʻa e kakano mo e kaveinga ʻo e folofolá?
Ke ʻiloʻi ‘a e tokāteline mo e ngaahi tefitoʻi moʻoni mahuʻingá?
Ke mahino ʻa e tokāteliné mo e ngaahi tefitoʻi moʻoní?
Ke ongoʻi ʻa e moʻoni mo e mahuʻinga ‘o e ngaahi tokāteline mo e ngaahi tefitoʻi moʻoni ko iá?
Ke fakaʻaongaʻi ʻa e ngaahi moʻoní ʻi heʻenau moʻuí?
Tohiʻi e lahi ʻo e fakamamafa kuó ke fili ki he konga takitaha ʻi hoʻo nouti ki he lēsoní.
Fakamatala Fakanounoú mo e Fakaʻaongaʻí
Ngaahi Tefitoʻi Moʻoni ke Manatuʻí
ʻI he ngaahi kalasi semineli mo e ʻinisititiuti ʻoku nofotaha ʻi he ngaahi tohi folofola kuo fakangofuá, ʻoku totonu ke akoʻi ʻa e tokāteliné mo e ngaahi tefitoʻi moʻoní ʻo fakatatau mo honau hokohoko ʻi he folofolá.
ʻI hono teuteuʻi ha lēsoní, ʻoku fakapapauʻi ʻe hono fakapalanisi ʻo e meʻa ke akoʻí mo e founga ke akoʻi ʻakí, ha mālohi lahi ange mo ha aʻusia fakaako ʻoku mahuʻingamālie.
ʻI hono fakakaukauʻi e meʻa ke akoʻí:
Ako fakamātoato e folofolá ke mahino ʻa e kakano mo e kaveinga ʻo e konga folofolá.
Feinga ke ʻiloʻi pea fekumi ke mahino ʻa e tokāteline mo e ngaahi tefitoʻi moʻoni ʻi he konga folofolá.
Fakakaukauʻi pe ko e fē ‘a e ngaahi tefitoʻi moʻoni mo e ngaahi tokāteline ‘oku mahuʻinga taha ke ako mo fakaʻaongaʻi ‘e he fānau akó.
Fakakaukauʻi ʻa e tuʻunga fakamamafa ‘e fai ki he konga takitaha ‘o e konga folofolá.
ʻĪmisi
Elder Richard G. Scott
“Fakapapauʻi e meʻa ʻoku mahuʻinga taha ke fakamuʻomuʻá, ʻo fakatatau ki he ngaahi meʻa ʻoku malava ʻe he fakafoʻituituí mo e ngaahi fie maʻu hoʻo fānau akó. Kapau ʻoku mahino ʻa e tefitoʻi moʻoni mahuʻingá, tukulotoʻi ia, pea ʻai ko e konga ʻo e tohi fakahinohino ʻa e fānau akó ki he kotoa ʻo ʻenau moʻuí, hili iá kuo ikunaʻi leva ʻa e kaveinga mahuʻinga tahá” (Richard G. Scott, “To Understand and Live Truth” [an evening with Elder Richard G. Scott, Feb. 4, 2005], 2–3, si.lds.org).
“Ko ia, pea hā leva?”
Hiki ha ngaahi meʻa te ke fakahoko ʻo makatuʻunga ʻi he ngaahi tefitoʻi moʻoni kuó ke ako ʻi he ʻaho ní, ke fakaʻosiʻaki ʻa e aʻusia fakaako ko ʻení.
