Lesona 19 Anomea mo le Sauniuniga o le Vasega: Fesoasoani i le Alii i le Togiolaina o e ua Maliliu
“Lesona 19 Anomea mo le Sauniuniga o le Vasega: Fesoasoani i le Alii i le Togiolaina o e ua Maliliu,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 19 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
Aiga, saunia e Caitlin Connolly
Lesona 19 Anomea mo Sauniuniga o le Vasega
Fesoasoani i le Alii i le Togiolaina o e ua Maliliu
O a ni mea e te iloa e uiga i ou tuaa? Pe e te iloaina ni mea se tele pe itiiti, e tāua le manatua o i latou o ni tagata moni. O i latou taitoatasi o se afafine po o se atalii faapelepele a le Tama Faalelagi. Mafaufau pe toafia ou tuaa ma isi i le talafaasolopito atoa na soifua ma maliliu e aunoa ma se malamalama ia Iesu Keriso pe sa le’i maua foi le avanoa e maua ai sauniga o le talalelei. A o e suesue, mafaufau pe na faapefea ona fesoasoani le galuega a le Faaola i le lalolagi o agaga e faalautele atu faamanuiaga o le talalelei i tagata uma. Mafaufau loloto i mea e mafai ona e faia e fesoasoani ai i le Faaola i le laveaiina o ē ua maliliu.
Vaega 1
O le a se mea o aoao mai ia i tatou e le galuega a Iesu Keriso i le lalolagi o agaga e uiga ia te Ia?
Na saunoa mai Elder Spencer J. Condie, a o avea ma se tasi o Fitugafulu:
Ata
Elder Spencer J. Condie
O mea moni e uiga i le maliu ma le Toetu o Iesu o loo taliaina e faatuatuaga Kerisiano o ni talitonuga faavae. Ae ui i lea, o le mea na faia e le agaga faavavau o Iesu ina ua maea Lona maliu ma a o le’i oo i Lona Toetu, o se mea lilo i tagata uma se’i vagana ai le Au Paia o Aso e Gata Ai. (“O Le Asiasiga a le Faaola i le Lalolagi o Agaga,” Liahona, Iulai 2003, 32)
O le lalolagi o agaga o se mealilo mo le toatele ona e itiiti lava se ta’ua i le Tusi Paia. I le taimi o Lana galuega i le olaga nei, sa valoia ai e Iesu Keriso e faapea “e faalogo e ua oti i le siufofoga o le Alo o le Atua: e ola foi i latou o e faalogo” (Ioane 5:25; tagai foi fuaiupu 24, 26–28). A o i ai i luga o le satauro, sa fetalai atu Iesu i le faomea ua salamo i ona autafa, “E moni, ou te fai atu ia te oe, O le aso ta te faatasi ai ma oe i le parataiso [po o le lalolagi o agaga]” (Luka 23:43; tagai foi Gospel Topics, “Paradise,” topics.ChurchofJesusChrist.org). Na aoao mulimuli ane Peteru ina ua mavae le maliu o Iesu, sa Ia “maliu atu ai ma talai atu ai i agaga i le falepuipui” (1 Peteru 3:19; 4:6).
I le 1918, sa mafaufau loloto ai Peresitene Iosefa F. Samita i nei upu mai ia Peteru ma mafaufau loloto i le Togiola a le Faaola ina ua ia maua se faaaliga ofoofogia o le lalolagi o agaga (tagai Mataupu Faavae ma Feagaiga 138:1–11).
I le taimi o lea faaaliga, sa taumanatunatu ai Peresitene Iosefa F. Samita pe mafai faapefea e le Faaola ona aoao atu le talalelei i agaga uma o e ua maliliu talu ai sa i ai o Ia iina mo se taimi puupuu lava (tagai Mataupu Faavae ma Feagaiga 138:25–28).
Ata
aikona, suesue
Suesue e Sauniuni ai mo le Vasega
Faitau le Mataupu Faavae ma Feagaiga 138:29-35, ma vaavaai pe na faapefea e le Faaola ona saunia le ala mo Lana talalelei ina ia folafola atu ai i tagata uma i le falepuipui o agaga.
O le a se mea atonu ua tatou aoaoina e uiga i le Faaola mai le faaaliga a Peresitene Samita? E faapefea ona e faamatalaina le tāua o lenei mea ofoofogia na tupu i se tasi e le’i faalogo i ai?
Vaega 2
E mafai faapefea ona ou fesoasoani i le Alii i le togiolaina o e ua maliliu?
Ona o lo La’ua alofa e lē i’u ma le alofa mutimutivale sa saunia ai e le Tama Faalelagi ma Iesu Keriso se ala mo tagata uma e maua ai sauniga e tāua mo le faaeaga—papatisoga, faamauga, faauuga i le Perisitua Mekisateko (mo alii), faaeega paia o le malumalu, ma le faamauga o le faaipoipoga. Pe a vaai atu i ai mai se vaaiga e faavavau, ua tatou vaai ai i soo o le Faaola i itu uma e lua o le veli o galulue faatasi ma Ia mo le faaolataga o fanau uma a le Tama Faalelagi. O le galuega o le faaolataga mo e ua maliliu o se avanoa paia e mafai ona tatou auai i le taimi nei ma mo o tatou olaga atoa. O se tasi o auala e mafai ona tatou fesoasoani ai i lenei galuega o le ala lea i sauniga sui, lea e na o malumalu e mafai ona faatinoina ai.
E ala mai i Ana perofeta, ua valaaulia ai e le Alii tagata uma o le Ekalesia e saunia o latou lava talafaasolopito o aiga ma faailoa mai i latou o e manaomia sauniga faaola. Na aoao mai Peresitene Russell M. Nelson:
Ata
Peresitene Russell M. Nelson
O le faia mo isi o mea e lē mafai ona latou faia mo i latou lava, tatou te faataitai ai i le mamanu a le Faaola, o lē na faia le Togiola e faamanuia ai olaga o isi tagata. (“Sauniuniga a le Tagata Lava Ia mo Faamanuiaga o le Malumalu,” Liahona, Me 2001, 33).
Na saunoa Elder D. Todd Christofferson o le Korama a Aposetolo e Toasefululua e uiga i le galuega sui e faatinoina i malumalu:
Ata
Elder D. Todd Christofferson
O a tatou taumafaiga e fai ma sui o e ua maliliu e fai ma molimau mamana o Iesu Keriso o le Faaola paia o tagata uma. O Lona alofa tunoa ma folafolaga e faapea foi ona oo atu ia i latou uma o ē e lē mauaina o Ia i lenei olaga. (“O le Faaolaina o e Oti ma le Molimau ia Iesu,” Liahona, Ian. 2001, 10).
Na faailoa mai e Elder Dale G. Renlund o le Korama a Aposetolo e Toasefululua se lisi o faamanuiaga “ofoofogia” e mafai ona tatou maua pe a tatou auai i galuega o talafaasolopito o aiga ma le malumalu:
Ata
Elder Dale G. Renlund
Faateleina le malamalama i le Faaola ma Lana taulaga togiola;
Faateleina le tosinaga a le Agaga Paia e lagona ai le malosiaga ma le taitaiga mo tatou lava olaga;
Faateleina le faatuatua, ina ia mafai ona faalolotoina ma tumau le liuaina i le Faaola;
Faateleina le tomai ma le faaosofia e aoao ai ma salamo ona o le malamalama po o ai i tatou, o fea tatou te o mai ai, ma se vaaiga manino i le mea tatou te o i ai;
Faateleina le faaleleia, faapaiaina, ma le puleaina o faatosinaga i o tatou loto;
Faateleina le olioli e ala i se tomai faateleina e lagona ai le alofa o le Alii;
Faateleina faamanuiaga faaleaiga, e tusa lava po o a o tatou tulaga faaleaiga i le taimi nei, tuanai, po o le lumanai pe o le a foi le lē atoatoa e ono i ai o tatou gafa faaleaiga;
Faateleina le alofa ma le talisapaia mo tuaa ma tagata soifua o aiga, ina ia tatou lē toe lagonaina le tuuatoatasi;
Faateleina le mana e iloatino ai vaega e manaomia ona faamaloloina ma o lea la, faatasi ai ma le fesoasoaniga a le Alii, e auauna atu ai i isi;
Faateleina le puipuiga mai faaosoosoga ma faatosinaga malolosi a le fili; ma le
Faateleina fesoasoaniga e foia ai ni loto atuatuvale, nutimomoia pe popole ma toe faamaloloina ai e manunua.
Afai na e tatalo mo soo se tasi o nei faamanuiaga, ia e auai i talafaasolopito o aiga ma galuega o le malumalu. A e faia lea mea, o le a taliina mai au tatalo. A faatinoina sauniga e fai ma sui o e ua maliliu, o le a faamaloloina fanau a le Atua i luga o le fogaeleele. (“Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 47.
O le a se mea e mafai ona e faia i le aso e auai faatasi ai ma le Alii i galuega o le malumalu ma talafaasolopito o aiga? Mafaufau e talanoa i se tagata o le aiga e uiga i ou tuaa, galue i le faasino igoa, faamasani atili i le FamilySearch, po o le alu i le malumalu ma faatino se sauniga mo se tasi ua maliu.
