10:

Faaali le Amio Sao

Lipoti:Faasoa faapuupuu ma le vaega se tali i le tatalo i le vaiaso ua tuanai.

Mafaufau loloto:Aisea e alofa ai le Alii ia i latou o i ai le “faamaoni o le loto”?

Maimoa:“What Shall a Man Give in Exchange for His Soul?” o loo maua i le srs.lds.org/videos. (Pe a le maua le vitio? Faitau le itulau 25.)

Se a Foi Se Mea e Avatu e le Tagata e Togiola A’i Lona Ola?

Afai e le mafai ona e matamata i le vitio, faitau le tusiga lenei.

mai le What Shall a Man Give in Exchange for His Soul

Elder Robert C. Gay: Na fesili le Faaola i Ona soo i le fesili lenei: “Se a foi se mea e avatu e le tagata e togiola a’i lona ola?”

O se fesili lenei na aoao mai e lo’u tama ou te mafaufau i ai ma le faaeteete i tausaga ua mavae. A o ou tuputupu a’e, sa tofi mai e o’u matua a’u feau e fai i le fale ma totogi mai se alauni ia te au mo lena galuega. Sa masani ona ou faaaogaina lena tupe, e sili laitiiti atu i le 50 sene i le vaiaso, ou te alu ai i le tifaga. O aso na o le tau o se pepa mo le tifaga sa na o le 25 sene mo se tamaitiiti e 11 tausaga. Ona totoe ai lea o le 25 sene e faaalu i lole laau, lea sa 5 sene i le lole. O se tifaga ma ni lole laau se lima! E leai se mea na sili atu nai lo lena mea.

Sa lelei mea uma seia oo ina atoa lo’u 12 tausaga. O le tutu ai i le laina i se tasi aoauli, sa ou iloa ane o le tau o le pepa tifaga mo se tagata e 12 tausaga le matua ua 35 sene, o lona uiga la, o le a leai isi lole laau e lua. O le le saunia lelei e fai lena ositaulaga, sa ou faapea ifo ai ia te a’u lava, “E tutusa lava ou foliga e pei o le vaiaso na te’a nei.” Na ou laalaa atu ma fai atu mo se pepa tifaga e 25-sene. Sa le’i emo le tali tupe ma sa ou faatauina au lole laau masani e lima ae le tolu.

O lo’u fiafia ai i lena mea na ausia, sa ou telea’i atu ai i le fale e faamatala i lo’u tama lo’u laki tele. A o o’u talatala atu i ai faamatalaga, sa leai sana tala na fai mai. Ina ua uma la’u faamatalaga, sa na ona tilotilo mai lava ia te a’u ma fai mai, “Atalii, e te faatauina atu lou agaga mo se limasene?” O ana upu sa tuia ai lo’u fatu e sefululua tausaga le matua. O se lesona sa le mafai ona galo ia te a’u.

(“Se a Foi Se Mea e Avatu e le Tagata e Togiola A’i Lona Ola?” Ensign po o le Liahona, Nov. 2012, 34)

Toe foi i le itulau 24.

Talanoa: O le a le uiga o le mauaina o le amio sao? O a nisi o auala laiti e tuuese ai e tagata o latou agaga ina ia maua ai mea o lenei olaga?

Faitau:Mataupu Faavae o le Faatuatua 1:13 ma le Iopu 27:5 (i le itu taumatau)

“Matou te talitonu ia faamaoni.”

Mataupu Faavae o le Faatuatua 1:13

“Seia oo lava i lou oti, ou te le faateaina lava la’u amio sa’o.”

Iopu 27:5

Gaoioiga

Na o oe lava, ia faatulaga oe lava i vaega nei.

Tuu se Numera i Luma o Aitema Taitasi e Faaali Mai ai le Faatele E Te Amioai ai i Lenei Auala.
1 = e le taitai lava, 2 = o nisi taimi, 3 = e masani lava, 4 = o taimi uma lava
___1. Ou te tausia uma au folafolaga, tautinoga, ma feagaiga.
___2. E matuai ou faamaoni lava i mea ou te tautala ai ma i faamaumauga ou te tausia.
___3. Ou te le faia ia faateleina le faaali mai o mea ia sili atu nai loo tulaga o loo i ai.
___4. Ou te toe faafoi atu mea uma ou te nonoina mai ma e le avea ni mea e le a au ia.
___5. Ou te faamaoni atoatoa i lou toalua i upu ma amioga.
___6. Ou te le faimamago lava, e tusa pe ou te iloa e le maua lava au.
___7. A ou maua se mea e le o au e anaina, ou te toe faafoi lena mea i le tagata e onaina.
___8. Ou te toe totogia i taimi uma tupe ou te nonoina mai.

Talanoa: Faitau Mosaea 4:28 (i le itu taumatau) ma le upu sii na saunia e Elder Joseph B. Wirthlin (i le itulau 25). Aisea ua avea ai le toe totogi o se aitalafu po o se pisinisi po o se nonoga tupe a le tamaitiiti aoga (e pei o se TFA) o se mataupu o le amio sao patino?

“Ma ou te manao ia outou manatua, soo se tasi o outou na te nonō se mea mai lē la te tuaoi e tatau ia te ia ona toe faafoi atu le mea na nonō mai e ia, e tusa ma lana ioega, a lē o lea ua e faia le agasala; ma atonu o le a e faia ai ia fai ai foi e lē lua te tuaoi le agasala.”

Mosaea 4:28

“O le amiosa’o o lona uiga o le faia o le mea sa’o ma lelei e tusa lava po o a taunuuga. O lona uiga o le amiotonu mai le taele o o tatou agaga, e le gata i a tatou amioga ae, o le mea sili atu ona taua, i o tatou mafaufauga ma i o tatou loto. … O sina pepelo laitiiti, o se sina faimamago, po o le faia o sina mea e le lelei e le taliaina e le Alii. … O le taui silisili o le amio sao o le mafutaga faifai pea o le Agaga Paia, … [o le o le a] taitai i tatou i mea uma tatou te fai.”

Joseph B. Wirthlin, “Personal Integrity,” Ensign, Me 1990, 30, 32, 33

Tautino:Tautino atu e faia faatinoga nei i le aluga o le vaiaso. Tuu se togi i pusa pe a e faamaeaina galuega taitasi.

• Faaleleia se tasi o eria e valu ua e iloiloina i luga.

• Faasoa mea na e aoaoina i le aso e uiga i le amio sao i lou aiga poo uo.