Isi Faamatalaga e Faatatau i Fale ma Fanua o Falelotu

Galuega Tau Faatufugaga

O falelotu e tatau ona atagia mai ai se uiga faaalia o le faaaloalo mo Iesu Keriso ma molimau atu i le talitonuga o tagata o le ekalesia ia te Ia. O ata o loo faaalia ai Iesu Keriso e tatau ona tuu i vaega o le faapaologa o falelotu e fesoasoani e faaali atu ai lenei talitonuga tutotonu. O vaega o faapaologa e le tatau ona i ai ni mea faalavefau e pei o pusa tioata e faaali atu ai, o laupapa puletini, laulau, ma faailoga. O ata o loo faaalia ai Iesu Keriso, vaaiga faatusi paia, ma le talafaasolopito o le Ekalesia e talafeagai mo alasavali ma potuaoga.

E filifili e le peresitene o le siteki po o isi taitai i le lotoifale ua tofia ia atatusi faatufugaga mai se lisi o atatusi faatufugaga ua faamaonia e le Ekalesia mo falelotu. E mafai e le pule o fale ma fanua ona faasoa atu le lisi o atatusi faatufugaga i taitai pe a manaomia se atatusi fou. O atatusi faatufugaga mai isi puna e masani lava e le faatagaina. O talosaga mo tuusaunoaga e tatau ona faia e ala atu i le pule o fale ma fanua.

O atatusi faatufugaga, e le mafai ona tuuina i totonu o le falesa pe tuu latalata i le vai papatiso. O faatagata, maafaamanatu, o mea e manatua ai, ata tusi, ma ata faafaatusa e le faatagaina i totonu po o fafo o le fale. O lenei aiaiga faavae e le faatatau i galuega o faatufugaga ua leva ona faaalia mo le tele o tausaga.

Masini Fai Kopi

O faatauga o masini fai kopi e fuafua e ala i taiala a le ofisa o le eria, lea e fua i manaoga o iunite i le lotoifale. O le vaega o le pulega o fale ma fanua e nafa ma le faatauina mai o masini fai kopi mo ofisa o le siteki ma nofoaga tutotonu o mea e faaaoga i falelotu.

Pe a manaomia ona siaki pe lipea, e faafesootai e taitai i le lotoifale le kamupani tautua pe afai o loo i ai se konekarate o le auaunaga. A le o lea, e faafesootai e taitai i le lotoifale le vaega o pulega o fale ma fanua, o e faatulagaina ma totogia le galuega.

O sapalai e pei o pepa ma le vaitusi o le masini fai kopi e faatauina mai e iunite i le lotoifale, e faaaoga ai paketi alauni a a latou iunite.

Teuteuga

O teuteuga mo gaoioiga o aso malolo, ‘aiga o faaipoipoga, ma isi mea tutupu faapena e mafai ona tuuina mo se taimi le tumau i totonu po o fafo o se fale. O teuteuga e ese mai i teufugalaau e le mafai ona tuuina i totonu o le falesa i le taimi o sauniga faamanatuga. E le fautuaina ni teuteuga i faapaologa ina ia tausisia ai pea se taulaiga i le migao mo le Faaola.

O teuteuga e tatau ona tauagafau ma lē taugata. E le tatau ona avea ai ma se mea e lamatia i le afi. E tatau ona mulimulitaia i taimi uma ia faatonuga ma tulafono mo mu ma le saogalemu i le lotoifale.

Masini mo Fesootaiga mo Faalavelave Faafuasei

E le faatauina pe taliaina e uarota ma siteki se telefoni faasatelite po o se masini leitio na foai mai mo le faaaogaina i faalavelave faafuasei pe mo le faapipiina i totonu o se falelotu. Ua uunaia taitai ina ia iloaina tagata taitoatasi atonu ua i ai a latou lava masini e fesoasoani ai i manaoga faapitoa tau fesootaiga a le uarota ma le siteki.

Masini mo Peteriaka

I tulaga e seasea ona tupu, atonu e le maua ai e se peteriaka se komepiuta (mo se faataitaiga, atonu e leai sana ia lava komepiuta pe mafai foi ona faaaoga le komepiuta i totonu o le ofisa o le failautusi i se falelotu). Afai o lea, e mafai e se peresitene o le siteki ona faamaonia le faatauina mai o se komepiuta ma fai le talosaga e ala i le faafesootaia o le pule o fale ma fanua. E saunia e siteki ia masini pu’eleo mo peteriaka e faaaoga ai tupe o le paketi alauni a le iunite i le lotoifale (LUBA).

Totogi

E le totogia e tagata o le au paia se tupe po o ni tupe e muai totogi mo le faaaogaina o falelotu po o fale ma fanua o le Ekalesia mo ‘aiga o faaipoipoga, maliu, faatasiga a aiga, mafutaga a faifeautalai, faafiafiaga konaseti ua faamaoniaina, po o ni gaoioiga faapena.

Fu’a

E mafai ona sisi le fu‘a a le atunuu i luga o fanua o le Ekalesia pe afai e mulimulitaia ia taiala i le lotoifale. E mafai ona tuu le fu‘a i totonu o fale o le Ekalesia i taimi faapitoa. O le lotonuu e le manaomia ai le tuuina pea lava pea o le fu‘a a le atunuu i nofoaga o tapuaiga.

A’oga i Fale ma le Vaaiga o Tamaiti i le Ao

E ui ina fautuaina malosi e le Ekalesia ia aoaoga, ae e le faaaogaina falelotu e fai ma falea’oga mo tamaiti e aooga i le fale, po o ni fale e vaai ai tamaiti i le ao pe fai ai foi ni gaoioiga mo tamaiti e aooga i le fale.

O le usitaia o lenei aiaiga faavae o le a siitia ai le saogalemu ma aloese ai le Ekalesia mai noataga tau lafoga.

Masini Satelite ma Vitio

O masini satelite ma vitio a le Ekalesia ua na o tulaga le suetupe po o faamoemoega e faatatau i le Ekalesia e faaaogaina ai, e pei ona faatagaina e le au peresitene o le siteki po o le au epikopo. E tatau ona loka maluina lelei masini uma pe a le faaaogaina. E le mafai ona aveesea mai le falelotu mo le faaaogaina i le aiga po o le tagata lava ia.

Faaaogaaga o Meatotino e Faaaoga Faatasi

O le faaaoga o meatotino a le Ekalesia e faaaoga faatasi e manaomia ai le faatagaga, e aofia ai le mafai ona faaaoga meatotino a le Ekalesia, pa, aia faatapulaa e faaaoga ai, faafitauli i tuaoi, ma le aia e sopo atu i fanua o le Ekalesia.

Faailoga

Afai e i ai ni fesili a se peresitene o le siteki e uiga i faailoga mo fale o le Ekalesia, na te faafesootaia le pule o fale ma fanua.

Masini Salu Kiona

O masini totino a le Ekalesia e alu i le afi e saluese ai le kiona, e tuuina atu i falelotu taitasi i nofoaga e manaomia ai. E mafai e tagata o le au paia ona faaaoga lenei masini e kilia ai auala savali o le falelotu. E faatapulaa e taitai nei tofiga i tagata matutua, ma faatuatuaina ma faatonu i latou e faaaoga lapataiga talafeagai mo le saogalemu.

Fanua Avanoa a le Ekalesia

O fanua a le Ekalesia o loo avanoa e le mafai ona faaaogaina pe nofoia e aunoa ma se faatagaga mai le Peresitene o le Eria. I nisi o tulaga, e mafai ona faaaoga e tagata o le au paia i le lotoifale se fanua avanoa a le Ekalesia mo ni togalaau mo se taimi e le tumau. Faafesootai le pule o fale ma fanua i le lotoifale i ni fesili po o le talosagaina o se faatagaga.