Tolauapiga mo Gaoioiga Faafiafia

Pulega o Meatotino mo Gaoioiga Faafiafia

O fale ma fanua a le Ekalesia mo gaoioiga faafiafia e tuuina atu ai se nofoaga atofaina i fafo mo gaoioiga a le Ekalesia. Ua atiina ae e tusa ai ma vaega autu ma fuafuaga faatulagaina ua faavaeina e le Ekalesia. E lua ituaiga o fanua mo gaoioiga faafiafia:

1. Fanua mo tolauapiga mo gaoioiga faafiafia

2. Local Unit Recreation Center (LURC) [Nofoaga Autu o Gaoioiga Faafiafia a le Iunite i le Lotoifale]

O le faamoemoega autu o fanua mo gaoioiga faafiafia, ia fesoasoani lea i tamaitai talavou ia lagona le Agaga a’o fiafia ai i gaoioiga faafiafia saogalemu ma le lelei. E mafai foi e siteki, uarota, aiga o tagata o le Ekalesia, ma a latou malo ona faaaoga nei tolauapiga mo gaoioiga faamaoniaina. E le tatau ona faaagaga ia fanua o tolauapiga mo gaoioiga faafiafia a le Ekalesia mo ni faalapotopotoga i le lotoifale, taumafaiga faapisinisi, ma tagata taitoatasi o isi faatuatuaga. Ae peitai, e mafai e tagata o le Ekalesia ona valaaulia a latou uo mai isi faatuatuaga latou te auai faatasi ma i latou.

E mafai ona aoina mai ni totogi mo le faaaogaina o se tolauapiga mo gaoioiga faafiafia e totogi ai le tau o le tausiga, lipea, po o mea e faaleleia. O tolauapiga uma mo gaoioiga faafiafia e tatau ona faaaogaina le polokalama a le Ekalesia e taofi ai avanoa i luga o le initoneti i le camping.ChurchofJesusChrist.org. O tupe uma e totogi e tatau ona aoina ma e na’o luga o le polokalama [initoneti] e fai ai mo tupe feaveai mai iunite-i-iunite mo iunite e fai ni avanoa mo le faaaogaina ae o kata tupe a le tagata lava ia e totogi ai avanoa mo le faaaogaina e le tagata lava ia.

O se LURC e masani ona tu i totonu o tuaoi o le siteki ma ua fuafua mo le faaaogaina autu e uarota i totonu o lena siteki po o siteki lata ane. O se faataitaiga masani lava, o se vaega o se faapaologa tele po o se se fanua faaopoopo mo gaoioiga e fai i fafo. E le tatau i siteki ona aoina ni tupe mo le faaaogaaga mai tagata o le Ekalesia pe a faaaoga se LURC.

E mafai e siteki ona talosaga mo le mauaina ma le atinaeina o se LURC fou po o se fanua mo tolauapiga mo gaoioiga faafiafia pe afai e i ai se manaoga alagatatau. E mafai e peresitene o siteki ona faafesootai le pule o fale ma fanua po o le ofisa o le eria, o le e mafai ona faaaofia ai le talosaga mo le iloiloga o le fuafuaga faaletausaga lea o le a auina atu i le Au Peresitene o le Eria.

Peitai, a’o le’i auina atu se talosaga, e fautuaina iunite i le lotoifale e faaaoga fale ma fanua mo tagata lautele ma ni fale e umia patino e tagata o loo avanoa. I nofoaga o loo i ai fale ma fanua totino a le Ekalesia i totonu o se mamao talafeagai i le salafa o tuaoi o siteki, o nei fale ma fanua e tatau ona faaaogaina uma a’o le’i talosagaina ni fale ma fanua faaopoopo.

O le anotusi lenei e fitoitonu i fanua mo gaoioiga faafiafia.

Fale ma Fanua Fou mo Tolauapiga mo Gaoioiga Faafiafia

O talosaga mo tupe a le Ekalesia e faatau mai ai pe atiina ae ai se tolauapiga mo gaoioiga faafiafia e auina atu e auala atu i le faatonu o mataupu faaletino. E faatoa talosagaina tupe lautele a le Ekalesia e faaaoga ai le faagasologa o le fuafuaga faaletausaga mo le tolauapiga mo gaoioiga faafiafia pe a ausia ia agavaa ma tulaga faatonuina o le atinaega. Faafesootai le pule o fale ma fanua e amata ai le faagasologa mo le iloiloga.

O Siteki e Le’i Atofaina i se Fale ma se Fanua mo Tolauapiga mo Gaoioiga Faafiafia

O le Fitugafulu Eria (pe a tofia ai e le Au Peresitene o le Eria) e tofia siteki i se tolauapiga totino a le Ekalesia i le eria e faavae i manaoga o le siteki ma le latalata ma le faaaogaaga o fale ma fanua faapena. E tatau foi ona iloiloina le faaaoga o tolauapiga mo tagata lautele ma tolauapiga e umia patino e tagata.

O siteki e le o i ai se tofiga o le tolauapiga mo gaoioiga faafiafia e mafai ona faia ni avanoa e faaaoga ai mai soo se tolauapiga mo gaoioiga faafiafia e faaaoga ai le polokalama initoneti o le faiga o avanoa mo le faaaogaina, ma mulimuli i le Faasologa o Avanoa na Muamua Fai mo le faaaogaina o loo lomiaina i luga o le uepisaite.

Faatupeina o Mea e Faaleleia mo Fale ma Fanua o Loo i Ai mo Tolauapiga mo Gaoioiga Faafiafia

E tofia se pule o fale ma fanua i tolauapiga taitasi ma e i ai le tiutetauave tuusa’o mo fale ma fanua uma o tolauapiga. O tupe mo tolauapiga o se vaega o le faagasologa o le fuafuaga faaletausaga ma e aofia ai tupe mo mea e sui, faaleleia, faagaoioiga, ma le tausiga. O tupe faaalu mo gaoioiga ma mea e faaaoga o le polokalama o le tolauapiga e totogi e le tolauapiga e ala i tupe a tagata e faaaogaina (tagai i le Tupe a le Siteki mo Tolauapiga).

Faagaoioiga ma le Tausiga

O fanua ma fale mo tolauapiga e asiasia e le itiiti ifo ma le tai ono masina e iloilo ai manaoga faifai pea mo le tausiga ma atugaluga mo le saogalemu. O tolauapiga ma eria o le vaomatua e tatau foi ona asiasia pe a mavae suiga iloga taitasi o le tau, e pei o matagi malolosi, timuga mamafa, po o le kiona.

I le Iunaite Setete ma Kanata, o punaoa mo asiasiga ma le tausiga o loo maua i le faia o se talosaga i le pule o fale ma fanua o loo galulue ma vaega o Auaunaga o Punaoa Faalenatura i le Matagaluega o Fale ma Fanua o Falelotu.

O tolauapiga mo gaoioiga faafiafia i fanua ma fale e lisiina e faaleleia ma tausia i se tulaga itiiti se’i iloga ua faia se maliega e lisiina mo se taimi umi, e mafai ona faamaonia ai tupe faaalu autu.

Faatauina Atu po o le Lisiina o Tolauapiga mo Gaoioiga Faafiafia o Loo i Ai

O au peresitene o siteki o e finagalo e faatau atu pe lisi atu se fanua o i ai o le tolauapiga mo gaoioiga faafiafia e tatau ona faafesootai atu le pule o fale ma fanua po o le ofisa o le eria. E le faatagaina ia siteki ona faia soo se feutagaiga ma soo se tino faalemalo po o sui faapisinisi e faatatau i le mauaina mai, lisiina atu, po o le lafoaia o se fale ma fanua o tolauapiga mo gaoioiga faafiafia.

Pulega

O le Fitugafulu Eria (pe a tofiaina ai e le Au Peresitene o le Eria) e tofia se peresitene o le siteki e fai ma sui e vaaia le pulega o le fale ma fanua mo tolauapiga. E tatau ona nofo le peresitene o le siteki ua fai ma sui i le eria lava lea faale-ekalesia lea e tu ai le fale ma le fanua.

Tulaga e Tuusaunoa ai Mai le Totogiina o Lafoga

E tatau ona faamamaluina le tulaga o le tuusaunoa mai lafoga o fale ma fanua o tolauapiga mo gaoioiga faafiafia. O fale ma fanua e le tatau ona faaaogaina mo faamoemoega faapisinisi pe faapolokiki, pe ia maua ai foi se tupe maua e sili atu nai lo le mea e manaomia mo le faagaoioia, faaleleia, po o lipea. Afai e le tuuina atu e le malo i le lotoifale lea o loo tu ai le fale ma le fanua o tolauapiga mo gaoioiga faafiafia ia le tulaga o le tuusaunoa i lafoga, o le a totogiina e le laumua o le Ekalesia ia lafoga.

Tupe a le Siteki mo Tolauapiga

I le Iunaite Setete ma Kanata, o le siteki e fai ma sui e tuuina atu tupe mo le tolauapiga e faaaoga ai se polokalama e ese mai e teu ai tupe a iunite o le Ekalesia (CUBS) o se teugatupe e faatulaga e ala i le Auaunaga Tau Tupe i le laumua o le Ekalesia. E le faia lava e siteki ua fai ma sui ni a latou lava tusi siaki po o ni teugatupe tuusa’o ma faletupe. O le teugatupe o le CUBS ua faaaogaina e totogi ai mea e manaomia mo le polokalama o le tolauapiga mo gaoioiga ma mea e faaaoga. O tupe uma e totogi e tagata e faaaogaina ma iloiloga e tatau ona teuina i le teugatupe o le CUBS. I eria e ese mai le Iunaite Setete ma Kanata, e faafesootai e le peresitene o le siteki ua fai ma sui ia le tagata mo mea tautupe i le eria mo faatonuga i le faia o ni teugatupe.

O le suetusi a le siteki ua fai ma sui e sueina tusi o le faagaoioiga o le tolauapiga e faaaoga ai le fomu o loo i ai nei o le Suegatusi o le Tolauapiga mo Gaoioiga Faafiafia o loo maua i le Area Audit Resource Library.

E iloilo toto’a ma faamaonia e le peresitene o le siteki ua fai ma sui ia tupe maua ma tupe faaalu uma. Afai e maua e se fale ma fanua o tolauapiga mo gaoioiga faafiafia se tupe maua mai punaoa faalenatura, e logo e le siteki ua fai ma sui le pule o fale ma fanua o le o loo galulue faatasi ma le Auaunaga o Punaoa Faalenatura i le Matagaluega o Fale ma Fanua o Falelotu (i le Iunaite Setete ma Kanata) po o le ofisa o le eria (e ese mai le Iunaite Setete ma Kanata). O tupe maua uma faapena e teuina i tupe lautele a le Ekalesia.

E mafai ona fesoasoani atu tagata o le Ekalesia e totogi le tau mo le tausiga, lipea po o galuega faaleleia o fale ma fanua o le tolauapiga mo gaoioiga faafiafia e ala i le foai atu i le leipa, mea e faaaoga, po o le faaaoga o masini mo nai galuega lipea laiti lava. O galuega uma e toe suia ma toe faaleleia e faia e le pule o fale ma fanua e faaaoga ai na’o konekarate ua muai faamaoniaina atoa ma tupe na faamaoniaina i le fuafuaga faaletausaga. E le tatau i taitai o le Ekalesia ona faaaoga ni suegatupe faapitoa e totogi ai mea e faatatau i mea e faaleleia atili ai le tolauapiga mo gaoioiga faafiafia (tagai i le Faatupeina o Mea e Faaleleia mo Tolauapiga o Loo I Ai Nei mo Gaoioiga Faafiafia (Funding Improvements for Existing Recreational Camps).

Sapalai o Vai Inu

O vaiinu i luga o fanua uma o le Ekalesia e sau mai la latou sapalai mai vaieli po o vaipuna patino (e ese mai vai a le malo po o le lotoifale) e fauina, faagaoioia, ma tausia e tusa ai ma tulafono faalemalo ma tulaga faatonuina ua faavaeina a le Ekalesia. O le pule o fale ma fanua e nafa mo le mautinoa o le vai ua faaaogaina ma sueina mo le tulaga lelei o le vai ia ogatasi ma tulaga manaomia faatulafonoina ma faiga sili ona lelei o le puleaina.

Masini ma Taavale

O le Matagaluega o Fale ma Fanua o Falelotu ma le Ekalesia e le masani ona tuuina atu pe tausia masini po o taavale mo tolauapiga mo gaoioiga faafiafia. Afai e manaomia ni masini faapitoa, e lisiina mai i tupe lava a le siteki, saunia e tagata o le siteki, pe faatauina e faaaoga ai paketi alauni a iunite i le lotoifale ma tupe totogi a e o loo faaaogaina.

Teufanua

Afai e manaomia se teufanua tumau se toatasi pe sili atu, e mafai e peresitene o siteki ua fai ma sui ona valaau atu i faifeau faamisiona mo auaunaga a le Ekalesia e faatumu lena avanoa. O nei faifeau faamisiona mo auaunaga a le Ekalesia e vaetofia e lo latou epikopo.

Mo nisi faamatalaga mo le valaauina o faifeau faamisiona mo auaunaga a le Ekalesia, tagai i le Tusitaulima Aoao, 24.7.