5:

Faaaoga Tatau Le Taimi

Lipoti:Faasoa faapuupuu i le vaega se faamanuiaga sa e maua i le vaiaso ua tuanai ona sa e usitai.

Mafaufau loloto:Aisea ua avea ai le taimi ma se tasi o meaalofa silisili a le Atua?

Maimoa:“The Gift of Time,” o loo maua i le srs.lds.org/videos. (Pe a le maua le vitio? Faitau le itulau 15.)

O Le Meaalofa o le Taimi

Afai e le mafai ona e matamata i le vitio, atofa atu matafaioi mai le tala ma faitau lenei tusiga faatasi.

Kofi: Talofa, Tuafafine Benkosi. O a mai oe?

Tuafafine Benkosi: O e manuia, Kofi?

Kofi: Oi, Tuafafine Benkosi. Ua ou pisi lava. E tatau ona ou galue ma auauna atu ma fesoasoani i lou aiga … sosoo ai foi ma lau lakapi faaamerika. E leai sa’u taimi!

Tuafafine B.: Kofi, o loo ia te oe le taimi uma o loo i ai.

Kofi: Ea?

Tuafafine B.: Lou atalii, ua tuuina mai e le Atua ia i tatou se meaalofa maoae—o lo tatou taimi. E tatau ona faaaoga lo tatou taimi e faia ai mea e sili ona taua.

Kofi: Ae faapefea, Tuafafine Benkosi? E te faia pea le tele o mea. Ua faamanuiaina oe i lou aiga, ma lau pisinisi. Ua e auauna atu ma faamanuia le toatele o tagata, e pei o au. Ou te le iloa pe faapefea ona faia.

Tuafafine B.: E te manao moni lava ia iloa? Afai e te nofo filemu ma faalogo, o le a ou tau atu ia te oe lau mealilo.

O taeao taitasi ou te ala ai e lei oso ae le la. E fai au lavalava ma fufulu ou mata ma lima.

Ou te faitau i tusitusiga paia. Ona ou faia lea o se lisi o mea e tatau ona faia i lena aso.

Ou te mafaufau i se tasi ou te auauna i ai. Ou te tatalo ia iloa le finagalo o le Atua. Ma ou te faalogo.

O nisi taimi o igoa ma foliga o tagata e oo mai i lou mafaufau. Ou te faaopoopoina i latou i lau lisi.

Kofi: O le ala lena e te iloa ai i taimi uma le tagata e manaomia lau auaunaga?

TUAFAFINE B.: Ioe, Kofi. Ma ou te tatalo mo le malosi ma le poto. Ou te tatalo o le a “faapaiaina [lau] galuega.” E tau mai lena mea i le 2 Nifae 32.

Ou te faafetai ia te Ia. Ou te folafola atu e faia le mea silisili. Ou te ole atu e Na te faia mea e le mafai ona ou faia.

Ona ou tilotilo lea i lau lisi. Ou te tuu se 1 i talaane o le mea aupito sili ona taua, ona sosoo ai lea o le 2.

Kofi: E faapefea ona e iloa mea e faamuamua?

Tuafafine B.: Ou te faalogo pe a ou tatalo! Ona ou alu lea ou te galue. Ou te tilotilo i le numera 1 ma taumafai e fai muamua, ona fai lea o le numera 2.

O nisi taimi e suia ai ni mea. E tau mai e le Agaga Paia ia te au e fai se isi mea. E lelei lena.

Ou te galue malosi, ae ou te maua le filemu. Ou te iloa o le a fesoasoani le Atua ia te au.

O lea la, faatasi ai ma lau lisi ma le Agaga, ou te faia le mea e taua, Kofi.

Kofi: E foliga mai e faigofie ma faigata i le taimi e tasi.

Tuafafine B.: E sao oe! Pe a iu ina ou sauni e moe, ou te tatalo. Ou te lipoti atu i le Tama Faalelagi. Ou te tau atu ia te Ia lou aso. Ou te faia ni fesili. Ou te fesili atu po o a mea e mafai ona sili atu ona ou faia. Ou te faalogo. E masani ona ou lagonaina Lona alofa. Ou te iloa e Na te faalautele mea ou te taumafai e fai. Ona ou maua lea o le filemu, Kofi, ma ou moe ai.

Kofi: Lelei lena mea, Mama Benkosi. Ou te manao i lenei filemu. Ou te manao e faaaoga lou taimi. Ou te manao ia sili atu ona ou galue ma auauna atu.

Toe foi i le itulau 14.

Talanoa: O le a se mea na e aoaoina mai ia Tuafafine Benkosi?

Faitau:Alema 34:32 ma le upu sii a Peresitene Polika Iaga (i le itu taumatau)

“Aua faauta, o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega.”

Alema 34:32

“O le taimi o mea uma o loo i le fogaeleele. … Afai e faaaoga ma le faautauta, o le a aumai ai mea e faaopoopo i lo outou ola filemu, talafeagai, ma le faamalieina. E ao ona tatou mafaufau i lenei mea, ma aua le toe nofonofo ma piilima, ma faamaimau taimi.”

Polika Iaga,i le Discourses of Brigham Young, sel. John A. Widtsoe (1954), 214

Gaoioiga

Laasaga 1: Faatasi ai ma se paga, faitau laasaga e lima e mafai ona e faia i aso taitasi e faaaoga ai ma le tatau lou taimi.

➊ Lisi ia Galuega	➋ Tatalo	➌ Seti Mea e Faamuamua	➍ Seti ia Sini, Galue	➎ Lipoti
I taeao taitasi, fai se lisi o galuega e fai. Faaopoopo igoa o tagata e auauna i ai.	Tatalo mo le taitaiga. Iloilo lau lisi o galuega. Faalogo. Tautino atu e te faia le mea silisili.	I luga o lau lisi o galuega, tuu se 1 i talaane o le mea aupito sili ona taua, se 2 i talaane o le isi mea e sosoo le taua, ma faaauau ai.	Faalogo i le Agaga. Seti ia sini. Galue malosi. Amata i le galuega e sili ona taua ma faasolosolo i lalo o le lisi.	I po taitasi, ia lipoti atu i le Tama Faalelagi i le tatalo. Fai ni fesili. Faalogo. Salamo. Lagona Lona alofa.

Laasaga 2: I luga o se isi fasi pepa, lisi au galuega. O ni galuega taua ia mo lau galuega, mo le aoga, mo le lotu, po o le auaunaga i le aiga—e le na o feau i aso taitasi. Tatalo e uiga i ai ma faamuamua lau lisi.

Laasaga 3: O taeao e tatau ona e faatulaga ni sini, faatino, ma lipoti pe na faapefea ona e faaaogaina lou taimi.

Tautino:Tautino atu e faia faatinoga nei i le aluga o le vaiaso. Tuu se togi i pusa pe a e faamaeaina galuega taitasi.

• Ia fai laasaga nei i aso uma ia sili atu ona faaaoga lelei ai lou taimi. Lipoti atu i po taitasi i le Tama Faalelagi i au tatalo.

• Faasoa mea na e aoaoina i le aso e uiga i le faaaogaina ma le tatau o lou taimi ma lou aiga poo uo.