PAGLIKAY UG PAGPAKIGBATOK SA KANGITNGIT
Sama nga ang ubang mga impluwensya mopuno sa imong kalag sa kahayag, ang uban magdala og kangitngit. Kini nga kangitngit sagad moabot sa hinay-hinay nga paagi, halos dili mamatikdan, kon ikaw dili magmatngon.
Ang pornograpiya mahimong makagunob. Ang pagpasagad niini mohikaw kanimo sa panag-uban sa Espiritu Santo. Mopangitngit kini sa imong hunahuna. Mopahuyang ug sa ngadto-ngadto moguba sa kinabuhi sa kaminyoon ug pamilya. Kadtong magpasagad niini sa dili madugay mobati og nalayo sa Dios, dili takus, ug dili madawat sa Dios, sa ilang kaugalingon, ug sa uban. Mahimo sila nga mga tawo nga kaugalingon lang ang gihunahuna ug dili na kaayo makatagamtam og maayo ug matarung nga mga pakiglambigit sa uban. Usikan nila ang mahinungdanong panahon ug kwarta, mobutang diha sa peligro ang ilang estado sa Simbahan, ug mopakunhod sa ilang abilidad sa pagserbisyo sa uban.
Ang ubang mga materyal nga dili kaayo klaro nga pornograpik mahimong mopuno gihapon sa imong kinabuhi sa kangitngit ug mohikaw kanimo sa espirituhanong kusog. Mga programa sa telebisyon, mga litrato, mga salida sa sine, mga kanta, ug mga libro sagad motagad sa pagkadili putli ug pagkamaluibon nga komon, madanihon, ug kataw-anan. Likayi ang bisan unsa nga mobugaw sa Espiritu Santo gikan sa imong kinabuhi.
Maayo nga makalingaw nga mga kalihokan motabang kanimo ug sa imong pamilya nga magkasuod sa usag usa ug sa Ginoo. Limitahi ang inyong panahon sa pagtan-aw og TV, pagdula og mga video games, ug paggamit sa mga computer para nga maglingaw-lingaw. Paghimo og mga sumbanan alang sa inyong pag-apil niini nga mga kalihokan, sama sa pagpugong sa paggamit sa Internet alang sa tino nga mga katuyoan lamang.
Samtang ikaw modeterminar kon unsay ilakip sa imong kinabuhi, pangutana og mga pangutana sama sa:
-
Makadapit ba kini sa Espiritu Santo?
-
Mopabati ba kini kanako nga nalig-on o nabayaw?
-
Nahisubay ba kini sa mga sumbanan sa ebanghelyo? (Ikomparar kini sa ika-trese nga artikulo sa hugot nga pagtuo.)
-
Giunsa paghatag og bili ang kaputli, pagkamaunongon, ug ang mga pamilya?
Kadtong magpasiugda og pornograpiya agresibo sa ilang pagpangita og bag-ong mga tiggamit, ilabi na sa Internet. Sagad sila mogamit og malinglahon nga mga paagi. Mahimong makasugat ka usahay og pornograpik nga mga materyal nga wala tuyoa. Kon mahitabo kini kanimo, pahawa gilayon gikan niini. Pakigbatoki kini nga kangitngit. Ayaw pagtugot nga mahimo kini nga kabahin sa imong kinabuhi. Ayaw kini padayona. Makapili ka sa pagpugong sa imong mga hunahuna ug ipunting ngadto sa laing butang.