គោលការណ៍ និងសេចក្តីណែនាំសម្រាប់ការដាក់ផែនការសាលាប្រជុំ

« សាសនាចក្រផ្ដល់សាលាប្រជុំដើម្បីឲ្យមនុស្សទាំងអស់ដែលចូលមកអាច ៖

ចុះ និងរំឭកសេចក្ដីសញ្ញាតាមរយៈពិធីបរិសុទ្ធដ៏ពិសិដ្ឋទាំងឡាយ ( សូមមើល គោលលទ្ធិ និង សេចក្ដីសញ្ញា ២០:៧៥; ៥៩:៩–១២ ) ។
ជួបជុំគ្នា ( សូមមើល នីហ្វៃទី៣ ១៨:២២–២៣ ) ។
ថ្វាយបង្គំ និងអធិស្ឋានជាមួយគ្នា ( សូមមើល ម៉ូសាយ ១៨:២៥; មរ៉ូណៃ ៦:៩ ) ។
បង្រៀន និងផ្ដល់ការងារបម្រើដល់គ្នាទៅវិញទៅមក ( សូមមើល មរ៉ូណៃ ៦:៤–៥ ) ។
ចូលរួមនៅក្នុងការប្រើប្រាស់ដែលបានអនុម័តដទៃទៀត ដូចបានពិពណ៌នានៅក្នុង ជំពូកទី ៣៥ នៃ ក្បួនខ្នាតទូទៅ ។

សាលាប្រជុំអាចមានទម្រង់ខុសៗគ្នាអាស្រ័យលើស្ថានភាព និងតម្រូវការក្នុងមូលដ្ឋាន » ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៥.១ ) ។

« ដើម្បីពង្រឹងដល់សាសនាចក្រ តំបន់ទាំងឡាយត្រូវរៀបចំផែនការមេសម្រាប់រយៈពេលវែងពីមុនធ្វើការសម្រេចចិត្ត ដើម្បីបន្ថែម ឬរៀបចំកន្លែងសាលាប្រជុំជាថ្មី » ( គោលការណ៍ និងសេចក្តីណែនាំអំពីការផ្តល់សាលាប្រជុំ [ ឆ្នាំ ២០២១ ] នៅលើគេហទំព័រ ChurchofJesusChrist.org ) ។ គោលការណ៍ និងសេចក្តីណែនាំខាងក្រោមនេះនឹងជួយដល់បុគ្គលិកប្រចាំតំបន់ នៅពេលពួកគេគាំទ្រដល់ថ្នាក់ដឹកនាំបព្វជិតភាពក្នុងតំបន់ និងស្ដេកឲ្យសម្រេចបានគោលបំណងនេះ ។

គោលការណ៍ទាំងឡាយ

ការពង្រឹងអង្គភាពទាំងឡាយ

ការពង្រឹងសាសនាចក្រតាមរយៈការកែសម្រួលទំហំ និងការកំណត់ព្រំប្រទល់អង្គភាពគឺស្ថិតនៅក្រោមការទទួលខុសត្រូវរបស់ថ្នាក់ដឹកនាំបព្វជិតភាព ដូចដែលបានណែនាំដោយគណៈប្រធានតំបន់ ។ ការផ្លាស់ប្ដូរព្រំប្រទល់អង្គភាពក៏អាចកែលម្អដល់ការប្រើប្រាស់សាលាប្រជុំផងដែរ ។

ការប្រើប្រាស់

« មុននឹងផ្តល់កន្លែងសាលាប្រជុំបន្ថែមទៀត ថ្នាក់ដឹកនាំត្រូវប្រាកដថា សាលាប្រជុំដែលកំពុងប្រើប្រាស់ដែលមានចម្ងាយធ្វើដំណើរសមហេតុសមផល គឺត្រូវបានប្រើប្រាស់តាមចំណុះរបស់វា » ( គោលការណ៍ និងសេចក្តីណែនាំអំពីការផ្តល់សាលាប្រជុំ ) ។ ចំណុះសាលាប្រជុំគិតដល់ទាំងចំនួនសមាជិក ( ចំណុះចូលរួម ) និងចំនួនអង្គភាព ( ចំណុះអង្គភាព ) ដែលសាលាប្រជុំមួយអាចទទួលយកបាន ។ នៅក្នុងតំបន់ដែលមានការប្ដូរសមាជិកភាព នោះសូមធ្វើការពិចារណាពីការប្រើប្រាស់ឡើងវិញ ( ការបោះបង់ ឬការផ្លាស់ប្ដូរមុខងារប្រើប្រាស់ ) នៃសាលាប្រជុំ និងអគារដែលមិនសូវប្រើប្រាស់ខ្លាំង ។

ការប៉ាន់ស្មានទុកជាមុនដែលសមរម្យ

ចំនួនកំណើនសមាជិកភាព និងវត្តមានដែលប៉ាន់ស្មានទុកជាមុនគឺសំខាន់ណាស់ ដើម្បីដាក់ផែនការមេសម្រាប់សាលាប្រជុំឲ្យមានប្រសិទ្ធភាព និងភាពសមស្រប ។ ការទស្សន៍ទាយពីចំនួនសមាជិកភាព និងវត្តមានគួរតែគណនាទៅតាមវិធីសាស្ដ្រដែលបានអនុម័ត ។

យុទ្ធសាស្ដ្រទីតាំង

អគារប្រជុំទាំងឡាយគួរតែដាក់នៅក្នុងទីតាំងមួយដែលសមរម្យបំផុត ដើម្បីផ្គត់ផ្គង់ដល់ចំនួនសមាជិកឲ្យបានច្រើនប្រកបដោយប្រសិទ្ធភាព ដោយមិនគិតពីព្រំប្រទល់ស្ដេកឡើយ ។ ការយល់ដឹងពីនិន្នាការកំណើនសមាជិក គន្លងនៃការផ្លាស់ប្ដូរទីលំនៅ និងមធ្យាបាយធ្វើដំណើរដែលមានស្រាប់ គឺចាំបាច់ណាស់ដើម្បីដៅយុទ្ធសាស្ដ្រដាក់ទីតាំងសាលាប្រជុំ ។

ការមានលទ្ធភាព

« ថ្នាក់ដឹកនាំតំបន់ និងមូលដ្ឋានស្វែងរកដំណោះស្រាយនានានៃតម្រូវការសាលាប្រជុំ ដែលកាត់បន្ថយការចំណាយ មានលក្ខណៈសមរម្យ អាចប្រើប្រាស់បានរយៈពេលយូរ និងអាចទទួលយកបាន » ( គោលការណ៍ និងសេចក្តីណែនាំអំពីការផ្តល់សាលាប្រជុំ ) ។

តំបន់ទាំងឡាយគួរតែពិចារណាពីជម្រើសដែលមានទាំងអស់ ដែលសមស្របទៅនឹងលក្ខខណ្ឌក្នុងមូលដ្ឋាន ។ ដំណោះស្រាយសមស្របអាចរួមមានផ្ទះរបស់សមាជិក សាលារៀនក្នុងមូលដ្ឋាន ឬមជ្ឈមណ្ឌលក្នុងសហគមន៍ កន្លែងជួល កន្លែងដែលសាសនាចក្រសាងសង់ បានជាវ ឬកែប្រែមុខងារប្រើប្រាស់ ឬជម្រើសផ្សេងៗទៀត ។

សេចក្តីណែនាំទាំងឡាយ

ថ្នាក់ដឹកនាំបព្វជិតភាពគួរតែពិចារណាដូចខាងក្រោមនេះ នៅពេលកំណត់ថាតើវួដចំនួនប៉ុន្មានដែលគួរដាក់នៅក្នុងសាលាប្រជុំមួយ ៖

កាលវិភាគការប្រជុំនៅថ្ងៃអាទិត្យចាប់ផ្ដើមនៅម៉ោងសមរម្យមួយ ហើយបញ្ចប់ត្រឹមពេលរសៀល ដើម្បីឲ្យក្រុមគ្រួសារទាំងអស់មានពេលសិក្សាដំណឹងល្អនៅតាមគេហដ្ឋាន ។
សមាជិកទាំងឡាយរស់នៅក្នុងតំបន់ដែលចំណាយពេលសមរម្យក្នុងការធ្វើដំណើរមកកាន់សាលាប្រជុំ ។
ប្រសិនបើចាំបាច់ ការកែសម្រួលសាលាប្រជុំគឺតិចតួច និងមានតម្លៃទាប ។

តំបន់ទាំងឡាយអនុវត្តតាមគោលការណ៍នៃការដាក់ផែនការសាលាប្រជុំ ហើយរៀបចំផែនការមេសម្រាប់រយៈពេលប្រាំឆ្នាំសម្រាប់សាលាប្រជុំ ពីមុនធ្វើការសម្រេចចិត្តដើម្បីបន្ថែម ឬរៀបចំកន្លែងសាលាប្រជុំជាថ្មី ។

ការដាក់ផែនការមេកម្រិតពហុស្ដេក ឬក្រុមប្រឹក្សាសម្របសម្រួល

ផែនការមេអាចបង្កើតឡើងបាននៅកម្រិតពហុស្ដេក ឬក្រុមប្រឹក្សាសម្របសម្រួល នៅពេល ៖

ស្ដេកជាច្រើនមានឱកាសប្រើប្រាស់អគារដែលមានស្រាប់ ឬអគារដែលស្នើសុំជាមួយគ្នាបាន ។
ការកំណត់ព្រំប្រទល់ឡើងវិញអាចជះឥទ្ធិពលលើពហុស្ដេក ។
កំណើនសមាជិក និងការប្រើប្រាស់ដែលបានប៉ាន់ស្មាន បង្ហាញពីតម្រូវការសម្រាប់រៀបចំកន្លែងថ្មី ។
ការប្ដូរសមាជិកភាពបានធ្វើឲ្យមានកន្លែងនៅចន្លោះ ដែលអាចប្រើប្រាស់ឡើងវិញបាន ។

អ្នកគ្រប់គ្រងដាក់ផែនការប្រចាំតំបន់ធ្វើការជាមួយនឹងពួកចិតសិបនាក់ប្រចាំតំបន់ និងប្រធានស្ដេកដែលពាក់ព័ន្ធ ដើម្បីរៀបចំផ្ដល់អនុសាសន៍សូមការអនុម័តពីគណៈប្រធានតំបន់ ។

ការដាក់ផែនការនៅកម្រិតស្ដេក

នៅពេលពិចារណាពីតម្រូវការដើម្បីបន្ថែម ឬរៀបចំកន្លែងសាលាប្រជុំជាថ្មី ដែលមិនមាននៅក្នុងផែនការមេនៃពហុស្ដេក ឬក្រុមប្រឹក្សាសម្របសម្រួល នោះអ្នកគ្រប់គ្រងដាក់ផែនការប្រចាំតំបន់ធ្វើការជាមួយនឹងប្រធានស្ដេកដែលពាក់ព័ន្ធ ដើម្បីរៀបចំផ្ដល់អនុសាសន៍សូមការអនុម័តពីគណៈប្រធានតំបន់ ។

ការប៉ាន់ស្មានពីការអនុម័ត និងការផ្ដល់មូលនិធិ

ការប៉ាន់ស្មានពីកន្លែងថ្មី ឬកន្លែងប្រើប្រាស់ឡើងវិញ ដូចបានកំណត់នៅក្នុងដំណើរការដាក់ផែនការ អាចត្រូវបានដាក់ជូនទុកជាផ្នែកមួយនៃផែនការប្រចាំឆ្នាំ ឬតាមរយៈដំណើរការអនុម័តបន្ថែម ។

តួនាទី និងការទទួលខុសត្រូវ

គណៈប្រធានតំបន់

គណៈប្រធានតំបន់ផ្ដល់ការណែនាំអំពីយុទ្ធសាស្ដ្រ ការសម្រេចចិត្ត និងលទ្ធផលដែលចង់បានស្ដីពីការដាក់ផែនការសម្រាប់សាលាប្រជុំ ។ គណៈប្រធានតំបន់ប្រាប់ពីកង្វល់ជាក់លាក់ ធ្វើការណែនាំពួកចិតសិបនាក់អំពីគោលលទ្ធិ និងគោលការណ៍ ព្រមទាំងផ្ដល់ការអនុម័តលើអាទិភាពផែនការមេ និងអនុសាសន៍ចុងក្រោយ ។

ពួកចិតសិបនាក់ប្រចាំតំបន់ និងថ្នាក់ដឹកនាំបព្វជិតភាពក្នុងមូលដ្ឋាន

ពួកចិតសិបនាក់ប្រចាំតំបន់បង្រៀនគោលលទ្ធិ និងគោលការណ៍ដល់ប្រធានស្ដេក និងប្រធានបេសកកម្ម ព្រមទាំងប្រឹក្សាជាមួយបុគ្គលិកប្រចាំតំបន់ផងដែរ ។ ពួកចិតសិបនាក់ប្រចាំតំបន់ ប្រធានស្ដេក និងប្រធានបេសកកម្មពិនិត្យមើលឡើងវិញ និងផ្ដល់មតិកែលម្អលើផែនការមេសម្រាប់សាលាប្រជុំ ។ ពួកលោកដាក់ស្នើការផ្លាស់ប្ដូរព្រំប្រទល់អង្គភាពនានាទៅកាន់គណៈប្រធានតំបន់ដើម្បីឲ្យធ្វើការពិនិត្យមើលឡើងវិញ ។

នាយកផ្នែកកិច្ចការអាណាចក្រ ( ន.ក.អ. ) និងបុគ្គលិកប្រចាំតំបន់

នាយកផ្នែកកិច្ចការអាណាចក្រ ( ន.ក.អ. ) និងបុគ្គលិកប្រចាំតំបន់ផ្ដល់ទិន្នន័យ របាយការណ៍ ការវិភាគ និងអនុសាសន៍ត្រឹមត្រូវដល់ថ្នាក់ដឹកនាំកិច្ចការសាសនា ។ ដោយស្របតាមការដឹកនាំរបស់គណៈប្រធានតំបន់ និងកម្មវិធីសាលាប្រជុំប្រចាំតំបន់ នោះអ្នកគ្រប់គ្រងការដាក់ផែនការប្រចាំតំបន់រៀបចំផែនការមេរយៈពេលប្រាំឆ្នាំ ដែលរួមមានចំណុចពិភាក្សាមកពីក្រុមប្រឹក្សាសម្របសម្រួល ពហុស្ដេក និងការដាក់ផែនការនៅកម្រិតស្ដេក ។ អ្នកគ្រប់គ្រងផែនការសហការគ្នាជាមួយនឹងថ្នាក់ដឹកនាំបព្វជិតភាពដើម្បីធ្វើការសម្រេចចិត្តដោយផ្អែកលើព័ត៌មានដែលមាន និងផ្ដល់អនុសាសន៍ចុងក្រោយ ។

កំណត់ចំណាំ ៖ ពាក្យ គណៈប្រធានស្ដេក ក៏សំដៅទៅលើគណៈប្រធានមណ្ឌលផងដែរ ។