Mataupu Faavae ma Taiala mo le Sauniaina o Falelotu

“E saunia e le Ekalesia ia Falelotu ina ia mafai ai e i latou uma e ulufale mai ona:

Osia ma faafou feagaiga e ala i sauniga paia (tagai i le Mataupu Faavae ma Feagaiga 20:75; 59:9–12).
Potopoto faatasi (tagai i le 3 Nifae 18:22–23).
Tapuai ma tatalo faatasi (tagai i le Mosaea 18:25; Moronae 6:9).
Aoao atu ma auauna atu le tasi i le isi (tagai i le Moronae 6:4–5).
Auai i isi faaaogaaga ua faamaonia e pei ona faamatalaina i le [mataupu 35 o le Tusitaulima Aoao].

O se falelotu e mafai ona eseese fausaga e faalagolago i tulaga ma manaoga i le lotoifale” (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 35.1). O le a fesoasoani ia mataupu faavae ma taiala nei i taitai o eria ma siteki ina ia ausia lenei faamoemoega e tusa ai ma manaoga o tagata o le ekalesia i o latou eria.

Manatua: I le vaega lenei, o le faaupuga au peresitene o siteki e faatatau foi i au peresitene o itu.

Mataupu Faavae

Laugatasia ma Fetuunaiga

E eseese tulaga faaupufai, faaagafesootai, ma faaletamaoaiga e soifua ai tagata o le Ekalesia. E eseese foi ia uarota ma paranesi i le aofai ma punaoa faaletaitaiga. O nei tulaga ma isi tulaga e ono manaomia ai fetuunaiga i le lotoifale pe a saunia ni falelotu talafeagai.

E tatau i falelotu uma ona i ai ni vaega taua e lagolago ai ia aafiaga o tapuaiga ma polokalama a le Ekalesia. E aofia ai i nei vaega ia avanoa mo le potopotoga lautele, aoaoga, ma gaoioiga. O isi vaega talafeagai e ono aofia ai le faautautaga loloto a le Au Peresitene o le Eria. E faia e taitai o le eria ni faaiuga atamai pe a fetuuna’ia ni mamanu ua faamaonia o falelotu i manaoga ma tulaga i le lotoifale.

E mafai ona avea se fale o se tagata o le ekalesia, se falea’oga i le lotoifale po o se nofoaga autu o le alalafaga, avanoa e lisiina mai, avanoa e fauina pe faatauina e le Ekalesia, po o nisi filifiliga, ma falelotu e fua i tulaga i le lotoifale. O nei mea taitasi e mafai ona mafaufau i ai o ni vaifofo talafeagai mo se taimi umi. O le faaaogaina o tekinolosi, e pei o masini otiovisio, e mafai ona faafaigofie ai se fetuunaiga faapea.

Tuuina Atu o le Avanoa

E taumafai malosi ia taitai perisitua o le eria ma le lotoifale ina ia atoatoa le faaaogaina o falelotu ma ia matua faaeteete i le fautuaina atu o se avanoa faaopoopo. E mafai ona saunia ia avanoa o falelotu pe a faatoateleina le auai e silia ma le gafatia o fale o i ai nei.

Taugofie

“E saili e taitai o le eria ma le lotoifale ia tali e sili ona talafeagai faaletamaoaiga, umi le taimi, ma mafai ona faatumauina i manaoga o falelotu” E tatau ona aumai e le nofoaga avanoa fou se ata o le migao ma le mamalu, ia tauagafau, ma ia ogatasi ma le mamanu ma foliga vaaia o lona siosiomaga i le lotoifale. E tatau foi ona faaaoga ia mea faufale, ma masini, ma meaafale e maua i le lotoifale pe a talafeagai. O le faagasologa o le sauniaina ma le faagaoioiga o avanoa mo falelotu e tatau ona fesoasoani e faamalosia ai le ola-tutoatasi o le Ekalesia i le eria.

Taiala

Faaaogaaga ma le Latalata

A o le’i sauniaina ni avanoa faaopoopo mo falelotu, e faamautinoa e taitai o loo faaaogaina ia falelotu uma o loo avanoa i totonu o taimi o feoa’iga talafeagai i lo latou gafatia faamoemoeina. O falelotu o ni vaega o faleteuoloa a le Alii ma e tatau ona faaaogaina e aunoa ma le mafaufau i tuaoi o le siteki. E mafai ona fesoasoani le aufaigaluega o fanua ma fale a le eria e faailoa atu i taitai ia avanoa o falelotu o loo i ai.

E fuafua e eria taitasi pe fia le taimi e faimalaga ai i se falelotu e talafeagai mo tagata; e masani lava e le sili atu ma le 30 i le 45 minute mo le toatele o tagata o le ekalesia i se iunite. E mafai ona fetuunai e le Au Peresitene o le Eria le taimi manaomia e malaga ai mo o latou eria e fuafua i tulaga ma tau o femalagaaiga i le lotoifale.

Auai

E fuafua e eria taitasi le telē ma le ituaiga o falelotu e sauniaina e fua lea i le aofai o tagata o le ekalesia o loo auai ma filifiliga o falelotu o loo avanoa. Faatoa mafaufau lava taitai o le eria ma le lotoifale i le fauga o se fale pe a ua uma ona filima’oti pe fuafua o le tali sili lea ona talafeagai faaletamaoaiga, umi le taimi, ma e mafai ona faatumauina.

Faamaoni i le Totogiina o le Sefuluai

A o le’i fausiaina pe faatau mai se falelotu, e tatau ona tutusa pe sili atu le pasene o tagata matutua i le iunite o loo toaaga mai ma totogi atoa le sefuluai nai lo le 80 pasene o le pasene o le averesi o tagata matutua o loo toaaga mai ma o loo totogi atoa le sefuluai i le eria (pe i le atunuu pe afai e silia ma le tasi se atunuu i le eria) i le tausaga ua tuanai. E mafai foi e le Au Peresitene o le Eria ona faaaoga lenei tulaga manaomia o le faamaoni i le totogiina o le sefuluai i fale e lisi po o isi filifiliga mo falelotu.

Fuafuaga Autu o Falelotu

Ina ia mafai ona faamalosia le Ekalesia, e saunia e eria ia fuafuaga autu e umi le taimi a o le’i faia ni faaiuga e faaopoopo pe toe faatulagaina se avanoa mo falelotu. Latou te auina atu nei fuafuaga e tusa ai ma taimi faatulagaina ua uma ona faavaeina. O vaega taua i nei fuafuaga e aofia ai le faaaogaina o avanoa o loo i ai, valoia o le tuputupu ae, fuafuaina mamao o tulaga o fale, suiga i tuaoi o iunite, ma le taugofie. O manaoga ma fuafuaga o falelotu e iloiloina i le tulaga faale-eria ma aufono faamaopoopo.

Isi Iloiloga

Ofisa o Siteki ma Fonotaga

E masani lava, e saunia e eria ni ofisa o le siteki pe afai o loo fuafuaina e faatu se siteki ma e le ofi i se avanoa o i ai nei. I le tulaga e mafai ai, e faia ia konafesi a siteki, gaoioiga, ma fonotaga a aufono e faaaoga ai avanoa o loo i ai pe lisiina. E mafai ona faaaoga ia tekinolosi o otiovisio mo fonotaga a le siteki ina ia maua ai ni avanoa faaopoopo i tua atu o avanoa o loo i ai pe lisiina.

Fuafuaga Faaletausaga o Fale ma Fanua mo Falelotu

O avanoa mo falelotu e faatupeina e ala atu i le Fuafuaga Faaletausaga o Fale ma Fanua mo Falelotu. E auina atu e le Au Peresitene o le Eria a latou fuafuaga faaletausaga i le Komiti o Paketi ma Faatauga e ala atu i le Au Epikopo Pulefaamalumalu.

Ofisa Faaopoopo o Epikopo ma Failautusi

O taiala nei e tuuina atu ai i taitai i le lotoifale ia faamatalaga a o iloiloina ofisa faaopoopo o epikopo ma failautusi i falelotu o i ai nei.

Taiala:

E mafai e le aufaigaluega o le Pulega o Fale ma Fanua ona fesoasoani e faatautaia se suesuega o le faaaogaina ina ia malamalama atili ai i le faaaogaina ma le gafatia faamoemoeina o avanoa o loo i ai nei i falelotu.
A o le’i tuuina atu se avanoa faaopoopo mo ofisa, e faamautinoa e taitai ua iloiloina potuaoga uma o loo avanoa ma isi avanoa mo le faaliliuina i ofisa.
Fuafua e faasoaa’i avanoa o le ofisa o le failautusi (mo se faataitaiga, e lua iunite i le ofisa e tasi).
E tatau ona malupuipuia i totonu leo [soundproof] (fa’alo, puipui, ma le faitotoa) pe a manaomia e puipuia ai le lē faalauaiteleina. E mafai ona ausia lenei mea i le utuina o vaipuipui i momi po o faiga e taofi ai leo.

Mo nofoaga i totonu o le Iunaite Setete ma Kanata, ua sailia e tagata o le aufaigaluega o le Eria ma Fale ma Fanua o Falelotu ni nai ofisa ma tau fuafuaina mo fale o fuafuaga faatulagaina masani o i ai nei ma taimi ua tuanai.